1 TESALONICENSES

Pabloba nau kartaɗe naa ɓʉɗa

1 Mʉ Pablobʉ. Nau karta ɓʉmaa ɓuu chi ãbarã Tesalónica puuruɗebenarã baita. Machi Dachi Bajãaɗebena Akõreɗebʉ mauɗe Dachi Mechiu Jesucristoɗebʉ.* Mʉ ãba Silvano mauɗe Timoteo mʉ baara panuu. Daiba kʉ̃ria panuu Dachi Akõreba mauɗe Dachi Mechiu Jesucristo biɗa maarã sõbiaɗeeba machi kariba panaɗamera mauɗe jirukaraayuwãe panabiaɗamera.

Ãbarãba biꞌia waupeɗaaɗa

2 Daiba ewaricha Dachi Akõremaa ʉtaa iɗiiduuɗe machi baita ichíturu kiɗibai abadau. 3 Daiba Dachi Akõre daaɗe ewaricha kĩraba panuu machiba Dachi Akõreɗe ijãa panuuɗeeba biꞌia wau panuu, kʉ̃riaɗeeba waabenarã kariba panuu mauɗe Dachi Mechiu Jesucristoba machi karibai ida ɓuɗawẽa eseɗau panuu.

4 Ãbarã, Dachi Akõreba machi ãrea kʉ̃ria ɓuu. Daiba kuitaa panuu ichiba machi jʉrʉ adausii. 5 Daiba chi beɗea bia Cristo ʉ̃rʉbena machimaa jaradeasiɗauɗe beɗeáturu berreaɗaabasii. Maumaarã mau beɗea biawãra arakʉɗe ɓuu kuitaa panuuɗeeba Dachi Akõre Jauri poyaabariiɗeeba berreasiɗau. Machiba kuitaa panuu dai saka machi tãeɗe nibapeɗaaɗa, machi biꞌia panaɗamera. 6 Araɓauɗe machiba dai panabachiɗau kĩra wau kopaneesiɗau. Mauɗe Dachi Mechiu nibaɗa kĩra wau kopaneesiɗau. Machi ãrea biꞌiwãe panumina Dachi Akõre Jauriba kĩrajʉʉbiasiiɗe chi beɗea bia ijãasiɗau.* 7 Maka joma Cristoɗe ijãabadaurã Macedonia druaɗebenarãba mauɗe Acaya druaɗebenarãba machi ʉ̃rʉbena ũrisiɗau saka nibaɗai panuu. 8 Maarãburu Dachi Mechiu ʉ̃rʉbena beɗea machiɗebena ũripeɗaaɗawãe basii; maumaarã druacha ẽbẽrarãba kuitaasiɗau machiba Dachi Akõreɗe ijãa panuu. Mauɗeeba ¿daiba machi ʉ̃rʉbena kãare maucha jaraɗaima? 9 Ara ãchiba jara panuu saka machiba dai deeɗaa urúbaɗe apeɗaaɗa, mauɗe Dachi Akõre kuenda juaba ne kapeɗaaɗarã ida ɓusiɗau Dachi Akõre biawãra chokae nii ijãaɗai baita. 10 Ãchiba jara panuu saka machiba Dachi Akõre Warr Jesús bajãaɗebena neei eseɗau panuu. Ara mau Jesús Dachi Akõreba biuɗaɗebena chokae jiradubisii. Mauba Dachi Akõreba dachi kastikai baɗa karibasii.

