FILIPENSES

Pabloba nau kartaɗe naa ɓʉɗa

1 Mʉ Pablobʉ. Timoteo mʉ ome ɓuu. Dai Jesucristo baita bari trajabadaurãbʉ. Mʉʉba nau karta ãbarã Filipos puuruɗebenarã baita ɓʉʉruu: ijãabadaurã nubadaurã, ijãabadaurã aiɗabadaurã, joma ẽbẽrarã Dachi Akõreɗerã Jesucristo ome nureerã baita.* 2 Daiba kʉ̃ria panuu Dachi Bajãaɗebena Akõreba mauɗe Dachi Mechiu Jesucristo ãchi sõbiaɗeeba machi aiɗa panaɗai mauɗe ãchi jirukaraayuwãe panabiaɗai.

Pabloba ãbarã baita Dachi Akõremaa ʉtaa iɗiɗa

3 Mʉʉba machi kĩrabaaruucha Dachi Akõremaa ichíturu kiɗibai abarii. 4 Dachi Akõremaa ʉtaa iɗiiruucha mʉʉba machi baita kĩrajʉʉ ʉtaa iɗibarii, 5 machiba ichi beɗea ijãapeɗaaɗaɗeeɗebena mʉ aiɗa panuuɗeeba, chi beɗea bia Cristo ʉ̃rʉbena jaradeai baita. 6 Mʉʉba nau biawãra kuitaa ɓuu: Dachi Akõreba chi machi sõɗe traju biꞌia wauɗa biꞌia kãrii aɓa Jesucristo neeruuɗaa. Mauɗe ichiba machi joma biꞌia ua ɓuai. 7 Biꞌia ɓuu mʉʉba joma machi ʉ̃rʉbena maka kʉ̃risia ɓuai, machi ãrea kʉ̃ria ɓuuɗeeba. Mʉ jʉ̃a ɓuuɗe maebʉrã chi beɗea bia Cristo ʉ̃rʉbena biawãra kuitaabi ɓuuɗe Dachi Akõreba ichi sõbiaɗeeba machi mauɗe mʉ siɗa aiɗa ɓuu ichi beɗea jaradea panaɗamera. 8 Dachi Akõreba kuitaa ɓuu mʉʉba Jesucristo ãrea kʉ̃ria ɓuuɗeeba joma machi siɗa ãrea kʉ̃riakua ɓuu.

9 Mʉʉba Dachi Akõremaa ʉtaa iɗi ɓuu machi ãrea chiya kʉ̃ria nureaɗamera, ichi biꞌia kuitaaɗamera mauɗe saka nibaɗai panuu kuitaaɗamera. 10 Maka machiba ãrea kuitaaɗai kãare biꞌia ɓuu mauɗe Cristo neeruuɗe ichi daaɗe kachiruaswãe nureaɗai mauɗe machi ʉ̃rʉbena kachirua jaraɗayuswãe nureaɗai. 11 Mʉʉba ʉtaa iɗi ɓuu machi Jesucristoɗeeba ne jomaɗe jipa nureaɗamera. Maka ẽbẽrarãba Dachi Akõre chi mechiu nii aɗai mauɗe ichimaa biꞌia berreaɗai.

Ne jomaɗe Pablo Cristo baita ɓuu

12 Ãbarã, mʉʉba machimaa kuitaabiai kʉ̃ria ɓuu mʉ chi makaɗaba aiɗa ɓuu ẽbẽrarãba chi beɗea bia Cristo ʉ̃rʉbena ijãaɗamera. 13 Romaɗebena jaradea ua ɓuabarii de nubadau kokoroarãba mauɗe waabenarãba kuitaa panuu mʉ Cristo kakua jʉ̃a ɓuu. 14 Mauɗeeba ãrea ãbarãba Dachi Mechiuɗeeba Dachi Akõre beɗea wapeawẽa jara nibabadau.

