Johan

3 Judah mi hna hruaitu zong a si i Farasi mi zong a simi Nikodemu tiah auhmi pa pakhat a um. 2 Cu pa cu zan ah Jesuh sinah a ra i “Saya,* nang cu Pathian thlahmi na si ti kha kan hngalh, Pathian nih a umpi lo ahcun ahohmanh nih hi bantuk khuaruahhar thil hi an tuah kho lai lo” tiah a ti. 3 Jesuh nih “Biatak kaan chimh lai, a hmaan tein kaan chimh lai, hrin ṭhan* a si lomi paoh cu Pathian Pennak kha a hmu lai lo” tiah a leh. 4 Mah tikah Nikodemu nih “A upa cangmi pakhat cu zeitindah hrin ṭhan a si khawh lai? A nu paw chung ah luh ṭhan in a voihnihnak hrin cu a si kho lo cu ta” tiah a ti. 5 Jesuh nih “Biatak kaan chimh lai, a hmaan tein kaan chimh lai, ti le thlarau in hrin a si lomi paoh cu Pathian Pennak ah a lut kho lai lo. 6 Thisa in hrin a simi cu thisa a si lai, thlarau in hrin a simi cu Pathian fale an si lai. 7 Hrin ṭhan nan si awk a si ka ti ruang ah na khuaruahhar hlah. 8 Thli cu a duhnaklei paoh ah a hrang tawn, a thawng kha na theih nain khoika in dah a rat i khoikalei ah dah a kal ti kha na hngal kho lo. Thlarau in hrin a simi zong cutin a si ve” tiah a leh.

9 Nikodemu nih “Mah cu zeitindah a si khawh lai?” tiah a hal. 10 Jesuh nih hitin a ti: “Israel mi cawnpiaktu na si ko nain mah cu maw na hngalh rih lo? 11 Biatak kaan chimh lai, a hmaan tein kaan chimh lai, kannih cu kan hngalhmi kha kan chim i kan hmuhmi kha tehte kan khaan, asinain tehte kan khaanmi kha nan cohlang duh lo. 12 Vawlei he aa tlaiin ka chimmi kong hmanh nan zumh lo ahcun vancung he aa tlaimi kong chinchin cu zeitindah nan zumh khawh lai? 13 Vancung in a rak ṭummi mi Fapa dah ti lo cu ahohmanh vancung ah an kai bal lo. 14 Moses nih ramcar ah rul a rak taar bantuk in mi Fapa zong taar a si ve lai. 15 Cucaah mi Fapa a zummi paoh cu zungzal nunnak an hmu lai.

16 “Pathian nih hi vawlei hi a dawt tuk caah a Fapa ngeihchunhte kha a pek, cucaah amah a zummi* paoh cu hrawh an si lai lo, zungzal nunnak an hmu lai. 17 Pathian nih a Fapa a rak thlahnak a ruang cu hi vawlei hi biaceih awkah a si lo, amah hmang in hi vawlei khamh awk tu ah a si. 18 Amah a zummi cu biaceih an si lai lo, a zum lomi tu cu atu in biaceih an si cang. Zeicahtiah Pathian Fapa ngeihchunh min kha an zumh lo caah a si. 19 Ceunak cu hi vawleicung ah a phan cang, asinain mi nih a ṭhalomi an tuahsernak ruang ah ceunak nakin muihnak kha an duh deuh, cucaah annih cu biaceih an si lai. 20 Thil ṭhalo a tuahmi paoh nih ceunak kha an huat i ceunak ah an ra duh lo, zeicahtiah an tuahmi kha a lang sual lai ti an phang. 21 Asinain a hmaanmi thil a tuahmi paoh cu ceunak ah an ra tawn, zeicahtiah an tuahmi cu Pathian duhnak ning in a si ti kha a langh nakhnga caah a si.”

22 Mah hnuah Jesuh cu a zultu hna he Judea ram ah an kal, cuka ah caan tlawmpal an um i mi kha tipil an pek hna. 23 Johan zong nih Salim khua pawng i Aenon ah tipil a pek ve hna, zeicahtiah cuka ah tidil nganpi pakhat a um, mi pawl cu a sinah an ra i tipil an ing. 24 Mah lioah Johan cu thong a tla rih lo.

25 Johan zultu hna cu thianhhlimhnak phungphai he aa tlaiin Judah mi pakhat he bia an rak i al. 26 A zultu pawl cu Johan sinah an ra i “Saya, Jordan Tiva ral i na sinah a rak rami pa, a kong tehte na khaanmi pa nih khan tipil a pek ve hna i mi tampi cu a sinah an kal” tiah an ti. 27 Johan nih “Pathian nih a pek hna dah ti lo ahcun minung nih cun zeihmanh an ngei kho lo. 28 ‘Kei cu Khrih ka si lo, a hmaiah thlah chungmi tu ka si’ tiah ka chimmi kha nanmah thengte nih nan theih ko cu ta. 29 Monu cu mopa ta a si. Asinain mopa pawng ah a dirmi a kawi zong nih mopa i a aw kha a theih tikah a lung aa lawm. Cu bantuk in kei zong lawmhnak in ka khat. 30 Anih cu a ṭhangcho lai, asinain kei tu cu ka ṭumchuk lai” tiah a ti.

31 Cunglei in a rami cu zeizong vialte nakin a ngan deuh. Vawlei in a rami tu cu vawlei ta a si i vawlei he aa tlaimi kong kha a chim. Van in a rami cu zeizong vialte nakin a ngan deuh. 32 Anih nih cun a hmuhmi le a theihmi kha tehte a khaan nain ahohmanh nih a chimmi kha an cohlang lo. 33 A bia a cohlangmi paoh cu Pathian nih biatak a chim ti kha tehte a khangmi an si.* 34 Pathian thlahmi nih cun Pathian bia kha a chim, zeicahtiah Pathian nih a thlarau kha siang ngai in a pek caah a si. 35 Pa nih a Fapa kha a dawt caah zeizong vialte kha a kut chung ah a pek dih cang. 36 Fapa a zummi paoh cu zungzal nunnak an hmu lai, a bia a ngai lomi tu cu nunnak an hmu lai lo, Pathian thinhunnak tu kha an cung ah a tlung lai.