Na Hngal Maw?
Hlanlio Babilon khua rawk ah hmuhmi tlakrawh le tlakrawh ser ning nih Baibal a hmaan ning kha zeitindah an langhter?
THILHLUN hlathlaitu pawl nih Babilon saknak ah an hmanmi tlak an rawhmi nuai tampi kha an hmuh. Thilhlun hlathlaitu Robert Koldewey chimmi ning in mah tlakrawh hna kha “nawncek a ṭhatnak le mei tih awk caah hman khawhmi burbuk a tamnak khua leng ah” rawh a rak si.
Babilon nawlngeitu pawl nih mah meiphu kha ṭih a nungmi thil cheukhat tuahnak ca zong ah an hman ti kha Hlathlaitu pawl nih an hmuh. Toronto Sianghleirun ah tuanbialei mifim a simi Paul-Alain Beaulieu nih hitin a ti: “Babilon ca hna ah siangpahrang nih a nawl a ngai lomi asiloah a thiangmi thil a upat lomi hna cu mei phu chung ah paih ding le khangh ding in nawl a chuahmi kong hna kha hmuh khawh a si.” Tahchunhnak ah, Siangpahrang Nebukhadnezzar chan lioah rak ṭialmi ca pakhat ah hitin a ti: “Rawl chuannak ah . . . chuang hna u, mei in khang hna u, ro lak in kio hna u, . . . Anmah khanghnak meikhu kha cunglei ah a kai nakhnga mei khanghnak in that hna u.”
Mah nih Baibal reltu pawl kha Daniel dal 3 ah langhtermi thil sining kong kha a hngalhter ṭhan hna. Mah ah Siangpahrang Nebukhadnezzar nih Babilon khua leng i Dura nelrawn ah sui milem nganpi pakhat a sernak kong kha kan hmuh. Hebru mino pathum Shadrak, Meshak le Abednego nih milem hmai ah kun kha an duh lo caah Nebukhadnezzar cu a thin a hung tuk i “meiphu cu voi dang nak a let sarih in nan linhter lai” i mah pa pathum hna hi “a alh hluahmahmi meiphu chung ah” nan paih hna lai tiah nawl a pek hna. Asinain a ṭhawngmi vancungmi pakhat nih thihnak in a rak khamh hna.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Nebukhadnezzar min khenhmi tlakrawh pakhat
Babilon ah hmuhmi tlakrawh nih Baibal cu a hmaanmi a si ti zong a langhter. Mah tlakrawh tampi ah Siangpahrang an thangṭhatnak ca hna aa tel. Lungca pakhat ah hitin aa ṭial: “Babilon Siangpahrang Nebukhadnezzar nih . . . A Liannganmi keimah Siangpahrang nih ka sakmi ka umnak inn cu . . . Ka tefa nih zungzal in uk hna seh.” Mah cu Nebukhadnezzar aa uanthlarnak kong he aa tlaiin Daniel 4:30 ah a langhtermi bia he aa lo tuk. Hitin a ti: “Mah hihi a liannganmi Babilon, keimah nih siangpahrang umnak caah keimah ṭhawnnak a nganmi le keimah upatnak langhternak caah ka sermi a si lo maw?”