Jehovah Cu Na Cung Ah A Lung A Tling Maw?

1. Zumhfekmi Jehovah salle cheukhat nih zeitindah an ruah khawh men?

JEHOVAH cu a miphun pawl cung ah a lung a tling ti hngalh cu zeitluk in dah hnemtu a si. Baibal nih hitin a ti: “Jehovah nih a miphun kha a dawt hna.” (Salm 149:4, NWT) Asinain a caan ah mi cheukhat nih ‘Jehovah cu kan cung ah a lung a tling taktak hnga maw?’ tiah an ruah caah an lung a dong. Baibal chan lio ah Jehovah a biami zumhfekmi tampi zong a caan ah cu bantuk ruahnak an ngei ve.—1 Sam. 1:6-10; Job 29:2, 4; Salm 51:11.

2. Ahote cung ah dah Jehovah cu a lung a tling?

² Baibal ah a tlinglomi minung nih Jehovah mithmai ṭha an hmuh khawh tiah fiang tein a langhter. Zeitindah a si khawh? Jesuh Khrih kan zumh kha kan langhter i tipil kan in a hau. (Johan 3:16) Mah cu kan sualnak kan i ngaichih i a duhnak tuah awkah Pathian sin ah bia kan i kam ti kha zapi hmai ah kan langhtermi a si. (Lam. 2:38; 3:19) Amah he a ṭhami pehtlaihnak ngeih awkah cutin kan tuah tikah Jehovah cu aa lawm tuk. Pumpeknak biakam ning in nun awkah kan si khawh chung in kan i zuam chung paoh cu Jehovah cu kan cung ah a lung a tling i a hawikom in a kan hmuh.—Salm 25:14.

3. Zei biahalnak dah kan i ruah hna lai?

³ Asinain mi cheukhat nih Pathian cu ka cung ah a lung a tling lo tiah zeicah an ruah khawh men? Jehovah nih kan cung ah a lung a tling ti kha zeitindah a langhter? Khrihfa pakhat nih Pathian cu a cung ah a lung a tling ti kha zeitindah a zumh khawh?

Mi Cheukhat Nih Jehovah Mithmai Ṭha Kan Hmu Lo Tiah An Ruahnak A Ruang

4-5. Man ka ngei lo tiah kan i ruah hmanh ah zeidah kan zumh khawh?

⁴ Kan lak ah tampi cu an ngakchia tein anmah le anmah man ka ngei lo tiah aa ruatmi an si. (Salm 88:15) Adrián timi unaupa nih hitin a ti: “Man a ngei lomi in kaa ruat peng. Ka ngakchia lioah ka chungkhar pawl Paradis ah an luh khawh nakhnga thla ka cammi kha kaa cinken rih. Asinain kei cu cuka ah um ding in kaa tlak lo tiah ka rak ruah.” Jehovah Tehte a si lomi chungkhar in a ṭhangmi Tony nih hitin a ti: “Ka nu le ka pa nih kan in dawt asiloah na caah kan i uangthlar tuk tiah an ka ti bal lo. Mah nih an lunglawmhter awkah zei hmanh ka tuah khawhmi a um lo timi ruahnak a ka ngeihter.”

⁵ Man ka ngei lo timi ruahnak kan ngeih caan ah Jehovah theng nih a sin ah a kan hnuh ti kha kan i cinken awk a si. (Johan 6:44) Kan sining ṭha hna kha a hmuh i kan kong kha kanmah nakin a hngalh deuh. (1 Sam. 16:7; 2 Chan. 6:30) Cucaah Pathian nih a sunglawimi nan si tiah a kan ti tikah kan zumh khawh.—1 Johan 3:19, 20.

6. Hlan i a rak tuahmi sualnak ruang ah lamkaltu Paul cu zeitindah a um?

⁶ Biatak an hngalh hlan i an rak tuahmi ruang ah kan lak i cheukhat cu ka sual tuk timi ruahnak an ngei. (1 Pet. 4:3) Zumhfek tein Jehovah a biami hna hmanh an derthawmnak kha an doh peng rih. Nangtah zeitin? A caan ah Jehovah nih a ka ngaithiam kho lai lo tiah na ruat maw? Cutin na ruah ahcun a dang zumhfekmi Jehovah salle zong cu bantuk ruahnak an ngei ve ti hngalhnak nih aan hnemh khawh. Tahchunhnak ah, lamkaltu Paul zong a tlin lonak kong a ruah tikah a lungre a thei tuk. (Rom 7:24) A taktak ti ahcun Paul cu a sualnak aa ngaichih i tipil a ing cangmi a si. Asinain amah le amah kha “lamkaltu vialte hna lakah a nauta bik” le a “sual bik” ka si tiah aa ti.—1 Kor. 15:9; 1 Tim. 1:15.

