Ralṭha Tein Phungchimnak In Jesuh I Zohchunh
“Pathian nih a thawng ṭha kha nannih chimh awkah ralṭhatnak a kan pek.”—1 THES. 2:2.
1. Pennak thawngṭha bia cu zeicah duhnungmi a si?
THAWNG ṭha theih cu a nuam tuk! Pathian Pennak thawngṭha bia hi thawng ṭha vialte lakah a ṭha bik a si. Sifahharnak, zawtnak, fahnak, ngaihchiatnak le thihnak a dongh cang lai kha mah thawngṭha nih a fehter. Zungzal nunnak lam a hun i Pathian tinhmi kong a phuan lengah Pathian he dawtnak in pehtlaihnak ṭha ngeih khawh ning a langhter. Jesuh chimmi hi thawngṭha bia a theimi paoh cu an i lawm lai tiah na ruah men lai. Asinain ngaihchiat awk cu cuticun a si lo.
2. Jesuh nih “ka ratnak chan cu . . . dohter awkah a si” tiah a chimmi kha fianter?
2 Jesuh nih a zultu pawl kha “Vawlei cungah daihnak tlunter awkah a ra, tiah ka ruat hlah u, daihnak tlunter awkah ka ra lo, vainam tlunter awk tu ah ka ra. Ka ratnak chan cu fale hna le pale hna dohter awk, fanule hna le nule hna dohter awkah a si; nan ral ṭhalo bik hna cu nanmah innchungkhar chung mi lila an si lai” tiah a chimh hna. (Matt. 10:34-36) Thawngṭha bia kha lunglawm in cohlan canah mi tampi nih an duh lo. Innchungkhar ah a cheu cu anmah theng thawngṭha bia a thanhtu hna ral an si.
3. Phungchimnak rian lim awkah zeidah a herh?
3 Jesuh thanhmi biatak kha kan thanh i nihin ah mah thawngṭha a theimi tampi nih Jesuh chan bantuk in an lehrulh. Cuticun i ruahchan awk a si. Jesuh nih a zultu pawl kha hitin a ti hna: “Sal cu a bawipa nakin a ngan deuh bal lo . . . keimah kha an ka hrem ahcun nannih zong an in hrem ve ko hna lai.” (Johan 15:20) Ram tampi ah cun hremnak cu kan tong lo nain nautatnak le zeirellonak kan tong. Cu a si caah ralṭha tein thawngṭha bia chim tikah inkhawhnak ngeih awkah zumhnak le ralṭhatnak a herh.—2 Piter 1:5-8 rel.
4. Paul cu zeicah phungchimnak ah ‘ralṭhat’ a herh?
4 Phungchim kal naa timh tikah a caan ah cun a har ko lai asiloah a cheukhat cu na caah thinphan awk a si men lai. Zumhfekmi thawngthantu tampi zong nangmah bantuk an si. Lamkaltu Paul cu biatak fekte in aa tlaihmi, ralṭha le ṭihnak ngei lo in phung a chimmi a si nain phungchim awkah fakpi in aa zuam caan tampi a um. Thesalonika khua Khrihfa hna sin ah Paul nih hitin a ṭial: “Thesalonika khua i nan sin kan phak hlan ah zeitindah Filipi khua ah an kan serhsat i an kan nihsawh ti cu nan hngalh. Asinain, Pathian nih a thawng ṭha kha nannih chimh awkah ralṭhatnak a kan pek i harnak tampi a um nain kan chim.” (1 Thes. 2:2) Filipi khua nawlngeitu hna nih Paul le a hawi Silas cu fung in an tuk hna, thong an thlak hna i hreng an khenh chih hna. (Lam. 16:16-24) Cuti a si nain Paul le Sila cu ‘ralṭha’ in phung an chim peng. Zeitindah ralṭha in kan chim khawh ve? A phi hmuh awkah Baibal chan Pathian salle kha Jehovah kong biatak ralṭha in chim awkah zeinihdah a forh hna le an nunning zeitindah kan i cawn khawh kha zoh u sih.
