Khrihfabu Na Rian Kha Sunsak

“Pathian nih amah duh ning tein, [pum nge cu] anmah le an um nakhnga ding cio ah khan a chiah hna.”—1 KOR. 12:18.

1, 2. (a) Khrihfabu ah a ummi paoh nih sunsak awk mahle rian cio a um kha zeinihdah a langhter? (b) Hi capar ah zei biahalnak dah kan i ruah lai?

HLANLIO Israel mi chan ah Jehovah nih a miphun kha thlarau rawl le lamhruainak pek awkah a rak pumhter hna. Israel mi nih Ai khua an tei hnu ah Joshua nih “phungbia chung bia vialte cu, thluachuahnak he chiatserhnak he, phungbia cauk chungah aa ṭialmi vialte ning khan, a rel. . . . Israel mi aa pummi vialte . . . hmai ah.”—Josh. 8:34, 35.

² C.E. kumzabu pakhatnak ah, lamkaltu Paul nih Khrihfabu cu “Pathian innchungkhar” le “biatak a dirkamhtu le biatak i a tungpi” a si tiah Khrihfa upa Timote sinah a chim. (1 Tim. 3:15) Tuchan Pathian “innchungkhar” cu a hmaanmi Khrihfa hna in dirhmi vawlei pumpi unau rual hi a si. Paul nih thlarau lamhruainak in Korin khuami sin a ṭialmi a cakuat pakhatnak a ngan 12 ah Khrihfabu kha pum he a tahchunh. Pum nge hna an rian cu aa khat lo nain a zapi in a herh dih tiah a ti. “Pathian nih amah duh ning tein, [pum nge cu] anmah le an um nakhnga ding cio ah khan a chiah hna” tiah Paul nih a ṭial. “Hmaizah awktlak i kan ruah set lomi hna pei ṭha khun in kan hmaizah hna” cu tiah a ti. (1 Kor. 12:18, 23) Cucaah Pathian innchungkhar ah miding pakhat rian cu zumhawktlak Khrihfa dang rian nakin a san deuh lo bantuk in a niam zong a niam deuh lo. Rian aa lawh lo men a si. Cu a si ah Pathian timhtuahmi Khrihfabu ah kan rian zeitindah kan hngalh lai i kan sunsak khawh lai? Zeinihdah kan rian ah hmual a ngeihter khawh? ‘Kan ṭhannak kha mi vialte nih an hmuh’ nakhnga zeidah kan tuah khawh?—1 Tim. 4:15.

Kan Rian Kan Sunhsak Khawh Ning

3. Khrihfabu ah kan rian hngal in kan sunsak langhternak lam khat cu zeidah a si?

³ Khrihfabu ah kan rian hngal in kan sunsak langhternak lam khat cu “zumhawk a tlakmi le a fimmi sal” le mah nih a aiawhmi Uktu Bu he rianṭuanṭi a si. (Matthai 24:45-47 rel.) Sal bu lamhruainak zeitindah kan leh i check a hau. Tahchunhnak ah, kum tampi chung thilpuan hrukning, nuamhsaihnak le Internet aa dawhtlak loin hmannak kong fiang tein lamhruainak kan hmuh cang. Thlaraulei huhphenhnak hmuh awkah mah ruahnak cheuhnak ṭha kha kan zul maw? Chungkhar pumhnak tuah lengmang awk ruahnak cheuhnak tah zeitin? Mah ruahnak cheuhnak kha zul in chungkhar pumhnak tuah awkah zan ah a caan na khiak cang maw? Nupi,va a ngei lomi kan si ahcun Baibal hlathlainak caah caan kan chia maw? Sal bu lamhruainak kan zulh ahcun pumpak in le chungkhar in Jehovah thluachuah kan hmu lai.

4. Pumpak thil kong thimnak tuah tikah zeidah ruah chih awk a si?

⁴ Nuamhsaihnak le thilpuan hrukning ti bantuk thil cu mahte in biakhiahnak tuah awk a si tiah cheukhat nih an ruah men lai. Khrihfabu ah a rian a sunsakmi aa pumpe cangmi Khrihfa nih cun biakhiahnak a tuah tikah amah duhnak lawng a ruat lai lo. A bik in Baibal ah aa ṭialmi Jehovah hmuhning tu a ruah awk a si. Pathian Bia cu ‘kan ke caah meiinn le kan lam ah ceunak a si’ awk a si. (Salm 119:105) Pumpak thimnak tuahmi nih kan phungchimnak le bu chung le bu leng mi hna zeitindah a hnorsuan hna ruah chih cu fim a si.—2 Korin 6:3, 4 rel.

