Chize Jita ni Mbwanja Muyiza Kahwa

ZAMBI MAKANONGESA MANGUVULU A HANO HASHI

Zambi makanongesa manguvulu a hano hashi kupalikila ha jita yize Mbimbiliya yakuvuluka ngwo, Armagedone.a (Usolwelo 16:16) Ha mashimbu jacho, “mianangana a hashi heswe” makalinunga hanga ase jita “ha tangwa linene lia Zambi Mukwa-Ndundo-Jeswe.” (Usolwelo 16:14) Armagedone muyikapwa jita ya kasula hano hashi.

Zambi makachiza manguvulu a hano hashi ni kusalakanyisaho Wanangana wenyi hanji ngwetu unguvulu wenyi, uze muukayula ku miaka ya mutolo kukatuka mu malilu. (Daniele 2:44) Zambi hanatongola Mwanenyi Yesu Kristu hanga apwe Mwanangana mu wanangana wenyi. (Izaia 9:6, 7; Mateu 28:18) Wananganab wacho, we Yesu alwezele tumbaji twenyi hanga awite muze te malemba. (Mateu 6:9, 10) Mu Wanangana wa Zambi atu eswe makapwa alinunga hamwe ni Yesu, Mwanangana wo.

Kuyula cha Yesu muchikalisa ni cha manguvulu a hano hashi waze akulivwisa kuwaha ene. Mumu iye kali mukwa-ululi, chikwo nawa, keshi katonde. Kukuchi kapwa mutu niumwe yoze makalivwa ngwe kanamulengulula mumu lia chikowa chenyi, chifuchi hanji mianda ya kuze akatukile. (Izaia 11:3, 4) Chikwo nawa, atu kechi kalitachika mumu lia kuhona kwasolwela ululi. Mumu liaka? Mumu Yesu makalihulumba hali mutu ni mutu. Iye “kumakapulula mukwa kuhona muze mateta; ni chiswale yoze keshi chikwashi. . . . Kumakakuula mwono wo ku yihungumiona ni uswi.”—Samu 72:12-14.

Wanangana wa Zambi muukanongesa mata eswe hano hashi. (Mika 4:3) Chikwo nawa, muukanongesa atu api waze akukoka mbwanja ni kuchiza sambukila ya akwo. (Samu 37:9, 10) Atu eswe hano hashi, mapwo, malunga hamwe ni twanuke makatwama ni ukulungunga kweswako makapwa.—Ezekiele 34:28.

Atu eswe makapwa ni mwono upema mu Wanangana wa Zambi. Iye makahwisa yuma yeswe yipi yize yakutwala atu alitachike ngwe, uswale, kapunga ni kuhona mazuwo apema. Atu eswe makapwa ni kulia chalumbama hamwe ni mazuwo apema.—Samu 72:16; Izaia 65:21-23.

Wanangana wa Zambi muukahwisa yuma yeswe yipi yize jita yanehene. Chino chinachingi hi wika ko yikola ya ku musunya, alioze ni kusakalala chize atu akupinda nacho mumu lia yuma yipi yize akupalika ha mashimbu a jita. Chipwe waze afwile, makaahindwisa hanga atwame cheka hano hashi. (Izaia 25:8; 26:19; 35:5, 6) Asoko makatwama cheka hamuwika. Kashika, manyonga eswe api waze atu apalikile ku jita makapwa ‘yuma ya kunyima.’—Usolwelo 21:4.

ZAMBI MAKACHIZA SHILI

Muze Wanangana wa Zambi muukayula hano hashi, atu eswe makawayila wika Zambi wamwenemwene, Yehovac, mwe “Zambi ya zango ni sambukila.” (2 A-Korindu 13:11) Atu eswe makasa tachi hanga atwame ni sambukila. (Izaia 2:3, 4; 11:9) Waze eswe mononokena Zambi keshi kapwa nawa yivulumunyi, alioze makapwa atu angunu.—A-Roma 8:20, 21.

ZAMBI MAKANONGESA SATANA NI ANDEMONIU JENYI

Wanangana wa Zambi muukanongesa Satana ni andemoniu jenyi waze akutwala atu hanga ase jita. (Usolwelo 20:1-3, 10) Muze ayo keshi kapwako nawa, atu makatwama mu “kulumbama cha sambukila.”—Samu 72:7.

Muhasa kupwa ni shindakenyo ngwo, yilakenyo ya Zambi ya kuhwisa jita ni mbwanja, pundu muyikamanunuka. Iye kali ni ndundo ni zango lia kuchilinga.

• Zambi kali ni mana ni ndundo ja kuhwisa jita ni ungulungulu. (Yombi 9:4) Kukushi chuma nyichimwe chize iye keshi kuhasa kuchilinga.—Yombi 42:2.

• Zambi kakwivwa yinyengo muze akumona atu mamona lamba. (Izaia 63:9) Iye nawa kakuvwila “kole waze akuzanga upupilo.”—Samu 11:5.

• Zambi kakumanununa mashimbu eswe yize akulakenya, iye keshi kuhanjika mahuza.—Izaia 55:10, 11; Titu 1:2.