CAWN AWK CAPAR 23
HLA 2 Na Min Cu Jehovah A Si
Jehovah Min Cu Kan Caah A Biapi
“Ka tehte cu nanmah hi nan si tiah BAWIPA nih a ti.”—ISA. 43:10.
A BIK IN LANGHTERMI
Jehovah min thianter awkah kan tuah dingmi kong kha kan hngalh lai.
1-2. Jehovah min cu Jesuh caah a biapi ti kha zeitindah kan hngalh khawh?
JEHOVAH min cu Jesuh caah a biapi bikmi a si. Anih cu a Pa min a bik in a thiantertu a si. A hmasa capar nih a langhter bantuk in Jesuh nih Jehovah min thianter awkah thih hmanh a ngamh. (Mar. 14:36; Heb. 10:7-9) Kum Thongkhat Uknak a dih hnuah Jesuh nih a nawlngeihnak vialte kha a Pa sinah lungtho tein a pek ṭhan lai. Mah nih Jehovah min kha a thianter lai. (1 Kor. 15:26-28) Jesuh nih a Pa a dawt tuk ti kha a min a sunsaknak nih fiang tein a langhter.
2 Jesuh cu a Pa min in vawlei ah a ra. (Joh. 5:43; 12:13) Zultu pawl kha a Pa min a hngalhter hna. (Joh. 17:6, 26) Jehovah min in a cawnpiak hna i khuaruahhar thil tampi a tuah. (Joh. 10:25) Cun a zultu pawl caah thla a cam i “na min thawng in” zohkhenh ko hna tiah Jehovah kha a rak nawl. (Joh. 17:11) Jesuh nih Jehovah min kha a biapi bik ah a chiah. Cu a si ah Jehovah min a hngal lo i a hmang lomi pakhat nih Khrih zultu taktak ka si tiah zeitindah a chimh khawh lai?
3. Hi capar ah zei kong dah kan i ruah hna lai?
3 A hmaanmi Khrihfa hna nih Jesuh keneh kha naih tein kan zulh i Jehovah min kha kan sunsak. (1 Pet. 2:21) Hi capar ah “Pennak kong thawngṭha” a chimmi hna kha Jehovah nih zeicah a min i laknak nawl a pek hna timi kong kan i ruah hna lai. (Matt. 24:14) Cun pakhat cio kan caah Jehovah min cu zeitluk in dah a biapit timi kong zong kan i ruah hna lai.
‘A Min Caah Mi A Thim Hna’
4. (a) Van a kai hlanah Jesuh nih a zultu pawl kha zei bia dah a chimh hna? (b) Zei biahalnak dah kan i ruah hna lai?
4 Jesuh nih van a kai hlanah a zultu pawl kha hitin a ti hna: “Thiang thlarau nan cung i a tlun tikah ṭhawnnak nan hmu lai i Jerusalem, Judea ram vialte, Samaria ram le vawleicung pumpi ah ka kong kha tehte nan khaan lai.” (Lam. 1:8) Cucaah thawngṭha kha Israel ram lawng ah si loin hmun kip ah an chim lai. Cuticun vawleicung pumpi i mi vialte nih Jesuh zultu si awkah caanṭha an hmu lai. (Matt. 28:19, 20) Asinain Jesuh nih “Ka kong kha tehte nan khaan lai” tiah a ti. Cu a si ah zultu thar hna nih Jesuh kong lawng maw tehte an khaan, Jehovah kong tah hngalh le tehte khaan a herh maw? Lamkaltu dal 15 i a langhtermi thil sining nih a phi hngalh awkah a kan bawmh lai.
5. Jerusalem i lamkaltu hna le upa hna nih Jehovah min hngalh a biapitnak kha zeitindah an langhter? (Hmanthlak zong zoh.)
5 AD 49 ah Jerusalem khua i lamkaltu hna le upa hna cu an i pum. Mah ah cuarpar tan lomi Jentail mi hna nih Khrihfa in cohlan an si nakhnga zeidah an tuah a herh timi kong an i ruah. A donghnak ah Jesuh a nau Jeim nih hitin a ti: “Pathian nih miphun dang kha lungthin a pek hna i a min caah an lak in mi a thim hnanak kong kha [Peter] nih fiang tein a chim cang.” Jeim nih aho min kong dah a chim duhmi a si? Profet Amos bia kha cherhchan in hitin a ti chap: “A taangmi hna nih ka min in auh a simi miphun dang hna he keimah Jehovah kha lungtho tein an ka kawl lai. Hi bia hi . . . keimah Jehovah nih ka chim.” (Lam. 15:14-18) Zultu thar hna nih Jehovah kong kha an cawn a hau i ‘a min in auh’ an si lai. Pathian min putu an si lai i mah min in hngalh an si lai tinak a si.
