“Kumukapwa Hamwe ni Yami mu Paraisu”

1. Shimbu Yesu te kanda achifwa, yika alwezele kuli chingulungulu yoze wapwile sali lienyi? (Luka 23:39-43)

YESU ni yingulungulu aali waze apwile sali lienyi te kanandoyoka ha mutondo wa lamba. (Luka 23:32, 33) Yingulungulu wano, chitangu kahanjikile yuma yipi hali Yesu, chino chinasolola ngwo, o kakapwile tumbaji twenyi. (Mateu 27:44; Marku 15:32) Umwe wa kuli ayo yalumuna nyonga lienyi, chocho yamba ngwenyi: “Mwene, ngwiwuluke kama muze muwiza mu Wanangana we.” Yesu yakumbulula ngwenyi: “Pundu, ngwami, Musono uno kumukapwa hamwe ni yami mu Paraisu.” (Tanga Luka 23:39-43.) Kukushi niyimwe yize yinasolola ngwo, chingulungulu wacho katayile sango jize Yesu apwile ni kwambujola ngwo, “Wanangana wa malilu” unakundama. Yesu kakambile ha shimbu nilimwe ngwenyi, lunga wacho te manjila mu Wanangana wa malilu. (Mateu 4:17) Yesu te kanahanjika ha Parayisu yize muyikapwa hano hashi. Kuchi tunachinyingika?

2. Yika yinasolola ngwo chingulungulu yoze walikonyekene kapwile Ka-Yunda?

² Chingulungulu yoze walikonyekene kota kapwile Ka-Yunda. Iye yalweza mukwo ngwenyi: “Yena kushi woma chipwe wa Zambi, nyi? Se uli mu uhiso umuwika.” (Luka 23:40) A-Yunda kapwile ni kuwayila Zambi umuwika, alioze akwa-mavungu te kakuwayila tuzambi anji. (Kutuhu. 20:2, 3; 1 Kori. 8:5, 6) Nyi lunga wacho kakapwile Ka-Yunda kachi kambile ngwenyi: “Yena kushi woma wa tuzambi, nyi?” Chikwo nawa, Yesu kakamutumine kuli akwa-mavungu, alioze kuli “mapanga a ku zuwo lia Izalele; waze anatoko.” (Mateu 15:24) Amu apwile Ka-Yunda lunga wacho kanyingikine ngwenyi, Zambi kalakenyene A-Izalele ngwo makahindwisa afu. Maliji waze ambile kasolwele ngwo, Zambi te mahindwisa Yesu hanga ayule mu Wanangana Wenyi. Kota lunga wacho neye kapwile ni kutalatala ngwo, Zambi te mamuhindwisa.

3. Yika kota chingulungulu anyongene muze Yesu ahanjikile ha Paraisu? Lumbununa. (Uputukilo 2:15)

³ Amu apwile Ka-Yunda, chingulungulu wacho kanyingikine lusango wa Alama ni Eva ni paraisu muze Yehova aasele. Kashika muze evwile maliji a Yesu kota kanyongene ha Paraisu yimwe yipema hano hashi.—Tanga Uputukilo 2:15.

4. Maliji waze Yesu alwezele chingulungulu, kakutukolweza kunyonga ha yika?

⁴ Maliji waze Yesu alwezele chingulungulu, katamba kutukolweza kunyonga ha chize mwono muukapwa mu Paraisu. Mutuhasa kulilongesa yimwe hakutwala ku Paraisu ya sambukila yize yapwile mu Wanangana wa Solomone. Mumu liaka? Mumu Mbimbiliya yinambe ngwo, Yesu kahiana Solomone. Kashika mutuhasa kushimbwila ngwetu, Mwanangana wetu Yesu Kristu ni Akwa-Kristu akuwayisa, makalinga yuma yakukomwesa mu Paraisu hano hashi. (Mateu 12:42) “Mapanga akwo” waze ali ni kutalatala cha kutwama ku miaka yeswe no kanazange kunyingika yize malinga hanga akatwame mu Paraisu.—Yoa. 10:16.

KUCHI MWONO MUUKAPWA MU PARAISU?