5. Zalon duhnak lungthin kha zeicah doh awk a si?

⁵ ‘Pathian nawl ngaihlonak lungthin’ cu kan dawpmi thli bantuk in hmun kip ah a um. (Efe. 2:2) Mah lungthin nih Jehovah bupi lamhruainak kan herh lo tiah a kan ruahter khawh. ‘Paul chimmi zeihmanh ah a rel lomi’ Diotrefes bantuk si kan duh lo cu a fiang ko. (3 Johan 9, 10) Zalon duhnak lunghthin kha doh a herh. Tuchan ah Jehovah nih a hmanmi pehtlaihnak lam upat lo in zeitikhmanh ah chim in tuah hlah u sih. (Nam. 16:1-3) Mah he ralchanh in sal bu he rianṭuan ṭinak tinvo tu kan sunsak awk a si. Cu lengah kan umnak Khrihfabu hruaitu pawl nawlngaih i zuam awk a si ko lo maw?—Hebru 13:7, 17 rel.

6. Pumpak sining kha zeicah i check awk a si?

⁶ Khrihfabu ah kan rian kan sunsak langhternak lam dang cu kan sining ṭha tein check in kan si khawh chung in ‘phungchim rian i chor’ le Jehovah upatnak pek a si. (Rom 11:13) A cheu cu caanhmaan hmaikal an ṭuan men lai. Cheukhat cu caantling rian a simi missionary, khualtlawng rianṭuantu le Bethel rian in vawlei cung pumpi ah an ṭuan. Unau tampi cu Kingdom Hall saknak ah an ṭuan. Jehovah miphun a tam deuh cu an chungkhar thlaraulei herhmi kha an si khawh chungin an zohkhenh i phungchimnak ah zarh fate an i tel. (Kolose 3:23, 24 rel.) Pathian rian ah lungtho te’n i pe in kan lungthin dihlak in a rian kan si khawh chung in kan ṭuan ahcun Khrihfabu ah rian kan ngei peng lai ti kha kan zumh khawh.

Kan Rian ah Hmual a Ngei khomi Thil

7. Kan sining cu Khrihfabu i kan rian cungah zeitindah hmual a ngeih khawh kha fianter.

⁷ Khrihfabu ah kan rian cu kan tuah khawhmi cung ah a zaceo hmual a ngeih caah ṭha tein kan sining zoh a biapi. Tahchunhnak ah, Khrihfabu ah unaupa rian cu unau nu rian he aa dang. Kumkhua, ngandamnak le thil dang zong Jehovah rian kan ṭuan khawhmi cungah hmual a ngei. “Tlangval hna an sunparnak cu an thazang hi a si, tar hna an i dawhnak cu an sam par hi a si” tiah Phungthlukbia 20:29 nih a ti. Khrihfabu ah mino unau pa pawl cu mino thazang an ngeih caah thazang pek haumi rian tam deuh an ṭuan kho i upa pawl cu an fimnak le an hmuhtonnak in Khrihfabu caah an ṭhahnem ngaingai. Jehovah bupi ah kan tuah khawhmi zei paoh hi Pathian velngeihnak thawngin a si kha philh lo a herh.—Lam. 14:26; Rom 12:6-8.

8. Duhnak ngeihmi hi Khrihfabu i kan ṭuanmi rian ah zeitluk in dah hmual a ngeih?

⁸ Thisa unau nu pahnih tahchunhnak nih Khrihfabu ah kan rian cung hmual a ngei khomi a dang pakhat kha a langhter. An pahnih in tang hra an awng i an sining zong aa khat. Tang hra an awn in caanhmaan hmaikal ṭuan awkah an nu le an pa nih an si khawh chung in tha an pek hna. Sianginn kai dih in pakhat cu hmaikal a ṭuan i pakhat cu vawlei rian caan tling a ṭuan. Zei ruangah dah an i dan? An duhnak ruangah a si. A donghnak ah an duhmi kha an ṭuan. Kannih a tam deuh zong cutin kan si ko lo maw? Pathian rian ah zeidah ṭuan kan duh kha ṭha tein ruah a hau. Kan sining kan mersan ahcun mah rian ah tam deuh in kan i tel kho lai maw?—2 Kor. 9:7.

9, 10. Jehovah rian kha tam deuh in ṭuan duhnak kan ngeih lo ahcun zeidah tuah awk a si?

