Lungthawhawk Ngai a Simi Fuhpanhning Thar in Zapi Lak Phungchimnak
1. Khrihfabu ah zapi an i chawhnak hmun a um ahcun zei tuah dingin dah thapek kan si?
1 Khrihfabu ah zapi an i chawhnak hmun a um ahcun cabuai asiloah fawi tein ṭhial khawhmi cauk chiahnak hna kha hmangin zapi lak phungchimnak tuah awkah thapek kan si. Fawi tein ṭhial khawhmi cauk chiahnak hman ahcun mah pawngah a tlawm bik unau pakhat nih dir hnawh ding asiloah ṭhut hnawh ding a si. Asinain cabuai hman ahcun thawngthanhtu pahnih nih hngah ding a si. Rianpekmi hna cu chawnh ngammi le naih ngammi an si awk a si. Cabuailei ah pakhatkhat an rat ahcun thawngthanhtu pakhat nih “mah kong he aa tlaiin Baibal nih zeitindah a chim ti kha na thei bal maw?” tiah hal in biaruahnak a thawk khawh. Cutin a chim lioah a dang unau hna nih a herh ahcun bawmh khawh dingin timhcia tein an um awk a si.
2. Zapi lak phungchimnak thawngin ṭhathnemhnak hmuhmi hmuhtonnak kong kha chim.
2 Mah fuhpanhning thar thawngin Baibal cawnpiaknak tampi hmuh khawh a si. Sianghleiruun a kaimi pakhat nih Jehovah Tehte Hna kong kha ṭial awkah bia a khiah. Asinain Biakinn kha a hmu kho lo. A hmaizarh ah an sianginn ah cabuai hmangin zapi lak phung an chimmi kha a hmuh. Cuticun Baibal cawnnak kha a cohlan i atu cu tipil a ingmi thawngthanhtu a si cang. Mah lengah zapi lak phungchimnak ah amah theng zong aa tel ve.
3. Zapi lak phungchimnak fuhpanhning thar kong he aa tlaiin unau cheukhat nih zeitindah an chim?
3 Zapi lak phungchimnak ah aa telmi unaunu pakhat nih hitin a chim: “Mi cheukhat nih hmanung bik chuahmi mekazin hna kha an i lak. A dangtu cu Jehovah Tehte Hna kong a hngal bal lomi an si. Mah bantuk fuhpanhning thar thawngin mi tampi sinah phungchim khawh a si kha ka hngalh.” A dang unaunu pakhat zong nih hitin a chim ve, “Lungthawhawk ngai a simi fuhpanhning thar in zapi lak phungchimnak thawngin mi pawl cu kan sinah an ra. Hngalh an duh lo hmanhah zeidah a si hnga ti hngalh duh ah an ra.”
4. Cabuai chiah tikah chiahnak hmun, a caan le a ni aa khahmi cu zeicah a ṭhat?
4 Cabuai chiah tikah chiahnak hmun, a caan le a ni aa khah ah a ṭha. Mah tikah mi pawl nih cauk kan chiahmi kha an hmuh lengmang lai i an kan fuhpanh ngam lai. Cun biahalnak a kan tuah ngam lai i cauk zong an i lak ngam lai. Nan Khrihfabu ah zapi lak phungchimnak ca timhtuahnak a um maw? A um ahcun nang zong i tel ve law ‘Pathian Pennak kong chimnak’ thawngin ṭhathnemnak hmu.—Luka 9:60.