1 TIMOTEO

Pabloba nau kartaɗe naa ɓʉɗa

1 Mʉ Pablobʉ, Jesucristoba bʉiɗa. Dachi Akõre chi Karibabariiba mauɗe Dachi Mechiu Jesucristoba mʉ naka ɓusiɗau. Ara mau Jesucristoɗeeba dachi biawãra biꞌia nureaɗai kuitaa panuu. Dachiba Jesucristoɗe ijãabadau mauɗe ichi kakua biꞌia nureaɗai kuitaabadau. 2 Timoteo, mʉʉba nau karta bichi baita ɓʉʉruu. Mʉʉɗeeba Cristoɗe ijãasiiɗeeba bichi biawãra mʉ warr kĩra ɓuu. Mʉʉba kʉ̃ria ɓuu Dachi Bajãaɗebena Akõreba* mauɗe Dachi Mechiu Jesucristoba kĩra chuburia panaɗamera, ãchi sõbiaɗeeba aiɗa panaɗamera, mauɗe jirukaraayuwãe panabiɗamera.

Setaa jaradeabadaurãmaa ida jaradeabiarã́se

3 Mʉʉba bichimaa chi chuburia iɗiɗa kĩra Macedonia druaɗaa wãsiiɗe, maucha jaraaruu: Efesoɗe ɓeese, chi ãyaa jaradeabadaurã waa setaa ida jaradeabiarãaɗamera. 4 Ãchimaa jarase nabẽraeɗebena nebʉrʉ mauɗe dachi nabẽraeɗebenarã trʉ̃ ãrea jaradeabadau ʉ̃rʉbena ãrea kʉ̃risiarãaɗamera. Mauɗeeba oa kachirua berrea duaneebiabarii. Mauba dachi aiɗakau Dachi Akõreba waubi ɓuu wauɗamera. Aɓa ichi beɗea ijãa panuuɗeeburu poyaa wauɗai. 5 Mʉʉba maka jara ɓuu ãbarã kʉ̃risia sõbiaɗeeba, biawãra Dachi Akõreɗe ijãa panuuɗeeba chiya kʉ̃ria duanaɗamera. 6 Maamina waabenarã o ãyare wãsiɗau. Maabae barikia dachi aiɗakau beɗeáturu berreabadau. 7 Ãchiba Moisesba ɓʉɗa jaradeabadaurã ba kʉ̃ria panuu, maamina ãrea kuitaa panuu kĩra jaradeabadamina adua panuu kãare jaradea panuu.

8 Dachiba kuitaa panuu Moisesba ɓʉɗa bibuara ɓuu. Maamina arakʉɗe jaradeaɗai panuu. 9 Nau kuitaaɗai panuu: Dachi Akõreba mau Moisesba ɓʉɗa deabasii chi jipa nuree baita, maumaarã deasii chi Dachi Akõreba jara ɓuu kĩra wauɗakaurã baita, ũribabaswãe nuree baita, Dachi Akõreswãe nuree baita, kachirua wau nuree baita, Dachi Akõre wapeaɗakau baita, chi nau iujãaɗebenarã kĩra panabadaurã baita, ãchi akõrerã beabadau baita, mia beabadau baita, 10 junebena ome kãi topaneebadaurã baita, ãchi araɓaurã ome mia pera waubadaurã baita, ẽbẽrarã jidauɗapeɗa nedobʉibadaurã baita, setaa jarabadaurã baita, chi juez kĩraare setaa jarabadau baita mauɗe chi biawãra beɗea jara ɓuu wauɗakaurã baita. 11 Dachiba chi Dachi Akõre ʉ̃rʉbena beɗea bia jaradeaduuɗe mau joma kauwa kuitaabiɗai. Dachi Akõre bia niiba mau mʉʉmaa deasii jaradea ɓuamera.

