Jeremiah nih Jehovah Pathian Kong a Chim Peng

Jehovah Pathian kong kan chim tikah a caan ah mi nih a kan nihsawh lai asiloah an thin a hung lai. Mah tikah Jehovah Pathian kong kha chim kan duh ti lo. Ngakchia hna tah cutin nan um bal maw?— Jehovah Pathian a daw ko nain a kong chim duh ti lo tiangin a um balmi mino pakhat kong kha Baibal nih a kan chimh. A min cu Jeremiah a si. Amah kong kha hngalh nan duh maw?

Mi pawl kha ṭhatlonak tuah ti hlah u tiah va chimh hna awkah Jehovah Pathian nih mino Jeremiah kha rian a pek. Jeremiah nih a ṭih caah a chim ngam lo. Cucaah Jehovah Pathian kha hitin a ti: ‘Zeidah ka chimh hna lai. Ngakchiate men ka si rih.’ Mah tikah Jehovah Pathian nih ‘ṭih hlah, kaan bawmh lai’ tiah a ti.

Mah tikah Jeremiah nih mi pawl kha ṭhatlonak nan tuah peng ahcun dantat nan si lai tiah ralrin a pek hna. Jeremiah nih a chimmi kha mi pawl nih an ngai maw?— An ngai lo i cheukhat nih cun an rak nihsawh. Cheukhat tu cu an thin a rak hung. Cheukhat tu nih cun thah hmanh an rak duh. Mah tikah Jeremiah cu zeitindah a rak um?— A rak ṭih. Cucaah ‘Jehovah Pathian kong kha ka chim ti lai lo’ tiah a rak ruah. Cutin chim loin a rak um taktak maw?— A um lo. Jehovah Pathian kha a dawt tuk caah a kong kha chim loin a rak um kho lo. Jeremiah nih a rak chim peng caah Jehovah Pathian nih a rak huhphenh.

Voikhat cu miṭhalo hna nih Jeremiah kha nawncek in a khatmi tikhor chungah an thlak. Ti le rawl zong an pe lo. Jeremiah kha mah tikhor chungah khan thi seh ti an duh. Asinain Jehovah Pathian nih tikhor chungin a rak khamh.

Jeremiah sinin zeidah nan i cawn khawh?— Jeremiah nih a rak ṭih caan zong a um ve. Asinain Jehovah Pathian kong kha a chim peng. Nannih zong Pathian kong kha mi pawl nan chimh hna tikah an in nihsawh hna lai asiloah an thin a hung lai. Mah tikah nan ning zong a zak lai i a ṭih zong nan ṭih kho men. Asinain Jehovah Pathian kong kha chim loin um hlah u. Jehovah Pathian nih Jeremiah kha a rak bawmh bantukin nannih zong an bawmh peng ve hna lai ti kha philhhlah u.