7. A hlan ah sualnak kan tuahmi kong he aa tlaiin zeidah kan i cinken awk a si?

⁷ Vancung kan Pa nih nan sualnak nan i ngaihchih ahcun kaan ngaihthiam hna lai tiah bia a kan kamh. (Salm 86:5) Cucaah kan rak tuahmi sualnak ruang ah kan i ngaihchih ahcun Jehovah nih a chim bantuk in a kan ngaihthiam lai ti kha kan zumh khawh.—Kol. 2:13.

8-9. Jehovah lung kan lawmhter kho bal lai lo timi ruahnak kha zeitindah kan hloh khawh?

⁸ Jehovah caah kan si khawh chung in ṭuan kan duh. Asinain mi cheukhat nih Pathian kan cung ah a lung a tlin nakhnga kan tuah kho bal lai lo tiah an ruah khawh men. Amanda timi unaunu nih hitin a ti: “Jehovah rian ka ṭuannak ah a hlan nakin i zuam deuh ka hau tiah ka ruah. Cucaah ka si khawh chung in tuah awkah kaa zuam. Kaa ruahchanmi ning in ka tuah khawh lo tikah ka lung a dong i Jehovah zong a lung a dong ve lai tiah ka ruah.”

⁹ Jehovah lunglawmhter awkah kan tuah kho bal lai lo timi ruahnak kha zeitindah kan hloh khawh? Jehovah cu a tlarimi a si ti kha i cinken. Kan tuah kho lo leng in a kan hal bal lo. Kan si khawh chung in a caah kan tuahmi paoh kha a sunsak. Lungthin dihlak in Jehovah rian a ṭuanmi Baibal ah an kong ṭialmi hna kong zong kha ruathmanh. Tahchunhnak ah, Paul kong kha ruathmanh. Kum tampi chung fakpi in rian aa zuam, meng thong tampi tiang khual a tlawng i khrihfabu tampi a rak dirh. Asinain a sining aa thleng i a hlan bantuk in phungchim rian a ṭuan khawh ti lo tikah Pathian cu a cung ah a lung a tling ti lo tinak a si maw? A si lo. A tuah khawhmi kha a tuah peng caah Jehovah nih thluachuah a pek. (Lam. 28:30, 31) Cu bantuk in Jehovah kan pek khawhmi cu a caan ah aa thleng kho men. Asinain Jehovah caah a biapimi cu kan lungput kha a si. Jehovah nih kan cung ah a lung a tling ti a langhter ning lam cheukhat kong kha i ruah hna u sih.

Jehovah Nih Kan Cung Ah A Lung A Tling Ti Kha Zeitindah A Langhter?

10. Jehovah nih kan cung ah a lung a tling ti a langhtermi bia kha zeitindah kan “theih” khawh? (Johan 16:27)

¹⁰ Baibal thawng in a langhter. Jehovah nih a miphun pawl kha a dawt hna i an cung ah a lung a tling ti kha a langhter. Baibal ah Jesuh a dawtnak le a cung ah a lung a tlinnak kong kha voihnih tiang a chim. (Matt. 3:17; 17:5) Nang tah Jehovah nih na cung ah ka lung a tling tiah aan timi kha theih na duh ve maw? Jehovah nih vancung in bia a kan ruah lo nain Baibal hmang in a kan chawnh. Jesuh nih a zultu pawl sin ah a chimmi bia kan rel tikah mah bia kha Jehovah nih kan sin ah a chimmi bia bantuk in kan “theih” khawh. (Johan 16:27 rel.) Jesuh nih a Pa sining kha tling tein a rak langhter. Cucaah Jesuh nih mitling lo an si nain zumhfek tein a ummi a zultu pawl cung ah a lung a tling ti a langhtermi bia kan rel tikah Jehovah nih mah bia kha kan sin ah a chim tiah kan mitthlam ah kan cuanter khawh.—Johan 15:9, 15.

11. Hneksaknak kan tonmi cu zeicah Jehovah mithmai ṭha kan sung tinak a si lo? (Jeim 1:12)

¹¹ A tuahsernak thawng in a langhter. Jehovah nih pumsalei in kan herhmi thil ti bantuk hna kha pek a kan duh tuk. Asinain Job cung ah a tuah bantuk in a caan ah kan cung ah thil ṭha lo kha umnak nawl a awnh. (Job 1:8-11) Hneksaknak kan ton tikah Pathian mithmai ṭha kan sung tinak a si lo. Mah can ah zeitluk in dah Jehovah kan dawt i kan i bochan ti langhternak caan ṭha tu kan ngei. (Jeim 1:12 rel.) Hneksaknak kan ton chung ah Jehovah nih zeitluk in dah a kan dawt i inkhawhnak ngeih awkah zeitindah a kan bawmh ti kha kan hmuh lai.

