LONGESO 57
Yika Watamba Kulinga Nyi Walinga Shili Yinene?
Chipwe ngwe wakuzanga chinji Yehova ni kusa tachi hanga wehuke yuma yize muyimuvwisa yikola ku mbunge, nihindu mashimbu amwe mulinga amwe tupalia. Alioze, shili yimwe yapwa yinene kuhiana yikwo. (1 A-Korindu 6:9, 10) Nyi ngwe mulinga shili yinene, yiwuluka ngwe Yehova nihindu machikuzanga. Iye kanazange kukukonekena ni kukukwasa.
1. Yika twatamba kulinga mba Yehova atukonekene?
Atu waze azanga Yehova kakulinyenga nyi manyingika ngwo, kalinga shili. Alioze kakuwana utakamiso ha chilakenyo cha Yehova kuli atu jenyi ngwenyi: “Chipwe milonga yenu yinachili nge, kumuyipwa yitoma ngwe neve.” (Izaia 1:18) Nyi twalikonyeka ni mbunge yetu yeswe, Yehova matukonekena. Kuchi twatamba kulikonyeka? Twatamba kulinyenga ha yize twalinga, kwecha kulinga yuma yacho, ni kuliumba kuli Yehova hanga atukonekene. Twatamba nawa kusa tachi hanga twalumune manyonga hanji ndako jize jatutwala ku shili ni kusa tachi hanga tutwame kulita ni shimbi jipema ja Yehova.—Tanga Izaia 55:6, 7.
2. Kuchi Yehova akuzachisa makulwana a mu chikungulwila hanga atukwase muze mutuvulumuna?
Nyi twalinga shili yinene, Yehova kakutulweza hanga twite ukwaso kuli “makulwana a chikungulwila.” (Tanga Tiangu 5:14, 15.) Makulwana a mu chikungulwila kakuzanga Yehova ni mapanga jenyi. O kakwalongesa chize atamba kutukwasa hanga tupwe nawa ni usepa upema ni Yehova.—A-Ngalashia 6:1.
Kuchi makulwana akutukwasa nyi twalinga shili yinene? Makulwana aali hanji atatu mahasa kuzachisa shimbi ja mu Mbimbiliya hanga atukwase kumona ngwo, chuma chize twalinga hi chipema ko. Mahasa nawa kutwaha yiyulo yipema ni kutukolweza hanga tuchine kuhilukila nawa shili yacho. Mahasa kukwata chiyulo cha kutukanjisa kulinga yuma yimwe mu chikungulwila ha shimbu limwe ndo muze usepa wetu ni Yehova muupwa kanawa. Nyi mutu malinga shili yinene mba kalikonyekene, makulwana mamuchiza mu chikungulwila hanga achine kupiangula atu akwo.
NYINGIKA NAWA
Kunyingika kanawa Yehova, muchitukwasa muze mutulinga shili yinene.
3. Kutayiza shili yetu chakutukwasa kupwa masepa ja Yehova
Shili yeswayo mutulinga yakukwata hali Yehova, kashika twatamba kumulweza shili yize twalinga. Tanga Samu 32:1-5, mba nushimutwine chihula chino:
Mumu liaka kutwatambile kuswekela Yehova shili yetu?
Muze mutulweza Yehova shili yetu mba mutufupa ukwaso wa makulwana a mu chikungulwila, mutulivwa kanawa. Tala CHINEMA, mba nushimutwine chihula chinahateho.
Kulita ni chinema, kuchi makulwana akwashile Canon kuhiluka kuli Yehova?
Twatamba kuhanjika umwenemwene kuli makulwana a mu chikungulwila, mumu hanaatongola hanga atukwase. Tanga Tiangu 5:16, mba nushimutwine chihula chino:
Kuchi kuhanjika umwenemwene kuli makulwana a mu chikungulwila chakwashiwisa yuma hanga ahase kutukwasa?
Tayiza shili ye ni kuhanjika umwenemwene kuli makulwana a mu chikungulwila. Chikwo nawa tayiza ukwaso wa Yehova
4. Yehova kakusolwela yivulumunyi keke
Nyi mutu yoze walinga shili yinene malituna kukaula shimbi ja Yehova, kakumuchiza mu chikungulwila. Kashika kutwatambile nawa kulikata hanji kuhanjika nenyi. Tanga 1 A-Korindu 5:6, 11, mba nushimutwine chihula chino:
Kuchi kulikata ni mutu yoze walinga shili chakuhona kulikonyeka, chakupihisa chikungulwila ngwe chizechene futunwiso yakufutunwisa mbolo?
Ngwe chizechene Yehova akusolwela yivulumunyi keke, makulwana no kakwimbulula keke ya Yehova ni kukwasa waze achijile mu chikungulwila. Atu anji waze achijile, hanahiluka mu chikungulwila. Mumu liaka? Mumu fumbo lize akutambula chipwe ngwe liapwa likalu, nihindu liakwakwasa kumona ngwo, yuma yize alingile yapwile yipi. (Samu 141:5)
Shina jila yize Yehova akufumbilamo yivulumunyi yakusolola ngwo iye kapwa mutu mwashi, mukwa-keke ni zango?
5. Yehova kakutukonekena muze twakulikonyeka
Yesu katele chimwe chishima chize chakutukwasa kunyingika chize Yehova akwivwa muze mutu yoze wavulumuna malikonyeka. Tanga Luka 15:1-7, mba nushimutwine chihula chino:
Yika chino chinakulongesa hakutwala kuli Yehova?
Tanga Ezekiele 33:11, mba nushimutwine chihula chino:
Yuma yika yilemu yize twatamba kulinga hanga tusolole ngwetu twalikonyeka?
Yehova kakulihulumba chinji hali tuvumbi twenyi, chizechene ngwe kafunga akulinga hali mapanga jenyi
ATU AMWE KAKWAMBA NGWO: “Nakwivwa woma wa kulweza makulwana a mu chikungulwila shili yize nalinga, neka manguchiza mu chikungulwila.”
Kuchi muhasa kukwasa mutu yoze wakunyonga chocho?
YIZE WALILONGESA
Nyi twalinga shili yinene, alioze twalikonyeka ni kusa tachi hanga tuchine kuhilukila yuma yacho, Yehova matukonekena.
Kuhitulula
Mumu liaka twatamba kulweza shili yetu kuli Yehova?
Yika twatamba kulinga mba atukonekene shili yetu?
Mumu liaka twatamba kufupa ukwaso wa makulwana a mu chikungulwila nyi ngwe twalinga shili yinene?
HENGWOLA NAWA
Tala chize umwe lunga amwene keke ya Yehova ngwe chize yinasonewa mu mukanda wa Izaia 1:18.
Kuchi makulwana a mu chikungulwila akweseka kukwasa atu waze alinga shili yinene?
Nyonga ha zango ni keke yize akusolwela yivulumunyi waze kalikonyekene.
Ha lusango wakwamba ngwo, “Nafupile Kuhiluka Kuli Yehova,” tala mumu liaka umwe lunga wahichikile umwenemwene amwene ngwenyi, Yehova kanamusanyika nawa.
“Mbimbiliya Yakwalumuna Mwono wa Atu” (Kaposhi wa Kutalila 1 wa Abril, 2012)