2 TESALONICESNSES

Pabloba nau kartaɗe naa ɓʉɗa

1 Mʉ Pablobʉ. Nau karta ɓʉʉruu ãbarã Tesalónica puuruɗebena baita. Machi, Dachi Bajãaɗebena Akõreɗebʉ* mauɗe Dachi Mechiu Jesucristoɗebʉ. Ãba Silvano mauɗe Timoteo mʉ ome panuu. 2 Daiba kʉ̃ria panuu Dachi Bajãaɗebena Akõreba mauɗe Dachi Mechiu Jesucristo ãchi sõbiaɗeeba machi aiɗa panaɗamera mauɗe jirukaraayuwãe panabiaɗamera.

Dachi Akõreba ichi beɗea ijãaɗakaurã ichiai ʉ̃rʉbena

3 Ãbarã, daiba ewaricha machi baita Dachi Akõréturu kiɗibai abadau. Daiba maka waubadau biꞌia ɓuu. Machiba ewaricha Cristo biꞌia ijãa panuu mauɗe biꞌia chiya kʉ̃ria panuu. 4 Mau baita daiba ẽbẽrarã Dachi Akõreɗerã panuucha machi ʉ̃rʉbena kĩrajʉʉ nebʉrʉbadau. Daiba jarabadau ẽbẽrarãba kachirua wauɗai baita wãraa panumina machiba Cristoɗe wabiɗa ijãa panuu mauɗe ãrea biꞌiwãe panumina joma dauchia jãadua panuu. 5 Mauba kuitaabi ɓuu Dachi Akõre jipa niiba ẽbẽrarã kastikabarii. Ichiba machi biꞌia unu ɓuu ichi juaɗe ua ɓuai baita. Mauɗeeba ʉ̃rauɗaa ãrea biꞌiwãe panuu.

6 Dachi Akõre jipa niiba ẽbẽrarã kastikabarii. Ichiba chi machi ãrea biꞌiwãe panabiabadau ãrea biꞌiwãe panabiai. 7 Maamina machi, chi biꞌiwãe panabiapeɗaaɗa kʉrrjĩrubiai dai kʉrrjĩrubiabarii kĩra. Mau makai Dachi Mechiu Jesús ichi angelerã chi poyaabadau ome tʉbʉchia aokoɗe bajãaɗebena neeruuɗe. Mauɗe joma Dachi Akõreɗe ijãaɗakaurã mauɗe chi beɗea bia Dachi Mechiu Jesús ʉ̃rʉbena ijãaɗakaurã kastikai. 8 —. 9 Ãchi tʉbʉ aokoɗe ewaricha ãrea biꞌiwãe panabiai. Dachi Mechiu daaɗebena mauɗe ichi poyaabarii mechiuɗebena kaitawẽ panaɗai. 10 Ichi neeruuɗe mau ewariɗe ichiɗirãba ichimaa biꞌia berreaɗai. Ãchi ome biꞌia wauɗaɗeeba joma ichi ijãabadaurãba ichi ãrea biꞌia unuɗai. Daiba ichi ʉ̃rʉbena jaradeasiɗauɗe, machia biɗa ijãasiɗau.

11 Mauɗeeba daiba ewaricha Dachi Akõremaa ʉtaa iɗibadau ichiba machi biꞌia unumera. Ichiba machi mau kakua iusii. Daiba ʉtaa iɗi panuu Dachi Akõreba ichi poyaabariiɗeeba machi ne jomaɗe aiɗamera. Maka ichiɗe ijãa panuuɗeeba biꞌia wau kʉ̃ria panuu joma wauɗai. 12 Makarã machiɗeeba jomaurãba Dachi Mechiu Jesucristo ʉ̃rʉbena biꞌia jaraɗai mauɗe ichiɗeeba machi ʉ̃rʉbena biꞌia jaraɗai, Dachi Akõreba mauɗe Dachi Mechiu Jesucristoba ãchi sõbiaɗeeba aiɗa panuuɗeeba.