Dachi Akõreba Pablo kĩra chuburiaɗa

12 Dachi Mechiu Jesucristoba mʉʉmaa poyaabarii deasii ichi beɗea jaradea ɓuamera. Kuitaasii mʉʉba ne joma jipa waui ichi baita. Mauɗeeba mʉ iusii ichiba kʉ̃ria ɓuu wau ɓuamera. Mau baita mʉʉba ichíturu kiɗibai ɓuu ai. 13 Naeɗe mʉʉba ichi ʉ̃rʉbena kachirua berreabachii mauɗe ichiɗirã kachirua waui baita wãraabachii. Waabenarãmaa kachirua berreabachii. Ichiɗe wabiɗa ijãawẽa ɓuasiiɗeeba mauɗe adua ɓuasiiɗeeba maka kachirua waubachii. Maamina ichiba mʉ kĩra chuburiasii. 14 Dachi Mechiu Jesucristoba ichi sõbiaɗeeba mʉ ãrea karibasii ichiɗe ijãamera mauɗe ichi kʉ̃ria uru ɓuamera.

15 Nau beɗea biawãraɗeeba jomaurãba mau ijãaɗai panuu: Jesucristo nau druaɗaa neesii kachirua waubadaurã karibai baita. Maarãɗebena mʉ chi aude kachirua ɓuasii. 16 Maamina mauɗeeba Dachi Akõreba mʉ kĩra chuburiasii. Maka Jesucristoba mʉ, chi aude kachirua wau ɓuaɗaɗeeba unubisii ichi joma dauchia jãadua eseɗau ɓuai ɓuu. Mʉʉɗeeba chi wabiɗa ijãaɗakaurãmaa kuitaabiasii saka ẽbẽra kachirua kĩra chuburiabarii ewaricha chokae ɓuamera. 17 Dachi Akõre ewaricha jomaurã Reybʉ. Mau chi dachiba unuɗakau biukau. Ichíturu aɓaburu nii.* Ichíturu dachiba ewaricha biꞌia berreaɗai panuu mauɗe wapeaɗai panuu. Maka biꞌia ɓuase.

18 Mʉ warr Timoteo, mʉʉba Dachi Akõreba naa jarabʉiɗa bichi ʉ̃rʉbena kʉ̃risiaruuɗe, bichiba waui ɓuu jarabʉiruu. Maka Cristoɗe ijãa ɓuuɗeeba, kʉ̃risia jipa ɓuuɗeeba chi biawãra beɗea uru ɓuase waabenarã tãeɗe kokoroa chĩobarii kĩra. Waabenarãba mau kʉ̃risia bia uru panaɗa ida ɓuɗapeɗa ãchiba Cristoɗe ijãa panuu ida ɓusiɗau. 19 —. 20 Maarãɗebena aɓa Himeneo basii. Mauɗe aɓa Alejandro basii. Maarã mʉʉba Satanás juaɗe ɓusii kuitaaɗamera Dachi Akõre ʉ̃rʉbena waa kachirua berrearãaɗamera.

Dachi Akõremaa ʉtaa iɗiɗai panuu ʉ̃rʉbena

2 Nau biꞌia jaraaruu: joma ẽbẽrarã baita ãbarãba Dachi Akõremaa chi chuburia iɗiɗai panuu, ichiba karibamera ʉtaa iɗiɗai panuu mauɗe ichíturu kiɗibai aɗai panuu. 2 Joma nau iujãaɗebena reyrã baita mauɗe jaradea ua ɓuabadaurã baita Dachi Akõremaa ʉtaa iɗiɗai panuu dachi jirukaraayuwãe panaɗai baita, apii panaɗai baita, Dachi Akõre wapea panaɗai baita mauɗe ne jomaɗe jipa panaɗai baita. 3 Maka ʉtaa iɗi panaɗai biꞌia ɓuu. Dachi Karibabarii Dachi Akõreba mau biꞌia unu ɓuu. 4 Ichiba kʉ̃ria ɓuu jomaurãba chi biawãra beɗea kuitaapeɗaaɗa kachiruaɗebena karibaɗai. 5 Dachi Akõre aɓaburu nii. Mauɗe chi ẽbẽrarã Dachi Akõre ome nebʉraɗe panaɗa mau biꞌia nibabiabarii aɓaburu nii. Mau ẽbẽra Jesucristobʉ. 6 Ara ichi ida beabisii ẽbẽrarã joma kariba ɓuai baita. Dachi Akõreba ɓuɗa ewariɗe mau kuitaabisii. 7 Mau baita mʉ ichi beɗea jarabarii ɓusii. Mʉ ichiba bʉiɗa ɓusii chi biawãra beɗea ichi ijãaɗai panuu ʉ̃rʉbena judiowãerãmaa jaradeaɗe wãmera. Mʉʉba biawãra jara ɓuu* mauɗe setawãe ɓuu.

