Lamcung Phungchim Man A Ngei
1. Jesuh kan i zohchunh khawhnak lamkhat cu zeidah a si?
1 Jesuh cu phungchim rian a ṭuan lioah lamcung le mi tamnak hmun ah phung chim ding aa cungcang lo. (Luka 9:57-61; Johan 4:7) Mi tam khawh chung tam sinah a biapimi thawngpang chim a duh. Tuchan ah Pathian fimnak mi hngalh awk bawmhnak ah lamcung phungchimnak cu a ṭha tukmi lam a si. (Ptb. 1:20) Thleidan thiamnak ngei in mi kan fuhpanh hna ahcun kan hlawh a tling chin lai.
2. Lamcung phungchim tikah zeitindah tuah awk a si?
2 Mi kha Fuhpanh hna: Hmun ka khat ah dir asiloah ṭhu in aa chawkmi nih rak fuhpanh lai hngah nakin mah nih va fuhpanh cu a ṭha deuh. Hmai panh tein nih hna law an mit zoh hna. Thawngthanhtu dang he nan kalṭi ahcun a dangdang in mi va fuhpanh cu a ṭha. Biatak theih a duhmi he nan i ton ṭhan khawh nakhnga zong naa zuam a hau. Bia nan i ruah dih in a si khawh ahcun a umnak hal. Thawngthanhtu cheukhat cu phung an chimhmi hna he i ton ṭhan in an lungthawhter awkah cuka hmun ah an va kal ṭhan lengmang.
3. Lamcung phungchim tikah thleidan thiamnak zeitindah hman awk a si?
3 Thleidan Thiamnak Ngei: Lam i khoika zawn ah dir ding le ahodah fuhpanh ding biachah tikah thleidan thiam a hau. Aa chawkmi dihlak chimh i timh awk a si lo. Ṭha tein khua zoh. Tahchunhnak ah, mi pakhat cu aa hnawhhnammi a lawh ahcun chimh lo ah a ṭha. Dawr hmai ah phung na chim ahcun, dawrngeitu hnahnawh pek lo awk i zuam. Dawr ah a lut hnikmi sin si loin a chuakmi sin chim cu a ṭha deuh. Mi va fuhpanh tikah ṭih le lau in an um nakhnga lo i zuam. Cauk pek tik zong ah thleidan thiamnak ngeih a hau. An lung a thawh theng lo ahcun mekazin pek lo in cazual tu pe hna.
4. Lamcung phungchimnak cu zeicah man a ngeih i a nuamh?
4 Lamcung phungchimnak thawng in caan tawite chungah biatak thlaici tampi kan vorh khawh. (Pct. 11:6) Kan tonmi cheukhat cu innkhat hnu innkhat kan kal lio i inn ah a um lomi an si men lai. A nuam i man a ngeimi lamcung phungchimnak ah tel khawh i zuam.