COLOSENSES

Pabloba nau kartaɗe naa ɓʉɗa

1 Mʉ Pablobʉ. Mʉ Jesucristoba bʉiɗabʉ, Dachi Akõreba mau kʉ̃riasiiɗeeba. Dachi ãba Timoteo mʉ ome ɓuu. 2 Mʉʉba nau karta ɓʉʉruu ẽbẽrarã Dachi Akõreɗe, dachi ãbarã Jesucristoɗe ijãabadaurã Colosa puuruɗebena baita. Daiba kʉ̃ria panuu Dachi Bajãaɗebena Akõreba* ichi sõbiaɗeeba machi kariba ɓuai mauɗe jirukaraayuwãe ɓuabiai.*

Pabloba ãbarã baita Dachi Akõremaa ʉtaa iɗiɗa

3 Dachi Mechiu Jesucristo Akõre, Dachi Akõremaa ʉtaa iɗiiduucha daiba machi baita ichíturu kiɗibai abadau. 4 Daiba ũri panuu machiba Jesucristoɗe ijãa panuu mauɗe joma ẽbẽrarã Dachi Akõreɗerã ãrea kʉ̃ria panuu. 5 Machi maka panuu, kuitaa panuuɗeeba Dachi Akõreba machi baita ne bia bajãaɗe nu uru ɓuu. Mau machiba naeɗe ũrisiɗau chi beɗea biawãra Jesucristo ʉ̃rʉbena machimaa neesiiɗe. Mau beɗea bia 6 machimare ũrisiɗauɗe Dachi Akõreba ichi sõbiaɗeeba machi biawãra karibai ɓuu joma kuitaasiɗau. Ara mau kĩra mau ewariɗeeɗebena joma druacha ẽbẽrarãba mau beɗea ãrea ijãamaa duanuu nejõo bakuru chaubarii kĩra. 7 Mau beɗea dachi ãba Epafrasba machimaa kuitaabiasii. Ichi daiba biawãra kʉ̃ria panuu. Dai ome araɓauɗe wau ɓuu. Ichi Cristo baita bari trajabariibʉ. Machi aiɗai baita ne jomaɗe jipa waubarii.* 8 Ichiba daimaa jarasii machi Dachi Akõre Jauriɗeeba biawãra chiya kʉ̃ria panuu.

9 Maka ũrisiɗauɗeeɗebena daiba machi baita ewaricha Dachi Akõremaa ʉtaa iɗi panuu ichiba waubi kʉ̃ria ɓuu machimaa joma kuitaabiamera. Mau awara ʉtaa iɗi panuu ichiba maarãmaa kʉ̃risia kuitaa mauɗe kauwa ũri ichi Jauriɗeeba joma deamera. 10 Maka machi poyaa jipa nibaɗai Dachi Mechiuba kʉ̃ria ɓuu kĩra mauɗe ne jomaɗe ichiba machi biꞌia unui. Biawãra machiba ne joma biꞌia wau panuuɗeeba nejõo biꞌia chaubarii kĩra duanaɗai mauɗe Dachi Akõre biꞌia unu kãribaɗeaɗai. 11 Daiba Dachi Akõremaa ʉtaa iɗi panuu ichi poyaabarii ãrea ɓuuɗeeba machi chaarea panaɗamera. Maka machi ãrea biꞌiwãe paneeduuɗe mauɗe waabenarãba machi kachirua wauduuɗe, biꞌia dauchia jãadua panaɗai. 12 Maka kĩrajʉʉ Dachi Bajãaɗebena Akõremaa biꞌia nii aɗai. Machi joma ichi ẽbẽrarã ome ʉ̃ɗaaɗe biꞌia ɓusii ichiba uru ɓuuɗebena adauɗamera. 13 Dachi Akõreba chi jʉbawãe nii pãriuɗebena dachi karibapeɗa ɓusii ichi Warr kʉ̃ria nii juaɗe ichiɗirã baara ua ɓuamera. 14 Ichi Warrɗeeba Dachi Akõreba dachi kachiruaɗebena karibasii.* Dachiba kachirua waupeɗaaɗa joma perdonasii.