⁹ Jehovah rian kha tam deuh in ṭuan duh loin tlawmte lawng Khrihfabu ah kan ṭuan ah tah? Paul nih Filipi khua mi sin a cakuat ah hitin a ṭial: “Pathian tinhmi kha nan zulh khawh nakhnga le cu tuah duhnak lungthin nan ngeih nakhnga, Pathian cu nan chungah rian a ṭuan zungzal ko.” A si, Jehovah cu kan chung ah rian a ṭuan kho i kan lungthin le kan duhmi cungah hmual a ngei kho.—Fil. 2:13; 4:13.

¹⁰ A duhnak tuah kan duh nakhnga thlacam awk a si lo maw? Hlan lio Israel Siangpahrang David cu cutin a tuah. ‘Maw Jehovah, na lam kha ka cawnpiak hna law ka hngalhter hna. Nangmah cu ka Khamhtu na si caah na biatak ningin nun cu ka cawnpiak tuah. Chun ni tlak in nangmah kha kan bochan’ tiah thla a cam. (Salm 25:4, 5) Kannih zong cutin thla kan cam ahcun a duhnak tuah duh awkah Jehovah nih a kan bawmh khawh. Jehovah Pathian le a Fapa duhnak kan tuah tikah zeitindah kan um ti ruahnak nih lawmhnak in a kan khahter. (Matt. 26:6-10; Luka 21:1-4) Cuti lawmhnak nih thlaraulei ṭhancho awkah Jehovah sin thlacam a kan forh lai. Profet Isaiah nih kan ngeih awk a simi lungput kha zohchunh awk a chiah tak. Jehovah nih “Ahodah ka fial lai? Ahodah ka lamkal a si lai?” tiah a ti tikah profet nih “keimah ka kal lai! Ka thlah tuah” tiah a leh.—Isaiah 6:8.

Ṭhanchonak Tuah Khawh Ning

11. (a)Bupi chung ah rian hmuh aa timmi unau pa pawl nih zeidah tuah awk a si? (b) Pathian rian tinvo sung kha unau pa pakhat nih zeitindah hmuh aa zuam khawh?

¹¹ 2008 rianṭuannak kum ah vawlei pumpi ah 289,678 tipil an in tikah hruaitu unaupa tampi a herh ti cu a fiang. Mah a herhmi kha unau pa nih zeitindah a leh awk a si? Bu rianṭuantu le Khrihfa upa caah Baibal chimmi tlinh i zuamnak thawng in a si. (1 Tim. 3:1-10, 12, 13; Titas 1:5-9) Unau pa pakhat nih cu bantuk Baibal halmi tlinh kha zeitindah aa zuam khawh? Phungchimnak ah lungtho in aa telnak, Khrihfabu rian teima in a ṭuannak, pumhnak ah a phi ṭha deuh in pek aa zuamnak le unau pawl cung siaherhnak a ngeihnak thawngin a si. Khrihfabu ah a rian a sunsak a langhter a si.

12. Mino nih biatak caah tei an maknak zeitindah an langhter khawh?

¹² Khrihfabu ah mino pawl, a hlei in kum hra fai a simi nih ṭhancho awkah zeidah tuah khawh a si? Baibal hngalhnak kawlnak thawngin ‘Pathian fimnak le hngalhnak’ lei ṭhan an i zuam kho. (Kol. 1:9) Baibal teima tein hlathlainak le Khrihfabu pumhnak ah lungtho tein i telnak in cutin ṭhancho khawh taktak a si ko. Mino nih caantling rian phunphun ‘rianṭuannak innka nganpi aa hunmi’ ah luh awk sining tlinh an i zuamnak in ṭhancho khawh a si. (1 Kor. 16:9) Jehovah rian kha pawcawmnak rian in ṭuan cu lung a tling taktakmi nunnak lam le thluachuah tampi hmuhnak lam a si.—Phungchimtu 12:1 rel.

13, 14. Unau nu pawl nih Khrihfabu ah an rian an sunsak kha zeitindah an langhter?

¹³ Unau nu pawl zong Salm 68:11 tlinternak ah i telnak tinvo an sunsak an langhter khawh ve. Hitin kan rel: “[Jehovah] nih nawlbia cu a chuah i cu thawng cu nu tampi nih an kalpi.” Unau nu pawl nih Khrihfabu ah an rian an sunhsak langhter khawh biknak lam cu zultu siternak rian ah i tel a si. (Matt. 28:19, 20) Cucaah phungchimnak rian tling tein an ṭuannak le mah rian ah lungtho tein an i pehchanhnak in unau nu pawl nih Khrihfabu ah an rian an sunsak an langhter.