8 Mauɗeeba, ãbarã araa ãbua imiiduucha mʉʉba kʉ̃ria ɓuu mukĩrarãba kʉ̃risia biaɗeeba ãchi jua ʉtaa jiraaduuɗe Dachi Akõremaa ʉtaa iɗiɗamera. Mauɗe kĩru panaɗaabai panuu mauɗe oa kachirua berrea panaɗaabai panuu.* 9 Mʉʉba kʉ̃ria ɓuu wẽrarãba paru arakʉɗe jʉ̃ɗamera, wẽrarã jipa nureeba jʉ̃badau kĩra. Ãchi buɗa ãrea kapipia meraa iruɗawẽa panaɗai panuu. Nee maebʉrã perla jʉ̃ɗawẽa panaɗai panuu. Mauɗe paru chi nejarr ãrea iɗibadau jʉ̃ɗawẽa panaɗai panuu. 10 Maumaarã Dachi Akõre wapea panuuɗeeba, wẽrarãba biꞌia wau panuuɗeeba ãrea biꞌia kapipia jʉ̃badau kĩra panaɗai panuu. 11 Ãbarã araa ãbua imiiduuɗe wẽrarãba chũpea ũriɗai panuu mauɗe chi ijãabadaurã nubadaurã wapea panaɗai panuu.* 12 Ãbua panuuɗe mʉʉba ida ɓukau wẽraba mukĩrarãmaa jaradea ɓuai maebʉrã mukĩra ichi juaɗe uru ɓuai. Maumaarã wẽrarãba chũpea ũri panaɗai panuu. 13 Maka ɓuai ɓuu Dachi Akõreba Adán naa wausiiɗeeba. Mawãare Eva wausii. 14 Mau awara jʉbawãe niiba Adán setaa kũruabasii, maumaarã wẽráturu setaa kũruasii. Maka setaa kũruasiiɗe wẽraba kachirua wausii. 15 Maamina wẽrarãba warr adaubadauɗeeba maarã karibai, Cristoɗe ijãa paneeduubʉrã, biawãra waabenarã kʉ̃ria uru paneeduubʉrã mauɗe Dachi Akõre baita biꞌia paneeduubʉrã. Joma mau kĩra jipa nureaɗai panuu.*

Ijãabadaurã nubarii saka ɓuai ɓuu

3 Nau beɗea biawãraɗeeba, mau ijãaɗai panuu: aɓauba chi ijãabadaurã nubarii ɓuai kʉ̃ria ɓuubʉrã, biꞌia wau kʉ̃ria ɓuu.* 2 Mauɗeeba chi ijãabadaurã nubarii nebʉra barau nii aɗayuswãe ɓuu, wẽra aɓaburu uru ɓuai ɓuu, kauwa nibai baita ɓuu, kʉ̃risia biaɗeeba ɓuai ɓuu, kĩra jipa ɓuai ɓuu, ichi deɗe needuurã biꞌia irsibii ɓuu mauɗe jaradea kuitaa ɓuai ɓuu. 3 Itua biu nibaabai ɓuu. Kĩrubi iɗaa nibaabai ɓuu, maumaarã kĩrabia ɓuai ɓuu. Jomaurã ome jirukaraayuwãe ɓuai ɓuu. Chi nejarra kʉ̃ria nibaiswãe ɓuai ɓuu. 4 Ichi deɗebenarã ãrea nu kuitaa ɓuai ɓuu, ichi warrarã ũribaba nureaɗai ɓuu mauɗe ãchiba ichi wapeaɗai panuu. 5 Ara ichi deɗebenarã nu adua ɓuubʉrã, ¿saka ẽbẽrarã Dachi Akõreɗerã biꞌia nuima? 6 Dachi Akõre beɗea ea ijãaɗa nii ijãabadaurã nubarii ɓuabai ɓuu chi mechiu kʉ̃risiarãamera. Maka kʉ̃risiaruubʉrã Dachi Akõreba ichi kastikai jʉbawãe nii kastikaɗa kĩra. 7 Cristoɗe ijãaɗakaurã biɗa ichi ʉ̃rʉbena biꞌia kʉ̃risiaɗai panuu. Maka ẽbẽrarãba ichi ʉ̃rʉbena kachirua berreaɗaabai mauɗe jʉbawãe niiba ichi ẽbẽrarã daaɗe nebʉra bara nii ai.

