Thawngthanhtu Pawl Biahalnak

◼ Mi pakhatkhat kha bupi cauk pek awk a si le si lo zeitindah kan hngalh khawh lai?

A bik in ruah awk cu biatak hngalh duhnak a ngei maw ngei lo ti a si. Hngalh duhnak a ngeih a langhter ahcun mekazin pahnih, brochure pakhat, cauk pakhat asiloah cauk dang pek khawh a si. Vawlei pumpi rianṭuannak ca thawhlawm tlawmte lawng a pek khawh lai asiloah a pe kho lai lo ti kan hngalh hmanh ah cauk pek khawh a si. (Job 34:19; Biat. 22:17) Asinain, hngalh duhnak a ngei lomi tu cu man a ngeimi kan cauk kha pek awk a si lo.—Matt. 7:6.

Inn-ngeitu nih hngalh duhnak a ngeih kha zeitindah kan hngalh khawh lai? Ṭha tein bia a kan ruah ahcun hngalh duhnak a ngei tinak a si. Kan chimmi ṭha tein a ngaih, biahalnak a kan leh le a ruahnak a chim ahcun biaruahnak ah aa tel ve tinak a si. Baibal kan rel tikah a zoh ve ahcun Baibal a upat tinak a si. A caan ah inn-ngeitu kha cauk rel a duh le duh lo hal ah a ṭha. Hngalh duhnak an ngeih le ngeih lo hngalh awkah thawngthanhtu nih thleidan thiamnak ngeih kan i zuam a hau. Tahchunhnak ah, lamcung phung kan chim tikah kan pawng ah a kalmi ahopaoh kha mekazin, brochure asiloah cauk pek cu aa tlak lo. Mi pakhat hngalh duhnak a ngeih le ngeih lo kan hngalh khawh lo ahcun cazual pek ah a ṭha.

Cu bantukin, thawngthanhtu nih cauk laknak ah cauk zeizat lak ding timi cu phungchimnak ah zeizat dah mi a pek khawh timi cungah aa hngat awk a si, thawhlawm zeizat dah a pek khawh timi cungah aa hngat lo. Thawhlawm cu cauk caah pekmi si loin, vawlei pumpi phungchimnak rian phun zakip caah pekmi a si. Kan ngeihmi tangka cu zeizat a si hmanh ah, bupi cauk kan sunsaknak nih kan ngeihmi chung in a hleivuang si loin kan ngeihmi vialte kha Pennak rianṭuannak caah siang ngai in pek awk a kan forh lai. (Mar. 12:41-44; 2 Kor. 9:7) Cun cauk kha kan herhmi zat lawng lak awk a kan forh lai. Cu tikah cauk ca a dihmi tangka a tlo lai.

[Cahmai 2nak i rinli kulh]

Hngalh duhnak an ngeih le ngeih lo hngalh awkah thawngthanhtu nih thleidan thiamnak ngeih kan i zuam a hau