EFESIOS

Pabloba nau kartaɗe naa ɓʉɗa

1 Mʉ Pablobʉ. Dachi Akõreba kʉ̃riasiiɗeeba mʉ Jesucristoba bʉiɗabʉ. Mʉʉba nau karta ɓʉmaa ɓuu joma Dachi Akõreɗerã ẽbẽrarã Jesucristoɗe ijãa nuree Éfeso* puuruɗebenarã baita. 2 Mʉʉba kʉ̃ria ɓuu Dachi Bajãaɗebena Akõreba mauɗe Dachi Mechiu Jesucristoba ãchi sõbiaɗeeba machi aiɗa panaɗai mauɗe jirukaraayuwãe panabiaɗai.

Dachi Akõreba chi bia joma dachi jauri baita dea ɓuu

3 Dachi Mechiu Jesucristo Akõremaa biꞌia berreaɗai panuu. Cristo ome panuuɗeeba ichi Jauriɗeeba chi bia joma dachimaa bajãaɗebena dea ɓuu. 4 Nau drua waui naeɗe Cristoɗeeba dachi jʉrʉ adausii ichi baita biꞌia nureaɗamera mauɗe ichi daaɗe jayoa kachiruaswãe nureaɗamera. Nabẽraeɗeeɗe Jesucristoɗeeba dachi ichi warrarã baɗai a kʉ̃risia ɓuasii. Maka wau kʉ̃ria ɓuasii dachi kʉ̃riakuasiiɗeeba. 5 —. 6 Ichi sõbia ãrea ɓuuɗeeba dachi karibasii ichiba kʉ̃ria ɓuu Warrɗeeba. Mau baita ichimaa biꞌia berreaɗai panuu. 7 Ichi Warr oa chesiiɗeeba Dachi Akõreba dachi kachiruaɗebena karibasii. Ichi mechiu sõbiaɗeeba dachiba kachirua waupeɗaaɗa joma perdonasii. 8 Ichi sõbiaɗeeba dachi ãrea aiɗapeɗa joma kʉ̃risia kuitaa mauɗe kʉ̃risia kauwa dachimaa deasii.* 9 Ichiba wau kʉ̃ria ɓuu naeɗe kuitaabiawẽa ɓuasii. Maamina dachimaa kuitaabiasii ichi sõbiaɗeeba maka kʉ̃ria ɓuasiiɗeeba. Ichiba Cristoɗeeba nabẽraeɗeeɗe waui kʉ̃risia ɓuaɗa 10 ichiba ɓuɗa ewariɗe maka joma waui: mau ewariɗe ne joma bajãaɗebena mauɗe nau iujãaɗebena Cristo juaɗe ɓui.

11 Dachi Akõreba ne joma ichiba wau kʉ̃ria ɓuu waubarii kĩra Cristoɗeeba dachi jʉrʉ adausii,* nabẽraeɗeeɗe kʉ̃risia ɓuaɗa kĩra. 12 Maka wausii dai judiorã chi naa Cristoɗe ijãapeɗaaɗarãba ichi biꞌia nii ʉ̃rʉbena biꞌia berreaɗamera. 13 Mau awara machi judiowãerã biɗa chi biawãra beɗea ũrisiɗauɗe, mau dachi karibai beɗea bia ijãasiɗau. Maka Cristoɗe ijãasiɗauɗe Dachi Akõreba ichi Jauri machimaa deasii ichiba jaraɗa kĩra. Dauchaa ɓuu kĩra mauba kuitaabia ɓuu machi ichiɗirã. 14 Dachi Akõre Jauri adaupeɗaaɗaɗeeba dachiba kuitaa panuu joma Dachi Akõreba deai jaraɗa biawãra adauɗai ichiɗirã joma biꞌia ɓui ewariɗe. Mauɗeeba ichi biꞌia nii ʉ̃rʉbena biꞌia berreaɗai panuu.