5. Mwono wa mutapu uka wakushimbwila kupwa nawo mu Paraisu?

⁵ Kunyonga lie, kuchi mwono muukapwa mu Paraisu? Hanji wakunyonga ha chimwe chihela chipema ngwe munda wa Endene. (Uputu. 2:7-9) Hanji wakwiwuluka maliji a Mika anambe ngwo: “Mutu mweswe matwama mushi lia mutondo wenyi wa uva hanji mushi lia mutondo wenyi wa makuyu.” (Mika 4:3, 4) Chikwo nawa, hanji wakwiwuluka jimwe versu ja mu Mbimbiliya jize jakwamba ngwo, hano hashi muhakazala too ni kulia. (Samu 72:16; Iza. 65:21, 22) Kota wakunyonga uli mu chimwe chihela chipema unali kulia chinji, ni kwivwa fuji yize yinakatuka ku yitemo ni mitondo. Hanji nawa wakunyonga uli hamwe ni asoko ni masepa je ni waze ahindwisa mu ufwe nunawahilila. Yuma yino yeswe twamba, hi yilota ko. Kwamba pundu, muyikalingiwa hano hashi. Chikwo nawa, mu Paraisu mutukalinga milimo yipema.

6. Milimo ya mutapu uka mutukalinga mu Paraisu? (Tala chizulie.)

⁶ Yehova katutangile ni uhashi wa kukalakala ni kuwahilila ha yize mutulinga. (Chilu. 2:24) Ha Kanunu ka Miaka ya Kuyula cha Yesu mutukalinga milimo yinji. Waze eswe makapalika ha luyinda munene ni tununu twa waze makahindwisa makafupiwa kulia, mazalo ni chihela haze makatwama. Chino chinalumbunuka ngwo, mutukakalakala chinji, milimo yacho muyikatwaha uwahililo. Yehova kalwezele Alama ni Eva hanga alime ni kutohesa munda wa Endene, ni yetu nawa mutukapwa ni uhashi wa kukalakala ni kupwisa hashi heswe Paraisu. Tunyongenu nawa ha uwahililo uze mutukapwa nawo ha kulongesa tununu a tununu twa atu waze makahindwisa akanyingike Yehova ni upale wenyi, ni kukwasa tuvumbi ashishika a ku shakulu hanga anyingike yuma yize yalingiwile hanyima lia kufwa cho!

7. Shindakenyo yika mutuhasa kupwa nayo, mumu liaka?

⁷ Mutuhasa kupwa ni shindakenyo ngwetu, mu Paraisu mutukapwa ni mwono upema, wa sambukila, ni yuma yeswe muyikapwa yakululieka kanawa. Mumu liaka? Mumu Yehova hanatwehe chilweza cha chize mwono muukapwa mu Paraisu kupalikila mu Wanangana wa Solomone.

KUYULA CHA SOLOMENE CHINASOLOLA CHIZE PARAISU MUYIKAPWA

8. Kuchi maliji a Samu 37:10, 11, 29 amanunukine? (Tala “Yihula ya Waze Akutanga Mikanda Yetu.”)

⁸ Mwanangana Ndawichi kasonekene hakutwala ku chize mwono muukapwa kulutwe, muze mwanangana wa mana, washishika mayula. (Tanga Samu 37:10, 11, 29.) Kanji-kanji twakutangila akwetu Samu 37:11 muze twakuhanjika hakutwala ku Paraisu. Chino chinalite mumu Yesu katongwele maliji jacho ha Longeso lia ha Mulundu ni kusolola ngwo, maliji jacho te mamanunuka kulutwe. (Mateu 5:5) Alioze maliji a Ndawichi kasolwele nawa chize mwono ha matangwa ja Mwanangana Solomone te muupwa. Muze Solomone apwile ni kuyula, atu ja Zambi kapwile ni sambukila mu Izalele mu chifuchi chize te mwokela “yamwa ni wuchi.” Zambi kambile ngwenyi: “Nyi munwenda nikulita ni yiyulo yami . . . , Mungunwaha uhwimino mu chifuchi. Munupomba kanawa, niumwe manuvwisa woma” wakuhi. (Levi 20:24; 26:3, 6) Yino ye yalingiwile muze Solomone apwile ni kuyula mu Izalele. (1 Sango 22:9; 29:26-28) Yehova kambile nawa ngwenyi, atu waze akuwayila tuzambi eka te kechi kapwako nawa. (Samu 37:10) Kashika, maliji a Samu 37:10, 11, 29 kamanunukine, chikwo nawa kumakamanunuka kulutwe lia matangwa.

9. Yika Mwanangana wa pwo wa ku Shipa ambile hakutwala ku kuyula cha Solomone?

⁹ Mwanangana wa pwo wa ku Shipa kevwile hakutwala ku sambukila ni upite uze wapwile mu Izalele ha kuyula cha Solomone. Chocho yalinga wenyi usuku ndo ku Yerusaleme, akalimwene mwene ni meso jenyi. (1 Mia. 10:1) Muze amwene chize wanangana wa Solomone wapwile yamba ngwenyi: “chipwe chihanda chahamuchima kangulwezelecho. . . . Kawaha malunga je, kawaha wano tuvumbi twe akumana kumeso je matangwa eswe nikwivwa mana je!” (1 Mia. 10:6-8) Alioze yuma yize yalingiwile mu wanangana wa Solomone yili wika chilweza cha yize Yehova makalingila atu kupalikila mu kuyula cha mwanenyi Yesu Kristu.