Ral he I Ton tikah Ralṭhat A Herh
5. Jehovah cung zumhawktlakmi hna cu zeicah ralṭhat zungzal a herh?
5 Ralṭhatnak ah a ngan bikmi zohchunhawk ṭha cu Jesuh Khrih a si. Asinain minung tuanbia thawkka in Jehovah cung zumhfekmi dihlak ralṭhat zungzal a herh. Zeiruang ah? Eden dum ah dohnak a um hnuah Pathian duhnak a tuahmi le Satan duhnak a tuahmi karlak ah ral a um lai tiah Jehovah nih a chimchung. (Gen. 3:15) Miding Abel a upa nih a thah lio ah mah ralnak cu a lang colh. Cun Buanchukcho tlun hlan ah a nungmi zumhawktlak Enok cungah ralnak a chuak. Pathian zei ah a rel lomi biaceih awkah Pathian cu a vancungmi mithiang rel cawk lo he an ra lai tiah a chimchung. (Judas 14, 15) Mi tampi nih mah thawngpang kha an duh lo. Enok kha an huat caah Jehovah nih a nunnak a lak lo ahcun an thah lai cu a fiang. Enok nih a ralṭhatnak kha cuticun a langhter!—Gen. 5:21-24.
6. Moses cu Faraoh sin biachim awkah zeicah ralṭhatnak a herh?
6 Faraoh sinah bia a chimmi Moses ralṭhatnak zong ruat hmanh, Faraoh cu amah le amah kha khuazing aiawhtu ka si tiah i hmu lo in nika khuazing Ra fapa khuazing ka si tiah aa hmumi uktu bawi a si. Anih zong Faraoh dangdang bantuk in amah zuk a biami si dawh a si. Faraoh bia cu upadi a si i upadi in a uk hna. A ṭhawngmi, aa porhlawmi, a lung a hakmi Faraoh cu midang nih hihi tuah timi phung a um lo. Cu bantuk minung hmai ah nun a nemmi tuukhal Moses cu sawm lo le conglawmh lomi in atu le atu a va kal. Moses nih zeidah a chimchung? Thil a hrawk cikcek hngami harnak kong a si. Moses nih zeidah a hal? A nuainuai a simi Faraoh sal pawl ramchung in chuahnak nawl hal a si. Moses cu ralṭhatnak a herh maw? A herh tuk!—Nam. 12:3; Heb. 11:27.
7, 8. (a) Hlanlio zumhawktlakmi hna nih zei hneksaknak dah an ton? (b) Khrihfa chan hlan ah a thiangmi biaknak a dir i a ṭhancho nakhnga zeinihdah an ral a ṭhatter hna?
7 Mah hnu in kum zabu tampi chungah profet hna le Pathian salle zumhawktlakmi hna cu a thiangmi biaknak caah ralṭha in an um. Satan vawlei nih a zaangfak hna lo. Paul nih hitin a ṭial: “Lung in an cheh hna, hluah in cheu hnih ah an chuah hna, vainam in an thah hna. Tu phaw le meheh phaw i aih in an vak hniapmap i hremnak le serhsatnak kha an ing.” (Heb. 11:37) Pathian cung zumhawktlak salle fek tein dir awkah zeinihdah a bawmh hna? A hmai deuh cacang cheukhat ah Abel, Abraham, Sarah le midang pawl inkhawhnak thazang a ngeihtermi hna kong kha lamkaltu Paul nih hitin a ṭial: “Pathian nih a kamhmi hna cu an hmu lo, sihmanhsehlaw [zumhnak in] lamhlatpi in an rak hmuh i an rak i lawm.” (Heb. 11:13) A hmaanmi biaknak lei ah ralṭha tein a dirmi Elijah, Jeremiah le Khrihfa chan hlan i a dang zumhawktlak profet ti bantuk nih Jehovah biakam ah an mit an chiah zungzal caah inkhawh awk a bawmh hna.—Titas 1:2.