Pabloba Tesalónica puuruɗe wauɗa

2 Ãbarã, machiba kuitaa panuu dai machimaa wã panasiɗauɗe bari wãɗaabasii. 2 Kuitaa panuu machimaa wãɗai naeɗe Filipoɗebenarãba dai kachirua jarasiɗau mauɗe kachirua wausiɗau.* Mau awara machimaa neesiɗauɗe ãreaba kʉ̃riaɗaabasii daiba jaradea panuu. Maamina Dachi Akõreba dachi sõbiabiasii ichi beɗea bia machimaa wapeawẽa jaradeaɗamera. 3 Daiba machimaa biawãrawãe jaradeabadau ijãarãaɗamera iɗiɗaabasii. Mauɗe machi tãeɗe setaɗeeba panuuwãe basii, machi setaa kũruaɗai baita. 4 Maumaarã Dachi Akõreba biꞌia unuɗaɗeeba dai iusii ichi beɗea bia jaradeaɗamera. Mauɗeeba daiba jaradeaduuɗe, makaɗakau chi ẽbẽrarãba daimaa ichiaɗapeɗa, kʉ̃riaɗamera. Bari jaradeabadau dai Dachi Akõre baara biꞌia panaɗamera. Ichiba dai sõ kʉ̃risia unubarii. 5 Machiba kuitaa panuu daiba setaɗeeba machi ẽbẽrarã biꞌia nuree aɗaabasii. Mauɗe chi nejarra adoeɗai baita setaɗeeba jaradeaɗaabasii. Mau Dachi Akõreba kuitaa ɓuu. 6 Daiba jʉrʉɗawẽa panasiɗau, machiba mauɗe waabenarãba dai ʉ̃rʉbena biꞌia jaraɗamera. Maumaarã dai Cristoba bʉikaɗaɗeeba daiba jaradea ua panaɗai panasiɗau machi tãeɗe. Maamina maka wauɗaabasii. 7 Maumaarã daiba kʉ̃ria panuuɗeeba machi kariba panasiɗau chi naweba chi warrarã nubarii kĩra. 8 Daiba machi ãrea kʉ̃ria panuuɗeeba bari chi Dachi Akõre ʉ̃rʉbena beɗea bia machimaa jaradeaɗakau, mauɗe machi ne jomaɗe aiɗaɗai baita panasiɗau. 9 Ãbarã, machiba kuitaa panuu ãyadaa mauɗe ẽsabuɗe kʉrrjĩruɗaabasii. Mau awara traju siɗa waubachiɗau chi nejarra adauɗai baita. Daiba chi Dachi Akõre ʉ̃rʉbena beɗea bia machimaa jaradea panasiɗauɗe, kʉ̃riaɗaabasii machiba daimaa ne kaebea dea panaɗayu, machi chiko ɓaꞌãra ɓeerãamera.

10 Machiba kuitaa panuu mauɗe Dachi Akõreba kuitaa ɓuu dai machi chi Cristoɗe ijãabadaurã tãeɗe biꞌia, jipa mauɗe kachirua jaraɗayuswãe nibasiɗau. 11 Mau awara kuitaa panuu chi akõreba ichi warrarã ome waubarii kĩra daiba machicha maka wau panasiɗau. 12 Daiba biꞌia jarasiɗau machi Dachi Akõreba kʉ̃ria ɓuu kĩra nibaɗamera. Ichiba machi iusii, ichi juaɗe ua ɓuai baita mauɗe ichi biaɗebena uru panaɗamera.

13 Daiba ewaricha machi baita Dachi Akõremaa ichíturu kiɗibai abadau. Machiba Dachi Akõre beɗea daiɗeeba ũrisiɗauɗe ẽbẽra kʉ̃risia kĩra ijãaɗaabasii. Maumaarã mau beɗea biawãra chi Dachi Akõre beɗea kuitaapeɗaaɗaɗeeba ijãasiɗau. Ara mau beɗeaba machi chi Cristoɗe ijãabadaurãmaa biꞌia waubia ɓuu. 14 Ãbarã, machiba ijãa panuu kakua ara machi druaɗebenarãba kachirua wau panasiɗau Dachi Akõreɗe ẽbẽrarã judiorã druaɗe makapeɗaaɗa kĩra. Aria Jesucristoɗe ijãabadaurã judiorã chi ijãaɗakaurãba kachirua wau panasiɗau. 15 Ara maarãba Dachi Mechiu Jesús mauɗe Dachi Akõre baita berreabadaurã siɗa beasiɗau. Mau awara dai ãyaa bʉisiɗau. Maarã Dachi Akõreba biꞌia unukau. Maarãba jomaurã kĩramaabadau. 16 Dachi Akõreba karibamera daiba judiowãerãmaa jaradea kʉ̃ria panuuɗe, maarãba daiba jaradeaɗai ida kabiɗaabasii. Maka aude kachirua wau panuuɗeeba Dachi Akõreba ichi oa kachiruaɗeeba maarã ãrea kastikai.

