“Hneksaknak A In Tikah Fek tein A Ummi Cu A Lung Aa Lawm”
1 Khrihfa dihlak nih hneksaknak kan ton. (2 Tim. 3:12) Hneksaknak kha zawtfahnak, khuasak harnak, tukforhnak, hremnak asiloah a dang lam hna in kan ton men lai. Thlarau lei ah duh sah in thadernak, Khrihfa phungchim daithlannak asiloah Pathian rian ṭuan ti lo tiang timh-nak ngei in Satan nih kan cungah hneksaknak a chuahter. (Job 1:9-11) Hneksaknak inkhawhnak nih zeitindah a kan lawmhter?—2 Pit. 2:9.
2 Hneksaknak caah Timhcianak: Jesuh nunnak le cawnpiaknak kong aa telmi a Baibal kha Jehovah nih a kan pek. Jesuh chimmi le tuahmi kan theihnak thawngin a fekmi hram kan bunh i hneksaknak caah timhcia kan si. (Luka 6:47-49) Khrihfa unau, Khrihfabu pumhnak le zumhawk tlak sal nih Baibal hrambunh in an chuahmi cauk ti bantuk an kan timhpiakmi hna zong in thazang kan hmu. Pathian pekmi laksawng thlacamnak zong zalong tein kan hman.—Matt. 6:13.
3 Jehovah nih ruahchannak zong a kan pek. Jehovah biakammi fek tein kan zumh tikah kan i ruahchanmi cu “kan nunnak caah a fekmi le a ṭhawngmi thir cangai bantuk a si.” (Heb. 6:19) Baibal chan lioah tilawng hna cu nikhua a ṭhat caan zongah thir cangai ken lo in an kal bal lo. Ruah lopi in thlichia a hran tikah thir cangai bunhnak nih tilawng kha rilikam lungpang ah i suk lo ding in a kham khawh. Cu bantuk in atu ah Pathian biakammi fek tein kan zumhnak nih harnak thlichia kan ton tikah a kan hmunh-ter lai. Harnak kha ruah lopi in a chuak kho. Paul le Barnabas cu Listra khua ah phung an chim tikah a hmasa ah cun an cohlan ko nain Judah mi ralchanhtu pawl an phanh tikah thil sining cu khul rang tuk in aa thleng.—Lam. 14:8-19.
4 Inkhawhnak nih Lawmhnak A Chuahter: Phungchimnak ah ralchannak kan tong ko nain fek tein kan dirnak nih daihnak a kan hmuhter. Khrih ruangah ningzah in awk nan i tlak tiah hmuh kan si caah kan i lawm. (Lam. 5:40, 41) Hneksaknak inkhawhnak nih toidornak, nawlngaihnak le inkhawhnak a kan ngeihter deuh. (Deut. 8:16; Heb. 5:8; Jeim 1:2, 3) Mah nih Jehovah i bochan awk, a biakam zumh awk le a sin ah i dor awk a kan cawnpiak.—Ptb. 18:10.
5 Hremnak cu caan tawi te lawng a si lai kha kan hngalh. (2 Kor. 4:17, 18) Hneksaknak nih Jehovah zeitluk in dah kan dawt langhternak caan ṭha a kan pek. Inkhawh-nak thawng in Satan sualpuhnak kha kan leh khawh. Cucaah kan i teiter lo! “Hneksaknak a in tikah fek tein a ummi cu a lung aa lawm, zeicahtiah cu bantuk hneksaknak kha a tei khawh caah . . . nunnak kha laksawng ah a hmuh lai.”—Jeim 1:12.