Pabloba Dachi Akõremaa ʉtaa iɗiɗa

15 Mauɗeeba machiba Dachi Mechiu Jesusɗe ijãa panuu mauɗe joma ẽbẽrarã Dachi Akõreɗerã kʉ̃ria panuu mʉʉba ũrisiiɗeeɗebena, 16 mʉʉba ewaricha machi baita Dachi Akõremaa ichíturu kiɗibai abarii mauɗe machi ʉ̃rʉbena ʉtaa iɗibarii. 17 Mʉʉba Dachi Mechiu Jesucristo Akõremaa, chi Akõre biꞌia niimaa ʉtaa iɗibarii ichi Jauriɗeeba machimaa biꞌia kʉ̃risiabiamera mauɗe ichi ʉ̃rʉbena kuitaabiamera. Maka machiba ichi aude kuitaaɗai. 18 Mauɗe ʉtaa iɗibarii Dachi Akõreba machi kʉ̃risia ewamera. Maka machiba kuitaaɗai kãare ichiɗebena adauɗai baita eseɗau panuu, mau adauɗamera iusiiɗeeba. Mauɗe machiba kuitaaɗai ichi ẽbẽrarãba adauɗai ãrea biꞌia ɓuu. 19 Mauɗe mʉʉba ʉtaa iɗibarii machiba kuitaaɗamera ichi poyaa jomaurã audeara poyaa ɓuu. Mau poyaabariiɗeeba ichiba dachi ichiɗe ijãa nuree kariba ɓuu. Ara mau poyaabarii mechia ɓuuɗeeba, 20 Dachi Akõreba Cristo biu ɓuaɗa chokae jiradubipeɗa bajãaɗe ichi jua biare akʉ ɓeebisii. 21 Dachi Akõreba ichi jomaurã mechiu ɓusii: jai kachirua karrarã audeara, bajãaɗebena chi mechiu nuree audeara, chi poyaabadau audeara mauɗe chi aude jua chaarea nuree audeara. Nau ewariɗe ichi jomaurã audeara chi mechiu nii mauɗe kaaɗebena ewariɗe biɗa maka ɓuai. 22 Dachi Akõreba ne joma Cristo juaɗe ɓusii mauɗe Cristo ɓusii ne jomaɗe ichi ẽbẽrarã Mechiu ɓuamera. 23 Ẽbẽrarã Cristoɗerã ichi kakuabʉ. Ãchi ne jomaɗe ichiɗeeba panuu mauɗe ne joma ichiɗeeba ɓuu.

Dachi Akõreba Cristoɗeeba dachi karibaɗa

2 Naeɗe machi biu panasiɗau, ijãaɗawẽa panasiɗauɗeeba, kachirua waubachiɗauɗeeba.* 2 Maka nibasiɗau nau iujãaɗebena kʉ̃risia ijãa panasiiɗeeba mauɗe jai kachiruarã chi aude mechiu nii ijãa panasiiɗeeba. Iɗibae ichiba chi Dachi Akõre beɗea ijãaɗakaurã ichi juaɗe ua ɓuu. 3 Naeɗe joma dachi ãchi kĩra nibasiɗau nau kakuaba kachirua waubi ɓuu wau panasiɗauɗeeba. Nau kakuaba kachirua waui kʉ̃ria ɓuu mauɗe dachiba kachirua waui kʉ̃risia ɓuu wau panasiɗau. Dachi kachiruaɗeeba Dachi Akõreba ichi kĩrubiɗeeba dachi kastikai ɓuasii joma kachirua waubadaurã kastikabarii kĩra.

4 Maamina Dachi Akõreba ãrea kĩra chuburiabarii. Ichiba dachi ãrea kʉ̃ria ɓuuɗeeba 5 kachiruaɗe biu panaɗa Cristo ome ãbua chokae ɓusii. Dachi Akõreba ichi sõbiaɗeeba machi karibasii. 6 Jesucristo ome ãbua panuuɗeeba Dachi Akõreba dachi chokae jiradubiasii mauɗe mau ome ãbua bajãaɗe akʉ ɓeebiasii. 7 Mau joma wausii kaaɗebena ewariɗe ichi ãrea sõbia nii unubii baita. Mauɗeeba dachi chi Jesucristo ome panuurã karibasii. 8 Jesusɗe ijãasiɗauɗeeba Dachi Akõreba ichi sõbiaɗeeba machi karibasii. Ara machi du aɓa karibaɗaabasii, maumaarã Dachi Akõréburu bari karibasii. 9 Machiba biꞌia wau panuuɗeeba Dachi Akõreba karibaabasii. Maka aɓau biɗa ara ichi ʉ̃rʉbena poyaa biꞌia berreabai. 10 Dachi Akõreba dachi Jesucristoɗeeba chiwiɗi wausii ne bia wau panaɗamera. Mau ne biꞌia wauɗai panuu, ichiba naeɗe ɓusii dachiba wauɗamera.

Cristoɗeeba judiorã mauɗe judiowãerã Dachi Akõre ome biꞌia paneeɗa

11 Mauɗeeba kĩrabásturu machi judiowãerãɗebena adausiɗauɗeeba, judiorãba machi «mukĩra chi kakua tõoɗawẽa nuree» abachiɗau. Ara ãchi «mukĩra chi kakua tõo nuree» abachiɗau, maamina aɓa nau kakuaɗéburu ãyaa nuree. 12 Kĩrabásturu naeɗe machi Cristowãe nureasii mauɗe israelɗebenarãwãe basii. Dachi Akõre ãchi ome beɗea deasiiɗe ichiba machimaa aɓa biɗa deai baɗa jaraabasii. Mau awara machi saka biꞌia nureaɗaiswãe panasiɗau mauɗe nau druaɗe Dachi Akõreswãe nureasii. 13 Maamina jãabae Jesucristo ome panuuɗeeba, machi naeɗe kaitawẽ nureaɗa Dachi Akõreba Cristo oaɗeeba ichi kaita adausii.