15 Biawãra chi nuree mʉ ome kĩra kachirua panuuɗeeba, maarãba jarabadau Cristo ʉ̃rʉbena mʉ audeara kuitaa panuu aɗai baita. Maamina waabenarãba kʉ̃risia biaɗeeba jarabadau. 16 Maarãba kʉ̃riaɗeeba maka waubadau. Kuitaa panuu Dachi Akõreba mʉ nama ɓusii chi beɗea bia Cristo ʉ̃rʉbena biawãra arakʉɗe kuitaabiamera. Maamina chi nureerãba Cristo ʉ̃rʉbena jara nibabadau ãrea kuitaa nuree kʉ̃risia panuuɗeeba. Kʉ̃risia biaɗeeba maka wauɗakau. Kʉ̃risia panuu maka mʉ nama jʉ̃a ɓuuɗe aude kĩra nomaabiɗai. 17 —. 18 Maamina ¿mau sakaima? Kʉ̃risia biaɗeeba maebʉrã kʉ̃risia kachiruaɗeeba jara nibaaduubʉrã, Cristo ʉ̃rʉbena jara panuu. Mauɗeeba mʉ kĩrajʉʉ ɓuu.

Mauɗe kĩrajʉʉ ɓuai 19 mʉʉba kuitaa ɓuuɗeeba mʉ namabena awara wãaruu, machiba Dachi Akõremaa ʉtaa iɗi panuuɗeeba mauɗe Jesucristoba deaɗa Jauriba aiɗa ɓuuɗeeba. 20 Cristo kakua mʉ ne aɓa biɗa nejasiai kʉ̃riawẽa ɓuu, maumaarã ichi ʉ̃rʉbena berreai baita kĩra nejasiaswãe ɓuai kʉ̃ria ɓuu. Maka mʉʉba jomaurãmaa Cristo chi mechiu nii kuitaabiai, ewaricha wau ɓuabarii kĩra. Chokae ɓeeruubʉrã maebʉrã biuruubʉrã, mʉʉba kʉ̃ria ɓuu jomaurãba mʉʉɗeeba kuitaaɗai Cristo chi mechiu nii. 21 Mʉʉmaarã, mʉ chokae ɓuuɗe Cristo baita ɓuai, maamina biuruubʉrã aude biꞌia ɓuai. 22 Mʉ chokae ɓuuɗe Cristo ʉ̃rʉbena poyaa jaradea ɓuai. Mauɗeeba mʉʉba adua ɓuu kãare kʉ̃ria ɓuu, chokae ɓuai maebʉrã biui. 23 Chaarea ɓuu jarai baita mau omeɗebena sãu aude biꞌia ɓuu. Mʉʉmaarã biꞌia ɓuu biui, Cristo ome ɓuai baita. 24 Maamina machi baita biꞌia ɓuu mʉ chokae ɓuai. 25 Mauɗeeba kuitaa ɓuu machi aiɗai baita mʉ wabiɗa chokae ɓuai mauɗe waya machi ome ãbua ɓuai. Maka machiba Cristoɗe biꞌia ijãa panuuɗeeba kĩrajʉʉ panaɗai. 26 Jesucristoba mʉ waya machimaa adoeruuɗe machi ichi kakua biꞌia kĩrajʉʉɗapeɗa biꞌia jaraɗai.

27 Jipa nibásturu chi beɗea bia Cristo ʉ̃rʉbena jara ɓuu kĩra. Makarã mʉʉba machi ichiaɗe wãaruubʉrã, maebʉrã machi ome ɓuuwãeɗe machi ʉ̃rʉbena ũriiruubʉrã, kuitaai machiba araɓau kʉ̃risiaɗeeba ãbua ãrea ijãa panuu mauɗe ãbua ãrea traja panuu mau beɗea bia kuitaabiɗai baita. 28 Machi kĩramaabadau aɓa biɗa wapearã́sturu. Mauba kuitaabii Dachi Akõreba ãchi baribai, maamina machi karibai. Mau Dachi Akõreba joma wau ɓuu. 29 Ichi biaɗeeba machi iubasii aɓaburu Cristoɗe ijãa panaɗamera, maumaarã iusii Cristo kakua ãrea biꞌiwãe panaɗamera. 30 Machiba unusiɗau mʉ ãrea biꞌiwãe ɓuuɗe dauchia jãadua ɓuaɗa mauɗe jãabae ũri panuu wabiɗa dauchia jãadua ɓuu.* Ara mau kĩra machi siɗa ãrea dauchia jãadua panuu.

