Baibal Hrambunhmi Cauk Hna Pekṭhenh Tikah Thleidan Khawhnak Ngei

Jesuh nih “man pek loin nan hmuh i man loin va pe ve hna u” tiah a kan cawnpiak. (Matt. 10:8) Baibal asiloah Baibal hrambunh in chuahmi cauk hna kha man loin kan pekṭhenh hnanak thawngin mah a fiangmi lamhruainak kha kan zulh. (2 Kor. 2:17) Asinain mah cauk hna ah Baibal chung i a sunglawimi biatak kong aa tel. Thazaang le tangka tampi dih in mah cauk hna kha chuahmi a si i vawleicung pumpi ah a ummi Khrihfabu hna sinah kuat a si. Cucaah kan herh zat lawng kan i lak awk a si.

Zapi sin phungchimnak a si hmanhah cauk na pekṭhenh hna tikah thleidan khawhnak ngei. Cutin tuah a herh. (Matt. 7:6) Aa chawkmi hna kha cauk tampi pek canah hngalh duhnak an ngei taktak maw ti hngalh awkah anmah he biaruah awkah i zuam. A tanglei i rinli kulh ah aa telmi biahalnak pakhatkhat kha “aw” tiah na phi kho lai maw? Hngalh duhnak a ngei taktakmi a si le si lo naa fian lo ahcun cazual lawng kha pe. Mekazin asiloah a dang cauk pakhatkhat kha rel ka duh tiah a ti ahcun lungtho tein pe.—Ptb. 3:27, 28.