1 PEDRO

Pedroba nau kartaɗe naa ɓʉɗa

1 Mʉ Pedrobʉ, Jesucristoba bʉiɗabʉ. Mʉʉba nau karta ɓʉʉruu Dachi Akõreba jʉrʉ adauɗarã Ponto druaɗe, Galacia druaɗe, Capadocia druaɗe, Asia druaɗe, Bitinia druaɗe mauɗe drua awaraɗebenarã kĩra panabadau baita. 2 Dachi Bajãaɗebena Akõreba* machi adausii ichiba naeɗe makai kʉ̃risia ɓuaɗa kĩra. Dachi Akõre Jauriba machi ichi baita ɓusii Jesucristoɗe ijãaɗamera mauɗe ichi oaɗeeba Dachi Akõre daaɗe kachiruaswãe nureaɗamera. Mʉʉba kʉ̃ria ɓuu Dachi Akõreba ichi sõbiaɗeeba machi aiɗa ɓuamera mauɗe jirukaraayuwãe ɓuabiamera.

Pedroba Dachi Akõremaa biꞌia berreaɗa

3 Dachi Mechiu Jesucristo, dachi Bajãaɗebena Akõremaa biꞌia berreaɗai panuu. Ichiba dachi ãrea kĩra chuburiasiiɗeeba Jesucristo biu ɓuaɗa chokae jiradusiiɗeeba dachi waya chokae duaneebiasii. Mauɗeeba kuitaa panuu 4 ichiba dachi baita bajãaɗe nu uru ɓuu joma adauɗamera. Mau ãrikau, wãꞌãekau mauɗe kachiruaswãe ɓuu. 5 Jesucristoɗe ijãa panuuɗeeba Dachi Akõreba ichi poyaabariiɗeeba machi nu uru ɓuai, aɓa chi kaaɗebena ewariɗe karibaaruuɗaa.

6 Mauɗeeba ãrea kĩrajʉʉ panuu. Ara ʉ̃rauɗaa ne aꞌawaraaɗeeba machi ãrea biꞌiwãe panumina, 7 mau biꞌiwãe panuuɗeeba unubiɗai Jesucristoɗe biawãra ijãa panuu. Machiba ijãa panuu nee kĩra ɓuu. Nee wãsiaba dorraɓaribibadau mau chi néeturu ɓeemera. Ara mau kĩra machi ãrea biꞌiwãe panuu jãadua panuuɗeeba unubi panuu Jesucristoɗe biawãra ijãa panuu. Mau ijãa panuu nee audeara biꞌia ɓuu nee wãꞌãebariiɗeeba. Machiba Jesucristoɗe biawãra ijãa panuu unubi panuuɗeeba, ichi unuuduuɗe Dachi Akõreba machi biꞌia unui, biꞌia jarai mauɗe chi mechiurã ɓui.

8 Machiba Jesucristo unuɗakamina mau kʉ̃ria panuu. Ʉ̃rauɗaa unuɗawẽa panumina ichiɗe ijãa panuu. Ichi kakua ãrea kĩrajʉʉ panuu. Maka kĩrajʉʉ panuuɗeeba mau kĩrajʉʉ saka ɓuu, poyaa kuitaa jaraɗawẽa panuu. 9 Maka kĩrajʉʉ panuu Jesucristoɗe ijãa panuuɗeeba, Dachi Akõreba karibaiɗeeba.

10 Dachi Akõre baita berreabadaurãba nabẽraeɗe jarabachiɗau Dachi Akõreba ichi sõbiaɗeeba machi karibai. Mau ʉ̃rʉbena kuitaaɗai baita ãchiba kauwa kʉ̃risiabachiɗau mauɗe mau ichiapeɗaaɗakare iɗibachiɗau. 11 Cristo Jauri ãchi sõɗe ɓuuba berreabiabachii Cristo ãrea biꞌiwãe ɓuaɗa baɗa Dachi Akõreba biꞌia ɓui ʉ̃rʉbena. Berreasiiɗe kuitaa kʉ̃ria panasiɗau kai ʉ̃rʉbena Cristo Jauriba ãchimaa berreabiasii mauɗe sakaeɗe joma mau makai. 12 Maamina Dachi Akõreba kuitaabiaɗa ãchiba berreapeɗaaɗa ãchi baitawãe basii, maumaarã machi baita ɓuu. Ãchiba berreapeɗaaɗa jãabae chi beɗea bia Cristo ʉ̃rʉbena jaradeabadaurã dachimaa biꞌia kuitaabia panuu Dachi Akõre Jauri bajãaɗebena bʉisiiɗeeba. Mau angelerã biɗa kuitaa kʉ̃ria panuu.