Kumzabu pakhatnak uktu bu meeting ah Khrihfa hna cu Pathian min caah miphun pakhat kan si awk a si ti kha an hun hngalhthiam (Catlangbu 5 zoh)
6-7. (a) Jesuh cu zeicah vawlei ah a rat? (b) A bik in a ratnak a ruang cu zeidah a si?
6 Jesuh min cu “Jehovah Cu Khamhtu A Si” timi sullam a ngei. Jehovah nih zumhnak a ngeimi vialte khamh awkah Jesuh kha a hman. Jesuh cu minung khamh awkah vawlei ah a ra i a nunnak kha a pek. (Matt. 20:28) Jesuh tlanhnak man thawng in minung nih khamhnak le zungzal nunnak kan hmu kho.—Joh. 3:16.
7 Zeicah minung nih tlanhnak man kan herh? Eden dum ah a cangmi thil ruang ah a si. A hmasa capar ah a langhter bantuk in Adam le Evi nih Jehovah kha an ralchanh i zungzal nunnak kha an rak sung. (Gen. 3:6, 24) Cucaah Jesuh cu Adam le Evi tefa khamh awkah vawlei ah a ra. Asinain mah nakin a biapi deuhmi a ruang pakhat a um. Eden dum ah Satan nih Jehovah min a thangchiat ti kha i cinken. (Gen. 3:4, 5) Mah ruang ah Jehovah min cu thianter hrimhrim a hau. Jehovah min thianter a si tikah minung cu zungzal in khamh an si lai. Jesuh cu Jehovah min thianter awkah aa tlak bikmi a si. Zeicahtiah anih cu Jehovah min in a ra i a duhnak ning in a nun caah a si.
Jehovah min a hngal lo i a hmang lomi pakhat nih Khrih zultu taktak ka si tiah zeitindah a chimh khawh?
8. Jesuh zultu vialte nih zeidah an hngalh a hau?
8 Judah mi an si ah, Jentail mi an si ah Jesuh a zummi vialte nih Jehovah Pathian kha khamhnak Hrampi in an cohlan a hau lai. (Joh. 17:3) Mah leng ah Jesuh bantuk in Jehovah min putu an si lai. Mah min thianter a biapitnak kong zong an hngalh a hau lai. Cutin an tuah lawng ah khamh an si lai. (Lam. 2:21, 22) Cucaah Khrihfa hna nih Jehovah kong le Jesuh kong kha ṭha tein an cawn a hau. Jesuh nih Johan 17 ah aa ṭialmi a thlacamnak kha hitin a donghter: “Na min cu annih kha ka hngalhter cang hna i ka hngalhter lengmang rih hna lai. Mah lawng ah ka cung ah dawtnak na langhter bantuk in midang cung ah dawtnak an langhter khawh ve lai i anmah he lungthin khat tein ka um kho lai.”—Joh. 17:26.
“Ka Tehte Cu Nanmah Nan Si”
9. Jesuh zultu si khawh awkah zeidah kan tuah a hau?
9 Kan i ruah cang bantuk in Jesuh zultu si khawh awkah Jehovah min kan thianter a hau. (Matt. 6:9, 10) Min dang vialte nakin Jehovah min biapi bik ah kan chiah ti kha tuahsernak in kan langhter a hau. Cu a si ah Jehovah min thianter awk le Satan chimmi vialte cu lihbia a si ti langhter awkah zeidah kan tuah khawh?
10. Isaiah dal 42 in 44 ah zei kong dah a langhter? (Isaiah 43:9; 44:7-9) (Hmanthlak zong zoh.)
10 Isaiah dal 42 in 44 ah Jehovah min thianter awkah kan tuah khawhmi kong kha a langhter. Mah dal hna ah pathian ka si tiah aa timi paoh kha a hmaanmi an si maw, si lo ti langhter awkah Jehovah nih a zuamcawh hna. Biaceihnak zung i chuahpimi bantuk in cutin a langhter kho dingmi tehte pakhat tal an um maw tiah a hal hna. Asinain ahohmanh nih an langhter kho lo!—Isaiah 43:9; 44:7-9 rel.