8 Khrihfa chan hlan zumhawktlakmi hna nih a ceumi, duhnungmi hmailei kha an rak cuanh. An thawhṭhan tikah Khrih Jesuh le a kuttang tlangbawi 144,000 nih tlangbawi rian an ṭuan ruangah a donghnak ah mitling an si lai i “thutnak sal sinak khan luatter an” si lai. (Rom 8:21) Cun Jeremiah le hlanlio Pathian salle ralṭhami hna cu Jehovah amahkhanmi ruangah ralṭha in a ummi an si. Cucu Jeremiah a kamhmi hi bia ah a lang: “Annih nih nangmah cu an in tuk lai, sihmanhsehlaw na sinah ka um i kan huhphenh lai caah an in tei lai lo, tiah [Jehovah] nih a ti.” (Jer. 1:19) Nihin ah Pathian kamhmi hmailei hmuh hngami le thlaraulei huhphenhnak amahkhannak kha kan ruah tikah cu bantuk in thazang kan ngei.—Ptb. 2:7; 2 Korin 4:17, 18 rel.
Jesuh Ralṭha In Phungchim awkah Dawtnak nih a Forh
9, 10. Biaknak lamhruaitu hna, (b) ralkap bu, (c) tlangbawi ngan, (d) Pilat hmai ah Jesuh nih zeiti lam in dah ralṭhatnak a langhter?
9 Kan i Zohchunhawk ṭha Jesuh nih ralṭhatnak kha a phunphun in a langhter. Tahchunhnak ah, Jesuh cu nawlngeimi hna nih an huat ko nain Pathian nih minung hngalhter a duhmi kong kha a thlahdorh lo. Nawlngeimi biaknak lamhruaitu hna anmah le anmah ding tuk in an i hmuhmi le an cawnpiaknak a palhmi kha ṭih lo in a phuan. Jesuh nih dairek in le fiangko in a ti hna. Thil a cangmi pakhat ah hitin a ti hna: “Phungbia cawnpiaktu saya hna le Farasi mi hna, nan caah ngaihchia a va si hringhran dah! Mi depde hna. Si rang an thuhmi thlan bantuk nan si. Lenglei cun aa dawh ko, sihmanhsehlaw a chung cu mithi ruh le a thumi pei a khat cu. Cu bantuk cu nan si, a lenglei cun miṭha ko nan lo, sihmanhsehlaw nan chung cu lih le sualnak in a khat.”—Matt. 23:27, 28.
10 Gethsemane dum ah Jesuh cu ralkap hmai ah a dir i an kawlmi cu amah a si kha ralṭha in a chim. (Johan 18:3-8) Cu hnuah Sanhedrin ah an kalpi i tlangbawi ngan nih bia a hal. Tlangbawi ngan nih thah awkah bia a kawl kha a hngalh ko nain Khrih a si le Pathian Fapa a si kha ṭih lo in a chim. Cun “A Liannganmi Pathian orhlei kam ah ka ṭhut i vancung khuadawm he ka rat” an hmuhte lai tiah a ti chap. (Mar. 14:53, 57-65) Mah hnu tlawmpal ah Jesuh cu an ṭem i luatnak a pe khomi Pilat hmai ah a dir. Asinain Jesuh nih sual a puhtu hna kha kaa khat hmanh a let hna lo. (Mar. 15:1-5) Mah vialte ah ralṭhatnak tampi a herh.
11. Ralṭhatnak le dawtnak zeitindah aa pehtlaih?
11 Jesuh nih Pilat kha hitin a ti: “Hi vawlei ah ka chuah chan le ka rat chan cu biatak kong chim hi a si.” (Johan 18:37) Jehovah nih Jesuh kha thawngṭha bia chim ding rian a pek i Jesuh nih vancung a Pa a dawt caah mah rian cu lunglawm tein a ṭuan. (Luka 4:18, 19) Jesuh nih minung zong a dawt hna. Minung nunnak a har zong a hngalh. Cu bantuk in Jehovah le innpa kan dawt tuk hna caah ralṭha te le ṭihnak ngei lo in phung kan chim.—Matt. 22:36-40.