Dachi Akõre baita biꞌia panásturu

13 Mauɗeeba kʉ̃risia kuitaaɗeeba panásturu biꞌia wauɗai baita. Kĩra jipa panásturu. Kakua ãkaaɗawẽa eseɗau panásturu Jesucristo unuuduu ewariɗe Dachi Akõreba ichi sõbiaɗeeba machimaa ne bia deamera. 14 Warr ũribaba nii kĩra panásturu. Nau kakuaba kachirua wau kʉ̃ria ɓuu waa waurã́sturu Dachi Akõreɗe ijãaɗawẽa panasiiɗe waubachiɗau kĩra. 15 Dachi Akõreba machi iusii. Ichi ne jomaɗe jipa nii. Mauɗeeba machiba wauduucha jipa panásturu. 16 Dachi Akõre beɗeaɗe naka ɓʉ kuɓuu: «Jipa panásturu mʉ jipa niiɗeeba».*

17 Machiba Dachi Akõremaa berreaduuɗe machi Chacha abadaubʉrã, kuitásturu Ichiba ẽbẽra waabenarã audeara kʉ̃riakauɗeeba joma ichiai dachiba waupeɗaaɗa. Mauɗeeba wabiɗa nau iujãaɗe ãibenarã kĩra panuumisa ewaricha ichi wapea panuuɗeeba jipa nibásturu. 18 Naeɗe machi chi kʉ̃risia biawãeɗe nibabachiɗau machi nabẽraeɗebenarãba maka jaradeabachiɗauɗeeba. Maamina kuitaa panuu Dachi Akõreba machi mauɗebena karibasii. Ichiba machi nedoobasii nee ãrea ɓuakauba maebʉrã parata ãrea ɓuakauba, maumaarã Cristo oa chi nejarr ãrea iɗibadauba nedosii. Cristo chi bibuara nii oeja cheke Dachi Akõremaa baa deaɗa kĩra ɓuasii. 19 —. 20 Nau iujãa waui naeɗe Dachi Akõreba Cristo jʉrʉ adaupeɗa nau kaaɗebena ewariɗe bʉisii machi biꞌia nureaɗamera. 21 Cristoɗeeba machiba Dachi Akõreɗe ijãa panuu. Dachi Akõreba ichi biu ɓuaɗa chokae jiradubipeɗa chi mechiu ɓusii. Mauɗeeba machiba Dachi Akõreɗe biawãra ijãa panuu mauɗe eseɗau panuu Dachi Akõreba jaraɗa joma waumera.

22 Chi biawãra beɗea ijãa panuuɗeeba machi kachiruaswãe paneesiɗau.* Mauɗeeba ãbarã biawãra kʉ̃ria panuu. Sõɗeeba biawãra ãrea chiya kʉ̃ria panásturu. 23 Nau kakua biui ɓuuɗeeba machi chiwiɗi naweba waya adauɗaabasii, maumaarã Dachi Akõre biukau niiɗeeba chiwiɗi adausiɗau. Dachi Akõre beɗea wãꞌãekauba chokae ɓuai deabarii. Mau beɗeaɗeeba machi chiwiɗi wãwa kĩra adausiɗau. 24 Dachi Akõre beɗeaɗe naka ɓʉ kuɓuu:

Mau wãꞌãekau beɗea bia Cristoɗebenabʉ. Mau ãbarãba machimaa jarasiɗau.