Ijãabadaurã aiɗabarii saka ɓuai ɓuu

8 Ara mau kĩra ijãabadaurã aiɗabadaurã jipa nibaɗai panuu ẽbẽrarãba wapeaɗamera.* Ãchiba setaa berreaɗaabai panuu, itua biu nibaɗaabai panuu, mauɗe chi nejarra kʉ̃ria panaɗaabai panuu. 9 Dachiba ijãa panuu beɗea Dachi Akõreba kuitaabiaɗa, kʉ̃risia biaɗeeba ãrea nuɗai panuu. 10 Ãbarã aiɗabadaurã ɓuɗai naeɗe ãrea kauwa ichiaɗai panuu. Maabae maarã ʉ̃rʉbena kachirua jaraɗayuswãe nureebʉrã, ijãabadaurã aiɗabadau panaɗai panuu. 11 Ara mau kĩra wẽrarã siɗa jipa nibaɗai panuu ẽbẽrarãba wapeaɗamera.* Waabenarã ʉ̃rʉbena ãrea kachirua berreaɗaabai panuu. Kauwa nibaɗai baita panuu mauɗe jomaɗe jipa nureaɗai panuu. 12 Ãbarã aiɗabariiba wẽra aɓa uru ɓuai ɓuu. Ichi warrarã mauɗe ichi deɗebenarã ãrea nu kuitaa ɓuai ɓuu. 13 Ãbarã aiɗabadaurãba wauɗai panuu jipa wauduubʉrã, jomaurãba ãchi ʉ̃rʉbena biꞌia berreaɗai. Maka wapeawẽa ãchiba Jesucristoɗe ijãa panuu ʉ̃rʉbena aude poyaa berreaɗai.

Chi biawãra beɗea Dachi Akõreba kuitaabiaɗa

14 Mʉ isa bichi ichiaɗe wã kʉ̃ria ɓuu. Maamina nau karta bichi baita ɓʉɗauruu. 15 Maamina kãꞌãaruubʉrã mʉʉba kʉ̃ria ɓuu Dachi Akõre chokae nii ẽbẽrarã saka ãbua panaɗai panuu bichiba kuitaamera. Dachiba Dachi Akõre chi biawãra beɗea jaradeabadau de wãto kĩra ɓuu mauɗe de jʉ̃rʉ kĩra ɓuu.

16 Biawãra Dachi Akõreba mau beɗea kuitaabiaɗa ãrea biꞌia ɓuu:

Setaa jaradeabadaurã

4 Dachi Akõre Jauriba arakʉɗe jara ɓuu nau kaaɗebena ewariɗe waabenarãba Cristoɗe ijãa panapeɗaaɗa ida ɓuɗapeɗa jai kachirua seta iɗaa nuree mauɗe ãchiba jaradeabi panuu ijãaɗai. 2 Mau jai kachiruarãba jaradeabi panuu ẽbẽrarã chi jipa kĩra nureeba jaradeabadau. Kachirua waubadauɗeeba mau ẽbẽrarãba adua nuree sãu chi bia mauɗe sãu chi kachirua. 3 Jãarãba wẽra ida miakãibiɗakau mauɗe chi ɓee chiko ida kobiɗakau. Maamina Dachi Akõreba joma deasii ichiɗe ijãabadaurãba mauɗe chi biawãra beɗea kuitaa panuurãba ichimaa ichíturu kiɗibai aɗapeɗa koɗamera. 4 Ne joma Dachi Akõreba waukuaɗa biꞌia ɓuu. Mauɗeeba Dachi Akõremaa ichíturu kiɗibai aaduubʉrã dachiba koɗaiɗebena aɓa biɗa koɗaabai aɗaabai panuu. 5 Mau koɗai Dachi Akõre daaɗe biꞌia ɓuu Dachi Akõre beɗeaba maka jara ɓuuɗeeba mauɗe ichimaa ʉtaa iɗibadauɗeeba.