Pablo Tesalonicaɗebena ãbarã ichiaɗe wã kʉ̃ria ɓuaɗa

17 Ãbarã, ãrea bawẽa ɓuu, dai machi baara panaɗa ãyaa wãpeɗaaɗa. Nauɗe daiba machi unuɗawẽa panumina dai kʉ̃risiaɗe machi baara panuu. Daiba biawãra machi ichiaɗe wã kʉ̃ria panasiɗau maamina Satanasba ida ɓuubasii wãrãaɗamera. Mʉ biawãra ɓes ãrea machimaa wãi baita ɓuasii. 18 —. 19 Biawãra dai machi kakua kĩrajʉʉ panuu. Mau awara kuitaa panuu Dachi Mechiu Jesucristo neeruuɗe daiba machi jipa panuu ichimaa unubiɗai. Mauɗe ichi daaɗe machi kakua dai kĩrajʉʉ panaɗai.* 20 Biawãra machi dai nejuakayabʉ mauɗe kĩrajʉʉbʉ.

3 Daiba waa poyaa dauchia jãadua panaɗaabasiiɗeeba dai du aɓa Atenas puuruɗe panuumisa kʉ̃risiasiɗau dachi ãba Timoteo machimaa bʉiɗai. Dachi Akõre baita trajabarii Timoteoba dai ome araɓau beɗea bia Cristo ʉ̃rʉbena jaradeabarii.* Ara makʉɗe ichi bʉisiɗau Cristoɗe biꞌia ijãa panuuɗeeba dauchia jãadua panaɗamera, 2 —. 3 mauɗe machi ãrea biꞌiwãe panuuɗe, mau ãrea kʉ̃risiarãaɗamera. Machiba kuitaa panuu Cristoɗe ijãa panuu baita dachi ãrea nebʉraɗe panaɗai panuu. 4 Machi baara panasiɗauɗe daiba jarabachiɗau ẽbẽrarãba dachi ãrea nebʉraɗe panabiɗamera. Machiba kuitaa panuu biawãra makasii. 5 Mauɗeeba mʉʉba waa poyaa dauchia jãadua ɓuawẽeɗeeba Timoteo machimaa bʉisii, wabiɗa Cristoɗe ijãa panuu kuitaai baita. Mʉʉba kʉ̃risia ɓuasii jʉbawãe niiba machimaa Cristo ida ɓubia ɓuasii. Makaɗa basirã daiba machimaa Cristo ʉ̃rʉbena jaradeapeɗaaɗa bari ara jãka ɓuai basii.

6 Maamina Timoteo machimaa ɓuaɗa daimaa neesii. Machiba Cristoɗe ijãa panuu ʉ̃rʉbena mauɗe machi kʉ̃ria ʉ̃rʉbena ichiba biꞌia jaraɗe neesii. Ichiba jarasii machiba kʉ̃riaɗeeba wabiɗa dai kĩrababadau mauɗe unu kʉ̃ria panuu, daiba machi unu kʉ̃ria panuu kĩra. 7 Mauba ãbarã, daiba kuitaasiɗau machiba Jesusɗe wabiɗa ijãa panuu. Mauɗeeba dai ãrea nebʉra baraa panumina kĩrajʉʉsiɗau. 8 Jãabae dai biawãra sõbia paneesiɗau, kuitaa panuuɗeeba machi Dachi Mechiuɗe dauchia jãadua panuu. 9 ¿Saka ichíturu kiɗibai jaraɗaima, dai ãrea kĩrajʉʉ panuu Dachi Akõre daaɗe machi ʉ̃rʉbena? 10 Ãsaeɗe, ẽsabuɗaa biɗa daiba Dachi Akõremaa ʉtaa iɗibadau machi ichiaɗe wãɗai baita. Maka machiba Cristo ʉ̃rʉbena wabiɗa adua panuu daiba poyaa jaradeaɗai joma aude ijãaɗamera.