Cristo joma audeara mechiu nii

21 Kachirua wau panuuɗeeba machi mau naeɗe Dachi Akõreɗebena awara nureasii mauɗe machiba kachirua kʉ̃risia panuuɗeeba Dachi Akõre kĩramaa panasiɗau. 22 Maamina Cristo biusiiɗeeba Dachi Akõreba machi mau ome biꞌia ɓusii ichi daaɗe kachiruaswãe nureaɗamera mauɗe waabenarãba machi ʉ̃rʉbena kachirua jaraɗayuswãe nureaɗamera. 23 Mauɗeeba Cristoɗe ãrea ijãa panuuɗeeba dauchia jãadua nureaɗai panuu. Chi beɗea bia Cristo ʉ̃rʉbena machiba ũripeɗaaɗa ida ɓuɗaabai panuu, maumaarã Dachi Akõreba deai jaraɗa eseɗauɗai panuu. Mau beɗea bia joma nau iujãaɗe* jaradea panuu. Ara mau beɗea mʉa biɗa jaradea ɓuu.

Pabloba ãbarã aiɗai baita jaradea ɓuaɗa

24 Jãabae mʉʉba machi aiɗai baita ãrea biꞌiwãe ɓumina kĩrajʉʉ ɓuu. Mauɗe Cristo baita wabiɗa biꞌiwãe ɓuai ɓuuɗeeba, ãrea biꞌiwãe nibai joma ichi ẽbẽrarã aiɗai baita. 25 Dachi Akõreba mʉ ichi ẽbẽrarã baita trajabarii ɓusii. Mauɗeeba ichi beɗea joma arakʉɗe machimaa jaradea ɓuu. 26 Nabẽraeɗebena ewariɗe mau beɗea Dachi Akõreba kuitaabiawẽa ɓuasii, maamina iɗi mau beɗea ichi ẽbẽrarãmaa kuitaabiasii. 27 Mau beɗea naeɗe kuitaabiawẽa ɓuaɗa, ichiɗirãmaa kuitaabiasii. Mau beɗea bia chi judiowãerã baita biɗa ɓuu. Ichiba kuitaabiawẽa ɓuaɗa nau: Cristo machi sõɗe ɓuu. Ichiɗeeba kuitaa panuu ichi biaɗeeba ne adauɗai.

28 Joma kʉ̃risia kuitaaɗebena daiba Cristo ʉ̃rʉbena jomaurãmaa jaradea panuu jipa nibaɗamera. Maka daiba ẽbẽrarã joma Cristoɗeeba jomaɗe jipa panuu Dachi Akõremaa unubiaɗai. 29 Mau baita mʉ kʉrrjĩruwẽa traja ɓuu Cristoba ichi poyaabarii ãrea dea ɓuuɗeeba.

2 Mʉʉba kʉ̃ria ɓuu machiba nau kuitaaɗai: mʉ dauchia jãadua ãrea traja ɓuu machi Colosaɗebenarã, ãbarã Laodicea puuruɗebenarã mauɗe joma ãbarã mʉ unuɗakau aiɗai baita. 2 Mʉʉba kʉ̃ria ɓuu jomaurã dauchia jãadua kĩra ʉɓʉa panabiai, kʉ̃riaɗeeba ãbua biꞌia duanaɗai mauɗe biawãra kʉ̃risia kuitaa nureeɗeeba biꞌia duanaɗai. Maka Dachi Akõreba mau naeɗe kuitaabiawẽa ɓuaɗa kuitaaɗai. Mau Cristobʉ. 3 Ichiaburu Dachi Akõre kʉ̃risia kuitaaɗai mauɗe ne ãrea kuitaaɗai baita poyaa deai. Mau kʉ̃risia kuitaaɗai mauɗe ne kuitaaɗai ãrea biꞌia nuree. 4 Joma mau mʉʉba jara ɓuu aɓauba machimaa setaa jararãamera, setaa mipitaa berrearuuba. 5 Mʉ machi ome ɓuuwãemina mʉ kʉ̃risia machi ome ɓuu. Mʉʉba kuitaa ɓuu machi ãbua biꞌia panuu mauɗe Cristoɗe ãrea ijãa panuu. Mauɗeeba kĩrajʉʉ ɓuu.

Chokae ɓuai wiɗi Cristoɗe uru panuu

6 Machiba Dachi Mechiu Jesucristoɗe ijãasiɗauɗeeba ichiɗeeba nibásturu. 7 Ichiɗeeba chaarea panásturu ãrea karr jidau panuu kĩra mauɗe de bia wauɗa kĩra. Ichiɗe ãrea ijãa panásturu ãbarãba jaradeapeɗaaɗa kĩra. Ewaricha Dachi Akõremaa ichíturu kiɗibai ásturu.

