Thlarau Rawl Ṭuannak Ah Tling Tein I Tel

‘Bawipa rian kha teima tein ṭuan u.’—1 KOR. 15:58.

1. Jesuh nih a zultu hna kha zei tuah awk dah a sawm hna?

JESUH cu C.E., 30 a donghnak lei ah Samaria ram khual a tlawn lioah Saikhar khua pawng tikhor ah aa din. A zultu pawl kha hitin a ti hna: “Lo khi ṭha tein hei zoh hna hmanh u; rawl cu an hmin dih cang i ṭuan an cu diam cang khih.” (Johan 4:35) Jesuh nih rawl ṭuannak taktak kong a chimmi si loin a zultu a si hngami miding pawl pumhkhawhnak kha a chim duhmi a si. Mah cu Jesuh nih a zultu pawl kha rawl ṭuannak ah i tel dingin a sawmmi hna a si. Ṭuan awk rian cu a tampi nain rian lim awkah caan tlawmte lawng a tang!

2, 3. (a) Rawl ṭuannak caan ah kan nun kha zeinihdah a langhter? (b) Hi capar ah zei kong dah kan i ruah lai?

² Jesuh chimmi rawlṭuannak kong cu kan chan ah a hlei in sullam a ngei. Vawlei cung minung he a tahchunhmi ‘rawl ṭuan a cut’ caan ah kan nung. Kum fate minung nuai tampi cu nunnak a pemi biatak cawn awkah sawm an si i zultu thar thong tampi cu tipil an ing. Rawlṭuan uktu bawi, Jehovah Pathian kut tang i rawlṭuannak caan chung a biapit biknak caan ah rawl ṭuan awk tinvo kan hmu. Mah rawl ṭuannak rian kha ‘teima tein’ na ṭuan maw?—1 Kor. 15:58.

³ Jesuh nih vawlei cung a phungchim rian kum thum le a cheu a ṭuan lioah a zultu pawl kha rawl ṭuannak rian caah a timhlamh hna. Jesuh nih a zultu pawl a biapimi thil tampi a cawnpiakmi hna lakah i cawn awk thil pathum kha hi capar ah kan i ruah lai. Mah pathum kan i ruah tikah tuchan zultu pumhkhawhnak rian ah kan si khawh chung in kan ṭuan lioah kan caah man a ngei tukmi i cawn awk pathum kha kan hmuh lai. Mah pathum kha pakhat hnu pakhat i ruah u sih.

Toidornak Ngeih A Herh

4. Jesuh nih toidornak a biapit kha zeitindah a langhter?

⁴ Mah hi na mitthlam ah cuanter hmanh: Zultu pawl cu ahodah a ngan bik tiah bia an i al. An i zumh lo le an thin a hun kha an mithmai ah a lang. Cucaah Jesuh nih ngakchiate pakhat kha a auh i an hmai ah a dirter. Ngakchia pate kha zoh in “nannih cu nan i thlen i ngakchia bantuk ah nan i can lo ahcun Vancung Pennak chungah nan lut bal lai lo. Vancung Pennak chung i a ngan bik cu mi toiah aa dor i hi ngakchia bantuk ah aa cangmi cu a si” tiah a ti hna. (Matthai 18:1-4 rel.) Hi vawlei nih mi ngan sinak kha nawlngeihnak, rumnak le rian in a tah nain zultu pawl cu ‘mi toi ah aa dormi’ sinak thawngin mi ngan an si lai kha an hngalh a hau. Toidornak taktak an langhter lawngah Jehovah nih a hman hna lai i thluachuah a pek hna lai.

5, 6. Rawl ṭuannak rian ah tling tein i tel khawh awkah zeicah toidornak ngeih a herh? Tahchunhnak in chim.

⁵ Tuchan ah mi tampi nih an nunnak kha nawlngeihnak, rumnak le rian hmuhnak ca lawngah an hman. Cucaah thlarau lei caah caan an pe kho ti lo. (Matt. 13:22) Jehovah mi hna tu cu rawlṭuan Uktu Bawi lungton awk le thluachuah hmuh awkah ‘mi toi ah aa dormi’ si an i zuam.—Matt. 6:24; 2 Kor. 11:7; Fil. 3:8.