14 Biawãra Cristoba dachi jirukaraayuwãe ɓusii. Ichiba judiorã, judiowãerã ome ãbua ɓusii puuru aɓa ɓeemera. Ichi biuɗaɗeeba dachi awara panaɗa ãbua ɓusii. 15 Moisesba ɓʉɗaba ne ãrea waubiabachii judiorã, judiowãerã awara ɓui baita. Maamina Cristo biuɗaɗeeba Moisesba ɓʉɗa awara ɓusii puuru wiɗi aɓaɗe duanaɗamera mauɗe ãbua jirukaraayuwãe duanaɗamera. 16 Ichi cruzɗe biuɗaɗeeba puuru ome ɓuaɗa puuru aɓa waupeɗa omea Dachi Akõre ome biꞌia ɓusii. Maka dachi awara panaɗa ichiba ãbua biꞌia ɓusii.

17 Cristo neesii, chi beɗea bia Dachi Akõre ome jirukaraayuwãe ɓuai ʉ̃rʉbena machimaa jarai baita, chi Dachi Akõreɗebena kaitawẽ panaɗamaa mauɗe chi Dachi Akõre kaita panaɗamaa.* 18 Cristoɗeeba dachi omeeba araɓau Bajãaɗebena Akõremaa poyaa ara kaita neeɗai, ichi araɓau Jauriɗeeba. 19 Mauɗeeba machi judiowãerã waa drua ãiɗebenarã kĩra nureaɗaabai, maumaarã Dachi Akõre puuruɗebenarã ome ãbua panuu; machi ẽbẽrarã Dachi Akõreɗerãbʉ. 20 Machi de mo wauɗa kĩra panuu. Jesusba bʉiɗarã mauɗe Dachi Akõre baita berreabadaurã mau de ekarebena mo kĩra panuu. Mau deɗebena mo chi bibuara ɓuu Jesucristobʉ. 21 Ichiɗeeba, mo ʉtaa karaa kãrii kĩra, de bia wau kãrii, Dachi Mechiu baita biꞌia ɓeemera. 22 Cristo ome panuuɗeeba machi siɗa joma ẽbẽrarã Dachi Akõreɗerã baara de araɓau kĩra nuree. Mau deɗe Dachi Akõre ichi Jauriɗeeba ɓuabarii.

Dachi Akõreba Pablo judiowãerãmaa jaradeaɗe bʉiɗa

3 Mauɗeeba mʉʉba [machi baita Dachi Akõremaa ʉtaa iɗibarii].* Mʉ Pablobʉ. Machi judiowãerãmaa Jesucristo ʉ̃rʉbena jaradea ɓuu kakua jʉ̃a uru panuu. 2 Mʉʉmaarã machiba ãrea kuitaa panuu Dachi Akõreba ichi sõbiaɗeeba mʉ ɓusii machimaa jaradeamera. 3 Ichiba naeɗe kuitaabiwẽa ɓuaɗa mʉʉmaa kuitaabisii. Mau ʉ̃rʉbena mʉʉba nau kartaɗe ɓaꞌãra ɓʉsii. 4 Nau karta eɗa jara panuuɗe machiba kuitaaɗai Dachi Akõreba Cristo ʉ̃rʉbena kuitaabiwẽa ɓuaɗa, mau mʉʉba kauwa kuitaa ɓuu. 5 Naeɗe Dachi Akõreba ẽbẽrarãmaa mau kuitaabiawẽa ɓuasii, maamina jãabae chi ichi baita berreabadaurãmaa mauɗe Jesucristoba bʉiɗarãmaa ichi Jauriɗeeba kuitaabiasii. 6 Ichiba kuitaabiawẽa ɓuaɗa naubʉ: judiowãerãba chi beɗea biꞌia Cristo ʉ̃rʉbena ijãa panuuɗeeba judiorã ome ãbua Dachi Akõreba deaiɗebena adauɗai,* araɓau kakuaɗe panuu, mauɗe Dachi Akõreba Jesucristoɗeeba deai jaraɗa* ãbua uru panuu. 7 Dachi Akõreba ichi sõbiaɗeeba mʉ ichi baita trajabarii ɓusii mau beɗea bia Cristo ʉ̃rʉbena jaradeamera. Ichi poyaabariiɗeeba maka wausii.

8 Joma ẽbẽrarã Dachi Akõreɗerã tãeɗe mʉ kaebeu nimina, ichi sõbiaɗeeba mʉ ɓusii judiowãerãmaa Cristo ʉ̃rʉbena ne bia chi wãꞌãekau jaradeaɗe wãmera. 9 Chi ne joma wauɗa Dachi Akõreba mʉ ɓusii jomaurãmaa kuitaabiamera saka wausii ichiba araɓaeɗeeɗe waui kʉ̃risia ɓuaɗa. Mau waui kʉ̃risia ɓuaɗa naeɗe kuitaabiawẽa ɓuasii. 10 Jãabae ẽbẽrarã, Dachi Akõreɗeeba Ichiba ichi ne jomaɗe ãrea kuitaa ɓuu kuitaabiasii chi meserãa nureerãmaa mauɗe bajãaɗebena chi mechiu nureerãmaa. 11 Maka wausii ichiba nabẽraeɗe Dachi Mechiu Jesucristoɗeeba waui kʉ̃risia ɓuasiiɗeeba. 12 Dachiba ara mau Jesucristoɗe ijãa panuuɗeeba mauɗe ichi ome ãbua panuuɗeeba Dachi Akõremaa wapeawẽa ʉtaa iɗiɗai panuu. 13 Mauɗeeba mʉʉba machimaa naka chi chuburia iɗiiruu: mʉ machi kakua nama naka biꞌiwãe ɓumina ãrea jirukaraarã́sturu. Maka ãrea biꞌiwãe ɓuu machi Dachi Akõre ome biꞌia nureaɗamera.