8 Kauwa panásturu aɓauba machimaa setaa jararãamera, chi dachi aiɗakau biawãrawãe ɓuu kʉ̃risiabadauɗeeba. Mau joma nabẽraeɗebena kʉ̃risiabadau nau iujãaɗebena jauri meserãa nureeɗebenabʉ. Mau beɗea Cristoɗebenawãebʉ. 9 Cristo ẽbẽra kakuaɗe biawãra Dachi Akõrebʉ.* 10 Machi Cristoɗe ẽbẽrarãɗeeba, ichiɗeeba joma uru panuu Dachi Akõre ome biꞌia nureaɗai baita. Mau joma chi meserãa nuree Mechiubʉ. 11 Machi ichiɗirã nureeɗeeba, machi mukĩra chi kakua tõopeɗaaɗa kĩra nuree. Maamina ẽbẽra juaba maka wauɗaabasii. Maumaarã jara ɓuu dachi kakuaba kachirua wau kʉ̃ria ɓuuɗebena karibasii. Mau mukĩra chi kakua tõoɗa Cristoba wausii. 12 Dachi Akõreba ichi poyaabariiɗeeba Cristo chi biuɗaɗebena chokae jiradubisii. Machiba Dachi Akõre maka poyaabarii nii ijãasiɗauɗeeba boro easiɗauɗe unubisiɗau Cristo ome jau ɓupeɗaaɗa mauɗe Dachi Akõreba machi Cristo ome chokae jiradubiɗa.

13 Cristoɗe ijãaɗai naeɗe machi biu panasiɗau kachirua wau waubachiɗauɗeeba. Mauɗe dachi kakuaba kachirua wau kʉ̃ria ɓuu waubachiɗau.* Maamina Dachi Akõreba machi Cristo baara chokae duanubiasii. Joma dachiba kachirua waupeɗaaɗa ichiba perdonasii. 14 Biawãra kachirua wau panuuɗeeba dachi Dachi Akõremaa deai ɓuu deaɗai panasiɗau. Mauɗeeba Moisesba ɓʉɗaɗe ɓʉ kuɓuu dachi biuɗai panuu.* Maamina Cristo cruzɗe biusiiɗe Dachi Akõreba mau deaɗai panaɗa joma ida ɓusii. 15 Mauɗeeba Dachi Akõreba joma dachiba unuɗakau chi mechiu nuree poyaasii. Mau wauɗa ichiba jomaurãmaa unubiasii.*

16 Mauɗeeba machiba kobadau ʉ̃rʉbena mauɗe dobadau ʉ̃rʉbena ẽbẽrarãba kachirua jaraaduubʉrã, maarã beɗea ijãarã́sturu. Machiba ẽbẽrarã kĩrajʉʉ bara ɓuabarii ewari waubadau ewari nuɗakau, jeɗako wiɗi nuɗakau mauɗe bari panabadau ewari nuɗakau ʉ̃rʉbena maarãba kachirua jaraaduubʉrã, ijãarã́sturu. 17 Dachi Akõreba joma mau waui ɓuaɗa tõroroa unubi ɓuasii. Maamina ichiba waui jaraɗa Cristoɗeeba joma wausii.

18 Mau baita aɓauba machiba ne bia bajãaɗe adauɗaabai aaduubʉrã, ijãarã́sturu.* Maarã berreabadaurã setaa maka nibabadau waabenarã chi aude kaebeu nibabadau kĩra. Maarãba angelerã ãrea kʉ̃riabadau. Chi maarã daumaa unubiapeɗaaɗa ãrea jaradeabadau. Dachi juaba biꞌiwãe waui kʉ̃ria ɓuuɗeeba ẽbẽra jaradea ua ɓuabadaurã mechiurã kĩra ãyaa kʉ̃risiabadau. 19 Ãchi Dachi Mechiu Cristo* ome panuuwãe. Maamina ẽbẽrarã Cristoɗeeba ichiɗeeba ne joma uru panuu ichi ome ãbua biꞌia panaɗai baita. Ichiɗeeba dachi waribadau Dachi Akõreba waribi ɓuu kĩra.