¹⁴ Paul nih Titas sinah hitin a ṭial: “Nu tar deuh pawl kha, nan umtuning ah mi hmaizah a thiammi nan si awk a si. . . Nu no deuh pawl kha, an vale le an fale dawt an thiam nakhnga le, mah le mah aa uk khomi an si nakhnga le a thiangmi an si nakhnga le innchungkhar khuasak ṭha tein a zohkhenh khomi an si nakhnga le an vale bia a ngaimi an si nakhnga, thil ṭha nan cawnpiak hna lai, tiah nu tar deuh pawl cu na chimh hna lai. Cu ti an tuah ahcun Thawng ṭha cu mi nih an thangchiat kho lai lo.” (Titas 2:3-5) Nutling Khrihfa unau nu hna cu Khrihfabu ah huham ṭha an ngei kho. Hruaitu unau pa pawl upatnak, thil hrukning le nuamhsaihnak ti bantuk ah biakhiahnak ṭha an tuahnak thawngin midang caah zohchunhawk ṭha an si i Khrihfabu ah an rian an sunsak tuk an langhter.

15. Va ngeilo unau nu nih umharnak kha zeitindah a tei khawh?

¹⁵ A caan ah, va ngeilomi unau nu cu Khrihfabu ah an rian hngalh an i harh men lai. Cu thil a tongmi unau nu pakhat nih “va ngeih lo cu a caan ah um a har tawn” tiah a ti. Mah kha zeitindah a tei hal tikah hitin a chim: “Thlacamnak le hlathlainak nih ka rian hngalh awk a ka bawmh. Jehovah nih zeitindah a ka hmuh ti kha ka ruat. Cun Khrihfabu ah midang bawmh khawh kaa zuam. Mah nih keimah ca lawng ruat loin midang ca ruah awk a ka bawmh.” Salm 32:8 ah Jehovah nih David kha “lungthin kan cheuh lai” tiah a ti. Jehovah nih va ngeilo unau nu hna telin a salle vialte cung siaherhnak a ngeih caah Khrihfabu ah kan rian ṭuan khawh awk a kan bawmh lai.

Na Rian kha Zohkhenh Peng!

16, 17. (a) A bupi chung ah i tel awk Jehovah sawmnak cohlan cu zeicah a ṭha bikmi biakhiahnak a si? (b) Jehovah bupi ah kan rian zeitindah kan zohkhenh khawh a si?

¹⁶ Jehovah nih a salle pakhat cio kha amah he i pehtlaih awkah dawtnak in a hnuh hna. Jesuh nih hitin a chim: “A ka thlahtu ka Pa nih ka sinah a hnuh hna dah ti lo ahcun ahohmanh ka sinah an ra kho lo.” (Johan 6:44) Tuchan ah Jehovah nih vawlei cung mi nuai tampi lak in pakhat cio kha a Khrihfabu ah i tel ding a kan sawm. Mah sawmnak cohlan cu biakhiahnak kan tuahmi lak ah a ṭha bik biakhiahnak a si. Mah nih kan nunnak kha sullam a ngeihter. Khrihfabu ah rian ngeih in kan um caah zeitluk in dah lawmhnak le lungtlinnak kan hmuh!

¹⁷ ‘Jehovah na umnak inn kha ka tlaihchan i na sunparnak a umnak hmun kha ka duh. Him tein hmun rawn ah ka dir i zapi pumhnak ah Jehovah cu ka thangṭhat’ tiah Salm caṭialtu nih hla a sak. (Salm 26:8, 12) A hmaanmi Pathian nih a Khrihfabu ah rian a kan pek cio. Ngol loin theocratic lamhruainak zulhnak le Pathian rian ah rian tamnak thawngin Jehovah bupi i kan rian kha kan zohkhenh peng khawh lai.

Naa Cinken Maw?

• Khrihfabu ah Khrihfa dihlak caah rian a a um cio ti cu zeicah aa tlak?

• Pathian bupi i kan rian kan sunsak zeitindah kan langhter?

• Zeinihdah Khrihfabu i kan rian kha hmual a ngeihter khawh?

• Khrihfabu i kan rian kan sunsak kha Khrihfa mino le upa nih zeitindah kan langhter khawh?

[Cahmai 16 hmantlak]

Unaupa pawl nih Khrihfabu tinvo kha zeitindah an hmuh khawh lai?

[Cahmai 17 hmanthlak]

Unau nu pawl nih Khrihfabu i an rian an sunsak kha zeitindah an langhter khawh?