Pẽdrãa warr waya piradrusia

Akawa kue chewẽa koɓoosiiɗe, Jeowaba Eliasmaa naka asia: “Sareptaɗaa wãba. Mama aria pẽdrãa ɓua bichimaa chiko kobiyu”. Chi puuru poroaɗe, Eliasba unuɗa chi pẽdrãa poore kiɗii tʉbʉ pemaa ɓooɗa maabea ichia ichimaa bania deai baita wiɗisii. Jãu wẽraba mau adauɗe wãsiiɗe, Eliasba naka asii: “Muchuburia mʉʉmaa pan siɗa wau deaba”. Mauɗe chi pẽdrãaba naka asii: “Mʉa pan deayua wãʼãe ɓuma. Bari harináturu aceite baara ɓuu chiko chuuyua mʉ warr mʉ báitaburu”. Eliasba jarasia: “Jeowaba jara ɓuu bichia mʉʉmaa pan ɓiɗĩika kiruu dearuubʉrã, mauba bichi aceite mauɗe harina bara ɓooyua chi kue chewẽa kuɓuuɗe”.

Chi pẽdrãa ichi deeɗaa wãpeɗa maabae pan wausia Elías baita. Chi pẽdrãa ichi warr ome chi chiko bara panasii kue chewẽa kuɓuuɗe, ara jari Jeowaba jaraɗa kĩra. Chi aceite mauɗe chi harina baara chi ʉɗebenarã acabawẽe basia.

Maaɗakare miachuburi pasasia. Chi warra cheke chi pẽdrãaɗe ãrĩã ẽperma koɓeepeɗa maabae biusia. Ichia chuburia wiɗiɗa basia Eliasmaa aiɗabiyua. Eliasba chi warra cheke chi nawe juaɗebena ore adausia. Maabae de ʉ̃rʉbenaɗaa adoesii. Jeeɗa camaɗe kunusia mauɗe ʉtaa wiɗiɗa basia: “Jeowa, muchuburia cha kiɗii warra waya chokaebiba”. ¿Kuitaa ɓuẽ sakayua mau chi biʼia ãrĩã ɓoosii Jeowaba maka piradrubiɗa? Jãu diaɗaa biupeɗaaɗa baɗa waya piradruɗaabasii baerã. Mauɗe chi pẽdrãa chi warr baara Israelɗebenawãe basii baerã.

Chi warra cheke waya ʉ̃yabapeɗa chokae ɓeesii. Eliasba naka asii chi pẽdrãamaa: “¡Ochiáse! Bichi warra chokaesii”. Ichi kĩrajʉʉ ãrĩã koɓeepeɗa, Eliasmaa naka jarasii: “Jãabáeburu ijãaruu bichi Dachi Akõreba bʉeɗa ɓuu. Bichia jara ɓuu Jeowaɗebena nee ɓua, mauɗéburu ara jãka pasa ɓua”.