Vale Hna Khrih Dawtnak I Zohchunh U!

JESUH nih vawlei a nunnak a dongh lai zan ah zumhawktlak a zultu pawl kha hitin a ti hna: “Nawlbia thar kan pek hna: pakhat le pakhat i daw u. Keimah nih kan dawt hna bantuk hin pakhat le pakhat nan i dawt awk a si. Pakhat le pakhat nan zawn nan i ruah ahcun mi vialte nih, hi hna hi amah a zultu kha an si, tiah an in hngalh hna lai.” (Johan 13:34, 35) A si, a hmaanmi Khrihfa hna cu pakhat le pakhat an i daw lai.

Lamkaltu Paul nih Khrihfa vale kha dairek in chim in hitin a ṭial: “Vale hna, Khrih nih Khrihfabu cu a dawt i a nunnak a pek bantuk in nannih zong nih nan nupi le kha nan dawt hna awk a si.” (Efe. 5:25) Khrihfa vale pakhat nih a innchungkhar ah a hlei in a nupi cu Jehovah sin aa pumpemi pakhat a si tikah hi Baibal cang forhfialnak cu zeitindah a hman khawh?

Khrih Nih Khrihfabu kha A Dawt I A Cawm

Baibal nih hitin a chim: “Pa nih an nupile cu anmah pum an i dawt bantuk in an dawt hna awk a si. A nupi a daw mi pa cu amah le amah aa dawt a si ko. Ahohmanh nih mah pum kha an hua bal lo. Khrih nih Khrihfabu kha a cawm a zoh a khenh bantuk in, ahohmanh nih a pum cu a zoh a khenh i a cawm ve.” (Efe. 5:28, 29) Jesuh nih a zultu pawl kha a dawt tuk hna. A cawm a zohkhenh hna. Mitling lo an si ko nain an cungah a nun a nem i a zaangfah hna. “Khrihfabu kha i dawhte . . . in amah sin lila ah khan pek a duh caah” a zultu pawl an sining ṭha ah lungthin a pek.—Efe. 5:27.

Khrih nih Khrihfabu a dawt a langhter bantuk in vale nih an bia le tuahsernak in an nupile an dawt langhter awk a si. A va dawtnak a hmu zungzalmi nupi cu a lung aa lawm. A dang kap khat cu inn ṭha le thilri tampi he a ummi nu pakhat cu a va nih ṭha tein a hramh lo asiloah a zohkhenh lo ahcun lungrawk in a um kho.

Pa pakhat nih a nupi a dawt zeitindah a langhter lai? Mi tampi he an um tikah a nupi kha midang he upatnak in a theihhngalhter hna lai i hawi le bawmtu in a thangṭhat lai. A nupi kha innchungkhar hlawhtlinnak ah biapi in aa tel a si ahcun midang kha cungcang lo tein a chimh hna lai. Anmah lawng in an um caan ah a va nih a nupi a dawt kha a hngalhter. Kut in va tongh, mirh, va kuh le thangṭhat ti bantuk cu thil hmete a si ko lai nain nu pakhat caah a biapi tuk.

“‘Ka Unau Hna’ ti Khawh A Ning A Zak lo”

Jesuh cu chiti thuhmi a zultu hna kha “‘ka unau hna’ ti i kawh a ning a zak lo.” (Heb. 2:11, 12, 17) Khrihfa vale pakhat na si ahcun na nupi kha Khrihfa unau nu a si zong kha philh hlah. Nan i um hlan ah asiloah nan i um hnu ah tipil a ingmi a si ahcun Jehovah sin aa pumpeknak cu ṭhitum biakam nakin a biapi deuh. Khrihfabu pumhnak tlaitu unau pa, na nupi kha a phi na hal tikah “Unau nu—” tiah na auh lai. Amah cu Khrihfabu le inn zongah unau nu a si. Kingdom Hall ah zaangfahnak le upat tein na pehtlaih bantuk in inn zong ah pehtlaih a biapi.