Pabloba ãbarã baita Dachi Akõremaa ʉtaa iɗiɗa

14 Mauɗeeba mʉ dachi Bajãaɗebena Akõre daaɗe õdarrɗe koɓeebarii.* 15 Ichiba joma bajãaɗe nuree mauɗe nau iujãaɗe nuree wausii mauɗe ichiɗeeba nuree.* 16 Mʉʉba ʉtaa iɗi ɓuu ichi Jauriɗeeba mauɗe ichiba ne bia ãrea uru ɓuuɗebena ichi poyaabarii machimaa sõɗe deamera. Maka machi chaarea nureaɗai. 17 Mauɗe ʉtaa iɗi ɓuu ijãa panuuɗeeba Cristo machi sõɗe ɓuamera mauɗe machi ne jomaɗe kʉ̃riaɗeeba panaɗamera. Maka chaarea nureaɗai ãrea karr jidau panuu kĩra. 18 Mauɗe machiba joma ẽbẽrarã Dachi Akõreɗerã baarauba poyaa kuitaaɗai Cristoba dachi kʉ̃ria ɓuu. Mau jõparrea ɓuu, deseroa ɓuu, ʉtʉ ɓuu mauɗe iɗu ɓuu. 19 Ara dachi kʉ̃risiaɗeeba poyaa kuitaaɗakamina mʉʉba ʉtaa iɗi ɓuu machiba mau kuitaaɗamera. Kuitaaduubʉrã ne jomaɗe Dachi Akõre kĩra nureaɗai.

20 ¡Dachi Akõre ãrea biꞌia nii! Ichi poyaabarii dachi sõɗe ɓuuɗeeba ne mechiu poyaa waui, dachiba kʉ̃risiabadau audeara maebʉrã ichimaa ʉtaa iɗibadau audeara. 21 Ãbarã, Jesucristo baara panuuɗeeba ¡ewaricha Dachi Akõremaa biꞌia berreaɗai panuu! Biꞌia ɓuu maka ɓuai.

Dachi Akõre Jauriɗeeba ãbarã chi kakua aɓa nii kĩra nuree

4 Mʉ Dachi Mechiu kakua jʉ̃a uru panuu. Mʉʉba machimaa chi chuburia iɗiiruu jipa nibaɗamera. Dachi Akõreba machi iusii maka nibaɗamera. 2 Machi waabenarã audeara biꞌia nuree kʉ̃risiarã́sturu. Kʉ̃riaɗeeba chiya dauchia jãadua nureásturu. 3 Dachi Akõre Jauriba machi jirukaraayuwãe nureabiai ɓuuɗeeba, ne joma biꞌia wáusturu biawãra ãbua nureaɗamera. 4 Dachi kakua ara aɓaburu ɓuu. Dachi Akõre Jauri ara aɓaburu iniɗau. Dachi Akõreba machi iusii ara mau eseɗau panaɗamera. 5 Dachi Mechiu Jesús ara aɓaburu nii. Dachiba araɓau Jesusɗe ijãa panuu. Mauɗe araɓau trʉ̃ɗeeba boro easiɗau. 6 Dachi Akõre ara aɓaburu nii. Ichi jomaurã Akõrebʉ, jomaurã Mechiubʉ. Jomaurã sõɗe ɓuu mauɗe jomaurãɗeeba ichiba wau kʉ̃ria ɓuu waubarii.

7 Maamina Cristoba ne waubiabarii dea kʉ̃ria ɓuaɗa kĩra ichi sõbiaɗeeba dachicha ichi baita ne bia wauɗamera aꞌawaraa deaɗakasii. 8 Dachi Akõre beɗeaɗe naka ɓʉ kuɓuu:

«Ichi ʉtaa wãsiiɗe ichiba ichi kĩramaabadaurã poyaaɗa adoesii jʉ̃ʉka ua ɓuai baita. Maabae ẽbẽrarãmaa ne bia deaɗakasii».*