10. Yesu kanahiana Solomone mu mutapu uka?

¹⁰ Yesu kanahiana Solomone mu yuma yeswe. Solomone kapwile chihenge, kalingile yuma yipi chinji yize yanehene lamba kuli atu ja Zambi. Alioze, Yesu kali Mwanangana mungunu yoze keshi kuhengesa. (Luka 1:32; Hepre. 4:14, 15) Yesu kanungine ni kushishika kuli Yehova chipwe ngwe kapalikile mu yeseko yinji yize Satana amunehenene. Iye kasolwele ngwo, kechi keza kavulumuna chipwe kulinga chuma chize muchimwesa atu lamba. Pundu lume, iye kali Mwanangana mupema yoze mutuhasa kupwa nenyi.

11. Aya waze makakwasa Yesu?

¹¹ Yesu makakalakala hamuwika ni Akwa-Kristu akuwayisa 144.000 hanga akafunge atu ni kumanununa upele wa Zambi hano hashi. (Uso. 14:1-3) Akwa-Kristu jacho kananyingika kanawa yize yinalumbunuka kupalika mu lamba ni mu yeseko, mumu o kali malunga ni mapwo waze atwamine hano hashika, kashika makanyingika kanawa chize twakwivwa. Mba mulimo uka Akwa-Kristu wano makapwa nawo?

MULIMO UKA AKWA-KRISTU AKUWAYISA MAKALINGA?

12. Mulimo uka Yehova ahanyine kuli Akwa-Kristu akuwayisa 144.000?

¹² Yesu ni Akwa-Kristu akuwayisa makapwa ni mulimo unene kuhiana uze Solomone apwile nawo. Solomone kapwile ni kufunga atu waze apwile mu chifuchi chize te akuyula. Alioze Akwa-Kristu akuwayisa makafunga atu hashi heswe. Ewa, Yehova kahanyine mulimo walipwila kuli Akwa-Kristu akuwayisa 144.000!

13. Mulimo ukwo uka ulemu uze Akwa-Kristu akuwayisa makapwa nawo?

¹³ Chizechene ngwe Yesu, Akwa-Kristu akuwayisa 144.000 no makapwa mianangana ni asasendote. (Uso. 5:10) Shimbi ya Mose yapwile nikwamba ngwo, sasendote katamba kufunga atu ku musunya ni ku ufulielo. Shimbi yacho yapwile ni kusolola yize te muyilingiwa kulutwe. Kashika mutuhasa kwamba ngwetu, Akwa-Kristu akuwayisa no makafunga atu ja Zambi ku musunya ni ku ufulielo. (Hepre. 10:1) Kanda tuchinyingika chize mianangana wano ni asasendote makahanjika ni yetu hano hashi. Alioze, chuma tunanyingika chili chino, atu eswe waze makapwa mu Paraisu makapwa ni usongwelo wa Yehova. —Uso. 21:3, 4.

YIKA MAPANGA AKWO ATAMBA KULINGA MBA AKATWAME MU PARAISU?

14. Yika mbunga yikepe ya mapanga ni “mapanga akwo” akulinga hamuwika?

¹⁴ Yesu kasanyikine atu waze makayula nenyi ngwo, “mbunga yikepe ya mapanga.” (Luka 12:32) Chizavu chikwo kachisanyikine ngwenyi, “mapanga akwo.” Yizavu yino yaali yili mu chendo chimuwika. (Yoa. 10:16) Yizavu yino yaali yakukalakala hamuwika, chikwo nawa muyikanunga ni kukalakala hamuwika muze hano hashi muhakapwa Paraisu. Mu chifuchi chaha “mbunga yikepe ya mapanga” muyikatwama mu malilu alioze “mapanga akwo” makatwama hano hashi ku miaka yeswe. Mapanga akwo katamba kulinga yimwe haliapwila mba akatwame mu Paraisu.