Dachi Akõreba Cristo jomaurã audeara chi mechiu ɓuɗa

2 Cristoɗe kĩrajʉʉ panuuɗeeba, machi kĩrajʉʉbia ɓuu ichiba kʉ̃ria ɓuuɗeeba, Dachi Akõre Jauri machi ome ɓuuɗeeba mauɗe ichi kʉ̃riaba machi kĩra chuburia ɓuuɗeeba, 2 mʉ naka ãrea kĩrajʉʉbísturu: araɓau kʉ̃risia uru panásturu, chiya kʉ̃ria panásturu mauɗe araɓau kʉ̃risiaɗeeba joma wáusturu. 3 Waabenarã audeara biꞌia nuree kʉ̃risia panuuɗeeba ne aɓa biɗa waurã́sturu. Mauɗe waurã́sturu machi báitaburu biꞌia nureaɗai baita. Maumaarã kʉ̃risiásturu waabenarã machi audeara biꞌia nuree. 4 Machicha biꞌia nureaɗai baita jʉrʉrã́sturu, maumaarã jʉrʉ́sturu waabenarã siɗa biꞌia nureaɗamera. 5 Jesucristoba kʉ̃risia ɓuaɗa kĩra kʉ̃risiásturu:

6 Ichi Dachi Akõremina, ara Dachi Akõre kĩra araɓauɗe ɓuai kʉ̃risiabasii.

7 Maumaarã ichi maka nibaɗa ida ɓusii chibari baita bari trajabarii bai baita. Maabae dachi kĩra nau kakuaɗe ɓeesii.

8 Makaaruuɗe miichuburi ɓeesii. Dachi Akõreba biui ɓuu asiiɗe ichi makasii. Cruzɗe ãrea biꞌiwãe ɓuapeɗa biui ɓumina mau makasii.

9 Mauɗeeba bajãaɗe Dachi Akõreba ichi chi aude mechiu ɓusii. Ichi jomaurã Mechiu ɓusii.*

10 Maka joma bajãaɗe nuree, nau iujãaɗe nuree mauɗe biuɗarã panabadauɗe nuree Jesús daaɗe õdarrɗe kopaneeɗai.

11 Mauɗe jomaurãba Jesucristo jomaurã Mechiu a jaraɗai mauɗe Dachi Bajãaɗebena Akõremaa biꞌia berreaɗai.

Ãbarã nau iujãaɗe saka nureaɗai panuu

12 Maka mʉ ãbarã chi kʉ̃ria, mʉ machi ome ɓuasiiɗeeba Dachi Akõre beɗea jara ɓuu kĩra wau panuu. Jãabae mʉ machi ome ɓuuwãemina Dachi Akõre ãrea wapea panuuɗeeba wau panásturu ichiba machi karibasiiɗeeba. 13 Ichiba machi aiɗa ɓuu ichiba kʉ̃ria ɓuu wau panaɗamera mauɗe maka wau kʉ̃ria panaɗamera.

14 Waabenarã ʉ̃rʉbena kachirua berreaɗawẽa mauɗe oa kachirua berreaɗawẽa joma wáusturu. 15 Maka machi ʉ̃rʉbena kachirua jaraɗayuswãe nureaɗai mauɗe jipa nureaɗai. Ẽbẽrarã ãrea kachirua waubadau tãeɗe panumina kachiruaswãe panásturu. Dachi Akõre warrarãɗeeba ãchi tãeɗe ʉtarebena pusterrea teɗechoabadau kĩra nuree. 16 Chi dachi chokae ɓuabiabarii beɗea ʉ̃rʉbena ãchimaa arakʉɗe kuitaabia panásturu. Maka Cristo neeruuɗe mʉ machi kakua kĩrajʉʉi. Mauɗe mʉʉba kuitaai mʉ bari ara jãka nibaabasii mauɗe bari trajaabasii. 17 Kãꞌãabariwãeɗe mʉ Cristo kakua beaɗai panuu. Maka uva ɓaa Dachi Akõremaa ea deabachiɗau kĩra ɓuai.* Ara mau kĩra machiba Cristoɗe ijãa panuu, ãnimara Dachi Akõremaa baa deai kĩra ɓuu.* Mauɗeeba mʉ machi ome ãrea kĩrajʉʉ ɓuu. 18 Ara mau kĩra machi siɗa mʉ ome ãbua kĩrajʉʉ nureaɗai panuu.