9 Chi ʉtaa wãsii a ɓuuba ¿kãare jara ɓuma? Jara ɓuu ʉtaa wãi naeɗe ʉtʉʉba ichi nau iujãaɗe chi aude iɗuɗaa neesii. 10 Chi ʉtʉʉba eɗaa neeɗa waya bajãa chi aude ʉtʉ ɓuumaa wãsii ne joma ichi juaɗe ua ɓuamera. 11 Ara ichiba chi nuree ɓusii ichiba bʉiɗarã nureaɗamera, waabenarã ɓusii Dachi Akõre baita berreabadaurã nureaɗamera, waabenarã ɓusii chi beɗea bia Cristo ʉ̃rʉbena jaraɗe nibaɗamera, mauɗe waabenarã ɓusii chi ijãabadaurã nubadaurã mauɗe jaradeabadaurã nureaɗamera. 12 Ichiba maka ɓusii ẽbẽrarã Dachi Akõreɗerã aiɗaɗamera, ãchia biɗa Dachi Akõre baita poyaa biꞌia wauɗamera. Maka joma Cristo ẽbẽrarã ichi kakua abadau chaarea warimaa panuu, 13 aɓa jomaurã Dachi Akõre Warrɗe ijãa panuuɗeeba mauɗe kuitaa panuuɗeeba ãbua biꞌia paneeduuɗaa. Mauɗe dachi ne jomaɗe Cristo kĩra nureaɗai. 14 Makarã waa wãwa kĩra nureaɗaabai. Wãwaba barikia beɗea ijãabarii. Mau awara ẽbẽrarã setaa kũruaɗai kuitaa nureeba jaradea panuuɗeeba, setaa ijãabiabadau pũatuba jãba ãyaa adoeruu kĩra. Maamina dachi mau jãba kĩra nureaɗaabai. 15 Maumaarã kʉ̃riaɗeeba chi biawãra beɗea ijãaɗai panuu ne jomaɗe Dachi Mechiu Cristo kĩra nureaɗai baita. 16 Ichiɗeeba joma dachi ichi kakuabʉ. Chi dachi kakuaɗe jiɗiu kara ɓeeba chiya aiɗaɗai. Dachicha wauɗai panuu kĩra wauduuɗe jomaurã kʉ̃riaɗeeba biꞌia wari kãri baɗai.

Cristoɗeeba chokae ɓuai wiɗi uru nuree saka nibaɗai panuu

17 Machiba biawãra wauɗamera, mʉʉba Dachi Mechiu trʉ̃ɗeeba nau jaraaruu: waa Dachi Akõre adua nuree kĩra nibarã́sturu.* Ãchi kʉ̃risia biꞌiwãe nureeɗeeba nibabadau. 18 Ãchi kʉ̃risia pãriuɗe duanuuɗeeba Dachi Akõre ʉ̃rʉbena kuitaaɗakau. Ãchi sõ chaareaba Dachi Akõre adua nureeɗeeba, chi ichiba chokae duanubiai ɓuu wãꞌãe nuree. 19 Ãchi kakuaba barikiu kachirua wauduu kakua peraɗakau. Aɓa kachirua wauɗáituru kʉ̃riabadau. Chi kĩra nejasia joma wau panuu ʉ̃rʉbena, kakua ãkaaɗakau.

20 Maamina machiba Cristoɗe ijãasiɗauɗe kuitaasiɗau maka nureaɗaabai panuu. 21 Ãbarãba chi biawãra beɗea Cristo ʉ̃rʉbena biꞌia jaradeasiɗau mauɗe biawãra machiba ichi ʉ̃rʉbena ũriɗapeɗa ijãasiɗau. 22 Ãchimaa jaradeapeɗaaɗa naubʉ: naeɗe machiba wau panaɗa kĩra waa maka nibarã́sturu. Chi kakua kachirua wau kʉ̃ria ɓuuba setaɗeeba biꞌiwãe paneebiabarii. Mau ida ɓústuru, paru sore ẽebadau kĩra. 23 Maumaarã Dachi Akõremaa machi kʉ̃risia wiɗi ida waubiásturu. 24 Mau kʉ̃risia wiɗi Dachi Akõreba wausii machi ichi kĩra nureaɗamera. Mauɗeeba paru wiɗi jʉ̃ panuu kĩra, kʉ̃risia wiɗiɗeeba nibásturu. Maka machi Dachi Akõre daaɗe jipa, biꞌia nibaɗai chi biawãra beɗeaba jara ɓuu kĩra.

25 Mauɗeeba setaa ida ɓústuru. Aɓaburu biawãráturu waabenarã ome berreásturu, joma dachi araɓau kakuaɗebenaɗeeba.

26 Kĩruuduubʉrã kachirua waurã́sturu. Machi kĩru panuumisa, ewari araa ɓaebirã́sturu.* 27 Jʉbawãe niimaa ida setaa kũruabiarã́sturu.

28 Nechirua badaaɗa waa nechiruabai ɓuu, maumaarã ichi juaba trajai ɓuu ne uru ɓuai baita. Maka ichiba uru ɓuai chi nejarr barauwãe nuree aiɗai baita.

29 Beɗea kachirua berrearã́sturu. Maumaarã beɗea biáturu berreásturu waabenarã aiɗaɗai baita. Maka machi beɗea ũri nuree biꞌia panaɗai. 30 Kachirua wauduuba Dachi Akõre Jauri kĩra nomaabirã́sturu. Dachi Akõreba mau machimaa deasii ichiɗirã kuitaa panaɗamera. Ichi Jauri machi baara ɓuai aɓa Dachi Akõreba ichi ẽbẽrarã joma biꞌia ɓui ewariɗaa. 31 Machiba joma aɓau ʉ̃rʉbena sõɗe kachirua kʉ̃risiabadau, sõɗeeba kĩrubadau, oa kachirua berreabadau, kĩruɗeeba berreabadau, waabenarã ʉ̃rʉbena setaa jarabadau mauɗe waabenarã kachirua wauɗai kʉ̃risiabadau joma ida ɓústuru. 32 Sõbiaɗeeba nureásturu. Kĩra chuburia baraa nureásturu. Chi machiba kachirua waupeɗaaɗa kʉde uru ɓee ida ɓústuru, Dachi Akõreba machi kachirua Cristoɗeeba ida ɓuɗa kĩra.