Jesucristo baita bari trajabarii bia

6 Timoteo, bichiba joma mau ãbarãmaa jaradea ɓuaruubʉrã, Jesucristo baita bari trajabarii biꞌia ɓuai. Dachi Akõre chi biawãra beɗea dachiba ijãa panuu ijãa kãriiɗeeba bichi jauri chaarea wari ɓuai biꞌia ko ɓuu kĩra.

7 Nabẽraeɗebena nebʉrʉbadau kachirua ɓee ida ɓuse. Dachi Akõreba kʉ̃ria ɓuu kĩra nibai baita jʉrʉse. 8 Biawãra dachi kakua chaareabiɗai baita wau panuubʉrã, dastu dachi kakua aiɗaɗai. Maamina Dachi Akõre baara nibaaduubʉrã, mauba dachi ne jomaɗe aiɗai. Iɗibae mauɗe kaaɗebena ewariɗe biɗa karibai. 9 Mau beɗea biawãra ɓuu. Jomaurãba mau ijãaɗai panuu. 10 Mau baita dachi traja panuu. Ãrea biꞌiwãe panuu, Dachi Akõre chokae ɓuuba jomaurã poyaa karibai kuitaa panuuɗeeba. Biꞌia jaraaruubʉrã, chi ichiɗe ijãaduu karibabarii.

11 Joma mau jaradease mauɗe jarase wauɗamera. 12 Bichi kũudrãa ɓumina aɓaumaa biɗa ida kabirã́se. Maumaarã bichiba berrearuuɗeeba, ne wau ɓuuɗeeba, waabenarã biawãra kʉ̃ria ɓuuɗeeba, kĩra jipa ɓuuɗeeba, mauɗe Cristoɗe ijãa ɓuuɗeeba ãbarãmaa unubiáse saka panaɗai panuu. 13 Mʉ jãmaa wãaruumisa, jomaurã daaɗe Dachi Akõre beɗea jĩwa eɗa jarase, jaradea ɓuase mauɗe ãbarã aiɗa ɓuase biꞌia ijãaɗamera. 14 Dachi Akõreba bichimaa waubi ɓuu deaɗa wãꞌãebirã́se. Ãbarã nubadaurãba ãchi jua bichi ʉ̃rʉ kuɓusiɗauɗe Dachi Akõreɗeeba jarasiɗau ichiba mau dearuu. 15 Joma mau kĩra jipa wau ɓuase jomaurãba kuitaaɗamera bichiba ewaricha biꞌia wau kãrii. 16 Ara bichi ʉ̃rʉbena mauɗe bichiba jaradea ɓuu ʉ̃rʉbena kauwa ɓuase. Joma mau jipa wau nibase. Maka wau niibʉrã bichi karibai. Bichiba jaradea ɓuu ũri panuu siɗa karibaɗai.

Ãbarã ome saka ɓuai ɓuu

5 Chõrarã iadaarã́se, maumaarã bichi akõre ome berreabarii kĩra maarã ome sõbiaɗeeba berreáse ũriɗamera. Kũudrãarãmaa berreáse bichi ãbarã ome berreabarii kĩra. 2 Chõodraarãmaa berreáse bichi nawe ome berreabarii kĩra. Awẽrarãmaa berreáse bichi neekau ome berreabarii kĩra. Maarã baara joma kachiruaɗebena awara ɓuase.