20 Machi Cristo ome ãbua biusiɗauɗeeba nau iujãaɗebena jauri mechiurãɗe ijãaɗaabai panuu. Mau ¿sakãe wabiɗa mau kʉ̃risia ijãa panuma nau iujãaɗebenarã ijãabadau kĩra? 21 Naka jarabadau: «Jãkʉ waurã́sturu, jãkʉ ko chaarã́sturu, jãkʉ jidaurã́sturu». 22 Joma mau ẽbẽrarãba ãchi kʉ̃risiaɗeeba jaradeabadau. Mau kʉ̃risia ijãaɗaabai panuu joma dachiba kopeɗaaɗa mauɗe dopeɗaaɗa wãꞌãebariiɗeeba. 23 Biawãra mau kʉ̃risia kuitaa kĩra ɓuu. Ãchiba jarabadau ara dachi du aɓa ne waubadauɗeeba Dachi Akõre kaaɗe poyaa biꞌia wãɗai, waabenarã audeara kaebeu nibaɗai panuu mauɗe ãrea biꞌiwãe panaɗai panuu, ara dachi du aɓa puꞌuaduuɗeeba. Maamina joma mauba dachi kakuaba kachirua wau kʉ̃ria ɓuu maka waubikau.

Ne bajãaɗebena jʉrʉɗai panuu

3 Machi Cristo ome chokae jiradusiɗauɗeeba ne bajãaɗebena jʉrʉ panásturu. Aria Cristo Dachi Akõre jua biare akʉ ɓuu. 2 Ne bajãaɗebena kʉ̃risia panásturu, mauɗe nau iujãaɗebena kʉ̃risia panarã́sturu. 3 Maka nibaɗai panuu, Cristo ome biuɗakare ichi ome chokae panuuɗeeba. Mau waabenarã ẽbẽrarãba kuitaaɗakau. Maamina Cristo Dachi Akõre ome chokae ɓuuɗeeba, machi siɗa Dachi Akõre ome chokae panuu. 4 Machi Cristoɗeeba chokae panuuɗeeba, ichi waya unubiiruuɗe machi ichi ome panaɗai. Mauɗe ara ichi kĩra, kĩrawãrea panaɗai.*

Cristoɗeeba dachi chiwiɗi paneeɗa

5 Mauɗeeba joma nau iujãaɗebena kʉ̃risia machi sõɗe ɓuu ida ɓústuru. Dachi kakuaba barikiu kachirua waurã́sturu, mia kĩra nejasia waurã́sturu, ne mia pera waurã́sturu, kʉ̃risia kachirua kʉ̃risiarã́sturu, mauɗe ne kaebea ãrea uru panaɗai kʉ̃ria panarã́sturu. Chi ne kaebea ãrea kʉ̃ria ɓuu, Dachi Akõre kuenda juaba ne kapeɗaaɗaɗe ijãa ɓuu kĩra nii. 6 Joma mau kachirua baita Dachi Akõreba ichiɗe ijãaɗakau nuree kastikai.* 7 Machi siɗa eskareeɗe maka nibabachiɗau. 8 Maamina jãabae nau joma ida ɓústuru: machi sõɗeeba kĩrubadau, oa kachirua berreabadau, waabenarãmaa kachirua waubadau, waabenarã ʉ̃rʉbena setaa jarabadau mauɗe beɗea kachirua jarabadau joma ida ɓústuru.

9 Waabenarãmaa setaa jararã́sturu. Machi ẽbẽra Cristoɗe ijãaɗai naeɗe maka panaɗa ida ɓusiɗau, dachiba chi paru sore ẽebadau kĩra. Mauɗe machiba kachirua waupeɗaaɗa ida ɓusiɗau. 10 Paru chiwiɗi jʉ̃ʉduu kĩra machi chiwiɗi paneesiɗau. Dachi Akõreba maka wausii. Mau awara machi biꞌia wau kãriɗau ichi kĩra nureaɗamera mauɗe ichi biꞌia unuɗamera. 11 Dachi Akõreba maka wausiiɗeeba ichi daaɗe griego judio ome araɓauɗe nii. Mukĩra chi kakua tõo nii mukĩra chi kakua tõowẽa nii ome araɓauɗe nii. Drua ãibena, ne adua nii ome araɓauɗe nii. Chi chibari baita bari trajabarii, chi chibariswãe nii ome araɓauɗe nii. Cristo chi aude bibuara nii. Ichi jomaurã sõɗe ɓuu.