2 Mauɗeeba waabenarãmaa kachirua wauɗai ida ɓústuru. Waabenarãmaa setaa jararã́sturu. Chi nureeba ara ãchiba jarabadau kĩra wauɗakau. Mau ẽbẽrarã kĩra panarã́sturu. Waabenarãba uru panuu kakua, kachirua kʉ̃risiarã́sturu. Waabenarã ʉ̃rʉbena kachirua jararã́sturu. 2 Dachi Mechiuba sõbiaɗeeba machi karibabarii kuitaasiɗau. Mauɗeeba warr ea adauɗaba ju do kʉ̃ria ɓuabarii kĩra Dachi Akõre beɗea biꞌia kuitaa kʉ̃riásturu.* Ichi beɗea chi biawãra ju ɓaara kĩra nii. Ichi beɗea kuitaaduubʉrã, wariɗai aɓa ichiba machi karibaaruuɗaa. 3 —.

Dachi Akõreba jʉrʉ adauɗa ẽbẽrarã

4 Dachi Mechiu Jesucristomaa nésturu. Ichi chokae ɓuu, de waui baitabena mo kĩra ɓuu.* Ẽbẽrarãba ichi ida ɓusiɗau, maamina Dachi Akõreba mo bia mauɗe chi mau nejarr ãrea iɗibadau jʉrʉ adausii. 5 Machi ichiɗebena chokae nureeɗeeba, de waui baitabena mo kĩra nureebʉ. Machiɗebena Dachi Akõreba ichi de wauruu. Mauɗe ichi baita machi paarerã babiaruu. Machiba Jesucristoɗebena Dachi Akõre baita ne wau panuuɗe ichimaa ãnimara baa deaduu kĩra wau panuu. Maka wau panuu ichiba biꞌia unu ɓuu. 6 Dachi Akõre beɗeaɗe Jesucristo ʉ̃rʉbena naka ɓʉ kuɓuu:

7 Machi chi Cristoɗe ijãabadaurãmaarã, ichi ãrea biꞌia ɓuu. Maamina chi ichiɗe ijãaɗakaurã ʉ̃rʉbena Dachi Akõre beɗeaɗe naka ɓʉ kuɓuu:

«Chi mo chi de waubadaurãba ida ɓupeɗaaɗa, mau chi biara ɓeesii».*

8 Mauɗe naka ɓʉ kuɓuu:

«Ẽbẽrarã mau moomaa drʉɗapeɗa ɓaeɗai».*

Ãchiba Dachi Akõre beɗea ijãaɗawẽa panuuɗeeba moomaa drʉʉduu kĩra nuree. Dachi Akõreba maarã ɓusii maka nureaɗamera.

9 Maamina machi Dachi Akõreba jʉrʉ adauɗarãbʉ, joma Dachi Mechiu paarerãbʉ, ichi baita ɓuɗa ẽbẽrarãbʉ mauɗe ichi puurubʉ. Maka Dachi Akõreba ne ãrea biꞌia wauɗa ʉ̃rʉbena machiba berreabadau. Dachi Akõreba machi pãriuɗebena iusii ichi ʉ̃ɗaa ãrea biꞌia ɓuuɗe nureaɗamera. 10 Naeɗe machi Dachi Akõre puuruwãe basii, maamina jãabae Dachi Akõre puurubʉ. Naeɗe Dachi Akõreba machi kĩra chuburiawẽa ɓuasii, maamina jãabae kĩra chuburia ɓuu.*

Ijãaɗakaurã tãeɗe jipa panaɗai panuu

11 Mʉ ãbarã, nau iujãaɗe machi ãibena druaɗebenarãɓu. Mauɗeeba mʉʉba machimaa chi chuburia iɗiiruu nau kakuaba kachirua wau kʉ̃ria ɓuu ida ɓuɗamera. Mau ara dachi ome chĩo ɓuu. 12 Dachi Akõreɗe ijãaɗakaurã tãeɗe jipa nibásturu. Maka ãchiba machi kachirua waubadaurã a panumina, machiba biꞌia wau panuu unu panuu. Maabae Dachi Akõre neeruuɗe machi ʉ̃rʉbena ichimaa biꞌia berreaɗai.