3 Pẽdrãarã chi aiɗaɗayuswãe nuree aiɗase. 4 Maamina pẽdrãaba warrarã ua ɓuubʉrã, ãichekerã ua ɓuubʉrã, maarãba mau pẽdrãa aiɗaɗai panuu. Ãchiba ãrea kuitaaɗai panuu saka ãchi deɗebenarã aiɗaɗai panuu. Ãchi akõrerãmaa ne kaebea deaɗai panuu ãchi tatarãba ãchimaa dea panaɗa kĩra. Mau Dachi Akõre daaɗe jipa ɓuu. 5 Pẽdrãa biawãra ichi du aɓa ɓuuba ãrea kuitaa ɓuu joma ichiba uru ɓuai ɓuu Dachi Akõréburu deai. Ãyadaa mauɗe ẽsabuɗe Dachi Akõremaa ʉtaa iɗibarii karibamera. 6 Maamina pẽdrãaba barikia wau ɓuai jʉrʉʉruubʉrã, chokae ɓumina biuɗa kĩra ɓuu. 7 Joma chi ãbarãmaa mau waubiáse pẽdrãarã ʉ̃rʉbena kachirua jaraɗawẽa panaɗamera. 8 Aɓaba ara ichi deɗebenarã aiɗakaubʉrã, Dachi Akõre beɗea ida ɓu ɓuu. Mau Cristoɗe ijãaɗakaurã audeara kachirua wau ɓuu.

9 Ãbarãba barikiu pẽdrãa trʉ̃ kartaɗe ɓʉɗaabai panuu aiɗaɗai baita. Maumaarã naka nuree ɓʉɗai panuu: 60 año wãyaa nuree mauɗe mukĩra aɓaburu uru panaɗa. 10 Ãchiba biꞌia waupeɗaaɗaɗeeba trʉ̃ poa panaɗai panuu. Ãchi warrarã biꞌia waribiabachiɗaubʉrã, ãchi deɗe neepeɗaaɗa biꞌia irsibibachiɗaubʉrã, ãbarã jʉ̃rʉ jeraabachiɗaubʉrã, chi biꞌiwãe nuree aiɗabachiɗaubʉrã, mauɗe ne joma biꞌia waubachiɗaubʉrã, mau pẽdrãa trʉ̃ kartaɗe ɓʉɗai panuu.*

11 Maamina pẽdrãa wabiɗa chõodraawãe nuree trʉ̃ kartaɗe ɓʉrã́sturu. Maarã mukĩra awaba waya kima adauɗai kʉ̃riabadau. Maka ãchiba Cristo traju wauɗai baita waya miakãiɗaabai beɗea deapeɗaaɗa ida ɓubadau. 12 Ãchiba chi naa beɗea deapeɗaaɗa ida ɓusiɗauɗeeba nebʉra bara panuu. 13 Mau awara ãchi decha nibabadau mauɗe koꞌoa paneebadau. Mau awara chi beɗea ãrea paneebadau, waabenarã nebʉraɗe eɗa wã paneebadau, mauɗe ne jaraabai ɓuu berrea paneebadau. 14 Mauɗeeba mʉʉba kʉ̃ria ɓuu pẽdrãa wabiɗa chõodraawãe nuree miakãiɗai, warr adauɗai, mauɗe ãchi de siɗa biꞌia nuɗai. Maka dachi kĩramaabadauba poyaa kachirua berreaɗaabai. 15 Mʉʉba mau jara ɓuu waabenarã pẽdrãarã o ãyare wãɗapeɗa Satanás baara wã panasiiɗeeba.

16 Cristoɗe ijãa ɓuu wẽraba pẽdrãa ichi deɗebenarã tãeɗe nuree aiɗai ɓuu.* Maka mau pẽdrãa Cristoɗe ijãabadaurãba aiɗaɗaabai panuu. Maumaarã pẽdrãa istu nuree aiɗaɗai panuu.

Ãbarã nubadaurã ome saka wauɗai panuu

17 Chi ijãabadaurã nubadaurãba biꞌia wau panuuɗeeba ãbarãba kʉ̃risia biaɗeeba maarã aiɗaɗai panuu, ne uru panaɗamera. Maarãɗebena chi Dachi Akõre beɗea jaradeabadaurã mauɗe dachi saka nibai ʉ̃rʉbena jaradeabadaurã, aude aiɗaɗai panuu. 18 Dachi Akõre beɗeaɗe naka jara ɓuu: «Bichiba pakaba ne biraduamaa ɓuuɗe chi kũ jʉ̃rã́se».* Mauɗe naka jara ɓuu: «Trajabariiba ichi deai ɓuu chi nejarra adaui ɓuu».*