Timoteo mauɗe Epafrodito

19 Dachi Mechiu Jesusba kʉ̃riaruubʉrã mʉʉba Timoteo isa machimaa wãbii. Maka ichi waya mʉʉmaa neeruuɗe mʉ siɗa kĩrajʉʉ ɓuai machi saka panuu kuitaai ɓuuɗeeba. 20 Nama mʉ baara ichi kĩra nii wãꞌãe. Ichiba machi biawãra aiɗa kʉ̃ria ɓuu. 21 Jomaurãba ara ãchi biꞌia nureaɗai jʉrʉbadau, Jesucristoba kʉ̃ria ɓuu jʉrʉɗai baɗamaarã. 22 Maamina machiba kuitaa panuu Timoteoba biꞌia waubarii. Warrba ichi akõre aiɗabarii kĩra ichiba beɗea bia Cristo ʉ̃rʉbena aiɗa jaradea ɓuu. 23 Mʉ kãare saka wauɗai panuu kuitaaruuɗe Timoteo machimaa bʉii kʉ̃risia ɓuu. 24 Maamina kʉ̃risia ɓuu Dachi Mechiuba mʉ aiɗai, kãꞌãabariwãeɗe mʉ siɗa machimaa wãmera.

25 Machiba ãba Epafrodito mʉ aiɗamera bʉisiɗau. Mauba mʉ ome Dachi Akõre beɗea jaradea ɓuu kokoroa chĩo ɓuu kĩra. Mʉʉba machimaa ichi waya wãbii. 26 Ichiba machi biawãra unu kʉ̃ria ɓuu. Ãrea jirukaraa ɓuu, machiba ichi ẽpermo ɓuu ũrisiɗauɗeeba. 27 Biawãra ichi ẽpermo ɓuasii. Beraa biukausii. Maamina Dachi Akõreba ichi kĩra chuburiasii. Aɓaburu ichi kĩra chuburiabasii, maumaarã mʉ siɗa kĩra chuburiasii waya jirukaraa ɓeerãamera. 28 Mauɗeeba mʉʉba ichi waya isa wãbi kʉ̃ria ɓuu, machiba ichi unuuduuɗe waya kĩrajʉʉɗamera. Maka mʉ machi kakua ãrea jirukaraa ɓuabai. 29 Kĩrajʉʉ panuuɗeeba ichi biꞌia irsibísturu Dachi Mechiuɗeɗeeba. Chi ichi kĩra nuree ʉ̃rʉbena biꞌia kʉ̃risiásturu. 30 Cristoba waubi ɓuu kakua ichi beraa biukausii. Chi machiba mamauba mʉ baita poyaa wauɗawẽa panuu, ichiba biui adua wausii.

Cristoɗéburu ijãaɗai panuu

3 Mau awara ãbarã, Dachi Mechiuɗeeba kĩrajʉʉ panásturu. Mʉʉba nau beɗea naa ɓʉsmina, ara mau ɓʉi baita ida ɓukau. Maka kachiruaɗebena machi nu ɓuai.

