1 | Kulemba—“Kunjikenu Yipikalo Yenu Yeswe Kuli Iye”

MBIMBILIA YINAMBE NGWO: “Kunjikenu yipikalo yenu yeswe kuli iye [Zambi], mumu iye kakunufunga.”—1 PETULU 5:7.

Yika Chino Chinalumbunuka

Yehova kanazange hanga tumulweze yuma yeswayo yinatupinjisa ku manyonga ni ku mbunge. (Samu 55:22) Chipwe ngwe yize tunapalika yili yikehe hanji yinene twatamba kulemba. Muze twakupinda ni yipikalo, Yehova keshi kuwahilila. Kulemba kuli iye yili jila yipema ya kuwanyinamo sambukila ya ku manyonga.—A-Fwilipu 4:6, 7.

Chize Yino Muyihasa Kukukwasa

Muze tunayiji yikola ya mu manyonga, mutuhasa kulivwa ukawetu. Akwetu kanji-kanji keshi kunyingika kanawa yize tunapalika. (Yishima 14:10) Alioze, muze twakulweza Yehova chize tunevu, mutumona ngwetu iye kali Zambi yoze wakutupanjika ni kulihulumba ha yize tunamulweze. Yehova kanatumona, kananyingika chize tunevu ni tachi jize tunase hanga tukumbe yikola yetu. Kashika, iye kanazange hanga tumulweze yuma yeswe yize tunapinda nayo.—2 Sango ja Mianangana 6:29, 30.

Kuhanjika ni Yehova mu yilemba chakutwaha shindakenyo ngwo iye kakutufunga. Mutuhasa kulivwa ngwe mukwa-kwimba samu yoze walembele ngwenyi: “Hiwamona luyinda wami; hiwanyingika lamba lia mbunge yami.” (Samu 31:7) Kunyingika ngwo Yehova kakulihulumba ha yize tunapalika, muchihasa kutukwasa kununga ni kusa tachi ni kushishika ha mashimbu akalu. Iye kakulinga nawa yimwe, hi wika ko kunyingika yize tunapalika. Kuhiana eswe, iye kananyingika yize tunapalika ni kutukwasa kulihumikiza ni kuwana utakamiso mu Mbimbiliya.

Chize Mbimbiliya Yakukwasa Julian

Chize Yikola ya mu Manyonga Yakungupinjisa

“Yami nakupinda ni yikola ya mu manyonga ni kunyonga yuma yinji yize yakungupinjisa chinji. Mashimbu amwe nguli kanawa, alioze susumuku munguputuka kunenganyana chipwe ngwe kwalingiwile nichimwe. Nakulipikala chinji chipi-chipi muze nguli hamuwika ni akwetu. Nakulipikala chinji ha yize ayo manyonga hali yami.

“Masepa jami waze ananyingika yikola yami, kakusa tachi hanga angukwase. Ha mashimbu amwe ayo kakwamba yuma yize kuchafupiwile. Alioze nakusakwilila ha tachi jize ayo akusa hanga angukwase.

“Kanji-kanji kulipikala chami ni yikola yami ya mu manyonga yakungutwala nguhone kulemba. Chakufupiwa kusa tachi hanga ngulihulikile ha yize munguhanjika ni Yehova mu yilemba. Manyonga jami keshi kushimbwila—kakwalumuka kawashi-washi, kashika chakukaliwa kusa tachi hanga ngukaule yuma yize yakulingiwa ha tangwa ni tangwa. Chakungukaliwila kulweza Yehova chize ngunevu hanji yize ngunapinda nayo.”

Chize Mbimbiliya Yakungukwasa

“Nalilongesa mu Mbimbiliya ngwami yilemba yami yafupiwile kusuhwa hanji kuzachisa maliji akalu chinji hanga Zambi apanjike yilemba yami. Ha mashimbu amwe muze chishi kuhasa kulweza akwetu chize ngunevu, nakulemba wika ngwami: ‘Yehova, lisesa ngukwase kama.’ Ha kulinga chino, nakulivwa ngwami Yehova kakungupanjika ni kungukumbulula ha yize ngunafupu ha shimbu liacho. Hanyima lia kulemba nafupile ukwaso wa mandotolo. Ngunawahilila ha kwamba ngwami majila eswe aali kangukwashile kulivwa kanawa. Chili kuyuka chinene ha kufupa ukwaso wa Tata yami wa mu malilu ni kunyingika zango lienyi.”