Dachi Akõre warrarã saka nureaɗai panuu

5 Dachi Akõreba ichi warrarã ãrea kʉ̃ria ɓuu. Mauɗeeba machi ichi kĩra nureásturu. 2 Jomaurã kʉ̃riásturu Cristoba dachi kʉ̃ria ɓuu unubiɗa kĩra. Kʉ̃riaɗeeba dachi kakua ara ichi beabisii Dachi Akõremaa ãnimara baa dearuu kĩra. Dachi Akõreba mau biꞌia unusii.

3 Machi ẽbẽrarã Dachi Akõreɗerãɗeeba machi kakuaba barikiu kachirua wauɗaabai panuu, kĩra nejasia wauɗaabai panuu mauɗe waabenarãba uru ɓee kʉ̃riaɗaabai panuu. Mau ʉ̃rʉbena aɓau biɗa ɓistĩika biɗa berreaɗaabai panuu.* 4 Beɗea kachirua, nebʉrʉ biꞌiwãe mauɗe beɗea miadaa mia ʉibi berrearã́sturu, maka berreai biꞌiwãe ɓuuɗeeba.* Maumaarã Dachi Akõremaa biꞌia ɓuu áduru. 5 Machiba kuitaa panuu junebena wẽra ome kãibadau, ne kĩra nejasia kachirua wau nibabadau, mauɗe ne joma uru panaɗai kʉ̃riabadau chi Cristo mauɗe Dachi Akõreba deaɗai a panuu adauɗaabai. Ne joma uru ɓuu kʉ̃ria ɓuai Dachi Akõre kuenda juaba ne kapeɗaaɗaɗe ijãa ɓuu kĩra ɓuu, Dachi Akõre audeara, chi ichiba uru ɓuai kʉ̃ria ɓuu aude ijãa ɓuuɗeeba.

6 Aɓa biɗa setaɗeeba kachirua wauɗai panuu aaruubʉrã, ida setaa kũruabirã́sturu. Kachirua wau panuu baita Dachi Akõreba chi ichi beɗea ijãawẽa nuree kastikai. 7 Mauɗeeba kachirua waubadaurã ome araɓau waurã́sturu.

8 Naeɗe machi pãriuɗebena basii, maamina iɗibae Dachi Mechiu ome panuuɗeeba machi ʉ̃ɗaaɗebenarãbʉ. Mauɗeeba ʉ̃ɗaaɗebena warrarã kĩra nibásturu. 9 Ʉ̃ɗaaɗe nibaaruubʉrã sõbia nureaɗai, jipa wauɗai mauɗe biawãraɗeeba nibaɗai.* 10 Dachi Mechiuba biꞌia unu ɓuu kuitaaɗai baita jʉrʉ́sturu. 11 Pãriuɗebenarãba kachirua waubadauɗeeba ne bia neekau. Mauɗeeba araɓau waurã́sturu, maumaarã kuitaabiásturu ãchiba waubadau kachiruabʉ. 12 Biawãra dachi kĩra nejasiaɗai panuu ãchiba kachirua miru waubadau ʉ̃rʉbena berreaɗai baita. 13 Maamina ne joma ʉ̃ɗaaɗe ɓuuduuɗe saka ɓuu unubibadau, 14 ʉ̃ɗaaɗe ne joma unubadauɗeeba. Mau baita naka jarabadau:

«Ʉ̃rʉmase bichi kãi ɓuu. Kachiruaɗe biu ɓuaɗa jiraduse. Maabae Cristoba bichi ʉ̃ɗaaɗe ɓui».

15 Mauɗeeba kauwa nibásturu. Adua nuree kĩra nibarã́sturu, maumaarã kʉ̃risia kuitaaɗeeba nibásturu. 16 Machiba poyaa wauduucha biꞌia wáusturu, nau ewariɗe ẽbẽrarãba ne joma kachirua waubadauɗeeba. 17 Kʉ̃risiaswãe nuree kĩra nurearã́sturu, maumaarã ãrea kuitásturu kãare Dachi Mechiuba waubi ɓuu. 18 Ituaba biu nibarã́sturu. Mauba kachirua aude waubibarii. Biu nibaɗai audeara Dachi Akõre Jauriɗeeba nureásturu. 19 Dachi Akõre beɗeaɗe ɓʉ kuɓuu karibadau, ãbarãba karibadau mauɗe Dachi Akõre Jauriba karibi ɓuu chiya karibaɗai baita ãbua karísturu. Dachi Mechiumaa sõɗeeba karísturu biꞌia berreaɗai baita. 20 Dachi Mechiu Jesucristo trʉ̃ɗeeba ewaricha dachi Bajãaɗebena Akõremaa ne joma baita ichíturu kiɗibai ásturu.