2 Ẽbẽrarã usa kĩra nureeɗebena kauwa duanásturu, maarãba kachirua waubadauɗeeba. Maarãba jaradeabadau mukĩra chi kakua tõoɗai panuu ẽbẽrarã Dachi Akõreɗerã nureaɗai baita.* 3 Maamina dachi chi biawãra mukĩra chi kakua tõopeɗaaɗabʉ.* Dachiaburu Dachi Akõre Jauriɗeeba ichimaa biꞌia berreabadau. Mauɗe Jesucristoba dachi baita wauɗa biꞌia jarabadau. Dachiba kʉ̃risiaɗakau Dachi Akõreba dachi jipa nuree unui, dachiba wau panuu kakua. 4 Mʉʉba nau kakuaɗe biꞌia wauɗa kakua maka kʉ̃risia ɓuai ɓumina, maka kʉ̃risiakau. Biawãra aɓauba wau ɓuu kakua Dachi Akõreba jipa unui kʉ̃risiaruubʉrã, ichi audeara mʉʉba aude maka poyaa kʉ̃risia ɓuai ɓuu. 5 Mʉ danaba mʉ adauɗa 8 ewari baɗakare, mʉ mukĩra chi kakua tõosiɗau. Mʉ israelɗebenabʉ, Benjaminɗebena neeɗabʉ. Mʉ nabẽraeɗebenarã chi biawãra hebreorã basii. Fariseo basiiɗeeba mʉʉba Moisesba ɓʉɗa kauwa waubachii. 6 Mau judiorã ley ãrea waubachiiɗeeba Cristoɗe ijãa nuree wãraabachii kachirua waui baita. Mau judiorã ley ãrea waubachiiɗeeba aɓau biɗa mʉ ʉ̃rʉbena kachirua jaraɗayuswãe nii.

7 Maamina ne joma mʉʉba naeɗe biꞌia unu ɓuaɗa, jãabae Cristoɗe ijãa ɓuuɗeeba mau biꞌia unukau. 8 Biawãra mʉ Mechiu Jesucristo kuitaai ne joma audeara bibuara ɓuu. Mʉʉba kʉ̃risia ɓuaɗa ichi kakua joma ida ɓusii. Joma mau nejarr kĩra unusii Cristo kuitaai baita 9 mauɗe ichi ome ɓuai baita. Mʉ ichi ome ɓuuwãe chi Moisesba ɓʉɗaɗeeba, maumaarã maka nii Cristoba ichi Akõreba jaraɗa kĩra wausiiɗeeba, dachi kakua biusiiɗeeba. Mʉʉba Cristoɗe ijãa ɓuuɗeeba, Dachi Akõreba mʉ ichi ome uru ɓuu. 10 Mʉʉba Cristo ãrea unui kʉ̃ria ɓuu. Ichi Dachi Akõre poyaabariiɗeeba chokae jiradusii. Mʉ ara mau poyaabariiɗeeba ichi baara nibai kʉ̃ria ɓuu. Mauɗeeba ichi ãrea biꞌiwãe ɓuaɗa kĩra mʉ siɗa biꞌiwãe ɓuai kʉ̃ria ɓuu, mauɗe ichi biuɗa kĩra biui kʉ̃ria ɓuu. 11 Maka kʉ̃ria ɓuu Dachi Akõreba mʉ chokae jiradubiiɗeeba.

12 Mʉʉba jarawẽa ɓuu mʉ jãabae maka nii. Mauɗe jarawẽa ɓuu mʉ jãabae jipa nii. Maamina maka ɓuai baita mʉ iɗiiɗeeba naa wãaruu, Cristo Jesusba mʉ mau baita jidausiiɗeeba. 13 Ãbarã, mʉʉba jarawẽa ɓuu mʉ biawãra maka nii; maamina mʉʉba nau wau ɓuu: mʉʉba naeɗe wau ɓuaɗa adua ɓeepeɗa naa pira wãaruu, Cristo kĩra ɓuai baita. 14 Pira kãrii, chi neei ɓuumaa neei baita, Jesucristoɗeeba ne bia bajãaɗebena adaui baita, Dachi Akõreba iusiiɗeeba.

15 Joma dachi Cristo ãrea kuitaa nureerãba ara mau kĩra kʉ̃risiaɗai panuu. Machiba ãyaa kʉ̃risia panuubʉrã, Dachi Akõreba saka kʉ̃risiaɗai panuu arakʉɗe kuitaabiai. 16 Maamina dachiba kuitaapeɗaaɗa joma wauɗai panuu.

