Thawngṭha Karhternak ah Cazual kha Hmang
1. Pathian miphun nih cazual kha zeitindah an rak hman?
1 Thawngṭha karhternak ah Jehovah miphun nih Baibal ah hram aa bunhmi cazual an hmannak hi a sau cang. 1880 ah, C.T. Russell le a hawile nih Baibal Siangngakchia Cazual kha an rak chuah, mah cazual kha zapi sin phawtzamh awkah Vennak Innsang a reltu pawl kha an rak pek hna. Cazual cu a biapi tukmi in an hmuh caah 1884 ah C.T. Russell nih Pennak thawngṭha a karh nakhnga a miak a la lomi upadi hnatlak pimi bu a dirh tikah mah bu min kha “cazual” timi biafang telh chih in Zion Vennak Innsang Cazual Bu tiah a rak sak. Atu ah cun Pennsylvania i Vennak Innsang Baibal le Cazual Bu tiah auh a si. 1918 ah, cazual nuai 300 leng kha Baibal Siangngakchia pawl nih mi an pek hna. Cazual cu atu tiang thawngṭha chimnak caah hmual a ngeimi hriamnam a si.
2. Zeicah cazual cu hmual a ngeih?
2 Hmual a Ngeihnak a Ruang: Cazual cu a rong phunphun a um i mit a hlang. Tawite le fiangte in aa ṭial caah lung a la i a kong tete mi a hngalhter. Mekazin asiloah cauk aa lak duh lomi hna hmanh nih lak an duh. Thawngthanhtu a thar le ngakchia ca hmanh ah mi pek a fawi. Mah lengah cazual cu a hmet caah put a fawi.
3. Cazual man a ngeih a langhtermi pumpak hmuhtonnak asiloah bupi cauk ah aa ṭialmi hmuhtonnak chim.
3 Mi tampi cu cazual thawngin biatak an hun hngalh. Tahchunhnak ah, Haiti i a ummi nu pakhat nih lam cungah cazual kha a hmuh. A char i a rel hnuah “biatak ka hmuh cang” tiah a rak ti. A hnuah biakinn ah aa pum, Baibal a cawng i tipil a ing, mah vialte cu cazual ah aa ṭialmi Pathian Bia ruangah a si.
4. Cazual mi kan pek hna tikah kan i tinhmi cu zeidah a si?
4 Innkhat hnu Innkhat: Cazual cu phungchimnak ah hmual a ngeimi a si caah November thla thawk in cazual mi pekṭhenh thla a um lengmang lai. Kan i tinhmi cu cazual hei pek menmen si lo in biaruahnak thawknak caah hman kha a si. A hmasa bik len lio asiloah lennolh tuah tikah hngalh chap an duh ahcun Baibal Cawnpiakmi cauk asiloah Baibal cawnnak cauk dang hmang in Baibal cawn ning hmuhsak khawh a si. Cazual kha innkhat hnu innkhat ah zeitindah mi pek khawh a si? Cazual a phunphun a um caah mi kan pek dingmi cazual ah aa ṭialmi kha ṭha tein hngalh a hau.
5. Innkhat hnu innkhat kal tikah cazual kha zeitindah mi pek khawh a si?
5 Kan chimning cu sang le kan hmanmi cazual he aa tlakmi a si a hau. Inn-ngeitu kha cazual pe in biaruahnak kan thawk khawh. Mi lung a lami a phaw nih an lung a thawhter men hna lai. Asiloah cazual tam nawn kha hmuhsak in a duhmi kan thimter khawh. Sang i a ummi hna nih innka hun an ṭih ahcun, cazual a phaw kha inn-ngeitu nih a hmuh khawh nakhnga kan piah khawh asiloah innka tang in cazual pakhat ka hrolh kho lai maw tiah hal in a ruahnak hngalh kan duh kha kan chimh khawh. Cazual biatlangpi cu biahalnak a si ahcun mah biahalnak he aa tlaiin a ruahnak kan hal khawh. Asiloah inn-ngeitu lung a thawhter hngami le biaruahnak a kan thawkter kho hngami biahalnak kanmah tein kan hal khawh. Mah hnuah cazual i a ummi a kong pakhat kha inn-ngeitu he relṭi khawh a si, cun biahalnak a phanh tikah dir ta in inn-ngeitu kha a ruahnak hal khawh a si. A biapi bikmi Baibal cang pawl kha Baibal in rel khawh a si. A kong cheukhat i ruah hnuah donghter in lennolh tuah awk ṭha tein timh ding a si. Inn ah mi an um lo tikah bupi ca nan chiahtak tawn a si ahcun a lengmi nih fawi tein an hmuh khawh lonak hmun ah cazual kha chiah ding a si.
6. Lam cung phungchimnak ah cazual kha zeitindah hman khawh a si?
6 Lam Cung Phungchimnak: Lam cung phungchimnak ah cazual na hmang bal maw? Aa chawkmi cheukhat cu an i hnawhnam i biaruah awkah dir an duh lo. Annih cu biatak hngalh duhnak an ngeih le ngeih lo hngalh a har. An rel lai le rel lai lo kan hngalh lo caah hmanung bik chuahmi mekazin si lo in cazual tu pek awk a si. Cazual a phaw cu lung a la i a ca a tawi caah mi nih an i manh caante ah rel an duh ko lai. Mi cu an i hnawhnam lo ahcun cazual i a ummi a kong cheukhat kha i ruahṭi khawh a si.
7. Tonsaphak phungchimnak ah cazual zeitindah hman ding a si ti a langhtermi hmuhtonnak kha chim.
7 Tonsaphak Phungchimnak: Cazual in tonsaphak phungchim cu a fawi. Unaupa pakhat cu leng a chuah fate a zal ah cazual tlawmpal aa sanh peng. Dawr a zuartu ti bantuk pakhatkhat he an i ton tikah rel awk pakhat kaan pek lai tiah a ti hna i cazual kha a pek hna. Nuva tuahkhat cu New York City i an va tlawn tikah miphun zakip he kan i tong lai ti an hngalh. Cucaah Miphun Vialte timi cauk le holh phunphun in cazual tam nawn kha an i put. Lam pawng ah thil a zuarmi, pangpar dum asiloah rawl dawr ah a ṭhumi pakhatkhat nih ramdang holh in bia a chimmi an theih tikah an holh in chuahmi cazual kha an pek.
8. Cazual cu zeiti lam in dah thlaici he aa lawh?
8 “Thlaici Tuh”: Cazual cu thlaici he aa lo. Lothlopa nih zei thlaici dah a keuh lai ti a hngalh lo caah thlaici kha tampi a vorh. Phungchimtu 11:6 nih hitin a ti: “Zinglei ah thlaici tuh ko, zanlei zongah ngol hlah; zeicahtiah an dihlak in an ṭhat lai le an ṭhat lai lo kha na hngal lo i a zei kha dah a ṭha deuh lai ti zong kha na hngal lo.” Cucaah, phungchimnak ah hmual a ngei ngaimi mah hriamnam hmang in ‘hngalhnak kha vorh’ hna u sih.—Ptb. 15:7, NW.
[Cahmai 3 i a tawinak in langhternak]
Cazual cu phungchimnak ah hmual a ngeimi a si caah November thla thawk in cazual mi pekṭhenh thla a um lengmang lai.