Cazual Thar Hna i aa Thleidangmi aa Ṭial Ning
1. Phungchimnak ah hman khawh a simi ṭialning thar in an chuahmi hna cu zeidah an si?
1 2014, ‘Biatak cu Pathian Bia kha a Si!’ timi Special Civui ah cazual thar panga chuah a si. Cu lengah “Mithi hi an Tho Ṭhan Taktak lai Maw?” timi Pennak Thawngṭha No. 38 zong hi cazual thar ah aa tel vemi a si. Mah cazual thar cu a paruk ningin aa ṭial ning aa thleidang ngai. Zeicah aa thleidang khun in chuah a si? Innkhat hnu innkhat phungchimnak ah mah cazual i aa ṭial ning kha zeitindah kan fianter khawh?
2. Zei timhnak he dah ṭial ning thar in an chuah?
2 Zeicah Ṭial Ning Thar a Si: Phungchimnak ah hmual ngei tein chim kan duh a si ahcun a kong pali kan hman a herh: (1) Biaruahnak thawk khawh awkah inn-ngeitu i a hmuhnak kha hal. (2) Baibal relpiak. (3) Inn-ngeitu rel awkah cauk pe. (4) A hnu na len ṭhan tik i chim awkah biahalnak pakhat in tuah. Cazual ṭial ning thar hna nih mah a kong pali kha fawi tein hman khawh awkah an bawmh lai.
3. Phungchimnak ah cazual thar kha zeitindah kan pekṭhenh khawh hna?
3 Hman Khawh Ning: (1) Bia nan i chawnh dih hnuah inn-ngeitu kha cazual a phaw i hngalh duh awk ngai a simi biahalnak hna kha hmuhsak law zeitindah na ruah tiah hal. (2) Cazual kha kau law, “Baibal Chimmi” timi kha i ruah u. A si thiam ahcun Baibal cang pawl kha Baibal in relpiak. Inn-ngeitu nih caan a ngeih ahcun, “Mah in Zei Ṭhatnak Dah na Hmuh Khawh” timi kong kha i ruah u. (3) Cazual kha pe law nan i ruah rih lomi kong kha rel awkah inn-ngeitu kha tha pe. (4) Na kal hlanah, “Mah hi Ruathmanh” timi tang i biahalnak hna kha hmuhsak law Baibal a phi kha a hnuah i ruah ṭhan awkah tim.
4. Na len ṭhan tikah cazual thar hna kha zeitindah na hman khawh?
4 Mah nih lennolh tuah awkah a fawiter lai. A hnu bik na len lio i bia na halmi a phi kha cazual a hnulei i a ummi langhtermi Baibal cang hna kha relpiak in na chimh khawh. Na kal hlanah inn-ngeitu kha Thawngṭha timi brochure hmanthlak kha hmuhsak. Cazual chung i a kong lam he aa tlai-in tling tein a fiantermi mah brochure chung i ṭhen kha hmuhsak law pe. Inn-ngeitu nih a cohlan ahcun a hnuah len ṭhan in i ruah ṭhan dingah i tim. Cutin na tuah ahcun Baibal cawnpiaknak na thawk khawh lai. Asiloah brochure kha pek na duh lo ahcun cazual dang pakhat kha pe law a hnu na len ṭhan tikah inn-ngeitu he i ruahṭi dingin i tim.
5. Phungchimnak ah cazual hman cu zeicah a ṭhat?
5 Phungchimnak ah cazual kan hmannak hi kum 130 leng a si cang. A hmet ngan le an ṭial ning hna cu aa lo lo nain cazual hna cu phungchimnak ah man a ngei tukmi hriamnam an si. Vawleicung pumpi ah Baibal hngalhnak a karh peng khawh nakhnga mah ṭial ning thar in an chuahmi cazual hna hi ṭha tein hmang hna u sih.—Ptb. 15:7a.