17 Ãbarã, mʉ kĩra panásturu. Machi tãeɗe nibasiɗauɗe daiba unubiasiɗau saka nureaɗai panuu. Ãbarã maka nuree baara nibásturu. 18 Ɓes ãrea mʉʉba nau machimaa jarasii mauɗe jẽa ɓuuba waya jaraaruu: ẽbẽrarã ãreaba ãchiba wau panuuɗeeba unubiabadau chi Cristo cruzɗe biuɗa ʉ̃rʉbena beɗea kuitaaɗai kʉ̃riaɗakau.* 19 Mauɗeeba biuduuɗe Dachi Akõreba ãchi joma ichiai. Dachi Akõre ida ɓubadau, ãchi kakuaba kʉ̃ria ɓuu wauɗai baita.* Mia pera wau panuu ʉ̃rʉbena ãrea berreabadau. Aɓa nau iujãaɗebenáturu kʉ̃risiabadau. 20 Maamina dachi bajãaɗebenarãbʉ. Dachi Karibabarii mamauba neei eseɗau panuu. Mau Dachi Mechiu Jesucristobʉ. 21 Ichi neeruuɗe chi kakua biui ɓuu ãyaa waui. Mauɗe ichi kakua kĩra ãrea biꞌia ɓeei. Ichi poyaabariiɗeeba maka waui. Mau poyaabariiɗeeba ichiba ne joma poyaai.

4 Mauɗeeba mʉ ãbarã, mʉʉba jaraɗa kĩra Dachi Mechiuɗe ãrea ijãa panásturu. Mʉʉba machi ãrea kʉ̃ria ɓuu mauɗe unu kʉ̃ria ɓuu. Machi kakua, mʉ ãrea kĩrajʉʉ ɓuu. Machi mʉ kĩrajʉʉbibadaubʉ.*

Pabloba ãbarãmaa waubiaɗa

2 Mʉʉba neekau Evodiamaa mauɗe neekau Sintiquemaa chi chuburia iɗiiruu chiya berreaɗamera, Dachi Mechiu Jesucristo ome panuuɗeeba. 3 Mauɗe bichi, chi mʉ ome Dachi Akõre traju waubarii, mʉʉba bichimaa iɗiiruu mau neekaurã aiɗamera. Ãchi Clemente baara mauɗe waabenarã siɗa mʉ ome ãrea trajasiɗau chi beɗea bia Cristo ʉ̃rʉbena kuitaabiaɗai baita. Joma ãchi trʉ̃ Dachi Akõreba chi ewaricha chokae duanabarii kartaɗe ɓʉ uru ɓuu.

4 Dachi Mechiu Jesucristo ome panuuɗeeba ewaricha kĩrajʉʉ panásturu. Mʉʉba waya jaraaruu: ¡Kĩrajʉʉ panásturu! 5 Machi ẽbẽrarã bia nuree, jomaurãmaa unubiásturu. Dachi Mechiu neei ewari ʉ̃rʉ ba ɓuu.

6 Barikia kakua ãrea jirukaraarã́sturu, maumaarã Dachi Akõremaa ʉtaa iɗísturu, ichimaa chi chuburia iɗísturu, mauɗe ne joma ʉ̃rʉbena ichíturu kiɗibai ásturu. 7 Mauba Dachi Akõreba machi sõ mauɗe machi kʉ̃risia jirukaraayuwãe duanubiai Jesucristo ome panuuɗeeba. Mau jirukaraayuwãe panaɗai ẽbẽrarãba ãchi du aɓa poyaa kauwa kuitaaɗaabai.

8 Mau awara ãbarã, joma chi biawãra ʉ̃rʉbena, ne joma dachiba biꞌia ɓuu unubadau ʉ̃rʉbena, joma jipa ɓuu ʉ̃rʉbena, joma kachiruaswãe ɓuu ʉ̃rʉbena, jomaurãba kʉ̃riabadau ʉ̃rʉbena, joma biꞌia trʉ̃ poa ɓuu ʉ̃rʉbena, ne joma biꞌia ʉ̃rʉbena mauɗe ne joma dachiba biꞌia jarabadau ʉ̃rʉbena kʉ̃risia panásturu. 9 Mʉʉba jaradeaɗa, machiba mʉʉɗeeba kuitaapeɗaaɗa, mʉʉɗeeba ũripeɗaaɗa mauɗe unupeɗaaɗa joma wau panásturu. Mauɗe Dachi Akõre machi ome ɓuai mauɗe machi jirukaraayuwãe duanubiai.