19 Aɓauba ijãabadaurã nubarii jidearuubʉrã, maamina ẽbẽra omeeba maebʉrã õbeaba ara mau kĩra jaraɗawẽebʉrã, mau beɗea ijãarã́se. 20 Maamina ijãabadaurã nubariiba kachirua wau ɓuubʉrã, jomaurã daaɗe iadaase waabenarãba wapeaba mau kachirua waurãaɗamera. 21 Dachi Akõre daaɗe, Cristo daaɗe mauɗe angelerã daaɗe mʉʉba bichimaa jaraaruu: joma mʉʉba jaraɗa ijãa wause. Maka wauruuɗe, ẽbẽraba jaraaruu aɓauba aude ũrirã́se, maumaarã jomaurã ome araɓauɗe jipa wau ɓuase. 22 Bichi jua aɓau ʉ̃rʉ biɗa isa kuɓurã́se, ijãabadaurã nubarii ɓuamera. Bichiba maka wauruubʉrã, mauba kachirua wauɗabʉrã bichi siɗa nebʉraɗe ɓuai mau kachirua baita. Joma kachiruaɗebena awara ɓuase.

23 Bichi barikia kakua kachirua ɓuabariiɗeeba baníaturu dorã́se. Maumaarã uva ɓaa siɗa bichi ɓi baita ɓistĩika dose.

24 Chi kachirua ichiai naeɗe, waabenarãba kachirua wau panuu dachiba biꞌia unubadau maamina waabenarãba kachirua wau panuu maaɗakare kuitaaɗai. 25 Ara mau kĩra waabenarãba biꞌia wau panuu dachiba biꞌia unubadau, mauɗe waabenarãba biꞌia wau panuu biꞌia unuɗakamina miru ɓeebai.

Chibari baita bari trajabadaurã saka panaɗai panuu

6 Cristoɗe ijãa panuu baita bari trajabadaurãba ãchi chibari wapea panaɗai panuu. Maka waabenarãba kachirua jaraɗaabai Dachi Akõre mauɗe dachiba jaradeabadau ʉ̃rʉbena. 2 Ãchi chibari biɗa Cristoɗe ijãa ɓuubʉrã, kʉ̃risiaɗaabai panuu ãbaɗeeba wapeaɗaabai panuu. Maumaarã ichi baita bibuara trajaɗai panuu. Ãchi trajuɗeeba Cristoɗe ijãa ɓuuba chi nejarra adaubariiɗeeba, kʉ̃riaɗeeba ichi baita trajaɗai panuu. Mau jaradea ɓuase. Mauɗe ãchimaa jarase maka wauɗamera.

Chi nejarra kʉ̃ria nuree

3 Aɓauba ãyaa jaradearuubʉrã, Dachi Mechiu Jesucristoba jipa jaradeaɗa makawãema aaruubʉrã, mauɗe dachi jipa nibaɗai ʉ̃rʉbena siɗa ãyaa jaradearuubʉrã, 4 joma kuitaa ɓuu kʉ̃risia ɓumina biawãra adua nii. Kĩrajʉʉwãe ɓuuɗeeba oa kachirua berrea ɓuabarii. Barikia berreaduuɗeeba oa kachirua ɓeebarii. Mauɗeeba naarã neebadau: ãibenaba ne kaebea uru ɓuu kakua kĩra kachirua ɓuai, ãibena ome kĩrubi iɗaa ɓuai, ãibena ʉ̃rʉbena kachirua berrea ɓuai, mauɗe ãibena ʉ̃rʉbena kachirua kʉ̃risia ɓuai. 5 Mau ẽbẽrarã kʉ̃risia biawãe nuree mauɗe biawãra berrea adua nuree siɗa barikia oa kachirua berreabadau. Ãchiba kʉ̃risiabadau Dachi Akõreɗe ijãa ɓuuɗeeba chi nejarra adauɗai.* 6 Biawãra jipa niɗauɗeeba ne bia ãrea uru panuu, maamina ara dachiba nau druaɗe uru panuuba kĩrajʉʉ nureebʉrã. 7 Dachi danaba dachi adausiɗauɗe nau iujãaɗe ne kaebea aɓau biɗa eneeɗaabasii. Biuduuɗe ne kaebea aɓau biɗa adoeɗaabai. 8 Mauɗeeba koɗai uru panuubʉrã, paru uru panuubʉrã, ara mauba jirukaraayuwãe nureaɗai panuu. 9 Maamina barau nureaɗai kʉ̃ria panuuba ne joma kʉ̃ria panuuɗeeba kachiruaɗe ɓaebadau. Chi dachi aiɗakau mauɗe dachi kachirua wau ɓuu kʉ̃ria panuuɗeeba kachiruaɗe paneebadau ãnimara enabeɗe ɓaeɗa kĩra. Mau ãrea miichuburi paneebadau, doeɗa taawãaruu kĩra. 10 Chi nejarra kʉ̃ria ɓuuɗeeba ne kachirua ãrea neebarii. Ara mau kʉ̃ria panuuɗeeba waabenarãba Cristoɗe ijãa panaɗa ida ɓusiɗau. Maka ãchi ãrea biꞌiwãe panasiɗau.