Dachi kima ome saka nureaɗai panuu

21 Cristo wapea panuuɗeeba araɓauɗe chiya ijã́sturu.*

22 Wẽrarã kima bara nuree, machi kimarãba jara panuu ijãa panásturu, machiba Dachi Mechiu Cristo beɗea ijãa waubadau kĩra. 23 Mukĩra ichi wẽra chibaribʉ. Ara mau kĩra Cristo ichi ẽbẽrarã Chibaribʉ mauɗe ichi ẽbẽrarã ichi kakua kĩra nuree. Ichi ãchi Karibabariibʉ. 24 Cristo ẽbẽrarãba ichi beɗea ijãabadau kĩra wẽraba ichi kima beɗea joma ijãa ɓuai ɓuu.

25 Mukĩrarã wẽra bara nuree, machi wẽra kʉ̃riásturu, Cristoba dachi kʉ̃ria ɓuu unubiɗa kĩra. Kʉ̃riaɗeeba dachi baita ara ichi ida beabisii. 26 Ichiba maka wausii dachi Dachi Akõre baita biꞌia ɓui baita. Ichi beɗeaba dachi kachirua jeraasii baniaba jeraaɗa kĩra.* 27 Joma mau wausii dachi ichi baita ãrea biꞌia ɓui baita, jayoa kachiruaswãe, bibidruaswãe mauɗe barikiu kachiruaswãe. Ichiba kʉ̃ria ɓuasii dachi ichi baita biꞌia nureaɗai, kachirua jaraɗai a jaraswãe. 28 Ara mau kĩra mukĩraba ichi kima ãrea kʉ̃ria ɓuai ɓuu ara ichi kakua kʉ̃ria ɓuu kĩra. Mukĩraba ichi kima kʉ̃ria ɓuubʉrã, ara ichi kʉ̃ria ɓuu. 29 Aɓau biɗa ichi kakua kĩramaakau, maumaarã biꞌia ko ɓuuɗeeba ãrea nubarii. Ara mau kĩra Cristoba ichi ẽbẽrarã nubarii, 30 ichi kakua kĩra panuuɗeeba.* 31 Dachi Akõre beɗeaɗe naka ɓʉ kuɓuu:

32 Mau beɗeaba kʉ̃risia mechiu kuitaawẽa panaɗa kuitaabi ɓuu. Mʉʉba jara ɓuu Cristo ichi ẽbẽrarã ome ãbua panuuɗebena. 33 Mau ʉ̃rʉbena kuitaabi ɓumina machicha machi kima kʉ̃ria nureaɗai panuu ara machi kʉ̃ria panuu kĩra. Mauɗe wẽraba ichi kima wapeadee ɓuai ɓuu.

Warrarã akõrerã ome saka nureaɗai panuu

6 Warrarã, machi akõrerã beɗea ũribaba ũrísturu Dachi Mechiuba kʉ̃ria ɓuu kĩra, maka jipa ɓuuɗeeba. 2 Moisesba ɓʉɗaɗe naka jara ɓuu: «Machi akõre mauɗe machi nawe wapea panásturu».* Dachi Akõreba naeɗe naka aiɗai a ɓuasii: 3 Maka wauduubʉrã, «Machi nau druaɗe ewari ãrea biꞌia duanaɗai».*

4 Akõrerã, machi warrarã kĩrubiarã́sturu. Maumaarã biꞌia jaradea panuuɗeeba mauɗe jipa waubia panuuɗeeba Dachi Mechiuba kʉ̃ria ɓuu kĩra waribiásturu.

Chi chibari baita bari trajabadaurã ãchi chibari ome saka nureaɗai panuu

5 Chibari baita bari trajabadaurã, machi chi nau iujãaɗebena chibari wapea panuuɗeeba, ichiba jaraaruu machi sõɗeeba joma wáusturu Cristo beɗea ijãa panuu kĩra. 6 Ichiba ichia ɓuuɗéburu maka waurã́sturu, ichi ome biꞌia nureaɗai baita. Maumaarã sõɗeeba wáusturu, machi Cristo baita bari trajabadaurãɗeeba. Dachi Akõreba maka kʉ̃ria ɓuu. 7 Machi chibariba jara ɓuu waumaa panuuɗe, sõbiaɗeeba wáusturu Dachi Mechiu baita wau panuu kĩra. Kʉ̃risiarã́sturu nau iujãaɗebena chibari báitaburu maka traja panuu. 8 Machiba kuitaa panuu chibari baita bari trajabariibʉrã maebʉrã chibariswãe niibʉrã, Dachi Mechiuba dachimaa dachicha bajãaɗe deai dachiba waupeɗaaɗa kĩra.

9 Ara mau maka, machi chi chibarirã biɗa chi machi baita bari trajabadaurã biꞌia wáusturu. Ãchi iadaaɗai arã́sturu. Kĩrabásturu chi maarã Chibari bajãaɗebena ara machi Chibaribʉ. Ichiba joma araɓauɗe ichiabarii.

