Mi An Tamnak Hmun ah Hmual Ngei Ngaiin Tehtekhaannak
1. Kum zabu pakhatnak Khrihfa hna kha i zohchunh in nihin Khrihfa hna nih mi an tamnak hmun ah zeitindah tehte an khaan i, zeidah an hmuh?
1 Hmasa i Jesuh zultu hna ban-tukin nihin Khrihfa hna nih mi hmuh khawhnak hmun paoh ah thawngṭha bia kha chim awkah an i zuam. (Lam. 16:13; 17:17; 20:20, 21) Mi an tamnak hmun ah tehtekhaan ding an i zuam ruangah innkhat hnu innkhat phungchimnak ah zeitik hmanhah hmuh khawh a si hnga lomi hna chungin theih duhnak a ngeimi hna kha an hmuh khawh hna.
2. Mi an tamnak hmun hna ah tehtekhaan tikah thleidanthiamnak ngeih hi zeicah a herh i, thil aa rem cang nakhnga zeitindah tuah khawh a si?
2 Mi an tamnak hmun i tehte-khaan tikah thleidan thiamnak ngeih a herh. A tam deuh cu lang setsai loin tuah hi a ṭha bikmi a si. Tahchunhnak ah, thawngthanhtu tampi nih hmun pakhat i tehtekhaan tikah asilole thil zuarnak hmun pa-khat i kal tikah a cheukhat nih hna a kan hnawh tiah an ruah khawh. Cunih kan rian kha upatnak a umter lo lengah hmual a ngeihnak hmanh kha ri a ngeihter khawh. Cu ti si lo awkah zeidah tuah khawh a si? Mi an tamnak tehtekhaan khawhnak hmun tam a umnak hmun ah Khrihfabu cheukhat nih mah sang kha i ṭhencheu cio in an ṭuannak thawng-in bawmtu a si kha an hmuh cang. (1 Kor. 14:40) Cu lengah Khrihfabu Rianṭuannak Kommiṭi nih a dang khrihfabu pakhat kha bawmhnak pek ding in fiang tein timhtuahnak an tuah lo ahcun mahle khrihfabu rian peknak hmun lawng i phung-chimnak thawngin thil aa rem cang ko.—November 1998 Kannih Pennak Rianṭuannak, ca. 6, catlang. 18-19 kha zoh.
3. Mi an tamnak hmun ah tehte-khaan tikah zei fuhpanhning dah hmual a ngeih kha a cheu nih an hmuh?
3 Mi Va Fuhpanhnak: Jesuh cu tikhor pawngah minu pakhat he bia an i ruah tikah bia tawi tein a thawk hmasa i minu nih hngalh duhnak a langhter tikah tam deuh in a hun chim thluahmah. (Johan 4:7-26) Hi fuhpanhning hi nihin zong-ah hmun cheukhat ahcun hmual a ngeingai. Thawngthanhtu a cheu nih mi hmai i tehtekhaannak ah hmual a ngeih deuh nakhnga Pennak thawngpang kha an chim hlan ah a caan tlawmpal la in hei biakchonhnak le pumpak hngalh duh-nak an langhternak nih a bawmh hna kha an hmuh. Bia i ruahnak a chuahter hngami umnak hmun i theih duh ngai a simi kong pakhat kha an chim. Midang nih an lungre a theihnak kha an chim tikah ṭha tein an ngaihpiak hna. A rauh hlan ah Pathian Bia in hnemhnak kha an hrawm hna.—Rom. 15:4
4. Kan hmuhmi hngalhduhnak kha zeitindah kan ṭhanter khawh?
4 Hngalhduhnak Kha Ṭhanternak: Ṭha tein i ruah ṭi tik caan paoh ah hngalhduhnak kha ṭhanter awkah timhtuahnak hna ngeih awk i zuam ding a si. Cucu zeitindah tuah khawh a si? Bia nan i ruah caan a dih deng tikah ṭial awk na cauk (notebook) kha chuah law “bia kan i ruah hi a nuam ngai. Caan dang ah tah hi bantuk hin bia i ruahnak caan a um kho hnga maw?” Asiloah “rel na duh lai tiah ka ruahmi cauk kha rel law ti kan duh, na inn ah maw na zung ah dah ka rak put lai” tiah ti khawh a si. A cheu thawngthanhtu nih cun “zei fawn nambar in dah kan chonh lai” tiah an hal hna. Mah nih lehrulhnak ṭha pakhat kha a hmuhter tawn hna.
5. Mipi hmai tehtekhaan tikah zei hmuitinh dah kan ngeih awk a si?
5 Mi an tamnak hmun hna ah hmasa bik hmuhmi minung tampi nih Baibal cawnnak kha an co-hlan cang. Cu bantuk Baibal cawnnak kha an inn ah, rianṭuannak ah, aa tlakmi mi tam an umnak hmun pakhat ah asilole ṭelifawn in tuah khawh a si. Mi an tamnak hmun i hmual ngei ngai in tehte kan khaan tikah Baibal cawnnak kan thawk khawh nakhnga hmuitinh ngei kho hna u sih.