Rawl cu Ṭuan awkah An Hmin Dih Cang
1. Zei a biapi ngaimi rian dah ṭuan cuahmah a si?
1 Jesuh nih Samaria minu phung a chimh hnuah a zultu kha hitin a ti hna: “Lo khi ṭha tein hei zoh hna hmanh u; rawl cu an hmin dih cang i ṭuan an cu diam cang khih.” (Johan 4:35, 36) Thawngṭha a cohlangmi pawl pumhkhawmhnak rian cu ṭuan cuahmah a si i vawleicung pumpi ah ṭuan a si lai kha Jesuh nih a rak hmuhchung. Mah rian kha Jesuh nih vancung in lam a hruai. (Matt. 28:19, 20) Mah rian lim caan a naih chin bantuk in fakpi in ṭuan khun a si kha zeinihdah a langhter?
2. Zei ṭhanchonak nih dah vawlei pumpi rawl ṭuannak fakpi in ṭuan a si a langhter?
2 Vawlei Pumpi Rawlṭuannak: 2009 rianṭuannak kum ah, vawlei pumpi ah thawngthanhtu 3.2% a karh. Phungchim khamnak hmun ah 14% a karh. Thla fate tuahmi Baibal cawnpiaknak cu 7,619,000 leng a si i thawngthanhtu dihlak nambar nakin a tam deuh i nikum Baibal cawnpiaknak nakin sing nga deng a tam deuh. Mah rian cu hmun tampi ah a karh caah Gilead sianginn kai pawl kan thlahpiak u ti halnak ca a tam chin. Ram tampi i miphun dang holh hmannak lohmun cu a ṭhangcho tuk. Jehovah nih rawlṭuan donghnak caan ah fakpi in rian a ṭuan ti a fiang. (Isa. 60:22) Na ‘lo hmun’ cungah a ṭhatnak in hmuhnak na ngei maw?
3. Cheukhat nih rawl an ṭuannak hmun kongah zeitindah an chim tawn?
3 Na Umnak Lohmun Rianṭuannak: “Kei ka ṭuannak cu thei a tlai lo” tiah mi cheukhat nih an ti men lai. Hmun cheukhat cu hmun dang nakin asiloah a hlanlio tlukin thei a tlai men lai lo. Hi hmun ahcun rawl cu ṭuan dih a si cang, a tangmi tlawmpal khomh lawng a taang cang tiah unau cheukhat nih an ti men lai. Cucu a hmaan maw?
4. Phungchimnak ah zei lungput hmaan dah ngeih awk a si, zeicah?
4 Rawlṭuan caan timi cu a thawk in a dongh tiang fakpi in ṭuan caan a si. Jesuh chimmi hi bia a biapitnak hi zohhmanh: “Rawl ṭuan awk cu tampi a um ko, sihmanhsehlaw a ṭuantu ding cu tlawmte lawnglawng an si. Cucaah rawlṭuan Uktu Bawi sinah cun, rawl ṭuantu tam deuh a thlah hna nakhnga, thla va cam tuah u.” (Matt. 9:37, 38) Zeitik le khoika ah thei a tlai lai cu rawlṭuan Uktu Bawi Jehovah rian a si. (Johan 6:44; 1 Kor. 3:6-8) Kan rian cu zeidah a si? Baibal nih hitin a ti: “Zinglei ah thlaici tuh ko, zanlei zongah ngol hlah.” (Pct. 11:4-6) Rawlṭuan lim caan ah i din hlah!
5. Thei tlai lo dawh a lomi hmun ah zeicah teima tein chim peng awk a si?
5 Rawl Ṭuan Peng: Phung kan chimnak hmun cu atu le atu chimnak le a cohlangmi an umlonak a si hmanh ah, teima te le a biapi timi lungput in ṭuan a herhnak a ruang a um. (2 Tim. 4:2) Vawlei thil sining rang tuk in aa thlenmi nih minung lungput a thlenter i hmailei kong fakpi in a ruahter hna. Mino cu an hung upat deuh tikah himnak le lung daihnak kawl a hau tiah an ruat men lai. Kan i zuamnak nih mi cheukhat kha an lung a suk men hna lai. Hlan ah ngaih a duh lomi hna cu hmailei ahcun an duh te men lai. Thawngṭha ngaih a duh lo hmanh ah ralrin pek a herh ṭhiamṭhiam.—Ezek. 2:4, 5; 3:19.
6. Kan lohmun cu a ṭhat lo ahcun zeinihdah teimak peng awk a kan bawmh lai?
6 Kan lohmun cu a ṭhat lo ahcun zeinihdah teimak peng awk a kan bawmh lai? Innkhat hnu innkhat phungchimnak lengah chawhrawlnak sang ah le telephone in phungchim ti bantuk phun dang zong in chim khawh a si. Asiloah chim ning zong a phunphun thlen khawh a si. Caan suaimi thlen in zanlei ah phung chim khawh a si asiloah inn ah mi an um deuh caan ah phungchim khawh a si. Mi tam deuh sin phung chim khawh awkah holh dang zong cawn khawh a si. Hmaanhmaan ṭuannak thawngin phungchimnak ah tam deuh tel khawh a si. Asiloah rawlṭuantu tam deuh a herhnak hmun ah i ṭhial khawh a si. Rawlṭuannak cungah lungput hmaan kan ngeih ahcun mah a biapimi rian ah kan si khawh chung tel kan i zuam lai.
7. Pumhkhawmhnak rian cu zeitik tiang dah ṭuan awk a si?
7 Rawl pumh caan cu ri a ngeih caah lothlopa cu a rian aa lim hlan ah aa din lai lo asiloah duhsah in a ṭuan lai lo. Thlaraulei rawlṭuannak zong ah a biapi timi lungput ngeih a herh. Pumhkhawmhnak rian cu zeitik tiang dah ṭuan awk a si? “Caan dongh tiang” ṭuan awk a si. (Matt. 24:14; 28:20) Jehovah kong a Chimtu Jesuh bantukin pek kan simi rian hi lim kan duh. (Johan 4:34; 17:4) Cucaah caan dongh tiang a ṭhatnak in hmuhthiamnak he lungtho thanuam tein phungchim rian cu ṭuan zungzal u sih. (Matt. 24:13) Rawlṭuan rian cu a dih rih lo!
[Cahmai 2 ah Langhtermi ca]
Rawlṭuan caan timi cu a thawk in a dongh tiang fakpi in ṭuan caan khi a si