⁶ Thlanglei America ah Khrihfa upa a ṭuanmi Francisco kong hi ruat hmanh. Mino a si lioah hmaikal ṭuan duh ah sianghleirun a kai tan ṭim ah aa din. Hitin a chim: “Nupi ka ngeih hnu ah ka nupi he kan khuasaknak caah a ṭha ngaimi rian ka hmu. Asinain kan pahnih in caantling rian kan ṭuan khawh peng nakhnga sawhsawh tein nun awkah bia kan khiak. A hnu fa pali kan hun ngeih tikah kan khuasak a har chin. Asinain kan biakhiah ning in nun khawh awkah Jehovah nih a kan bawmh.” Cun hitin a bia a donghter: “Kum 30 leng Khrihfa upa rian le a dang rian tampi ka ṭuan khawh caah kaa lawm. Sawhsawh tein kan nun ruangah zeitikhmanh ah kan i ngaichih bal lo.”

7. Rom 12:16 ruahnak cheuhnak kha zeitindah hman naa zuam khawh?

⁷ Vawlei mi hna bantuk in “lungpuam” loin rian hme tete ṭuan duhnak lungthin asiloah toidornak na ngeih ahcun rawl ṭuannak ah i telnak tinvo le thluachuah dang tampi na hmu lai.—Rom 12:16; Matt. 4:19, 20; Luka 18:28-30.

Teimaknak in Thluachuah Hmu

8, 9. (a) Jesuh chimmi tangka kong bianabia kha a tawinak in chim. (b) Mah bianabia in ahote dah a hlei in thazang a hmu?

⁸ Rawl ṭuannak ah tling tein i tel khawh awkah a herhmi a dang pakhat cu teimaknak a si. Mah kha Jesuh nih tangka kong bianabia in a langhter.a Mah bianabia cu khualtlawn aa thawhmipa nih a salle pathum kha a thilri zohkhenh a fialmi hna kong a si. Pakhatnak sal kha tangka thong nga, pahnihnak sal kha thong hnih le pathumnak sal kha thong khat a pek hna. An bawipa a kal hnu ah pakhatnak le pahnihnak sal nih an tangka khan teima tein “chaw an let” colh. Asinain, pathumnak sal cu “mi zaangthu” a si. A tangka kha vawlei ah a phum. An bawipa a tlun tikah a sal pahnih hna cu “tangka tampi tawngthamtu” ah a chiah hna. Pathumnak sal kha cu a pekmi tangka kha a chuh ṭhan i a inn in a ṭhawl.—Matt. 25:14-30.

⁹ Jesuh chimmi bianabia chung teimami sal hna an nawl i cawn le na si khawh chung in zultu siternak rian ah i tel na duh lai cu a fiang ko. Asinain atu na sining ruang ah na duh ning in naa tel khawh lo ah tah zeitin? Sipuazi a ṭhatlo ruangah chungkhar pawcawmnak caah suimilam tampi chung rian na ṭuan men lai. Asiloah kum upat ruangah thazang tlawm in a dam zong na dam men lai lo. Cuti na si ahcun tangka kong bianabia cu na caah thazang petu a si lai.

10. Tangka kong bianabia bawi nih a tlarimi a si kha zeitindah a langhter, mah kong in zeitindah thazang na hmuh?

¹⁰ Bianabia chung bawipa nih sal pakhat cio an tuah khawhmi thil kha ṭha tein a hngalh. Cucaah “anmahle an thil ti khawh ning cio khan” tangka kha a pek hna. (Matt. 25:15) Pakhatnak sal nih pahnihnak sal nakin tam deuh a ṭuan khawh lai tiah a ruah bantuk in a si taktak. Asinain a salle an pahnih ning in “salṭha, sal zumhawktlak” tiah a ti hna i teimak tein an ṭuanmi kha a sunsak i laksawng aa zat in a pek hna. (Matt. 25: 21, 23) Cu bantuk in rawlṭuan Uktu Bawi, Jehovah Pathian nih na sining nih a pek tluk in na ṭuanmi kha a sunsak. Na lungthin dihlak in a rian na ṭuanmi kha a philh lai lo i laksawng an pek lai.—Mar. 14:3-9; Luka 21:1-4 rel .

