Esdrasba Jeowa Ley kawabia nibasia

Israelitarã ãrĩã waya Jerusalenɗaa neepeɗaaɗa baɗa, mau 70 año baɗakare, abiɗa chi nureerã chi ɓee puuru Persiaɗe nureapeɗaaɗa. Maarãɗebena israelita Esdras basii, ichi sacerdote mauɗe chi Ley Jeowaɗe jaradea nibaɗa. Esdrasba kawaɗa baɗa chi ẽbẽrarã Jerusalenɗebenaba akawa chi Leyba jara ɓuu aseɗaabaɗa, mauɗeeba araa wã kʉ̃riasii ãchi aiɗayua. Artajerjes, chi rey Persiaɗebenaba, ichimaa naka asia: “Diosba bichi chi kuitaa ãrĩã nibabisii chi Ley jaradeabiyua. Mauɗeeba, wãpeɗa odoeba bichi baara wã kʉ̃riabudau”. Esdrasba joma chibʉrʉbiaɗa waya Jerusalenɗaa nee kʉ̃ria nureerã. Ãchia Jeowamaa wiɗisiɗau oɗe wãaduu karebayua maabae kaitawẽe ɓuuɗaa wãsiɗau.

Cuatro mes baɗakare, Jerusalenɗaa neepeɗaaɗa. Chi gobernante puuruɗebenarãba naka asiɗaa Esdrasmaa: “Chi israelitarãba Jeowa ũriɗawẽe maabae kimabaraasiɗau wẽrarã junebena diósturu kʉ̃ria nureerã ome”. ¿Esdrasba kãare asesaa? Joma ẽbẽrarã kĩraiɗe õdarrɗe koɓeepeɗa naka ʉtaa wiɗiɗa baɗa: “Jeowa, bichi dai kakua biʼia ãrĩã ɓee asebaria, maka ɓumina dairã bichi daaɗe pekao ãrĩã asebadaa”. Bariarã chi ẽbẽrarã arrepentisiɗamina, araɓau biʼiwãe ɓee waa asesiɗau. Mauɗeeba Esdrasba trʉ̃ jarakuaɗa baɗa dawaraurã mauɗe juezrã siɗa mau biʼia ãrĩã wiɗikaɗayua chi jãuɗebena. Tres mesɗe, joma chi Jeowa ũriɗa kʉ̃riaɗawẽerã awara bʉekasiɗau.

12 año basiɗaa. Maumisa, chi aɗu paree mooba kapeɗaaɗa Jerusalenɗebena waya ʉtʉ babisiɗaa. Esdrasba chi ẽbẽrarã plazaɗe chibʉrʉbiasii chi Ley Dachi Akõreɗe leayua. Chi libro Leyɗebena ewatasiiɗe, chi ẽbẽrarã piradrusiɗaa. Esdrasba biʼia ãrĩã beɗea koɓeesia Jeowaɗebena mauɗe chi israelita jua ʉtʉ ʉasiɗaa unubiɗayua araɓau kʉ̃risia duanuurã. Maaɗakare, Esdrasba chi Ley leapeɗa maabea jãuɗebena jaradeasia. Chi ẽbẽrarãba kauwa ũrisiɗaa. Ãchia kawasiɗau Jeowaɗebena awara nureaɗa maabae jẽakuasiɗaa. Norema maucha, Esdrasba chi Ley waaburu lea koɓeeɗaa. Chi israelitarãba kawasiɗau chibʉrʉɗayua Fiesta Ne Uu nuɓuu junapeɗaaɗa baɗaɗebena asebudau mauɗeeba ãchirã joma chi fiesta baita prepara bara ɓeesia.

Siete día chi fiesta asesiɗauɗe, chi israelitarã kĩrajʉʉ ãrĩã duanasia. Jeowamaa ara kiruma apeɗaaɗa baɗa chi ne uupeɗaaɗa biʼia ɓoosiiɗeeba. Josué chokae nibasiiɗebena hasta jãu diaɗaa Fiesta Ne Uupeɗaaɗaɗebena jãka aseɗakau basii. Chi fiesta acabaɗakare chibʉrʉɗapeɗa naka wiɗipeɗaaɗa basia: “Jeowa, bichia dai Egiptoɗebena awara bʉeɗa baɗa. Chi iujãa põesãaɗe bichia daimaa chiko kobiaɗa mauɗe nau iujãa mipitaa ãrĩã ɓuu deaɗa basii. Maka ɓumina ũriɗaabasii bichia jaraburuu. Bariara chi profetarã ãrĩã bʉekasmina, mau daiba ũriɗaabasia. Maka ɓumina, bichi dai ome kĩruka basia. Akawa olvidaabasia Abrahanmaa jaraɗa baɗa. Jãabaera jara kʉ̃ria panuu daiba bichi ũriɗayu”. Chi puuruɗebenarãba ɓʉsiɗau Jeowamaa jarapeɗaaɗa baɗa, chi gobernador nureerã, chi levitarã mauɗe sacerdoterãba selloba firmapeɗaaɗa.