15. (a) Kuchi mapanga akwo akukwasa Akwa-Kristu akuwayisa? (b) Kuchi muhasa kwimbulula chilweza cha ndumbu uli mu zuwo lia kulanjishila yitumbo? (Tala chizulie)

¹⁵ Chingulungulu yoze twatongolanga kafwile chakuhona kusolola usakwililo ha yize Yesu amulingilile. Alioze, “mapanga akwo” kali ni uhashi wa kusolola zango lio muli Yesu. Chakutalilaho, twakusolola zango lietu muli Yesu ha chize twakutwama ni mandumbu jenyi Akwa-Kristu akuwayisa. Yesu mwene kambile ngwenyi, te kumapatwila “mapanga akwo” kulita ni chize akutwama ni Akwa-Kristu akuwayisa. (Mateu 25:31-40) Mutuhasa kukwasa mandumbu ja Yesu ha kulinga mulimo wa kutayisa tumbaji. (Mateu 28:18-20) Jila yimwe ya kuchilingilamo yili kuzachisa kanawa mukanda Wahilila ku Mwono ku Miaka Yeswe! Nyi kanda uchipwa ni longeso lia Mbimbiliya, muhasa kuchilinga hanga ukwase atu anji!

16. Kuchi mutuhasa kulilulieka haliapwila mba tukatwame mu chifuchi chaha?

¹⁶ Kutwatambile kunyonga ngwetu, twatamba kupwa mu Paraisu mba tulinge yuma yalita. Chipwe haliapwila mutuhasa kusa tachi hanga tulinge yuma yeswe kanawa ngwe yize twakuhanjika ni kulinga. Chikwo nawa, kupwa ni nyonga lialita ha chize twakumbata mwono wetu. Mutuhasa nawa kushishika kuli Yehova, kuli waze twalimbata no, ni kuli mandumbu jetu. Nyi twononokena Yehova haliapwila muchipwa chashi kumwononokena mu chifuchi chaha. Kashika twatamba kupwa ni yitanga yize muyisolola ngwo tunalilulieka hanga tukatwamemo. Tala chikuma chinambe ngwo “Shina Hiwalilulieka hanga Ukatwame Hashi Haha?” ha mutwe uno.

17. Mumu liaka kutwatambile kulihisa mashimbu eswe ha shili yize twalingile kunyima? Lumbununa.

¹⁷ Twatamba kusa tachi hanga tuhone kulihisa mashimbu eswe mumu lia shili yize twalingile kunyima. Chikwo nawa, kutwatambile kulinga shili chamulingila mumu ngwo hanatukula kuli Yesu. (Hepre. 10:26-31) Kashika mutuhasa kupwa ni shindakenyo ngwetu, nyi twalikonyeka ni mbunge yeswe ha kufupa ukwaso wa Yehova ni wa makulwana a mu chikungulwila, Yehova mavulama shili yetu. (Iza. 55:7; Yili. 3:19) Yesu kalwezele A-Fwariseu ngwenyi: “Nguneza mukutambika yivulumunyi alikonyeke; hi akwa ululi ko.” (Mateu 9:13) Ukuule ukwete ndundo jinji ni ulemu, kashika muuhasa kufuka shili yetu yeswe.

MUHASA KUTWAMA MU PARAISU KU MIAKA YA MUTOLO

18. Yika mukazanga kuhula kuli chingulungulu yoze wafwilile sali lia Yesu?

¹⁸ Nyonga ngwe, uli mu Paraisu mba unahanjika ni chingulungulu yoze wapwile Sali lia Yesu. Kota munuhanjika ha usakwililo uze nwakwivwa ha yize Yesu anulingilile. Hanji muhasa kumuhula ngwe, kuchi wevwile ha kupwa sali lia Yesu ha mashimbu jenyi akasula? Chikwo nawa, kuchi wevwile ha kwivwa ngwo, muopwa nenyi mu Paraisu? Hanji ni chingulungulu wacho mahasa kukuhula ngwenyi, kuchi wevwile ha kutwama ha matangwa a kusula mu chifuchi cha Satana? Muchikapwa chiwape chinene kulilongesa Mbimbiliya ni atu waze apwa ngwe lunga yono!—Efwe. 4:22-24.

19. Mumu liaka mwono mu Paraisu kuchi katukenya? (Tala chizulie ha chifukilo.)

¹⁹ Mwono mu Paraisu kuchi katukenya. Mutukapwa ni milimo yinji ya kulinga ni atu anji akunyingika. Chikwo nawa, ha tangwa ni tangwa mutukapwa ni uhashi wa kunyingika yimwe hakutwala kuli tata yetu Yehova ni kuwahilila ni yuma yeswe yipema yize hanatululiekela. Kulilongesa hakutwala kuli Yehova ni yitangiwa yenyi kuchatwamine ni musulo. Zango lietu kuli Yehova mulikakola chinji mumu mutukatwama ku miaka yeswe. Chochene, twakusakwilila chinji Yehova ni Yesu ha kutwaha kutalatala cha kutwama ku miaka ya mutolo!