Pathian Bia kha Ralṭha tein Chim Peng U
1 Khrihfa rianṭuantu hna in kan phungchimnak kha mikip nih an cohlang dih lai lo ti kan hngalh. (Matt. 10:14) Asinain a cheukhat nih an duh lonak an langhter tikah thawng ṭha bia chimnak dawnhter awk cu kan duh lo. (Ptb. 29:25) Pathian bia kha ralṭha tein chim peng awkah zei nih dah a kan bawmh?
2 Lamkaltu Paul nih ‘a sunglawi deuhmi Bawipa Jesuh hngalhnak’ kha ṭha tein a rak hngalhthiam. Cu nih “a fekmi zumhnak” he khan chim awkah a forh. (Fili. 3:8; 1 Thes. 1:5, Nw) A cheu nih cun a chimmi thawngpang kha hruh bia in an hmuh ko nain, “a zum mi vialte hna caah Pathian khamhnak hmual a si” kha a hngalh. (Rom. 1:16) Cu a si caah ralchannak a ton tik hmanhah, ‘Bawipa kong kha ralṭha ngaingai in a chim.’—Lam. 14:1-7; 20:18-21, 24.
3 Kan Thazaang Hrampi: Paul nih amah thazaang in ralṭha tein a chim khawhmi a si lo. Paul nih amah le Silas nih an tonmi kha hitin a rak ṭial: “Filipi khua ah an kan sersat i an kan nihsawh . . . Asinain, Pathian nih a Thawng Ṭha kha nannih chimh awkah ralṭhatnak a kan pek i harnak tampi a um nain kan chim.” (1 Thes. 2:2; Lam. 16:12, 37) Cu hlei ah, Rom i thong a tlak lioah, Paul nih thawngṭha bia kha chim peng awkah “ka ral a ṭhat nakhnga” thla rak ka campiak u tiah midang kha a hal hna. (Efe. 6:18-20) Jehovah aa bochannak thawngin Paul nih Pathian bia kha ralṭha tein a chim peng khawh.—2 Kor. 4:7; Fili. 4:13.
4 Nihin zong cu bantukin a si ve. Unaupa pakhat cu a rianṭuannak hmun ah Jehovah Hngaltu pakhat ka si ti chim awkah le tonsaphak phungchim awkah aa harh ngai caah thla a cam i phung cu a chim. A hmasa ahcun a hawipa nih a rak duh lo nain thawhṭhannak ruahchannak kong a theih tikah Baibal cawnnak kha a rak cohlan. Cu caan thawk in cun mah unaupa nih phung chimh awk i caan ṭha a hmuhmi paoh kha tlolh loin a rak hman. A hnu i a rianṭuannak hmun pakhat ah kum 14 chung a rian ṭuan hawi 34 kha tipil an in tiang a bawmh hna. Jehovah nih a “bia cu ralṭha chinchin in kan chim nakhnga” cu bantukin thazaang a kan pek lai ti kha fek tein kan zumh khawh.—Lam. 4:29.