Kokoroaba ichi kakua ʉ̃rʉ chaarea ɓuu jʉ̃barii ʉ̃rʉbena

10 Mau awara ãbarã, Dachi Mechiu ãrea poyaabarii ɓuuɗeeba chaarea nureásturu. 11 Chi kokoroaba ichi ʉ̃rʉ chaarea ɓuu jʉ̃barii Dachi Akõreba machimaa deaɗa jʉ̃́sturu, machi chaarea nureaɗai baita, jʉbawãe niiba setaa kũruarãamera. 12 Ẽbẽrarã ome chĩo panuuwãema.* Maumaarã jai kachiruarã nau iujãa pãriuɗebenarã ómeburu chĩo panuu. Maarã dachiba unuɗakau chi mechiu nureerãbʉ, chi ʉtarebena jai kachiruarã karrarãbʉ. 13 Mauɗeeba chi kokoroaba ichi ʉ̃rʉ chaarea ɓuu jʉ̃barii Dachi Akõreba machimaa deaɗa jʉ̃́sturu. Maka jʉbawãe niiba kachiruaɗe ɓaebii chaaruuɗe machi poyaa dauchia jãadua panaɗai. Poyaaɗapeɗa ãrea chaarea nureaɗai.

14 Mauɗeeba biawãra beɗea ijãa panuuɗeeba chaarea nureásturu, kokoroaba kʉrrɗe jʉ̃barii jʉ̃ ɓuu kĩra. Jipa nibásturu kachiruaɗe ɓaebiarãaɗamera, kokoroaba ichi kakuaɗe chaarea ɓuu jʉ̃barii kĩra. 15 Chi beɗea bia Dachi Akõre ome biꞌia ɓuai ʉ̃rʉbena jaraɗe wãɗai baita nureásturu, kokoroaba chĩoɗe wãi baita ichi jʉ̃rʉɗe jʉ̃barii kĩra. 16 Mau awara ne jomaɗe Cristoɗe ijãa panásturu, kokoroaba ichi juaɗe adaubarii aɗu mirubarii kĩra. Jʉbawãe niiba kachiruaɗe ɓaebii chaaruuɗe, enadrʉma aoko ɓuuba drʉʉruu kĩra ɓuu. Maamina machiba Cristoɗe ijãa panuubʉrã, dauchia jãadua panaɗai chi juaɗe adaubarii aɗu mirubariiba chi enadrʉma kiɗa aoko ɓuu kiibibarii kĩra. 17 Mauɗe sõɗeeba ãrea kuitásturu Dachi Akõreba machi biawãra karibasii, kokoroaba ichi boroɗe chaarea ɓuu jʉ̃barii kĩra. Mau awara Dachi Akõre beɗea ichi Jauriɗeeba ãrea kuitásturu. Dachi Akõre beɗea espada kĩra ɓuu, kachirua ome poyaabariiɗeeba.

18 Ewaricha ne joma baita Dachi Akõre Jauriɗeeba ʉtaa iɗi panásturu. Dau ʉ̃rʉma panuuɗeeba, joma ichi ẽbẽrarã baita kakua ãkaaɗawẽa ʉtaa iɗi panásturu. 19 Mauɗe mʉ baita Dachi Akõremaa ʉtaa iɗi panásturu. Ichimaa ʉtaa iɗísturu mʉʉmaa kuitaabimera saka Cristo ʉ̃rʉbena berreai ɓuu. Maka mʉʉba wapeawẽa ẽbẽrarãmaa kuitaabiai chi beɗea bia Cristo ʉ̃rʉbena, Dachi Akõreba naeɗe kuitaabiwẽa ɓuaɗa. 20 Cristoba mʉ bʉisii mau beɗea jaradeamera. Jaradea ɓuu kakua mʉ jʉ̃a uru panuu. Dachi Akõremaa ʉtaa iɗísturu mʉʉba mau beɗea bia ʉ̃rʉbena wapeawẽa berreai baita mʉʉba maka waui ɓuuɗeeba.

Pabloba nau kartaɗe aanama ɓʉɗa

21 Dachiba kʉ̃ria panuu ãba Tiquicoba mʉ ʉ̃rʉbena machimaa joma nebʉrʉi kuitaaɗamera mʉ saka ɓuu mauɗe kãare wau ɓuu. Ichi Dachi Mechiu baita ichi kʉ̃ria trajabarii jipa nii, mauɗe ne jomaɗe biꞌia waubarii. 22 Mʉʉba ichi machimaa bʉiruu kuitaaɗamera dai saka panuu. Mauba machi kĩrajʉʉbiai.

23 Ãbarã, mʉʉba kʉ̃ria ɓuu Dachi Bajãaɗebena Akõreba mauɗe Dachi Mechiu Jesucristo biɗa machi aiɗaɗai chiya kʉ̃ria panaɗamera mauɗe biꞌia ijãa panaɗamera. Mauɗe mʉʉba kʉ̃ria ɓuu maarãba jirukaraayuwãe panabiaɗai. 24 Mʉʉba kʉ̃ria ɓuu Dachi Akõreba ichi sõbiaɗeeba joma Dachi Mechiu Jesucristo biawãra ãrea kʉ̃ria nuree aiɗa ɓuai. Biꞌia ɓuu maka ɓuai.