12. Dmitrii hmuhtonnak in zeidah kan cawn khawh?

¹² Asia ah a ummi unaupa Dmitrii kong kha ruathmanh. A rian a sung i thla tampi chung ah rian a hmu lo. Cucaah phungchim rianṭuannak ah tam deuh in aa telnak thawng in Jehovah aa bochannak kha langhter awkah bia a khiah. Asinain thla tampi hnu tiang rian a hmu hlei lo. A hnu ah fakpi in a zaw i a thawh hmanh a tho kho lo. Mah tikah va ṭha le pa ṭha ka si ti lo i Jehovah mithmai ṭha ka sung cang tiah a hun ruah. Zankhat cu a fanu nih “dai tein keimah kha ka bochan ko u. Cu ti nan um ahcun nan ṭhawng lai i him tein nan um lai” timi Isaiah 30:15 bia aa telmi ca pakhat kha a print. A pa sin ah a kal i “Ka pa, na ngaih a chiat caan ah mah ca caang hi phil hlah” tiah a ti i a pawng ah a chiah piak. Mah tikah Dmitrii nih a chungkhar pawl he rawl ei awk, hnipuan le umnak inn an ngeihmi cu Jehovah thawng in a si ti kha a hun hngalh. Hitin a ti: “Ka tuah a herhmi cu dai tein ka Pathian i bochan peng kha a si.” Nang zong cu bantuk hneksaknak na ton ahcun Jehovah nih aan zohkhenh lai i inkhawhnak ngeih awkah aan bawmh lai ti kha zum.

13. Kan cung ah a lung a tling ti langhter awkah Jehovah nih ahote dah a hman khawh hna, zeitindah?

¹³ Zumtukhat unau pawl thawng in a langhter. Jehovah nih kan cung ah a lung a tling ti langhter awkah unau pawl kha a hman hna. Tahchunhnak ah, kan herh lio caante ah kanmah tha pek ding in midang kha a forh men hna lai. Asia ah a ummi a lungre a thei tukmi unaunu pakhat cung ah cutin a rak cang. A rian a sung, cun amah zong fakpi in a zaw. Mah leng ah a vapa cu sualnak ngan a tuah caah Khrihfa upa in dinhter a si. Cucaah hitin a ti: “Cutin ka tonnak a ruang kha ka hngalthiam kho lo. Thil ṭhalo ka tuah sual caah Jehovah mithmai ṭha ka sung tiah ka ruah.” Unaunu nih a mithmai ṭha a hmu ti kha a zumh khawh nakhnga Jehovah sinah a nawl. Jehovah nih zeitindah a leh? Hitin a ti: “Khrihfa upa pawl nih bia an ka ruah i Jehovah nih a ka dawt ti kha an ka zumhter.” A hnu ah Jehovah sin ah bawmhnak a hal ṭhan. Hitin a ti: “Mah ni ah kan Khrihfabu i unau tampi sin in cakuat ka hmuh. An ka hnemhnak ca ka rel pah in Jehovah nih ka thlacamnak a ka theihpiak tiah ka ruah.” Jehovah nih zaangfahnak bia chim awkah midang a hman hnanak thawng in kan cung ah a lung a tling ti kha a langhter tawn.—Salm 10:17.

14. Jehovah nih kan cung ah a lung a tling ti a langhtermi a dang lamkhat cu zeidah a si?

¹⁴ Kan herh lio ah zumtukhat pawl nih ruahnak an kan cheuhnak thawng zong in Jehovah nih kan cung ah a lung a tling ti kha a langhter. Tahchunhnak ah, Jehovah nih kumzabu pakhatnak ah zumtukhat pawl sinah cakuat 14 ṭial ding in lamkaltu Paul kha a rak hman. Mah cakuat ah hlangfang tein a si ko nain dawtnak aa telmi ruahnak cheuhnak bia hna aa tel. Cu bantuk ruahnak cheuhnak telh awkah Jehovah nih Paul kha zeicah lamhruainak a pek? Jehovah cu Pa ṭha a si i “a dawtmi” a fale kha a chimhhrin hna. (Ptb. 3:11, 12) Cucaah mi pakhat nih Baibal in ruahnak aan cheuh ahcun Jehovah cu na cung ah a lung a dong tinak a si lo. Mah can ah Jehovah nih a kan dawt peng rih ti kha mah nih a langhter. (Heb. 12:6) Jehovah cu kan cung ah a lung a tling ti a langhtertu zei hna dah a um rih?