11. Rian tam bu in teimaknak nih thluachuah tampi a hmuhter kha tahchunhnak in chim.

¹¹ Brazil ah a ummi unau nu Selmira kong nih Pathian rian teimak tein ṭuannak cu khuasak ṭhatnak cung ah aa hngat lo ti kha a langhter. A luan cia kum kul lioah a vapa cu mifir nih meithal in an kah i a thi, cucaah fa pathum cawm awk a ngei. Suimilam tampi chung mi inn ah rian a ṭuan i mi an i tet tukmi mawṭawka in a tlung kal. A rian a tam nain caanhmaan hmaikal ṭuan khawh awkah a caan a suai. A hnu ah a fale pahnih zong hmaikal an ṭuan. Hitin a chim: “Kum tampi chungah, minung 20 leng Baibal ka cawnpiak hna i annih cu ka ‘innchungkhar’ mi bantuk an hung si. Atu tiang kan i daw hna i hawikom ṭha kan si. Mah cu tangka in cawk khawh lomi a si.” Rawlṭuan Uktu Bawi nih Selmira a teimaknak kha thluachuah a pek taktak.

12. Phungchimnak ah teimami kan si zeitindah langhter khawh a si?

¹² Na sining ruang ah phungchimnak ah tam naa tel khawh lo hmanh ah, hmual ngei deuh in phung chimthiam naa zuam kho. Zarh fate Rianṭuan Pumhnak ah na theihmi kha ṭha tein na hman ahcun phungchim na thiam deuh lai i chimning thar zong na hngalh lai. (2 Tim. 2:15) Cun a biapi deuh lomi na rian kha caan dang ah ṭuan asiloah ṭuan ti lonak thawng in Khrihfabu phungchimnak caan ah hmaan tein naa tel kho lai.—Kol. 4:5.

13. Teimami si peng awkah a herh bikmi cu zeidah a si?

¹³ Pathian kan dawtnak le a cung kan i lawmhnak nih teimami a kan siter kha philh hlah. (Salm 40:8) Jesuh chimmi bianabia chung pathumnak sal nih a bawipa kha a lungton a harmi le a tlari lomi in a hmuh i a ṭih. Cucaah a bawipa ngeihmi tangka kha karhter loin vawlei ah a phum. Cu bantuk in kan rian daithlan lo awkah rawlṭuan Uktu Bawi Jehovah he pehtlaihnak ṭha ngeih peng a herh. Duh nungmi Pathian ziaza, dawtnak, lungsaunak le zaangfahnak kha i cawn awk le ṭha tein ruah awkah a caan pe. Cuticun Pathian rian kha na si khawh chungin ṭuan na duh lai.—Luka 6:45; Fil. 1:9-11.

‘Nan Thian awk a Si’

14. Rawlṭuantu si a duhmi nih zei a biapimi dah a tlinh awk a si?

¹⁴ Pathian nih vawlei cung a salle zeitindah um hna seh ti a duhmi kha lamkaltu Piter nih Hebru Baibal chung bia la in hitin a chim: “Nannih an kotu hna Pathian cu a thian bantuk in nannih zong thiang tein nung ve u. Cathiang nih, ‘Keimah ka thian caah nannih zong nan thian ve awk a si,’ a ti.” (1 Pit. 1:15, 16; Lev. 19:2; Deut. 18:13) Mah nih rawlṭuantu hna cu ziaza lei le thlarau lei ah thian a herh kha a langhter khun. Mah a biapimi thil tlinh khawh awkah zeidah kan tuah lai? Pathian bia, biatak thianternak kha kan cohlan lai.

15. Pathian bia, biatak cu zei ṭhawnnak dah a ngeih?

¹⁵ Pathian bia kha thianter khawhnak a ngeimi ti he a tahchunh. Lamkaltu Paul nih chiti thuhmi Khrihfa hna kha Khrih nupi ding a thiangmi hna he a tahchunh i annih cu Pathian mit ah an thiang tiah a ṭial. Khrih nih annih kha Pathian bia ‘ti in thiang tein a ṭawl hna i soi awk zeihmanh um lo a siter hna.’ (Efe. 5:25-27) A hmasa zong ah Jesuh nih Pathian bia thianter khawhnak a ngeih kha a rak chim. Jesuh nih a zultu hna kha “nannih cu kan chimhmi hna bia thawngin nan thiang cang” tiah a ti hna. (Johan 15:3) Cucaah Pathian bia, biatak cu ziaza lei le thlarau lei ah thianter khawhnak a ngei. Pathian biatak thianternak kan cohlan lawng ah kan biaknak kha Pathian nih a cohlan lai.

