Jeremiah Bantuk In Hliphlau Tein Um
‘[Jehovah nih] ka bia tlinter awkah hliphlau tein ka um, tiah a ti.’—JER. 1:12, NW.
1, 2. Jehovah ‘hliphlau tein’ a umnak kha zeicah almond thingkung in langhter a si?
JANUARY le February thla ah Israel le Lebanon tlang cu a kik ngai. Mah caan ah thingkung dang cu an par lo nain almond thingkung tu cu a par. A par cu paan zawng le a raang zawng a si. Mah hi ṭhal a chuah hlanah a par hmasa bikmi thingkung phun khat a si. Cucaah Hebru holh in mah pangpar min a sullam cu “tuante’n aa hlaumi” ti a si.
2 Jehovah nih Jeremiah kha profet a ṭuanter lioah a biapimi kong chimh awkah almond thingkung kha tahchunhnak ah a hman. Profet nih a rian a thawkka ah almond thing nge kha langhnak ah a hmuh. Zei sullam dah a ngeih? Jehovah nih ‘ka bia tlinter awkah hliphlau tein ka um’ tiah a ti. (Jer. 1:11, 12, NW) Almond thingkung cu kum thawkka ah tuan te’n aa hlauh bantukin Jehovah nih hmailei a tuah laimi thil kha tuante in a mi a chimh hna. Hlanlio a mi pawl kha nawl nan ngaih lo ahcun zeidah nan ton lai ti ralrin pek awkah a profet a thlah hna. (Jer. 7:25) Cun a chimchungmi a tlin hlan tiang i din lo in ‘hliphlau tein’ a rak um. Jehovah nih a khiahmi caan B.C.E. 607 ah zumhpialmi Judah ram kha bia a ceih.
3. Jehovah kong ah zeidah kan zumh khawh?
3 Tuchan zongah Jehovah cu a duhnak tlinter awkah hliphlau tein a um. Cucaah a bia cu a tling hrimhrim lai. Jehovah hliphlau tein a umnak nih zeitindah an ṭhathnem? Tukum 2011 zongah Jehovah cu a biakam tlinter awkah ‘hliphlau tein’ a um ti na zum maw? Jehovah nih bia a kan kamhmi na lung a hrin ahcun atu hi thlaraulei ngutnak in i hlauh awk caan a si cang. (Rom 13:11) Jehovah i a profet Jeremiah cu hliphlau tein um zungzal awk aa zuam. Jeremiah cu Pathian pekmi rian ṭuan awkah zeitin le zeiruangah hliphlau tein a um ti ruahnak nih Jehovah pekmi rian zeitindah teima tein ṭuan khawh a si ti hngalh awk a kan bawmh lai.
Biapi Tuk in Thanh dingmi Bia
4. Jeremiah cu Pathian bia thanh awkah zei harnak dah a ton, a thanh dingmi cu zeicah a biapit tuk?
4 Jehovah nih ralvengtu si ding rian a pek lioah Jeremiah cu kum 25 hrawng lawng a si rih. (Jer. 1:1, 2) Mah lioah Israel upa pawl, tar le nawlngeitu pawl sin biachim awkah ka ngakchia tuk rih, biachim zong ka thiam lo tiah aa ruat. (Jer. 1:6) A rian cu a hleiin tlangbawi, profet hmaanlo, uktu, mi tam duhnak a zulmi le ‘anmah duhning paoh in a nungmi’ hna fakpi in sualphawt le ṭihnungmi biaceihnak kong thanh ding a si. (Jer. 6:13; 8:5, 6) Cun kum 400 hrawng a hmaanmi biaknak hmunpi a simi siangpahrang Solomon sakmi biakinn zong hrawh a si cang lai, Jerusalem le Judah ram cu hmun king ah a cang lai i mi cu sal ah kalpi an si lai timi thawng zong a thanh lai. Cucaah Jeremiah thanh dingmi bia cu a biapi tukmi a si.
5, 6. (a) Jehovah nih tuchan ah chiti thuhmi hna kha zeitindah a hman hna? (b) Zei kong dah kan i ruah lai?
5 Tuchan zong ah, Jehovah nih thlarau chiti thuhmi Khrihfa phu khat kha dawtnak in a kan timhpiak, langhternak ralvengtu in hi vawleicung Pathian biaceihnak kong kha an thanh. Kum tampi chung mah chiti thuhmi hna nih zei chan ah dah kan nun ti ṭha tein ruah awkah mi kha an forh hna. (Jer. 6:17) Baibal nih Jehovah ni cu a rau lai lo, mi nih an i ruah lopi caan, ri a khiahmi caan bak ah a ra lai tiah a ti.—Zef. 3:8; Mar. 13:33; 2 Pit. 3:9, 10.