Jehovah Kan Cung Ah A Lung A Tling Ti Kan Hngalh Khawh Ning

15. Jehovah nih ahote dah a thiang thlarau a pek hna, mah nih zeicah zumhnak a kan ngeihter chin?

¹⁵ Jehovah nih a dawtmi hna kha thiang thlarau a pek hna. (Matt. 12:18) Hitin kan i hal kho: ‘Thiang thlarau nih a chuahtermi ziaza cheukhat kha ka langhter maw?’ Jehovah na hngalhka nakin atu ah na lung a sau deuh maw? Pathian thlarau nih a chuahtermi ziaza hna na langhter deuh ahcun Jehovah cu na cung ah a lung a tling ti kha na zumh khawh deuh lai.—“Pathian Thlarau Nih A Chuahtermi Ziaza Hna Cu . . . ” timi rinli kulh ah zoh.

16. Thawngṭha chimh awkah Jehovah nih ahote dah a hman hna, mah nih zeitindah aan umter? (1 Thesalon 2:4)

¹⁶ Jehovah nih a dawtmi hna kha thawngṭha chim awkah zumhnak he rian a pek hna. (1 Thesalon 2:4.) Jocelyn timi unaunu cu midang sin thawngṭha chimnak in ṭhathnemhnak a hmu. Nikhat cu, zingka a thawh tikah a lung a dong tuk. Hitin a ti: “Ka tha a um lo i man ka ngei lo tuk tiah kaa ruat. Asinain hmaikal ka rak ṭuan lio a si i mah ni cu phungchim ka kal tawn ni a si. Cucaah thla ka cam i phungchimnak ah ka kal.” Mah ni ah Jocelyn cu zaangfahnak a ngei i Baibal cawnpiaknak a cohlangmi Mary timi nu he an i tong. Thla tampi a rauh hnu ah Mary nih Jocelyn kha ka innka na kingh lio kha Pathian sin ah bawmhnak hal in thla ka cam lio a si tiah a ti. A hmuhtonnak kong a ruah ṭhan tikah Jocelyn nih hitin a ti: “Jehovah nih ‘na cung ah ka lung a tling’ tiah a ka timi bantuk in ka ruah.” Phung kan chim tikah mi kip in an cohlang lai lo ti cu a hmaan ko. Asinain midang sinah kan si khawh chung in thawngṭha kan chim tikah Jehovah cu aa lawm ti kha kan zumh khawh.

17. Tlanhnak man kong he aa tlaiin Vicky sinin zeidah na cawn khawh? (Salm 5:12)

¹⁷ Jehovah nih a dawtmi hna caah tlanhnak man kha a timh. (1 Tim. 2:5, 6) Asinain tlanhnak man kha kan zumh i tipil kan in cang hmanh ah Jehovah cu kan cung ah a lung a tling ti kha zumh awkah kan i harh rih ah tah zeitin? Kanmah kan ruahnak cu zumh khawh a si zungzal lo nain Jehovah tu cu zumh khawh a si ti kha philh hlah. Tlanhnak man a zummi hna cu Jehovah nih miding in a hmuh hna i thluachuah kaan pek hna lai tiah bia a kamh hna. (Salm 5:12 rel; Rom 3:26) Tlanhnak man kong ruahnak in Vicky cu ṭhathnemhnak a hmu. Nikhat cu, tlanhnak man kong thukpi in a ruah hnu ah mah hi a hun hngalhthiam: “Ka cung ah Jehovah cu a lung a sau tuk. . . . Asinain ‘ka tuahsernak cu na dawtnak tluk in a ngan lo. Na Fapa pekmi raithawinak nih ka sualnak a khup kho lai lo’ tiah a ti.” Tlanhnak man kong a ruahnak thawng in Vicky cu Jehovah nih a ka dawt timi ruahnak a hun ngei. Kannih zong tlanhnak man kong kan ruahnak thawng in Jehovah nih a kan dawt ti kha kan hun hngalh lai.

18. Vancung kan Pa nih a kan dawt peng ahcun zeidah kan zumh khawh?

¹⁸ Hi capar i kan cawnmi ning in zulh awkah kan i zuam hmanh ah kan lung a dongh caan le Jehovah nih a kan daw hnga maw tiah kan ruah caan a um kho rih men. Cutin na si ahcun Jehovah nih ‘amah a daw zungzalmi hna’ kha a dawt ve hna ti kha i cinken. (Jeim 1:12) Cucaah Jehovah kha naih peng law Jehovah nih na cung ah a lung a tling ti a langhter ning lam hna kha kawl peng. Jehovah cu “aho kan sin hmanh hin aa hlat lo” ti kha philh bal hlah.—Lam. 17:27.