KUCHI MUTUHASA KUKUMBA KOLE?

2 | Kanda Ufwetesa Upi Ha Upi

Yize Mbimbiliya Yakulongesa:

“Kanda nufwetesa niumwe yipi ha yipi. . . . Nyi kachi muchihasa kupwa nikulita ni tachi jenu, pwenu ni sambukila kuli atu eswe. Kanda nulikalila milonga yenwene, . . . mumu chinasonewa ngwo, Kukala mulonga chili kuli yami; yami kumungukafwetesa, chocho anambe Mwene.”—A-ROMA 12:17-19.

Yize Chisoneko chino Chinalumbunuka:

Hi chipi ko kwivwa uli nyi umwe matulinga yuma yipi, alioze Zambi keshi kuzanga muze twakufwetesa upi ha upi. Iye kanazange hanga tupwe yihomboloji, mumu kanalakenya ngwenyi, kumahwisa uhenge weswe.—Samu 37:7, 10.

Yize Muhasa Kulinga:

Nyi atu yihenge mafwetesa upi ha upi, chino muchatwala kulivwila kole. Kashika nyi umwe mutu mahanjika hanji kulinga yuma yize muyikulemeka ku mbunge, kanda ufwetesa upi ha upi. Eseka kulihumikiza ni kukumbulula mujila yize muyineha sambukila. Ha mashimbu amwe muchipema kulengulula yuma yize akulinga. (Yishima 19:11) Alioze nyi mumona ngwe chinapu chikalu kulengulula, muhasa kufupa kusopa mulonga wacho. Chakutalilaho, nyi umwe mutu makuvulumuna, muhasa kusakula kutwala mulonga wacho kuli mapulisha hanji kuli atu akwo waze ali ni poko ya kuyula.

Kufwetesa upi ha upi chakupihisa mwono

Mba nyi kwasolokele jila yipema yakuhwishila mulonga ni sambukila? Nyi hanji kuwamwene nawa yize mulinga hanga uhwise kapinda wacho ni sambukila? Kanda ufwetesa upi ha upi. Nyi walinga chino muhasa kwokesa yuma. Alioze nyi mwehuka kufwetesa upi ha upi, chino muchikukwasa kukumba kole. Muhasa kulilongesa kufuliela ngwo, Zambi makahwisa milonga yeswe. Mbimbiliya yinambe ngwo, “mufuliele iye, mba makulingilacho.”—Samu 37:3-5.

Sango ja ku Mwono—ADRIÁN

Kakumbile Manyonga a Kufwetesa Upi ha Upi

Muze apwile kanuke, Adrián kapwile mukwa kulilamba-lamba ni akwo, mumu lia chino yapwa ni nyonga lia kufwetesa upi ha upi. Iye yamba ngwenyi: “Ha yisuho yinji napwile ni kuzachisa mata muze te nakulilamba ni akwetu, nawa kanji-kanji te kakungulemeka ni kungwechelela mu tapalo hanga ngufwilemo.”

Adrián kaputukile kulilongesa Mbimbiliya muze apwile ni miaka 16. Yamba nawa ngwenyi: “Muze te ngunanungu ni kulilongesa Mbimbiliya, yingumona ulemu wa kwalumuna utu wami.” Iye te kanafupiwa kwehuka kole ni kwecha kulambana. Iye kayukile chinji ha yize alilongesele mu mukanda wa A-Roma 12:17-19, uze unahanjika hakutwala ku kukala. Yamba ngwenyi: “Hinatayiza ngwami, Yehova kumaneha ululi mu jila yalita ni ha mashimbu alita. Hakehe-hakehe yingwecha mwono upi uze napwile nawo.”

Tangwa limwe ha ufuku, chimwe chizavu cha akweze yichilukukila Adrián. Yoze wapwile ni kusongwela chizavu chacho yakololoka ngwenyi: “Likalile!” Adrián yamba ngwenyi: “Nazangile kulilamba no.” Alioze shimbu te alilambe no, iye yalemba kuli Yehova ni kukatuka ha chihela chacho.

Adrián yanunga ni kwamba ngwenyi: “Mukwachako yingulitakana ni kasongo wa chizavu chacho. Muze namumwene, yingwivwa uli unji nawa yinguzanga kufwetesa upi ha upi, hazehene yingulemba ni kwita kuli Yehova hanga angukwase kulihumikiza. Namwene ngwe ni iye te mevwa uli, alioze yeza haze te nguli yamba ngwenyi: ‘Ngukonekene ha yize yalingiwanga zau ufuku. Yami ngunazange kupwa ngwe yena. Ngunazange kulilongesa Mbimbiliya.’ Ngunakawahilila ha chize nahashile kulihumikiza! Mumu lia chino yinguputuka kulilongesa nenyi Mbimbiliya.”