6 Jehovah miphun a simi paoh nih a rauhhlan ah Jehovah nih vawlei thar a ratter cang lai ti kha an hngalh. Cucaah phungchimnak caan tam kan ngei ti lo ti kha an hngalh. Atu ah Jehovah Bia mi sin chim a biapi tuk. Mah nih zei tuah awk dah an forh? Phungchim rian ṭuannak ah tam deuh i tel awk an forh ko lo maw? Cuti na tuah ahcun Jesuh nih a rak chim bantuk in mi vialte nih Jehovah biak awk biakhiahnak caan ṭha an ngei lai. Jeremiah kha a rian hliphlau tein ṭuan awk a bawmmi thil pathum kong i ruah u sih, mah nih kannih zong a kan bawmh ve lai.
Mi kha Daw hna
7. Harnak lakah Jeremiah cu dawtnak nih phungchim awk zeitindah a forh kha fianter.
7 Harnak lakah Jeremiah cu phungchim awkah zeinihdah a forh? Mi a dawt hna nak nih a forh. Tuukhal ṭhalo pawl ruangah mi harnak an ton kha Jeremiah nih a hngalh. (Jer. 23:1, 2) Cucaah a rian kha dawtnak le zaangfahnak he a ṭuan. Israel mi nih Pathian Bia kha thei hna sehlaw zul hna seh ti a duh. An caah a lungre a thei tuk i an cung a tlung hngami harnak ruangah a ṭap. (Jeremiah 8:21; 9:1 rel.) Jeremiah nih Jehovah le a phun hawi a dawt tuk hna kha Jeremiah Ṭahnak Hla cauk nih fiang tein a langhter. (Ṭah. 4:6, 9) Tuchan mi tampi cu “khaltu a ngei lomi tuu bantukin lungrethei le awlokchong in an um” kha na hmuh hna tikah Pathian Pennak thawngṭha in hnemh na duh hna a si lo maw?—Matt. 9:36.
8. Jeremiah cu harnak a tong nain a lung a fah lo kha zeinihdah a langhter?
8 Jeremiah cu bawmh a duhmi hna sinin harnak a tong nain a lung a fak lo i teirul zong a cham hna lo. Siangpahrang ṭhalo Zedekiah cung hmanh ah a lung a sau i zaangfahnak a ngei. Zedekiah nih Jeremiah kha thah a duhmi hna kut ah a pek hna hnu hmanh ah Jeremiah nih Jehovah bia ngaih awkah a nawl rih. (Jer. 38:4, 5, 19, 20) Kannih tah mi cungah Jeremiah bantuk dawtnak kan ngei maw?
Pathian Pekmi Ralṭhatnak
9. Jeremiah ralṭhatnak cu Pathian thawngin a si kha zeitindah kan hngalh?
9 Jehovah nih rian a pek lioah Jeremiah nih ka ṭuan kho lai lo tiah a rak nawl. Mah nih a hnu ralṭhatnak a ngeihmi cu aa chuahpimi a si lo kha a kan hngalhter. Profet rian a ṭuan lio ah hawi hlei ṭhawnnak a ngeih cu lungtak in Pathian aa bochan caah a si. Jehovah cu profet “leiah a ṭang i ṭhawng ngai” in Jeremiah kha a bawmh i a rian ṭuan khawh awkah ṭhawnnak a pek. (Jer. 20:11) Jeremiah cu mi ralṭha in mi nih an hngalh caah Jesuh nih phung a chim lio ralṭhatnak a langhter tikah cheukhat nih Jeremiah a nung ṭhan tiah an ruah.—Matt. 16:13, 14.
10. Chiti thuhmi hna cu ‘miphun hna le pennak hna cungah’ an um tiah zeicah kan chim khawh?
10 “Miphun vialte hna Siangpahrang” Jehovah nih Jeremiah kha miphun hna le pennak cung a biaceihnak kong thanh awkah rian a pek. (Jer. 10:6, 7) Asinain chiti thuhmi a taang rihmi hna cu “miphun hna cung le pennak hna cungah” zeiti phun in dah rianpek an si? (Jer. 1:10) Hlanlio profet bantuk in chiti thuhmi hna cu van le vawlei i Cungnung Bik nih rian a pekmi hna an si. Cucaah annih cu vawleicung miphun hna le pennak hna cungah thawngthanhnak nawl a ngeimi an si. Chiti thuhmi hna nih Lianngan Bik Pathian nawlpeknak le Pathian Bia hmang in tuchan miphun hna le pennak hna cu Pathian nih a khiahmi caan ah a thimmi hmangin a hrawh dih cikcek hna lai tiah an thanh. (Jer. 18:7-10; Biat. 11:18) Chiti thuhmi hna cu vawleicung ah Jehovah biaceihnak kong teima tein thanh awk bia an khiak.