13 Dachi Mechiu Jesucristo baita joma nau iujãaɗebena karrarã beɗea ijã́sturu. Nau iujãaɗebena karrba jaraaruu ijã́sturu ichi chi mechiu niiɗeeba. 14 Mauɗe chi ichiɗe karrarã jaraaduu ijã́sturu. Chi karr chi mechiu niiba maarã ɓusii kachirua waubadaurã kastikaɗamera mauɗe biꞌia waubadaurã ʉ̃rʉbena biꞌia jaraɗamera. 15 Dachi Akõreba kʉ̃ria ɓuu machiba biꞌia wau panaɗai. Maka machiba chi kʉ̃risiaswãe nuree chũpeabiɗai, adua panuuɗebena machi ʉ̃rʉbena kachirua jarabadauɗeeba.

16 Machi jʉ̃ uru panaɗa kĩra ɓuuɗebena Cristoba machi enakoasiiɗeeba, mau kĩra nibásturu. Maamina maka ɓusiiɗeeba kʉ̃risiarã́sturu kachirua wauɗai panuu. Maumaarã Dachi Akõre baita bari trajabadaurã panásturu. 17 Jomaurã wapeásturu. Ãbarã ãrea kʉ̃riásturu. Dachi Akõre wapeásturu. Nau iujãaɗebena karr chi mechiu siɗa wapeásturu.

18 Chi chibari baita bari trajabadaurã, machi chibari wapea panásturu. Ichi beɗea ijã́sturu. Aɓaburu machi chibari chi bia nii mauɗe chi kĩra chuburiabarii ome maka panarã́sturu, maumaarã chi kachirua ome biɗa maka panásturu. 19 Ɓeseɗe biꞌia wau ɓuuɗeeba dachi ãrea biꞌiwãe panabadau. Maamina Dachi Akõreba dachi biꞌiwãe panuu kuitaa ɓuu. Dachiba mau ʉ̃rʉbena kʉ̃risiaduuɗe, mau joma dauchia jãadua panuubʉrã, Ichiba biꞌia unui. 20 Machiba kachirua wau panuu kakua chi chibariba kastikaaruubʉrã, machiba jãaduadumina ¿kaiba machi ʉ̃rʉbena biꞌia berreaima? Maamina biꞌia wau panuu kakua nebʉraɗe panuuɗe jãaduaduubʉrã, Dachi Akõreba biꞌia unui. 21 Cristo machi kakua ãrea biꞌiwãe ɓuasiiɗeeba Dachi Akõreba machi iusii ãrea biꞌiwãe panaɗamera. Cristo ãrea biꞌiwãe ɓuasiiɗe unubiasii machi nebʉraɗe panuuɗe saka nibaɗai panuu. 22 Cristoba kachirua wauka basii mauɗe setaa jaraka basii.* 23 Ẽbẽrarãba ichi kachirua jarasiɗauɗe ichiba ãchimaa kachirua jaraabasii. Ichi kachirua wausiɗauɗe ichiba waya ãchi kachirua waui a jaraabasii. Maumaarã Dachi Akõreba nebʉra jipa ichiabariiɗeeba ichi kachirua wau panuu Dachi Akõre juaɗe ɓubachii. 24 Cristoba dachi kachirua ichi ʉ̃rʉ cruzɗe adoesii dachi kachiruaɗebena biuɗapeɗa jipa nureaɗamera. Ichi kakua puꞌuasiɗauɗeeba machi biꞌia paneesiɗau. 25 Machi naeɗe chi oeja barikiuɗe nibaɗa kĩra nibabachiɗau, maamina jãabae Cristomaa waya neesiɗau. Ichiba machi nu ɓuu, oeja nubariiba ichi oeja nubarii kĩra.