Kan biachim le kan tuahsernak in Jehovah tehte kan si kha kan langhter (Catlangbu 10-11 zoh)
11. Isaiah 43:10-12 ning in Jehovah nih a mi pawl sinah zei bia dah a chim?
11 Isaiah 43:10-12 rel. Jehovah nih a mi pawl kha hitin a ti hna: “Ka tehte cu nanmah hi nan si, . . . keimah lawnglawng hi Pathian cu ka si.” Cun “Pathian dang aho tal an um maw?” tiah a hal hna. (Isa. 44:8) Cucaah kannih cu mah biahalnak leh awkah tinvo sung kan hmu. Kan biachim le kan tuahsernak in Jehovah lawnglawng a hmaanmi Pathian a si ti le a min cu min dang vialte nakin a lianngan bikmi a si ti kha tehte kan khaan. Satan nih zei bantuk in a kan hneksak hmanh ah Jehovah kan dawt le a cung ah zumhawktlak tein kan um kha kan nunning in kan langhter. Cuticun Jehovah min kha kan thianter khawh.
12. Isaiah 40:3, 5 i chimchungbia cu zeitindah a tlin?
12 Jehovah min thianternak ah kan i telmi cu Jesuh Khrih kan i zohchunhmi a si. Mi pakhat nih ‘BAWIPA caah lam a sialpiak’ lai tiah Isaiah nih a chimchung. (Isa. 40:3) Mah chimchungbia cu zeitindah a tlin? Tipil Petu Johan nih Jehovah min in a ra i Jehovah min in bia a chimtu Jesuh caah lam a sialpiaknak thawng in a tling. (Matt. 3:3; Mar. 1:2-4; Luka 3:3-6) Isaiah nih “BAWIPA sunparnak cu a lang lai” ti zong in a ti. (Isa. 40:5) Zeitindah a tlin? Vawlei a rat tikah Jesuh nih a Pa kha tling tein aa zohchunh caah Jehovah theng vawlei ah a ratmi bantuk a si.—Joh. 12:45.
13. Jesuh kha zeitindah kan i zohchunh khawh?
13 Jesuh bantuk in kannih zong Jehovah tehte kan si. Jehovah min putu kan si i a tuahmi khuaruahhar thil kong zong mikip sinah kan chim. Asinain Jehovah kong ṭha tein tehte khaan khawh awkah Jesuh nih a Pa min a thianter ning kong zong kan hngalhter hna a hau. (Lam. 1:8) Jesuh cu Jehovah kong a ṭha bik in Tehte a khang khotu a si caah amah kha kan i zohchunh. (Biat. 1:5) Jehovah min cu pakhat cio kan caah zei sullam dah a ngeih awk si?
Jehovah Min Cu Kan Caah A Biapi
14. Korin Kuatkhatnak 1:31 ning in Jehovah min kha zeitindah kan hmuh?
14 Jehovah min ruang ah kan i uangthlar. (1 Korin 1:31 rel.) A min ruang ah kan i uanthlar tikah Jehovah cu aa lawm. (Jer. 9:23, 24; 2 Kor. 10:17) “Jehovah ah i porhlaw” timi cu Jehovah kha kan Pathian in i uanthlarpi kha a si. A min upatnak pek le thianter kha tinvo sung in kan hmuh. Rianṭuanṭi hawi, sianginn kaiṭi hawi, innpa le midang sinah Jehovah Tehte kan si ti chim kha zeitik hmanh ah kan i zahpi awk a si lo! Satan nih Jehovah min kha midang sinah chim hna hlah seh ti a kan duh. (Jer. 11:21; Biat. 12:17) Satan le a profet pawl nih Jehovah min kha philh hna seh ti zong an kan duh. (Jer. 23:26, 27) Asinain Jehovah min kan sunsaknak nih “chun nitlak in” amah thangṭhat awkah a kan forh.—Salm 5:11; 89:16.