Thiang Thlarau nih Ralṭha in Phungchim awk Ral a Ṭhatter
12. Hmasa Khrihfa hna cu zeinihdah an lung a lawmhter?
12 Jesuh a thih hnu zarh tlawmpal chung ah Jehovah nih khamhnak a hmu dingmi kha zultu pawl sin a fonhter hna caah zultu pawl cu an i lawm. Pentekos puai tuah awkah Jerusalem ah a phanmi khuazakip in a rami Judahmi le Judah biaknak ah a lutmi miphun dang hna chung in 3,000 cu nikhatte ah tipil an ing! Jerusalem ah a ummi paoh nih mah kong cu an chim men lai. Baibal nih hitin a chim: “Lamkaltu hna kha Pathian nih khuaruahharnak le hmelchunhnak tampi a tuahter hna i cu nih cun mizapi kha ṭihnak in a khahter hna.”—Lam. 2:41, 43.
13. Unau pawl nih ralṭhat awkah zeicah thla an cam, aphichuak zeidah a si?
13 Biaknak lamhruaitu pawl cu an thin a hung tuk i Piter le Johan cu an tlaih hna i zankhat thong an thlak hna hnuah Jesuh kong chim lo ding in nawl an pek hna. An luat tikah thil sining kha unau pawl an chimh tik hna ah an dihlak in an tonmi ralchanhnak kongah hitin thla an chim: “Bawipa, . . . kannih na sal rual nih hin na bia cu ralṭha chinchin in kan chim nakhnga a nawl kan pe ko.” A phichuak zeidah a si? “Thiang Thlarau in an khat i Pathian bia cu ralṭha ngai in an chim.”—Lam. 4:24-31.
14. Thiang thlarau nih phungchimnak ah zeitindah a kan bawmh?
14 Jehovah a ṭhawnnak thiang thlarau nih Pathian bia ralṭha tein chim awkah zultu pawl a bawmh hna kha hngal. Midang le a kan ralchanhtu hna hmanh ralṭha tein biatak kan chimh ngamh hna cu kanmah ṭhawnnak ruangah a si lo. Jehovah sin thiang thlarau kan hal ahcun a kan pek khawh i a pek zong a kan pek lai. Kannih zong Jehovah bawmhnak in zeibantuk ralchanhnak hmanh zumhawktlak in inkhawh awkah a herhmi ralṭhatnak kha kan langhter khawh.—Salm 138:3 rel.
Nihin Khrihfa nih Ralṭha in An Chim
15. Biatak nih tuchan mi kha zeitindah a ṭhenter?
15 Hlanlio chan bantuk in kan chan ah biatak nih mi kha a ṭhen rih hna. A cheu nih lungtho in an cohlan nain a dang nih kan biak ning kha an hngalthiam lo i an upat lo. Jesuh nih a chimchung bantuk in a cheu nih kan sualnak an kawl, an kan nihsawh i an kan huat. (Matt. 10:22) A caan ahcun kan kong kha thawngthanhnak in a si lopi in an thanh. (Salm 109:1-3) Asinain vawlei pumpi ah Jehovah miphun nih thawngṭha kha ralṭha in an thanh.