Kima barau nuree saka nureaɗai ʉ̃rʉbena

3 Wẽra kima barau nuree, machi kima beɗea ijã́sturu. Maka chi nuree machi kimaɗebenarãba Dachi Akõre beɗea ijãaɗawẽa panumina machi kĩra jipa nuree mauɗe Dachi Akõre wapea nuree unuɗapeɗa ijãaɗai. Machiba machi kimamaa ijãaɗamera jaraɗawẽa panumina machiba biꞌia wau panuuɗeeba ijãabiɗai. 2 —. 3 Machi kĩrawãrea chi ʉ̃rʉbenáburu ɓuabai ɓuu; buɗa biꞌia irupeɗa ãrea kãajʉ̃ ɓuabai ɓuu, nee wauɗa kapipia jʉ̃ ɓuabai ɓuu, paru aude mipitaa ɓuu jʉ̃ ɓuabai ɓuu. 4 Maumaarã machi kĩrawãrea sõɗéburu ɓuai ɓuu; sõbia ɓuuɗeeba mauɗe jirukaraayuwãe ɓuuɗeeba ɓuai ɓuu. Mau kĩrawãrea wãꞌãekau mauɗe Dachi Akõreba biꞌia unu ɓuu. 5 Ara mau kĩra nabẽraeɗebena wẽrarã Dachi Akõre baita nureaɗa kĩrawãrea nureasii. Dachi Akõreba waui jaraɗa ãchiba sõɗeeba biawãra ijãa panabachiɗau mauɗe ãchi kima beɗea ijãabachiɗau. 6 Saraba Abraham beɗea ijãabachii mauɗe «mʉ mechiu» abachii. Ne wapeawẽa machiba ne joma biꞌia wau panuubʉrã, Sara kau nureaɗai.

7 Mukĩrarã wẽra barau nuree, kʉ̃risia biaɗeeba machi wẽra ome biꞌia panásturu. Machi wẽra biꞌia ɓuabii kʉ̃ria panuuɗeeba ãchi biꞌia nu panásturu, wẽra mukĩra aude meserãaswãe niiɗeeba mauɗe machi omea ãbua Dachi Akõre sõbiaɗeeba ichiba chokae panabiasiiɗeeba. Maka wauɗawẽebʉrã, machiba ʉtaa iɗiiduu Dachi Akõreba biꞌia ũriibai.

Biꞌia wau panuuɗeeba nebʉraɗe paneeɗai ʉ̃rʉbena

8 Mau awara ãbarã, araɓau kʉ̃risiaɗeeba joma machi ãbua biꞌia duanásturu. Waabenarã aiɗaɗai kʉ̃risia panásturu. Ãbarãɗeeba chiya kʉ̃riásturu. Chiya kĩra chuburiásturu mauɗe waabena audeara biꞌia nuree kʉ̃risiarã́sturu. 9 Aɓauba machi kachirua wauruubʉrã ara mau kĩra waurã́sturu. Kachirua jaraaruubʉrã ara mau kĩra kachirua jararã́sturu. Maumaarã ʉtaa iɗísturu Dachi Akõreba mau aiɗamera. Kuitaa panuu Dachi Akõreba machi adausii maka nureaɗamera. Maka nureebʉrã, Dachi Akõreba machi siɗa aiɗai. 10 Dachi Akõre beɗeaɗe naka ɓʉ kuɓuu:

13 Machiba biꞌia wau panuubʉrã, ¿kaiba machi kachirua wauima? 14 Maamina biꞌia wau panuuɗeeba ãrea biꞌiwãe duanuubʉrã, Dachi Akõre daaɗe ãrea biꞌia nureaɗai. Mauɗeeba chi machi kachirua wauduu wapearã́sturu. Ãrea jirukaraarã́sturu. 15 Cristo machi Mechiuɗeeba, sõɗeeba mau wapeásturu. Chi Cristoɗe adauɗai baita eseɗau panuuɗeeba mau ʉ̃rʉbena berreaɗayu panásturu. Maka aɓauba iɗiiruubʉrã, poyaa ijarra berreaɗawẽa arakʉɗe panauɗai. 16 Ara machi du aɓa kuitaa panásturu kachirua wauɗawẽa nuree. Maka machi Cristo kakua biꞌia nibabadau ʉ̃rʉbena kachirua berreabadaurã peraɗai.