12 Dachi Akõreba machi kʉ̃riaɗeeba jʉrʉ adausii ichi baita biꞌia nureaɗamera. Mauɗeeba waabenarã kĩra chuburia panásturu. Ẽbẽra bia panásturu. Machi waabenarã audeara biꞌia nuree kʉ̃risiarã́sturu. Jomaurã ome kʉ̃risia biaɗeeba panásturu. Ne jomaɗe jãadua panásturu. 13 Jomaurã ome jãaduai kuitaa panásturu. Aɓauba kachirua wauruubʉrã mau kachirua wauɗa perdonásturu. Machiba kachirua waupeɗaaɗa Dachi Mechiuba kʉde ɓeei ida ɓuɗa kĩra machia biɗa kʉde ɓeei ida ɓústuru. 14 Mau awara waabenarã kʉ̃ria duanásturu. Maka machi jomaurã ome ãbua biꞌia duanaɗai. 15 Dachi Akõreba machi iusii machi kakua ara aɓa nii kĩra panaɗamera. Cristoba machi sõɗe apii ɓuai dea ɓuu.* Mauba kuitaabii kãare wauɗai panuu. Maka panásturu. Mauɗe Dachi Akõremaa ichíturu kiɗibai ásturu.

16 Beɗea Cristo ʉ̃rʉbena machi sõɗe uru panásturu. Joma Dachi Akõre kuitaaɗeeba chiya jaradeásturu mauɗe chiya aiɗásturu biꞌia ijãaɗai baita. Dachi Akõre beɗeaɗe ɓʉ kuɓuu karísturu, ãbarãba karibadau mauɗe Dachi Akõre Jauriba karibi ɓuu siɗa Dachi Akõremaa karísturu. Sõɗeeba ichíturu kiɗibai jara panuuɗeeba karísturu. 17 Machi berreaduuɗe mauɗe ne wauduuɗe joma wáusturu Dachi Mechiu Jesusba kʉ̃ria ɓuu kĩra. Ichiɗeeba Dachi Bajãaɗebena Akõremaa ichíturu kiɗibai ásturu.*

Ãbarã ãchi deɗebenarã ome saka nureaɗai panuu

18 Wẽrarã kima bara nuree, machi kimarãba jara panuu ijãa panásturu.* Machi Dachi Mechiu Jesús ome panuuɗeeba maka wauɗai panuu. 19 Mukĩrarã wẽra bara nuree, machi wẽra kʉ̃riásturu. Maarã ome kĩrubi iɗaa panarã́sturu.

20 Warrarã, machi akõrerã beɗea ũribaba ũrísturu, Dachi Mechiuba mau biꞌia unubariiɗeeba. 21 Akõrerã, machi warrarã kĩrubiarã́sturu kĩra nomaarãaɗamera.

22 Chi chibari baita bari trajabadaurã, machi jaradea ua ɓuabarii nau iujãaɗebenarãba waubiiruu joma wáusturu. Maamina ichiba ichia ɓuuɗéburu waurã́sturu, ichi ome biꞌia nureaɗai baita. Maumaarã Dachi Akõre wapea panuuɗeeba sõbiaɗeeba joma wáusturu. 23 Joma machiba wau panuu chokekeaɗeeba wáusturu Dachi Mechiu baita wau panuu kĩra. Maamina maka waurã́sturu ẽbẽrarãba biꞌia unuɗamera. 24 Machi Dachi Mechiu Cristo baita bari trajabadaurãbʉ. Machiba kuitaa panuu ichi baita biꞌia wau panuuɗeeba, ichiba machimaa chi adauɗai panuu deai. 25 Maamina chi kachirua wau ɓuu Dachi Akõreba kastikai. Ichiba joma araɓauɗe kastikabarii.

4 Ne chibarirã, jipa wáusturu chi machi baita bari trajabadaurã ome. Kuitaa panuu machia biɗa machi Chibari bajãaɗe uru panuu.

2 Ewaricha Dachi Akõremaa ʉtaa iɗi panásturu. Ʉtaa iɗiiduuɗe dau ʉɓʉa panásturu mauɗe ichíturu kiɗibai ásturu. 3 Dai baita ʉtaa iɗísturu Dachi Akõreba poraa ewaaruu kĩra, Cristo ʉ̃rʉbena naeɗe kuitaabiwẽa ɓuaɗa ida jaradeabimera. Mau jaradea ɓuu kakua mʉ jʉ̃a uru panuu. 4 Ʉtaa iɗísturu mʉʉba biꞌia jaradeamera, mʉʉba waui ɓuu kĩra.