Ẽbẽra kachirua nii neei ʉ̃rʉbena ɓʉɗa

2 Mau awara ãbarã, daiba chi chuburia iɗi panuu Dachi Mechiu Jesucristo neei ʉ̃rʉbena mauɗe dachi ichi ome ãbua panaɗai ʉ̃rʉbena ara makʉɗe adua panuu kãare kʉ̃risiaɗayu. Aɓauba Dachi Mechiuba kastikai ewari neesii aaruubʉrã, perarã́sturu. Barikiuba Dachi Akõre ʉ̃rʉbena berrea ɓuu kĩra maka jaraaruubʉrã, maebʉrã maka jaradearuubʉrã maebʉrã daiba kartaɗe maka ɓʉpeɗaaɗa aaruubʉrã, ijãarã́sturu. 2 —. 3 Aɓau biɗa aɓaumaa ida setaa kũruarã́sturu. Dachi Mechiuba kastikai ewari neei naeɗe ãrea ẽbẽrarãba Dachi Akõre ida ɓuɗai. Mauɗe chi ẽbẽra kachirua nii unubiai. Mau ẽbẽra Dachi Akõreba tʉbʉ aokoɗe jiratai.* 4 Ichiba Dachi Akõre mauɗe joma ẽbẽrarãba dachi akõre abadau kʉ̃riakau ɓuai. Ichiba joma mau audeara chi mechiu nii ai. Mauɗeeba Dachi Akõre de mechiuɗe akʉ ɓeepeɗa, ichíturu Dachi Akõre ai.

5 Machimaa ɓuasiiɗe mʉʉba ¿mau jarawẽa ɓuaska? ¿Kĩrabaɗawẽa panuka? 6 Mauɗeeba kuitaa panuu kãareba mau ẽbẽra ida neebiwẽa ɓuu. Maamina ichi ewari neeruuɗe neei. 7 Ʉ̃rauɗaa chi kachirua miru waumaa ɓuu, maamina chi ida ɓuwẽa ɓuuba mau ẽbẽra kachirua nii ida neebiwẽa ɓuu. Maka ɓuai aɓa Dachi Akõreba chi ida ɓuwẽa ɓuu ãyaa adoeruuɗaa. 8 Maabáeburu chi kachiruaɗebena ẽbẽra neei. Maamina Dachi Mechiu Jesús kĩrawãrea teɗechoa neeruuɗe ara berrearuuba mau ẽbẽra beai.*

9 Chi ẽbẽra kachirua nii Satanasba neebii. Mauba jʉbawãe nii poyaabariiba ẽbẽrarãba ne poyaa wauɗakau joma barikiu waukuai, ẽbẽrarãba Dachi Akõreba maka wau ɓuu kʉ̃risiaɗamera. 10 Ne barikiu kachirua wau ɓuuɗeeba ẽbẽrarã tʉbʉ aokoɗe ãrea biꞌiwãe panaɗai panuu, mauba setaa kũrai. Ãchiba chi biawãra beɗea kʉ̃riaɗakauɗeeba Dachi Akõreba karibaabai. 11 Mauɗeeba Dachi Akõreba ida setaa ijãabiai. Maka ara ãchi du aɓa ãrea setaa kũrua nureaɗai. 12 Mau ẽbẽrarã chi beɗea biawãra ijãawẽa nureerãba kachirua kʉ̃ria waubadauɗeeba Dachi Akõreba kastikai.

Dachi Akõreba ichi ijãabadaurã karibaɗa

13 Ãbarã, daiba ewaricha machi baita Dachi Akõremaa ichíturu kiɗibai abadau. Dachi Mechiuba machi kʉ̃ria ɓuu. Ichiba araɓaeɗeeɗe machi jʉrʉ adausii karibai baita. Machiba ichi beɗea biawãra ijãa panuuɗeeba mauɗe ichi Jauriba machi ichi baita biꞌia ɓuɗaɗeeba aiɗai. 14 Daiba beɗea bia Cristo ʉ̃rʉbena jaradea panuuɗeeba Dachi Akõreba machi iusii Dachi Mechiu Jesucristo bia niiɗebena adauɗamera. 15 Mauɗeeba ãbarã, dauchia jãadua panásturu. Daiba jaradeapeɗaaɗa mauɗe kartaɗe ɓʉpeɗaaɗa kĩrabarã́sturu.

16 Dachi Akõreba dachi kʉ̃riasii. Ichi sõbiaɗeeba sõbia nureabiasii ewaricha maka panaɗamera. Mauɗe kuitaabiasii biawãra ichiɗeeba ne bia adauɗai. Daiba kʉ̃ria panuu Dachi Mechiu Jesucristoba mauɗe Dachi Bajãaɗebena Akõreba* machi sõbiabiɗayu mauɗe dauchia jãadua panaɗayu. Maka machiba berrea panuu mauɗe wau panuu joma biꞌia ɓuai. 17 —.