17 Dachi Akõreba machi biꞌiwãe paneebiaruubʉrã, biꞌia ɓuu ãrea biꞌiwãe paneeɗai biꞌia wau panuuɗeeba ãrea biꞌiwãe panaɗai baɗamaarã kachirua wau panuuɗeeba. 18 Cristo jipa ɓumina kachirua kakua ɓes aɓa biꞌiwãe ɓuasii. Mauba dachi chi jipawãe nuree Dachi Akõre ome biꞌia ɓusii. Ichi beasiɗau, maamina Dachi Akõre Jauriɗeeba chokae jiradusii. 19 Mauɗe Dachi Akõre Jauriɗeeba chi jauri jʉ̃a duanuumaa wãsii. Wãpeɗa chi kachirua joma poyaasii, asii. 20 Maarã jaurirãba nabẽraeɗe Noé ewariɗe Dachi Akõre beɗea ijãaɗaabasii. Noeba jãba mechiu wau ɓuumisa Dachi Akõreba joma dauchia jãadua ɓuuɗeeba eseɗau ɓuasii ãchiba ijãaɗamera. Maamina ẽbẽra ɓaꞌãra bania biruɗaɗebena paneesiɗau. Biawãra jaraaruubʉrã, 8buru karibasii. 21 Mau baniaba nau ʉ̃rauɗe boro eabadau ʉ̃rʉbena jara ɓuu. Boro eaduuɗe Jesucristo chokae jiradusiiɗeeba dachi kariba ɓuu. Boro earuuba dachi kakua jayoa jeraakau, maumaarã maka waubadau dachi kʉ̃risia jipa ɓuuba, biawãra Dachi Akõre ome nibaɗai kʉ̃ria panuuɗeeba.* 22 Jesucristo chokae jiradupeɗa, bajãaɗaa wãpeɗa Dachi Akõre jua biare ɓuu. Joma angelerã, joma jai kachiruarã chi mechiurã mauɗe chi meserãa nuree ichi juaɗe uru ɓuu.*

Cristo nibaɗa kĩra nibásturu

4 Cristo nau kakuaɗe ãrea biꞌiwãe ɓuasiiɗeeba machia biɗa araɓauɗe kʉ̃risia uru panásturu. Chi nau kakuaɗe ãrea biꞌiwãe ɓuuba kachirua ida ɓusii. 2 Mau ẽbẽraba wabiɗa nau iujãaɗe ɓuuɗe nau kakuaba kachirua wau kʉ̃ria ɓuu wau ɓuawẽma, maumaarã Dachi Akõreba kʉ̃ria ɓuu wau ɓuai. 3 Naeɗe machiba kachirua wau nureasii Dachi Akõreɗe ijãaɗakaurãba waubadau kĩra. ¡Ara basma! ¡Waa maka waurã́sturu! Waabenarã daaɗe ãrea kĩra nejasia waubachiɗau, nau kakuaba kachirua wau kʉ̃ria ɓuu waubachiɗau, itua biu nibabachiɗau, kĩrajʉʉ ewari waubadauɗe ãrea kachirua waubachiɗau, waabenarã baara itua ãrea dobachiɗau mauɗe Dachi Akõre kuenda juaba ne kapeɗaaɗamaa ʉtaa iɗibachiɗau. Mau Dachi Akõreba kʉ̃riakau. 4 Jãabae machiba waa chi Dachi Akõreɗe ijãaɗakaurã ome kachirua wauɗakauɗeeba ãchiba kuitaa kʉ̃risiaɗakau. Mauɗeeba machi ʉ̃rʉbena kachirua berreabadau. 5 Maamina Dachi Akõreba ãchi nebʉra ichiaruuɗe ãchiba waupeɗaaɗa ichimaa joma jaraɗai. Ichiba chi chokae nuree mauɗe biuɗarã nebʉra ichiai baita ɓuu. 6 Mauɗeeba biuɗarãba chi beɗea bia Cristo ʉ̃rʉbena ũrisiɗau ãchi jauri chokae nureaɗamera, Dachi Akõre chokae ɓuu kĩra.* Maamina ãchi chi kakua biusiɗau, Dachi Akõreba joma biuɗai panuu asiiɗeeba.