5 Cristoɗe ijãaɗakaurã tãeɗe kʉ̃risia kauwa nibásturu. Ewaricha jʉrʉ́sturu ichi ʉ̃rʉbena maarãmaa kuitaabiaɗai baita. 6 Beɗea biaɗeeba berreásturu jomaurãba biꞌia ũriɗamera. Maka Cristo ʉ̃rʉbena iɗiiduuɗe machiba kuitaa panaɗai saka panauɗai panuu.

Pabloba nau kartaɗe aanama ɓʉɗa

7 Mʉʉba dachi ãba Tíquico machimaa bʉiruu mʉ ʉ̃rʉbena jaramera. Daiba mau biꞌia kʉ̃ria panuu. Mauba mʉ ome ãbua Dachi Mechiu traju ne jomaɗe biꞌia wau ɓuu. Mauba dai ʉ̃rʉbena machimaa joma kuitaabiai, mauɗe kĩrajʉʉbiai. 8 —. 9 Tíquico baara ãba Onésimo bʉiruu. Ichiba ne jomaɗe jipa wau ɓuu mauɗe daiba mau kʉ̃ria panuu. Tiquicoba mauɗe Onesimoba machimaa nebʉrʉɗai joma nama saka nuɓuu.

10 Ãba Aristarco mʉ baara jʉ̃a uru panuu. Mauba jarabʉi ɓuu machi biꞌia panaɗai. Bernabé niu Marcosba jarabʉi ɓuu machi biꞌia panaɗai. Ichi ʉ̃rʉbena mʉʉba naeɗe kartaɗe ɓʉsii. Mau machimaa wãaruubʉrã, deeɗaa iu biꞌia iústuru. 11 Mauɗe ãba Jesús, Justo abadauba jarabʉi ɓuu machi biꞌia panaɗai. Ãbarã judiorãɗebena mau õbea panuuba nama mʉ aiɗa jaradea panuu Dachi Akõreba ichiɗirã ichi juaɗe ua ɓuu ʉ̃rʉbena. Mau ãbarã kakua mʉ kĩrajʉʉ ɓuabarii. 12 Machi puuruɗebena Jesucristo baita bari trajabarii Epafrasba jarabʉi ɓuu machi biꞌia panaɗai. Ichiba ewaricha Dachi Akõremaa ʉtaa iɗi ɓuabarii machi ne jomaɗe dauchia jãadua nureaɗamera, ãrea ijãa panaɗamera, mauɗe joma Dachi Akõreba waubi kʉ̃ria ɓuu kuitaaɗapeɗa wauɗamera. 13 Mʉʉba jaraaruu: ãba Epafras biawãra traja ɓuu machi aiɗai baita mauɗe joma ãbarã Laodicea puuruɗebenarã mauɗe Hierápolis puuruɗebenarã aiɗai baita. 14 Ãba ʉrrmiɗia deabarii Lucasba jarabʉi ɓuu machi biꞌia panaɗai. Mau daiba kʉ̃ria panuu. Ãba Demas biɗa jarabʉi ɓuu machi biꞌia panaɗai.

15 Dachi ãbarã Laodicea puuruɗebenarãmaa jarásturu mʉʉba jarabʉi ɓuu maarã biꞌia panaɗai. Dachi neekau Ninfas mauɗe jomaurã ãbarã ichi deɗe ãbua wãbadaurãmaa jarásturu mʉʉba jarabʉi ɓuu maarã biꞌia panaɗai.

16 Machiba nau karta eɗa jaraaduuɗe ãbarã Laodicea puuruɗebenarãmaa biɗa eɗa jarabiásturu. Machia biɗa chi karta mʉʉba maarãmaa urubʉiɗa eɗa jarásturu. 17 Ãba Arquipomaa jarásturu: «Dachi Mechiuba waubi ɓuu joma wau ɓuase».

18 Mʉ Pablobʉ. Ara mʉ juaba ɓʉʉruu mʉʉba jarabʉiruu machi biꞌia duanaɗai. Mʉ jʉ̃a uru panuuɗeeba Dachi Akõremaa ʉtaa iɗi panásturu. Mʉʉba kʉ̃ria ɓuu Dachi Akõreba ichi sõbiaɗeeba machi aiɗa ɓuayu.