16. Thlarau lei le ziaza lei ah zeitindah thian peng khawh a si?

¹⁶ Cucaah rawlṭuantu kan si khawh nakhnga ziaza lei le thlarau lei thurhnawmhnak vialte kan hlawt hmasa a hau. Mah rian ṭuan khawh peng awkah thlarau lei le ziaza lei Jehovah nunphung zulhnak ah zohchunhawk ṭha kan si a herh. (1 Piter 1:14-16 rel.) Pumsa lei thiannak biapi ah kan chiah zungzal bantuk in Pathian bia, biatak thianternak kha kan cohlan zungzal awk a si. Cu ah Baibal rel le i pumh aa tel. Cun Pathian ralrin peknak lungtak in zulh i zuam zong aa tel. Cuti tuahnak in sual tuah duhnak lungthin le vawlei thurhnawmhnak hna kha kan doh khawh lai. (Salm 119:9; Jeim 1:21-25) Pathian bia, biatak nih sualnak ngan hmanh a “thianh” khawh ti hngalh cu hnemtu a va si dah!—1 Kor. 6:9-11.

17. A thiangmi si zungzal awkah zei Baibal cawnpiaknak dah zulh awk a si?

¹⁷ Pathian bia, biatak thianternak kha lungtho tein na cohlang maw? Tahchunhnak ah, hi vawlei nuamhsaihnak kong ah ralrin pek na si tikah zeitindah na lehrulh? (Salm 101:3) Zumhnak aa khatlomi sianginn kai ṭi hawi le rianṭuan ṭi hawi he i komh tuknak kha na hrial maw? (1 Kor. 15:33) Jehovah mit ah a thiang lo an siter khomi na derthawmnak tei awkah fakpi in naa zuam maw? (Kol. 3:5) Nainganzi ah i telnak kha na hrial maw? Cun phun ṭanhnak tha a pemi lentecelh zuamnak hna tah na hrial maw?—Jeim 4:4.

18. Thlarau lei le ziaza lei thiannak nih rawl ṭuannak ah thei a tlaimi si awkah zeitindah a kan bawmh?

¹⁸ Cu kong ah zumhawktlak na si ahcun ṭhatnak tampi na hmu lai. Jesuh nih chiti thuhmi a zultu hna kha mitsur nge he tahchunh in hitin a chim: “Thei a tlai lomi ka nge vialte kha [ka Pa nih] a tan dih hna i thei a tlaimi nge vialte kha an tlai chinchin nakhnga a thianh hna.” (Johan 15:2) Baibal biatak thianhnak na cohlan ahcun thei tam deuh na tlai kho lai.

Atu le Hmailei ah Hmuh laimi Thluachuah

19. Rawl ṭuannak ah aa zuammi Jesuh zultu pawl cu zeitindah thluachuah an hmuh?

¹⁹ Jesuh cawnpiaknak a zulmi zumhawktlak zultu hna cu “vawlei cung khuazakip ah” tehtekhangtu si ding ah C.E. 33 Pentekos ni ah thiang thlarau in ṭhawnnak pek an si. (Lam. 1:8) Annih cu a hnu ah uktu bu le missionary le khualtlawng rianṭuantu an hung si i “van rang tang khuazakip ah sermi thil vialte” sin thawngṭha chimnak ah a biapi in an i tel. (Kol. 1:23) Anmah thengte thluachuah tampi an hmu i midang zong an lawmhter hna.

20. (a) Zei tuah awk dah bia na khiah? (b) Thlarau rawl ṭuannak ah tling tein naa telnak thawng in zei thluachuah dah na hmuh?

²⁰ Toidornak, teimaknak le Pathian phunglam zulhnak nih atu ṭuan liomi thlarau rawl ṭuannak ah tling te le hmualngei tein i tel awk a kan bawmh lai. Hi vawlei thilri le nuamhsaihnak a kawlmi hna cu lungfah le awlokchong in an um lio ah kannih tu cu lunglawmhnak le lungtlinnak taktak kan hmu. (Salm 126:6) A biapi bik cu ‘bawipa rian kan ṭuanmi cu a lak a si’ lai lo ti kan hngalhmi hi a si. (1 Kor. 15:58) Rawlṭuan Uktu Bawi, Jehovah Pathian nih a rian kan ṭuan ruang le dawtnak kan langhter ruang ah thluachuah a kan pek zungzal lai.—Heb. 6:10-12.

[A Tanglei Fianternak]

Naa Cinken Maw?

Rawl ṭuannak rian ah tling tein tel awk naa zuam lio ah-

• toidornak ngeih zeicah a biapit?

• teimaknak zeitindah ngeih peng khawh a si?

• thlarau lei le ziaza lei thian zeicah a biapit?

[Cahmai 17 Hmanthlak]

Toidornak nih Pennak biapi chiah khawh awkah nunning sawhsawh tein nun awk a kan bawmh