11 Daiba Dachi Bajãaɗebena Akõremaa mauɗe Dachi Mechiu Jesusmaa ʉtaa iɗi panuu machimaa waya wãbiaɗamera. 12 Daiba kʉ̃ria panuu Dachi Mechiuba machi aiɗa ɓuai jomaurã ome biꞌia chiya kʉ̃ria panaɗamera daiba machi ãrea kʉ̃ria panuu kĩra. 13 Mauɗe ʉtaa iɗi panuu Cristoba machi kariba ɓuai sõɗeeba ãrea ijãaɗamera. Maka Dachi Mechiu Jesús joma ichiɗirã baara neeruuɗe machi Dachi Bajãaɗebena Akõre daaɗe kachiruaswãe nureaɗai.

Saka nibaɗai panuu Dachi Akõreba biꞌia unumera

4 Mau awara ãbarã, daiba machimaa jaradeasiɗau saka Dachi Akõre daaɗe nibaɗai panuu ichiba biꞌia unumera. Dachi Mechiu Jesús trʉ̃ɗe daiba machimaa chi chuburia iɗi panuu, ara mau kĩra nibaɗamera. Biawãra machiba maka waumaa panuu, maamina biꞌia wáusturu.

2 Daiba Dachi Mechiu Jesusɗebena jaradeapeɗaaɗa machiba kuitaa panuu. 3 Dachi Akõreba kʉ̃ria ɓuu machi ichi baita biꞌia nureaɗamera. Mauɗeeba machi kakuaba barikiu kachirua waurã́sturu. 4 Machi kakua jipa kuitaa panaɗai duanásturu Dachi Akõre daaɗe mauɗe ẽbẽrarã daaɗe biꞌia panaɗamera.* 5 Nau kakuaba kachirua wau kʉ̃ria ɓuu waurã́sturu Dachi Akõre unuɗakaurãba waubadau kĩra. 6 Mauɗéburu dachi ãbarãmaa kachirua waurã́sturu mauɗe seta siɗa waurã́sturu. Joma mau Dachi Mechiuba kastikai, daiba machimaa jarapeɗaaɗa kĩra. 7 Dachi Akõreba dachi jʉrʉ adaubasii kachiruaɗe panaɗamera, maumaarã jʉrʉ adausii ichi baita jipa panaɗamera. 8 Chi mau mʉʉba jaradeaɗa ida ɓu ɓuuba ẽbẽraba jaraɗa ida ɓuwẽa ɓuu, maumaarã Dachi Akõreba jara ɓuu ida ɓu ɓuu. Ara mau Dachi Akõreba ichi Jauri machimaa deasii kachiruaswãe panaɗamera.

9 Mau awara machi saka ãbarã ome chiya kʉ̃riaɗai panuu ʉ̃rʉbena, mʉʉba nau kartaɗe ¿kãare ɓʉima? Ara Dachi Akõréburu machimaa mau jaradeasii. 10 Machiba joma ãbarã Macedonia druaɗebena mau kĩra kʉ̃ria panuu. Maamina ãbarã, daiba machimaa chi chuburia iɗi panuu aude chiya kʉ̃ria panaɗamera. 11 Mauɗe jʉrʉ́sturu jomaurã ome jirukaraayuwãe duanaɗai baita. Waabenarã nebʉraɗe panarã́sturu. Machi juaba trajásturu daiba jarapeɗaaɗa kĩra. 12 Maka nureebʉrã, machiba eseɗauɗayuswãe panaɗai waabenarãba machimaa ne kaebea deaɗai. Mauɗe makaburu Jesusɗe ijãaɗakaurãba machi biꞌia unuɗai.