15. Jehovah min auh timi cu zei sullam dah a si?
15 Jehovah min kha kan auh zungzal. (Rom 10:13, 14) Jehovah min auhnak ah Pathian pumpak min hngalhnak le hmannak lawng si loin mah nak tam deuh aa tel. Pathian kha a um taktakmi in kan hun hngalh caah kan i bochan i a sinah bawmhnak le lamhruainak zong kan hal. (Salm 20:7; 99:6; 116:4; 145:18) Mi sinah Jehovah min le a sining kong kha kan chim. Jehovah mithmai ṭha an hmuh khawh nakhnga sual ngaihchih awk le zumhnak langhter awk zong ah kan forh hna.—Isa. 12:4; Lam. 2:21, 38.
16. Satan cu lihchimtu a si kha zeitindah kan langhter khawh?
16 Jehovah min caah harnak kha lungtho tein kan in. (Jeim 5:10, 11) Harnak in buin Jehovah cung ah zumhawktlak tein kan ummi nih Satan cu lihchimtu a si ti kha a langhter. Job chan ah Satan nih Jehovah a biami hna kha hitin sual a puh hna: “Mi nih cun a ngeihmi vialte cu a nunnak caah cun a sian ko lai ta.” (Job 2:4) Mi nih thil sining a ṭhat lio caan lawng ah Jehovah an biakmi a si i harnak an ton ahcun an hlawt ko lai tiah Satan nih a ti. Zumhfekmi Job nih mah cu a hmaan lo ti kha a rak langhter. Kannih zong zei bantuk harnak kan ton hmanh ah Jehovah kha kan hlaw bal lo ti langhternak caanṭha kan ngei. Jehovah nih a kan zohkhenh zungzal lai ti kha kan zumh khawh. Zeicahtiah cutin a tuahnak thawng in a min nih sunparnak a hmuh lai caah a si.—Joh. 17:11.
17. Peter Kuatkhatnak 2:12 ning in Jehovah min kha a dang zeiti lam in dah sunparnak kan pek khawh rih?
17 Jehovah min cung ah upatnak kan langhter. (Ptb. 30:9; Jer. 7:8-11) Jehovah aiawhtu le a min putu kan si caah kan tuahsernak nih Jehovah min a ṭhatter khawh bantuk in a chiatter khawh ve. (1 Peter 2:12 rel.) Cucaah kan biachim le kan tuahsernak in Jehovah thangṭhat awkah kan si khawh chung in kan i zuam. Cuticun mitlinglo kan si ko nain Jehovah min kha sunparnak kan pek khawh.
18. Jehovah min cu kan caah a biapi ti kha zeiti lam in dah kan langhter khawh rih? (A tanglei fianternak zong zoh.)
18 Kanmah min ṭhatnak nakin Jehovah min ṭhatnak kha biapi deuh ah kan chiah. (Salm 138:2) Zeicah? Jehovah min kan sunsak caah kan pawngkam mi hna lakah kan min a chia kho men.a Jehovah min thangṭhat a si nakhnga Jesuh nih misual pakhat in thahnak kha lungtho tein a in. ‘Ningzahnak kha zei ah a rel lo’ i midang hmuh ning kha biapi tuk ah a chia lo. (Heb. 12:2-4) Pathian duhnak cung tu ah lungthin a pek.—Matt. 26:39.
19. Jehovah min kha zeitindah na hmuh, zeicah?
19 Jehovah a biami kan si ca le Jehovah Tehte Hna tiah auh kan si caah kan i uangthlar tuk. Cucaah zei bantuk nehsawhnak kan ton hmanh ah lungtho tein kan inkhawh. Jehovah min kha kan min ṭhatnak nakin biapi deuh ah kan chiah. Cucaah Satan nih zei bantuk harnak a kan pek hmanh ah Jehovah min kha thangṭhat peng hna u sih. Cutin kan tuah ahcun Jesuh nih Jehovah min kha biapi bik ah a chiah bantuk in kan chiah khawh ve lai.
HLA 10 Jehovah Kan Pathian Kha Thangṭhat U!
a A hawile pathum nih an thangchiat tikah zumhfekmi Job hmanh a lung a vaivuan. A fale le a ngeihmi thil vialte a sunghka ah “Job nih sualnak a tuah lo i Pathian cu a mawhchiat lo.” (Job 1:22; 2:10) Asinain thil ṭhalo na tuah tiah sual an phawt tikah a bia cu a hun “bultan.” Job nih Pathian min thianternak nakin amah min kilvennak kha biapi deuh ah a chiah.—Job 6:3; 13:4, 5; 32:2; 34:5.