Pabloba iɗiɗa ichi baita ʉtaa iɗiɗamera

3 Mau awara ãbarã, dai baita Dachi Akõremaa ʉtaa iɗísturu Dachi Mechiu beɗea druacha isa wãmera mauɗe ẽbẽrarãba mau kakua biꞌia jaraɗamera machi tãeɗeeba makaɗa kĩra. 2 Dachi Akõremaa ʉtaa iɗísturu dai aiɗamera, ẽbẽra kachiruarãba kachirua wau kʉ̃ria panuuɗebena. Chi nuree ẽbẽrarãba Cristoɗe ijãaɗai kʉ̃riaɗakau. 3 Maamina Dachi Mechiuba waui ichiba jara ɓuu kĩra. Ichiba machi aiɗa ɓuai dauchia jãadua panaɗamera mauɗe kachiruaɗebena kariba ɓuai.* 4 Dachi Mechiuɗeeba kuitaa panuu daiba jaradeapeɗaaɗa machiba biawãra wau panuu mauɗe waa wau paneeɗai. 5 Mauɗe kʉ̃ria panuu Dachi Mechiuba kuitaabiai machi ãrea kʉ̃ria ɓuu Dachi Akõre kĩra. Mauɗe kʉ̃ria panuu ichiba karibai Cristoba jãaduaɗa kĩra jãaduaɗamera.

Koꞌoawãe trajaɗai panuu

6 Ãbarã, Dachi Mechiu Jesucristo trʉ̃ɗeeba daiba machimaa jarabʉiduu ãbarã koꞌoa nuree ome ãbua panarãaɗamera. Daiba jaradeapeɗaaɗa kĩra wauɗakau. 7 Machiba kuitaa panuu dai nibapeɗaaɗa kĩra machi nibaɗai panuu. Machi tãeɗe panasiɗauɗe dai koꞌoa panaɗaka basii. 8 Daiba machiɗe chiko bari deapeɗaaɗa koɗaabasii, maumaarã ãyadaa mauɗe ẽsabuɗe kʉrrjĩruɗawẽa traju wau panasiɗau machiɗebena aɓau biɗa daimaa ne kaebea dearãaɗamera.* 9 Biawãra machiba karibaɗamera poyaa iɗiɗai panasmina iɗiɗaabasii. Maumaarã dai trajasiɗau kuitaabiɗai baita machiba ara mau kĩra wauɗai panuu. 10 Machi tãeɗe panasiɗauɗe daiba nau jarasiɗau: «Chi trajai kʉ̃riawẽa ɓuumaa kobirã́sturu». 11 Daiba ũri panuu waabenarã machiɗebena koꞌoa nuree. Maarã trajaɗakau maumaarã waabenarã nebʉraɗe panabadau. 12 Mau ãbarãmaa daiba Dachi Mechiu Jesucristoɗeeba chi chuburia iɗiɗai jirukaraayuwãe trajaɗamera koɗai baita uru panaɗamera.

13 Ãbarã, biꞌia wau panuuɗeeba kakua ãkaa panarã́sturu. 14 Daiba nau kartaɗe jaradeapeɗaaɗa aɓau biɗa ijãawẽebʉrã, jomaurãmaa kuitaabiásturu mau kachirua wau ɓuu. Mau ome ãbua panarã́sturu kĩrakaya ɓeemera. 15 Maamina mau machi kĩramaa kĩra uru panarã́sturu, maumaarã machi ãba baerã jarásturu jipa waumera.

Pabloba kaaɗeare ɓʉɗa

16 Daiba kʉ̃ria panuu Dachi Mechiu jirukaraayuwãe panabibariiba machimaa ewaricha jirukaraayuwãe ne jomaɗe panabiamera. Kʉ̃ria panuu Dachi Mechiu machi ome ɓuamera. 17 Mʉ Pablobʉ. Nau beɗea mʉ juaba ɓʉʉruu. Joma mʉ kartaɗe naka ɓʉbarii, kuitaabiai baita mʉaburu ɓʉʉruu. Naka ɓʉ kuɓuabarii. 18 Mʉʉba kʉ̃ria ɓuu Dachi Mechiu Jesucristoba ichi sõbiaɗeeba machi biꞌia nu ɓuamera.