7 Kãꞌãabariwãeɗe joma baribai. Mauɗeeba jipa kʉ̃risia panásturu mauɗe kauwa panásturu. Maka Dachi Akõremaa poyaa ʉtaa iɗiɗai. 8 Ãrea chiya kʉ̃ria panásturu. Mau jomaɗebena audeara bibuara ɓuu. Chi waabenarã kʉ̃ria uru ɓuuba ãchi kachirua ãrea kʉde uru ɓuaɗa ida ɓubarii. 9 Chi machi deɗe needuurã kachirua kʉ̃risiaɗawẽa biꞌia irsibísturu. 10 Dachi Akõreba ichi sõbiaɗeeba dachicha ichi Jauriba waubi ɓuu deasii, waabenarã aiɗaɗamera. Dachi Akõre baita bari trajabadaurã biawãraɗeeba ichiba machicha deasiiɗeeba waabena aiɗásturu. 11 Aɓauba jaradearuubʉrã, Dachi Akõre beɗea jaradea ɓuuɗeeba kauwa jaradeai ɓuu. Aɓauba waabena aiɗaaruubʉrã, Dachi Akõreba dea ɓuu poyaabariiɗeeba aiɗai ɓuu. Ne joma wáusturu jomaurãba Jesucristoɗeeba Dachi Akõremaa biꞌia berreaɗamera. Ichíturu ewaricha biꞌia berreaɗai panuu. Biꞌia ɓuu ne joma ichi juaɗe uru ɓuai. Ãrea biꞌia ɓuu maka ɓuai.*

Cristoɗe ijãa ɓuu kakua biꞌiwãe ɓuu ʉ̃rʉbena

12 Ãbarã, machi ãrea biꞌiwãe panuuɗeeba ãrea kʉ̃risiarã́sturu. Maka panuu Cristoɗe biꞌia ijãaɗai baita. Mauɗeeba maka ãrea biꞌiwãe panaɗaabai panuu kʉ̃risiarã́sturu. 13 Maumaarã Cristo biꞌiwãe ɓuasii kĩra ãrea biꞌiwãe panuuɗeeba kĩrajʉʉ panásturu. Maka Dachi Akõreba Cristo chi mechiu nii unubiaruuɗe machi ãrea kĩrajʉʉɗai. 14 Machi Cristoɗe ijãa panuu kakua kachirua jaraaduubʉrã, Dachi Akõre daaɗe ãrea biꞌia nuree. Dachi Akõre Jauri kĩrawãrea nii machi ome ɓuu. 15 Machi ãrea biꞌiwãe duanumina, nau kakua biꞌiwãe panaɗai biawãe ɓuu: mia beaɗa kakua, nechiruaɗa kakua, kachirua wauɗa maebʉrã chĩara nebʉraɗe ɓuaɗa kakua. 16 Maamina aɓauba Cristoɗe ijãa ɓuuɗeeba ãrea biꞌiwãe ɓuaruubʉrã, peraiwãe ɓuu. Maumaarã Cristoɗeeba Dachi Akõremaa biꞌia berreai ɓuu. 17 Jãabae Dachi Akõreba ichiɗirã nebʉra ichiai. Dachi Akõreba dachi naa ichiaruubʉrã, ¿chi beɗea bia Dachi Akõre ʉ̃rʉbena ijãawẽa nuree saka panaɗaima?

18 «Chi ẽbẽra jipa nii karibai baita chaarea ɓuubʉrã, ¿chi Dachi Akõre ida ɓupeɗa kachirua waubarii saka karibaima?»*

19 Mauɗeeba chi Dachi Akõreba kʉ̃ria ɓuu kĩra ãrea biꞌiwãe nuree ichi juaɗe ɓuɗapeɗa ne biꞌia wauɗai panuu. Dachi Wauɗaɗe poyaa ijãaɗai.