11. Harnak ton tikah teima tein phungchim awkah zeinihdah a kan bawmh lai?
11 Ralchanhnak, zeirellonak le harnak ton tikah lungrawh cu a phung a si ko. (2 Kor. 1:8) Asinain lungdong lo in Jeremiah bantukin hmailei ah fong u sih. Kan zapi in Pathian kha kan i bochan i thlacam in bawmhnak kan hal ahcun “ralṭhatnak a kan pek” lai. (1 Thes. 2:2) A hmaanmi Khrihfa kan si caah Pathian pekmi rian ṭuan awkah hliphlau tein kan um zungzal awk a si. Zumhawktlak lo Jerusalem bantuk in tuchan Khrihfaram hrawh a si lainak kong kha teima tein chim ding biakhiah a hau. Chiti thuhmi hna cu Jehovah ‘khamhnak’ caan kong lawng si loin Pathian phuhlamnak ni kong thanh awk zong ah ralṭhatnak an ngei.—Isa. 61:1, 2; 2 Kor. 6:2.
Lunglawmhnak
12. Jeremiah nih aa lawmhnak a hmunhter tiah zeicah kan chim khawh, cutin zeicah a tuah khawh?
12 Jeremiah cu a rian ah aa nuam. Jehovah sinah hitin a chim: “Na bia cu kei ka caah cun lawmhnak le thanuamnak a si, zeicahtiah nangmah nih keimah cu na ta si awkah min na ka bunh cang.” (Jer. 15:16) Jeremiah nih a hmaanmi Pathian aiawhtu le a bia chimtu a simi kha tinvo sung in a hmuh. Jeremiah cu mi nih an nihsawhnak kong lawng a ruah tikah aa nuam kho ti lo. Asinain a thanhmi bia a biapitnak le a ṭhatnak kong a ruah ṭhan tikah a lung aa lawm ṭhan.—Jer. 20:8, 9.
13. Aa lawmmi si zungzal awkah Pathian biathuk zeicah hlathlai a herh?
13 Tuchan zong ah phungchimnak ah i nuamh awkah “rawl taktak” a simi Pathian biathuk hlathlai a hau. (Heb. 5:14) Cuti hlathlainak nih kan zumhnak a fehter. (Kol. 2:6, 7) Cun kan tuahsernak nih Jehovah lung zeitindah a umter ti zong a kan hngalhter. Baibal relnak le hlathlainak ca caan pek kan i harh ahcun kan caan hmanning ṭha tein ruah ṭhan a hau. Baibal kha nifate minit tlawmpal kan rel le ṭha tein kan ruah hmanh ah Jehovah he kan i naih deuh lai i Jeremiah bantukin “lawmhnak le thanuamnak” kan ngei lai.
14, 15. (a) Jeremiah nih zumhfek tein a hmuhmi rian a ṭuan caah zei ṭhatnak dah a chuak? (b) Tuchan Pathian miphun nih phungchimnak rian he aa tlaiin zeidah an hngalh?
14 Jeremiah nih Jehovah ralrin peknak bia le biaceihnak kha teima tein a thanh bantukin “sak awk le phun awk” rian a ngeih zong a hngalh. (Jer. 1:10) Lungthin ṭha a ngeimi hna kha ruahchannak ngeih awkah a bawmh hnanak in saknak le phunnak rian a rak ṭuan. A ṭuanmi cu a hlawh a tling i B.C.E. 607, Jerusalem a rawh tikah Judah mi cheukhat le Judah mi a si lomi cheukhat cu an luat. A luatmi ah Rekhab tefa hna le Ebedmelek le Baruk cu kan hngalhmi an si. (Jer. 35:19; 39:15-18; 43:5-7) Zumhawk a tlakmi le Pathian a ṭihmi Jeremiah hawile nih chiti thuhmi an hawile vawlei ruahchannak a ngeimi hna kha a aiawh. Chiti thuhmi pawl cu “mibu nganpi” kha ruahchannak ngeih awk le an zumhnak ṭhawnter awk bawmhnak ah an i lawm. (Biat. 7:9) Cu bantukin chiti thuhmi an hawile zong lungthin ṭha a ngeimi biatak hngalh awk bawmhnak ah an i lawm ve.
