Na Caan kha Na thleng Kho Lai Maw?
1. Phungchimnak caah kan caan kha zeiruangah thlen awk a si?
1 A hmaanmi Khrihfa hna in “mi tlaitu” si awk i sawmmi kha kan cohlan cang. (Matt. 4:19) Ngatlaitu hna bantukin, mi kan hmuh khawh hna caan ah phungchim dingin a caan kan suai a si ahcun mi tlaihnak ah a ṭhahnem deuh lai. Ram tampi ahcun a ra laimi thla ah ni a sau lai. Chunhnu le zanlei sang ah inn ah mi kha hmuh khawh deuh a si. A tam deuh cu an i din i mileng rat kha an duh men ko lai. Khi caan ah phungchim dingin na caan kha na thleng kho lai maw?—1 Kor. 9:23.
2. Thawngṭha bia mi tam deuh sin phanh khawh awkah zei lam cheukhat dah a um?
2 Zanlei Sang Phungchimnak: Zanlei sang phungchim dingah a hlankan in ruahchungnak nih mi tampi sin thawngṭha bia a phanhter khawh. (Ptb. 21:5) Mino hna nih sianginn ṭum hnu ah phungchim khawh a si lai. A dang rian a ṭuanmi hna nih rian ṭum hnu ah phungchim khawh a si. A cheu caukpi cawnnak group nih zarhfate an pumh thawk hlan suimilam pakhat chung phungchim awkah an tuah khawh.
3. Nan sang ah chunhnu le zanlei sang ah zei ti lam in dah phung na chim khawh?
3 Chunhnu le zanlei sang innkhat hnu innkhat phungchimnak nih inn ah a um tawn lomi hna he biaruahnak caan a kan hmuhter. Hmun tampi ah lam cung phungchimnak le a dang mi tamnak hmun i phungchimnak pungsan zong kha zanlei sangah an tuah khawh. Cun a tam deuh nih zanlei sang ah lennolh tuah le Baibal cawnpiaknak tuah a ṭhat bik caan a si kha an hmuh.
4. Zanlei sang phungchimnak ah thleidanthiamnak le zawnruahnak ngeih hi zeicah a biapit?
4 Thleidanthiam A Hau: Zanlei sang phungchim tikah ṭha tein ruah tuak a hau. Innngeitu hna zan ah dinh awk an i timh lai caan i kalnak cha cun zanlei sang tuan deuh i phungchimnak hi a ṭha bik a si. (Fil. 4:5, NW) Innka na kingh tikah an in hmuh khawhnak hmun ah dir law aho na si fiang tein i hngalhter. Na rak lenmi hna naa tinhnak kha hngalhter colh. Na va len lio caan ah chungkhar rawl ei lio a caan aa rem lo caan a si ahcun voi dang ah ka ra ṭhan lai tiah ti hna. A zungzal zawnruahnak ngei.—Matt. 7:12.
5. Phungchimnak ah a si khomi ṭihnung kha zeitindah hrial khawh a si?
5 A si khomi ṭihnung zong kha i ralrin a hau. Nitlak hnu asiloah a muih hnu ah phungchim vah a si ahcun pahnih in asiloah a bu in kal hi a ṭha. Nangmah pakhat lawng a dang te i um lonak a ceunak hmun lam ah kal. A him ti na ruahnak hmun lawngah phungchim. A muih hnuah himnak a umlonak hmun cu hrial.—Ptb. 22:3.
6. Chunhnu le zanlei sang phungchimnak in zei ṭhathnemnak hna dah kan hmuh khawh?
6 Chunhnu le zanlei sang phungchimnak nih manhcaan le hmanhman hmaikal hna he kal ṭinak caan ṭha a kan hmuhter. (Rom. 1:12) Hi rianṭuannak ah i tel awkah na caan kha na thleng kho lai maw?