Jesús waya neei ʉ̃rʉbena

13 Ãbarã, daiba kʉ̃ria panuu machiba Jesusɗe ijãabadaurã biupeɗaaɗa ʉ̃rʉbena kuitaaɗamera. Maka machi kĩra nomaaɗaabai Dachi Akõreɗe ijãaɗakaurã kĩra nomaabadau kĩra. Ãchi kĩra nomaabadau chi biupeɗaaɗa saka duanaɗai kuitaaɗawẽeɗeeba.* 14 Maamina dachiba Jesús biu ɓuaɗaɗebena chokae jiraduɗa ijãa panuu. Mauɗeeba kuitaa panuu Jesusɗe ijãabadaurã biupeɗaaɗa Dachi Akõreba joma chokae jiradubiapeɗa ichi baara uaɗoi.

15 Mau baita Dachi Mechiuba jaraɗa daiba machimaa jaraaduu: Dachi Mechiu neeruuɗe dachi, chi wabiɗa chokae nuree chi biupeɗaaɗa naa ichimaa wãɗaabai. 16 Maumaarã Dachi Mechiu bajãaɗebena neei. Berrearuu jĩwa ũriɗai, ángel chi mechiu siɗa berrearuu ũriɗai, mauɗe Dachi Akõre kachu jĩwa chaaruu ũriɗai. Mauɗe chi Cristoɗe ijãabadaurã biupeɗaaɗa naa chokae jiraduɗai. 17 Ara makʉɗe dachi, chi chokae nuree, maarã ome ãbua ʉtaa wãɗai Dachi Mechiu baara jʉ̃rʉaraɗe unuɗai baita. Maka Dachi Mechiu ome ewaricha duanaɗai. 18 Mau beɗeaba machi chiya kĩrajʉ́sturu.

Dachi Mechiuba kastikai ewari

5 Ãbarã, mʉʉba nau kartaɗe ɓʉwẽma sakaeɗaa mau ewari neei, 2 machiba ãrea kuitaa panuuɗeeba Dachi Mechiuba kastikai ewari maka neei nechiru ẽsabuɗe neebarii kĩra. 3 Ẽbẽrarãba naka jara panaɗai: «Joma jirukaraayuwãe panuu, peraɗawẽa panuu». Maka panuuɗe maarã joma baribai ewari neei wẽra warr bara nii barikiu ewariɗe pirabari kĩra. Mauɗe maarã miruɗaabai.

4 Maamina ãbarã, machi pãriuɗe panuuwãema. Mauɗeeba Dachi Mechiuba kastikaɗe neeruu ewariɗe machi peraɗaabai nechiru neeruuɗe perabadau kĩra. 5 Joma machi ʉ̃ɗaaɗebenarã mauɗe ãyadaabenarã. Dachi ẽsabuɗebenawãema mauɗe pãriuɗebenawãema. 6 Mauɗeeba dachi kãi duanuuwãema waabenarã kãi duanuu kĩra, maumaarã dau ʉɓʉa panaɗai panuu mauɗe kĩrabia panaɗai panuu. 7 Chi kãi duaneebadaurã ẽsabuɗe kãi duaneebadau mauɗe chi itua biu nureerã ẽsabuɗe itua dobadau. 8 Maamina dachi chi ãyadaabenaɗeeba kĩrabia nureaɗai panuu. Cristoɗe ijãa panaɗai panuu, waabenarã kʉ̃ria nureaɗai panuu mauɗe Dachi Akõreba kastikai baɗaɗebena karibai eseɗau panaɗai panuu. Maka ara dachi biꞌia nu panaɗai, kokoroaba ichi boroɗe chaarea ɓuu jʉ̃barii kĩra, mauɗe kakuaɗe jʉ̃barii chaarea jʉ̃barii kĩra. 9 Dachi Akõreba dachi iubasii kastikai baita, maumaarã iusii Dachi Mechiu Jesucristoɗeeba karibaɗamera. 10 Ichi dachi kakua biusii. Mauɗeeba dachi chokae panuubʉrã maebʉrã biupeɗaaɗabʉrã, ichi neeruuɗe ichi ome ãbua chokae panaɗai. 11 Mauɗeeba chiya kĩrajʉ́sturu. Mauɗe chiya aiɗásturu biꞌia ijãaɗai baita machiba wau panuu kĩra.