Khrihfabu ah rian dang na hmuh chap a si ahcun Khrihfabu rian le na innchungkhar rian kha aa tluk in ṭuan awkah naa harh caan a um lai. Khrihfa upa pawl le bu rianṭuantu pawl he ṭha tein ṭuan ṭi le rian ṭha tein peknak nih an herh bikmi na nupi caah a caan tam deuh an ngeihter lai. Rian pek na simi Khrihfa rian kha tling tein a ṭuan khomi unau tampi an um, asinain na nupi cu nangmah he lawng aa ṭhiummi a si kha philh hlah.

Cun na nupi lu na si. Baibal nih hitin a ti: ‘Pa kip lu cu Khrih a si, nu lu cu pa a si.’ (1 Kor. 11:3) Mah lu sinak cu zeitindah na hman? A cunglei Baibal cang kha atu le atu cherhchan le dinfelnak halmi si lo in dawtnak in a si. Lu sinak kha ṭha tein hmannak a biapi bik lam cu na nupi na pehtlaihnak ah Jesuh Khrih i zohchunh kha a si.—1 Pit. 2:21.

“Ka Hawile Nan Si”

Jesuh nih a zultu pawl kha ka hawile nan si tiah a ti hna. Hitin a ti hna: “Nannih cu sinum kan ti ti hna lo, zeicahtiah sinum nih cun a bawipa tuahmi kha a hngal lo. Sihmanhsehlaw ka Pa sinin ka theihmi vialte kha kan chimh dih hna caah, ka hawile, ti tu ah kan ti cang hna.” (Johan 15:14, 15) Jesuh cu a zultu pawl he pehtlaihnak ṭha a ngei. Thil kha hmunkhat ah an tuah ṭi. “Jesuh le a zultu hna” kha Kana khua nupi ṭhitnak puai ah an sawm hna. (Johan 2:2) Gethsemane dum ti bantuk an duhnak hmun a um. “Jesuh le a zultu hna cu khika hmun ah khan voi tampi an i tong tawn” tiah Baibal nih a ti.—Johan 18:2.

Nupi pakhat nih a va he aa naih bikmi hawikom ka si timi ruahnak a ngeih a hau. Vale le nupile nan nunnak kha hmunkhat ah i nuamhpi awk a biapi tuk! Pathian rian hmunkhat ah ṭuan ṭi u. Hmunkhat in Baibal hlathlai ṭi kha i nuamhpi u. Caan hmang ṭi u—hmun khat ah lam len, bia i ruah, rawl ei ṭi u. Aa ṭhiummi nuva leng in si u, hawikom ṭha si u.

“A Dongh Tiang Hrimhrim In A Dawt hna”

Jesuh nih ‘a zultu pawl kha a dongh tiang hrimhrim in a dawt hna.’ (Johan 13:1) A cheukhat vale cu hi zawn ah Jesuh kha an i zohchunh tawn lo. A si khomi cu a no deuhmi ṭhit awkah ‘tlanval lio i nupi’ kha an kaltak men lai.—Mal. 2:14, 15.

Willi bantuk in midang nih Khrih kha an i zohchunh. Willi nupi cu mi ngandam lo tuk a si i kum tampi chung zohkhenh a hau. Mah kong ah Willi cu zeitindah a um? Hitin a chim: “Ka nupi kha Pathian pekmi laksawng in a zungzal ka ruah i, cuticun ka sunsak. Cu hlei ah, caan a ṭhat, a chiat zongah ṭha tein ka zohkhenh lai tiah a luancia kum 60 lio ah bia kaa kam. Mah biakamnak kha zeitikhmanh ah ka philh lai lo.”

Khrihfa vale hna Khrih dawtnak kha i zohchunh u. Na unau nu le hawi a simi Pathian a ṭimi na nupi kha cawm law daw.

[Cahmai 20nak i hmanthlak]

Na nupi cu na hawikom ṭha bik a si maw?

[Cahmai 20nak i hmanthlak]

‘Nan nupile kha daw peng hna u’