In Khawhnak in Laksawng Hmuh Asi
1 “In khawhnak nan ngeih ahcun nunnak nan hmu lai.” (Luka 21:19, Nw) “Thil hna ningcang donghnak caan” he aa tlaiin Jesuh chimchungmi chungah aa cheuchum in aa telmi mah bia hna nih zumhfek tein kan um lioah hneksaknak tampi ton awkah timhcia tein kan um lai tikha a kan hngalhter. Sihmanhsehlaw kannih pakhat cio nih Jehovah pekmi thazaang in ‘a dongh tiang a fekmi’ si in “khamh-nak kan hmu” kho.—Matt. 24:3, 13, Nw; Fil. 4:13.
2 Hremnak, ngandam lonak, tangka lei harnak le lungretheihnak hna hi nifate hneksaknak an si kho. Asinain, Jehovah cung i kan zumhfehnak kha Satan nih hrawh dingah aa zuam tikha zeitik hmanhah kan philh hrimhrim awk asi lo. Kan Pa cung i zumhfek tein kan ummi ni nikhat cio hi thangchiattu i zuamcawhnak kha lehrulh khawh awkah a kan bawmmi ni nikhat asi. Hneksaknak kan in tik i a tlami “mitthli” hna kha a philh lo ti kan hngalh hi a ṭha-hnem tuk! Cucu Jehovah caah a man a sunglawimi asi i kan zumhfehnak nih Jehovah lung kha a lawmhter!—Salm 56:8; Ptb. 27:11.
3 Hneksaknak in Thianh Kan si: Harnak kan in tikah zumhnak thadernak asiloah i uahnak, lungsau lonak ti bantuk mah sining thazang dernak hna kha an lang kho. Hneksaknak hna kha hrial awkah asilole donghter awkah Baibal he aa ralchanmi lam in i zuam nak cha cun, “a dongh tiangin ing ko u” timi Pathian Bia chimhhrinhnak kha kan zulh lai. Zeiruangah? Hneksaknak hna kha zumhfek tein kan in nak nih “zeihmanh bau loin a tlingmi” a kan siter caah asi. (Jeim 1:2-4) In khawhnak nih aa tlak ning tein umnak, zawnruahnak le zangfahnak tibantuk a man khiah khawh lomi sining hna kha ngeih awkah a kan bawmh khawh.—Rom. 12:15.
4 Hneksak Cangmi Zumhnak: Hneksaknak hna kan in khawh tikah Pathian hmai ah a man a sungtukmi hneksak cangmi zumhnak kha kan ngei. (1 Pit. 1:6, 7, Nw) Cu bantuk zumhnak nih hmailei hneksaknak hna kan ton tikah fek tein dir khawh awkah timh cia in a kan umter. Cuhleiah, Pathian mithmai ṭha kan hmu kho i, cu nih cun kan i ruahchannak kha a fehter i, cu ruahchannak cu kan caah a um taktakmi a hung si.—Rom. 5:3-5.
5 In khawhnak caah a ṭha bikmi laksawng kha Jeim 1:12 ah hitin a chim: “Hneksaknak a in tikah fekte in a ummi cu a lung aa lawm, zeicahtiah . . . nunnak kha laksawng ah a hmuh lai.” Cucaah, “amah a dawtu hna” kha tampi in laksawng a pek hna laimi kha fekte in zumh in Jehovah kan biaknak ah fekte in i hmun peng hna u sih.