Pabloba ãbarãmaa kaaɗe jaradeaɗa

12 Mau awara ãbarã, daiba chi chuburia iɗi panuu chi ãbarã machi tãeɗe Dachi Akõre traju waubadaurã ãrea wapeaɗamera. Ãchi Dachi Mechiu Jesucristoɗeeba machi saka nibaɗai jarabadau mauɗe jaradeabadau. 13 Ãchi ʉ̃rʉbena biꞌia kʉ̃risiásturu. Maarãba wau panuu kakua ãrea kʉ̃riásturu. Jomaurã ome biꞌia duanásturu.

14 Ãbarã, daiba chi chuburia iɗi panuu chi machi tãeɗe koꞌoa nureerãmaa kĩra ʉɓʉa berreaɗamera. Chi sõɗe kĩra nomaa nuree kĩrajʉʉbísturu, mauɗe chi poyaa dauchia jãadua nureaɗawẽa nuree mauɗe chi sõɗe meserãa wãꞌãe nuree aiɗásturu. Jomaurã ome dauchia jãadua panásturu. 15 ¡Ũrísturu! Aɓauba machi kachirua wauruubʉrã mau araɓau kachirua waurã́sturu. Mau kãyabãra ewaricha machi chiya biꞌia wáusturu. Jomaurã ome biꞌia wáusturu.

16 Jomaɗe kĩrajʉʉ panásturu. 17 Ida ɓuɗayuwãe Dachi Akõremaa ʉtaa iɗi panásturu. 18 Jomaɗe Dachi Akõremaa ichíturu kiɗibai a panásturu. Mau Dachi Akõreba kʉ̃ria ɓuu, machi Jesucristoɗe ijãabadauɗeeba.

19 Dachi Akõre Jauriba wau ɓuu ida ɓurã́sturu.* 20 Dachi Akõre baita berreabariiba jara ɓuu ida ɓurã́sturu. 21 Joma mau kauwa ũrísturu, maamina aɓa chi biáturu ijã́sturu. 22 Kachirua aɓa biɗa waurã́sturu.

23 Mʉʉba kʉ̃ria ɓuu Dachi Akõreba machi jomaɗe ichi baita biꞌia panabiayu. Mauba dachi jirukaraayuwãe panabiabarii. Mʉʉba kʉ̃ria ɓuu Dachi Akõreba machi jauri, machi kʉ̃risia mauɗe machi kakua ãrea biꞌia nu ɓuayu. Maka Dachi Mechiu Jesucristo neeruuɗe machi aɓa biɗa kachirua a jaraɗayuswãe panaɗai. 24 Chi machi Iuɗaba joma maka waui, ichiba beɗea deasiiɗeeba.

Pabloba nau kartaɗe aanama ɓʉɗa

25 Ãbarã, dai baita Dachi Akõremaa ʉtaa iɗísturu.

26 Biawãra kʉ̃riaɗeeba joma ãbarãmaa biꞌia berreásturu.*

27 Mʉʉba Dachi Mechiuɗeeba jaraaruu: nau karta joma ãbarã daaɗe eɗa jarásturu.

28 Mʉʉba kʉ̃ria ɓuu Dachi Mechiu Jesucristoba ichi sõbiaɗeeba machi aiɗa ɓuamera.