Ãbarãba ne urubʉipeɗaaɗa ʉ̃rʉbena Pabloba ãchíturu kiɗibai aɗa

10 Dachi Mechiuɗeeba mʉ ãrea kĩrajʉʉ ɓuu, machiba mʉ ʉ̃rʉbena kʉ̃risiasiɗauɗe waya ne urubʉisiɗauɗeeba. Mau machiba naeɗe wau kʉ̃ria panasmina poyaa wauɗaabasii. 11 Maka jarawẽa ɓuu mʉ ne wãꞌãe ɓuuɗeeba. Mʉʉba kuitaasii saka jirukaraayuwãe ɓuai chi mʉʉba uru ɓuuɗeeba. 12 Chi nejarr barauwãe ɓuuɗe mauɗe ãrea uru ɓuuɗe saka ɓuai kuitaa ɓuu. Mʉʉba kuitaasii barikiaɗe saka jirukaraayuwãe ɓuai, ɓi jãwaa ɓuuɗe mauɗe jarrbisia ɓuuɗe; ãrea uru ɓuuɗe mauɗe ne wãꞌãe ɓuuɗe. 13 Cristoɗeeba joma poyaa waui, ichiba mʉʉmaa meserãa ɓuabiiruuɗeeba. 14 Maamina mʉʉba machíturu kiɗibai aaruu, mʉ ãrea biꞌiwãe ɓuuɗe aiɗasiɗauɗeeba. Biawãra machiba biꞌia wausiɗau.

15 Ãbarã Filipoɗebenarã, machiba kuitaa panuu chi beɗea bia Cristo ʉ̃rʉbena araɓaeɗeeɗe ijãasiɗauɗe, mʉ Macedonia druaɗebena wãsiiɗe waabenarã ãbarã puuruɗebenarãba mʉ baita ne urubʉiɗaabasii. Machiaburu mʉ baita makasiɗau.* 16 Mʉ Tesalónica puuruɗe ɓuasiiɗe machiba ɓes ãrea urubʉisiɗau mʉ aiɗaɗai baita. 17 Mʉʉba iɗiwẽa ɓuu machiba ne urubʉiɗamera, maumaarã kʉ̃ria ɓuu biꞌia wau panuuɗeeba Dachi Akõreba machi biꞌia aiɗai. 18 Ne joma machiba ãba Epafrodito ome urubʉipeɗaaɗa mʉʉba adausii. Mauɗeeba ãrea uru ɓuu. Mauba mʉ biꞌia ɓuai. Machiba urubʉipeɗaaɗa chi kera tuwaa Dachi Akõremaa deaɗa kĩra ɓuu. Mau Dachi Akõreba biꞌia unu ɓuu. 19 Biawãra joma machiba ne wãꞌãe panuu mʉ Bajãaɗebena Akõreba ne bia uru ɓuuɗebena Jesucristoɗeeba deai. 20 Mauɗeeba ewaricha Dachi Bajãaɗebena Akõremaa biꞌia berreaɗai panuu. Biꞌia ɓuu maka ɓuai.

Pabloba nau kartaɗe aanama ɓʉɗa

21 Joma ẽbẽrarã Dachi Akõreɗerã Jesucristo ome nuree biꞌia panábaɗe a jarásturu. Ãbarã mʉ ome panuurã biɗa biꞌia panábaɗe a jarabʉi panuu. 22 Joma ẽbẽrarã Dachi Akõreɗerã namabenarãba biꞌia panábaɗe a jarabʉi panuu. Ãbarã Romaɗebena chi aude mechiu nii baita trajabadaurã biɗa biꞌia maka jarabʉi panuu.

23 Mʉʉba kʉ̃ria ɓuu Dachi Mechiu Jesucristoba ichi sõbiaɗeeba machi aiɗa ɓuai.*