Pedroba ijãabadaurã nubadaurãmaa jaraɗa

5 Machi chi ijãabadaurã nubadaurãmaa mʉʉba chi chuburia iɗiiruu, mʉ siɗa ijãabadaurã nubariiɗeeba. Cristo ãrea biꞌiwãe ɓuaɗa mʉʉba unusii. Mauɗe Dachi Akõreba Cristo chi mechiu nii unubiaruuɗe mʉ siɗa ichi ome ɓuai. Mauɗeeba naka chi chuburia iɗiiruu: 2 Dachi Akõreba ãbarã machi juaɗe ɓuɗa ãrea nústuru. Maka waurã́sturu waabenarãba maka waubi panuuɗeeba. Maumaarã nu kʉ̃ria panuuɗeeba maka wáusturu.* Chi nejarra kʉ̃ria panuuɗeeba nurã́sturu, maumaarã sõɗeeba nu kʉ̃ria panuuɗeeba maka wáusturu. 3 Chi machiba nu uru panuurã, machi baita bari trajabadaurã kĩra uru panarã́sturu, maumaarã machi nibaɗeeba unubiásturu saka nibaɗai panuu. 4 Maabae Cristo dachi Nubarii chi Mechiu neeruuɗe machi chi mechiurã babiai boro jũra ãrikau dearuu kĩra.

5 Kũudrãarã, chõrarãba jaraaduu ijã́sturu. Jomaurã chiya aiɗa nureaɗai panuu waabena audeara chi mechiu nii kʉ̃risiaɗawẽa. Dachi Akõre beɗeaɗe naka ɓʉ kuɓuu:

«Chi nejuakaya nuree Dachi Akõreba ida biꞌia ɓuabiakau.

Maamina chi mechiu kʉ̃risiawẽa nuree Dachi Akõreba ichi sõbiaɗeeba aiɗabarii».*

6 Mauɗeeba Dachi Akõre juaɗe panásturu, chi ne joma poyaa waubarii Ichi daaɗe chi mechiu kĩra nureewãe baita. Maka chi ichiba ɓui ewariɗe, machi chi mechiurã ɓui. 7 Machiba ãrea kʉ̃risia panuu Dachi Akõremaa joma jarásturu, ichiba machi nu ɓuuɗeeba.

8 Kauwa panásturu mauɗe kĩrabia panásturu. Jʉbawãe nii machi chi kĩramaabarii imama kĩra arraa niiba kai koi jʉrʉi.* 9 Maamina jʉbawãe nii ijãarã́sturu. Cristoɗe ãrea ijãa panásturu, kuitaa panuuɗeeba machi ãbarã joma druacha nuree ara mau kĩra ãrea biꞌiwãe panuu. 10 Machi ewari ɓaꞌãra biꞌiwãe panapeɗaaɗakare Dachi Akõreba ne jomaɗe biꞌia ɓui. Ichiba machi aiɗai biꞌia ijãaɗamera, joma jãaduaɗamera mauɗe chaarea nureaɗamera. Dachi Akõreba ichi sõbiaɗeeba ne jomaɗe aiɗabarii. Ichiba machi Jesucristoɗeeba iusii ichi ome ewaricha chi mechiu nureaɗamera. 11 Biꞌia ɓuu ewaricha ne joma ichi juaɗe uru ɓuai.* Biꞌia ɓuu maka ɓuai.

Pedroba nau kartaɗe aanama ɓʉɗa

12 Ãba Silvanoba nau karta cheke aiɗa ɓʉsii. Mʉʉba kuitaa ɓuu ara ichiba jara ɓuu kĩra joma waubarii. Nau kartaɗeeba mʉʉba machi aiɗa kʉ̃ria ɓuu biꞌia ijãaɗamera. Mauɗe kuitaabiai kʉ̃ria ɓuu biawãra Dachi Akõreba ichi sõbiaɗeeba aiɗa ɓuu. Mau ijãa panásturu.

13 Ãbarã Babiloniaɗebenarãba jarabʉi panuu machi biꞌia panaɗai.* Machi jʉrʉ adauɗa kĩra ãchi siɗa Dachi Akõreba jʉrʉ adausii. Mʉ warr kĩra nii Marcos biɗa jarabʉi ɓuu machi biꞌia panaɗai. 14 Biawãra kʉ̃riaɗeeba chiya irsibiɗai panásturu.* Mʉʉba kʉ̃ria ɓuu joma machi, Jesucristo ome nuree jirukaraayuwãe nureaɗai.*