Pabloba Timoteomaa waubiɗa

11 Maamina bichiba Cristoɗe ijãa niiɗeeba joma mauɗebena ãyaa wãse.* Jipa nibase. Dachi Akõre baara wãse. Sõɗeeba biawãra Cristoɗe ijãa ɓuase. Jomaurã kʉ̃ria ɓuase. Joma jãaduase. Jaradea ua ɓuabarimina, jomaurã ome sõbiaɗeeba ɓuase. 12 Cristoɗe ne joma ijãa ɓuase biꞌia chĩobarii kĩra. Maka bichi ewaricha Dachi Akõre ome chokae ɓuai. Ãrea panuurã daaɗe, bichiba Cristoɗe ijãa ɓuu jarasiiɗe Dachi Akõreba bichi iusii mau chokae ɓuai uru ɓuamera. 13 Joma chokae nuree Dachi Akõreɗeeba chokae nuree. Ara mau Dachi Akõre daaɗe mʉʉba jaraaruu bichiba wau ɓuamera. Jesucristo daaɗe biɗa araɓauɗe jaraaruu ichiba Poncio Pilato daaɗe chi beɗea biawãra jaraɗa kĩra. Mʉʉba nau jaraaruu: mʉʉba jaradea ɓuu kĩra jipa wau ɓuase, bichi ʉ̃rʉbena kachirua jarabiamaaba aɓa Dachi Mechiu Jesucristo neeruuɗaa. 14 —. 15 Dachi Akõreba ɓuɗa ewariɗe ichi unubii.

Barau nureeba saka wauɗai panuu

17 Nau druaɗe barau nureerãmaa jarase waabenarã audeara mechiu nuree kʉ̃risiarãaɗamera. Ãchiba ne uru panuu ãrea ɓuakauɗeeba jarase mau baita biꞌia panaɗai kʉ̃risiarãaɗamera. Dachi Akõréturu kʉ̃risiaɗai panuu.* Ichiaburu dachimaa ne joma wãꞌãekaraa deabarii jirukaraayuwãe nureaɗamera. 18 Chi barau nureerãmaa jarase jomaurã ome biꞌia wauɗamera. Mauɗe jarase ãchiba uru panuuɗebena sõbiaɗeeba waabenarãmaa deaɗai baita panaɗai panuu. 19 Maka biꞌia wau panuuɗeeba ne kaebea pe nuɓuumaa panuu ewari aɓa neeruuɗe biꞌia panaɗai baita. Ara mauɗe ãchi biawãra chokae panaɗai.

Pabloba nau kartaɗe aanama ɓʉɗa

20 Timoteo, joma Dachi Akõreba jaraɗa ãrea nuse. Chi Dachi Akõre baita biꞌiwãe ɓuu ʉ̃rʉbena berreabadau ida ɓuse. Mauɗe joma kʉ̃risia Dachi Akõre beɗea ome kĩra ãyaa nuree ida ɓuse. Waabenarã baita, mau kʉ̃risia ɓee biꞌia ɓuu. Maamina biꞌiwãe ɓuu. 21 Waabenarãba mau kʉ̃risia ijãabadau. Mauɗeeba ãchiba Cristoɗe ijãa panaɗa ida ɓusiɗau. Mʉʉba kʉ̃ria ɓuu Dachi Akõreba ichi sõbiaɗeeba bichi aiɗa ɓuai.*