15 Pathian miphun nih thawngṭha chim cu mi ca rianṭuan lawng si loin Pathian biak zong a si kha an hngalh. Cucaah mi nih an ngaih zong ngaih lo zongah phung kan chimnak thawngin lunglawmhnak kan hmu.—Salm 71:23; Rom 1:9 rel.
Na Rian Ṭuan awkah I ‘Hliphlau’
16, 17. Biathlam 17:10 le Habakkuk 2:3 nih kan caan a biapitnak zeitindah an langhter?
16 Biathlam 17:10 chimchungbia kan ruah tikah atu kan caan a biapitnak kha fiang tein kan hngalh. A pasarihnak siangpahrang, Anglo-American cu atu hi uktu a si. Mah he aa tlaiin hitin kan hmuh: “[A pasarihnak vawlei nawlngeitu] a rat tikah caan tlawmte lawng a um lai.” “Caan tlawmte” timi caan cu a dih cang lai. Hi chan ṭhalo donghnak he aa tlaiin profet Habakkuk nih hitin aamah a khaan: “Langhnak na hmuhmi nih khan sawhmi caan a ngei i . . . khulrang in a ra lio . . . hngak ko, zeicahtiah pello in a ra hrimhrim ko lai.”—Hab. 2:3.
17 Hitin i hal: ‘A biapimi caan ah kan nun kha ka nunning nih a langhter maw? A rauhhlan ah caan a dong cang lai ti ka zumh kha ka nunning nih a langhter maw? Ka biakhiahnak le biapi ka chiahmi nih caan a dong rih lai lo asiloah caan a dong theng lai lo ti ka ruah a langhter maw?’
18, 19. Zeicah atu hi duhsah in rian ṭuan caan a si lo?
18 Ralvengtu phu rian cu a dih rih lo. (Jeremiah 1:17-19 rel.) Chiti thuhmi a taang rihmi hna cu “thir tung” le “kulhmi khuapi” bantukin hninh khawh lomi an si cu lunglawmh awk taktak a si. An rian a dih tiang an ṭuan lioah Pathian bia in thazang an i laknak thawngin “taisawm caah biatak” an i sawmh. (Efe. 6:14) Chiti thuhmi hna nih Pathian pekmi rian an ṭuan lioah mibu nganpi nih anmah bantuk lungput ngei in lungtho tein an bawmh hna.
19 Atu hi Pennak rian duhsah in ṭuan caan si loin Jeremiah 12:5 a biapitnak ruah caan a si. (Rel.) Kan zapi in hneksaknak kan tong i mah kha inkhawh a hau. Zumhnak hneksaknak kha ‘mi he tlik i zuam’ he a tahchunh. ‘Harnak nganpi’ a naih chin caah harnak a tam chin lai kha kan i ruahchan. (Matt. 24:21) Hmailei ah harnak tam chin kan ton laimi kha ‘rangtum he tlik’ i zuam he a tahchunh. Rangtum he tlik aa zuammi pa cu inkhawhnak thazang tampi a ngeih a hau. Cucaah atu kan tonmi harnak inkhawhnak nih hmailei ton laimi harnak inkhawh awk a kan bawmh lai.
20. Zei tuah awk dah bia na khiah?
20 Kan dihlak in Jeremiah kan i zohchunh khawh i phungchim rian kha hlawh tling tein kan ṭuan khawh. Jeremiah cu dawtnak, ralṭhatnak le lawmhnak a ngeih caah a rian kha kum 67 chung zumhfek tein a ṭuan khawh. Aa dawhmi almond pangpar nih Jehovah cu a bia tlinter awkah ‘hliphlau tein’ a um kha a kan theihter ṭhan. Kannih zong cutin um ve awk a ruang ṭha kan ngei. Jeremiah cu ‘hliphlau tein’ a um bantuk in kannih zong kan um kho ve.
Naa Cinken Maw?
• Jeremiah cu a rian ‘hliphlau tein’ ṭuan awkah dawtnak nih zeitindah a forh?
• Pathian pekmi ralṭhatnak zeicah kan herh?
• Jeremiah cu aa lawmhnak hmunhter awkah zeinihdah a bawmh?
• Zeicah ‘hliphlau tein’ um na duh?
[Cahmai 31nak i hmanthlak]
Ralchanhnak lakah phung na chim kho zungzal lai maw?