16. Ralṭhatnak nih phung kan chimhmi hna an hmuh ning a thlen khawh kha zei hmuhtonnak nih dah a langhter?
16 Kan ralṭhatnak nih Pennak thawngṭha cungah an hmuhnak a danter khawh. Kyrgyzstan i unau nu nih hitin a chim: “Phungchim ka vah lio ah innngeitu pakhat nih ‘Pathian cu ka zumh ko, asinain Khrihfa Pathian cu a si lo. A tu hnu hi kutka ah na rat ṭhan ahcun ka uico kan thlah hnawh lai’ tiah a ka ti. A hnulei ah thircikcin in khihmi uico nganpi a um. Asinain Pathian Pennak No. 37, ‘Biaknak Min I Put In Tuahmi Ṭhatlonak A Dong Lai Maw!,’ cazual pekṭhenhnak campaign ah an innchungkhar ah mi dang pakhat tal he kan i tong hnga maw tiah mah inn ahcun kal ding bia ka khiak. Asinain mah pa ṭhiamṭhiam nih innka a ka hunh. Jehovah sinah thla ka cam zokzok i ‘Hello, kan hnulei nithum lio ah bia kan i ruahmi le na uico kong zong kaa cinken rih ko. Asinain kei zong nangmah bantuk in a hmaanmi Pathian pakhat lawng a zummi ka si caah na inn lanhtak cu a si kho lo. A rauh hlan ah Pathian nih a min thang a chiattertu biaknak dihlak a hrawh cang lai. Hi cazual na rel ahcun mah kong kha tam deuh in na hngalh lai’ tiah ka ti. Mah pa nih cazual kha a cohlan caah ka khuaruah a har. Cun inn dang ah ka kal ṭhan. Minit tlawmpal a rauh ah mahpa nih a kut ah cazual i put in a ka dawi. ‘Ka rel dih cang. Pathian thinhunnak in luat awkah zeidah ka tuah lai’ tiah a ka hal.” Baibal an cawng i Khrihfa pumhnak ah aa pum cang.
17. Unau nu a ralṭhatnak nih mi a ṭihmi Baibal a cawngmi kha zeitindah a ral a ṭhatter?
17 Kan ralṭhatnak nih midang zong ralṭhat awkah a forh khawh. Russia ah unau nu pakhat cu mawṭawka aa cit lio ah aa cit vemi nu pakhat kha mekazin a pek. Mah tikah pa pakhat cu a ṭhutnak in a tho i unau nu kut cung mekazin cu a chuh, a thleh a hman i zelṭuang ah a hlawnh. Unau nu cu thangpi in a volhpamh, a umnak hmun kha a hal i khua chungah phungchim lo ding in ralrin a pek. Unau nu nih Jehovah sinah thlacam in bawmhnak a hal i “Pum cu a that kho ko nain thlarau a that kho lomi cu va ṭih hlah u” timi Jesuh bia kha a lung ah a hung chuak. (Matt. 10:28) Unau nu cu dai tein a ṭhutnak in a tho i “Ka umnak hmun cu kan chim lai lo, hi khua ah phung cu ka chim rih ko lai” tiah a ti. Cun mawṭawka cung in a ṭum. Mah unau nu nih Baibal a cawnpiakmi pakhat mah mawṭawka ah a um kha unau nu nih a hngal lo. Mah nu cu mi a ṭih hna caah Khrihfa pumhnak ah aa pum ngam lo. Asinain unau nu a ralṭhatnak a hmuh hnu in kaa pum lai tiah biakhiahnak a tuah.
18. Jesuh bantuk in ralṭha in phungchim awkah zeinihdah a kan bawmh lai?
18 Pathian he aa hlatmi hi vawlei ah, Jesuh bantuk in phungchim awkah ralṭhatnak a herh. Ralṭhat awkah zeinihdah a kan bawmh khawh? Hmailei kha cuan. Pathian le innpa cung na dawtnak kha fehter. Ralṭhat awkah Jehovah sin thlacam. Zeitikhmanh ah nangmah pakhat lawng na si lo le Jesuh na sin a um kha a zungzal in hngal. (Matt. 28:20) Thiang thlarau nih thazang an pek lai. Cun Jehovah nih thluachuah an pek lai i an bawmh lai. Cucaah ralṭha tein hitin chim kho hna u sih: “Bawipa cu a ka bawmtu a si, zeihmanh ka ṭih lai lo. Minung nih ka cungah zeidah an tuah khawh lai?”—Heb. 13:6.
Zeitindah Na Leh Lai?
• Pathian salle cu zeicah ralṭhat a herh?
• Ralṭhatnak he aa tlai in
Khrih chan hlan ah a nungmi zumhawktlakmi hna
Jesuh Khrih
hmasa Khrihfa hna
tuchan Khrihfa hna sin in zeidah kan cawn khawh?
[Cahmai 21nak i hmanthlak]
Jesuh nih biaknak lamhruaitu hna kha ṭih lo in a phuan hna
[Cahmai 23nak i hmanthlak]
Jehovah nih phungchimnak ah ralṭhatnak a kan pek