Jehovah Nih A Chungkhar A Pumhkhawmh

‘Pumkhat sinak, thlarau nih an pekmi hna kha, ngeih peng awkah kan forh hna.’—EFE. 4:1, 3.

ZEITINDAH NA LEH LAI?

Pathian khuakhannak i aa tinhmi cu zeidah a si?

Zeitindah ‘pumkhat sinak thlarau nih a kan pekmi kha kan ngeih’ khawh lai?

‘Pakhat le pakhat cungah zaangfahnak ngeih’ awkah zeinihdah a kan bawmh lai?

1, 2. Vawlei le minung ca Jehovah tinhmi cu zeidah a si?

CHUNGKHAR timi biafang na theih tikah zeidah na lung ah a chuak? Aa dawmi le aa nuammi an si ti in maw? Tinhmi pakhat ca i rian a ṭuanṭimi in maw? Asiloah ṭhannak hmun le thilthar cawnnak le ruahmi kong i chimhnak ca a himmi hmun in dah? Aa dawmi chungkhar ah a ummi na si ahcun mah pawl kha na lung ah a hung chuak ko lai. Chungkhar a dirhtu cu Jehovah a si. (Efe. 3:14, 15) Pathian nih aa tinhmi cu van i a ummi vialte le vawlei i a ummi minung vialte kha chungkhar pakhat siter in himnak, pakhat le pakhat i zumhnak le lungrualnak an ngeih nakhnga a si.

² Adam le Evi nih sualnak an tuah tikah minung cu Pathian chungkhar kan si ti lo. Asinain Pathian tinhmi cu aa thleng hlei lo. Vawlei hi Adam le Evi tefa in a khatmi Paradis si awkah a tuah rih ko lai. (Gen. 1:28; Isa. 45:18) Aa tinhmi tlinter awkah a herhmi zei thil paoh a timhtuah. Baibal chung Efesa ah aa ṭialmi tam deuh cu lungrualnak kong a si nain Jehovah timhtuahnak kong zong a um. Efesa chung ah a ummi a hme cheukhat kan i ruah lai i van i a ummi vialte le vawlei i a ummi minung vialte kha chungkhar pakhat siter ding timi Jehovah tinhmi tlinternak ah zeitindah kan i tel khawh kha kan hngalh lai.

Khuakhannak le A Rianṭuan Ning

3. Efesa 1:9, 10 ah a ummi Pathian khuakhannak timi cu zeidah a si? Pakhatnak cu zeitikah dah aa thawk?

³ Jehovah cu aa tinhmi ning in a tuahtu a si zungzal. “Caan a cut tikah” Pathian nih van i a ummi vialte le vawlei i a ummi minung vialte kha chungkhar pakhat siter awkah a timhtuah. Mah timhtuahnak kha “khuakhannak” tiah a ti. (Efesa 1:8-10 rel.) Khuakhannak cu pahnih in a um. Pakhatnak ah Pathian nih chiti thuhmi kha van ah um awkah a timh-tuah hna, annih cu Jesuh Khrih kuttang ah rian an ṭuan lai. Mah cu Jehovah nih Khrih he van ah uktu a ṭuan hngami a pumhkhawmh hna caan, AD 33, Pentekos ni in aa thawk. (Lam. 2:1-4) Khrih tlanhnak man thawng in Pathian nih chiti thuhmi hna kha van i nun awkah aa tlakmi miding in a hmuh hna. Annih nih “Pathian fa” an si kha an i hngalh.—Rom 3:23, 24; 5:1; 8:15-17.

4, 5. Khuakhannak pahnihnak ah zeidah tuah a si?

⁴ Pahnihnak ah Pathian nih Messiah Pennak tang vawlei Paradis ah a um dingmi kha a pumhkhawmh hna. Paradis ah a um hmasa dingmi cu “mibu nganpi” an si lai. (Biat. 7:9, 13-17; 21:1-5) Kum Thongkhat Uknak chung ah mithi nuai tampi cu an thoṭhan lai i mibu nganpi he an umṭi lai. (Biat. 20:12, 13) Mah tikah lung aa rualmi kan si langhternak caanṭha tampi kan hmu lai. Mibu nganpi le a thoṭhanmi hna cu “vawlei i a ummi thil” an si te lai. Kum thongkhat uknak a dih tikah hneksak an si lai i zumhfek tein a ummi hna cu vawleicung ah a ummi “Pathian fale” an si lai.—Rom 8:21; Biat. 20:7, 8.

⁵ Jehovah nih atu in van ah a um dingmi le vawlei ah a um dingmi kha a timh-​tuah hna. Kannih pakhat cio tah Pa-​thian khuakhannak ah zeitindah kan i tel khawh ve lai?

‘Pumkhat Sinak kha Ngei Peng U’

6. Khrihfa hna cu hmunkhat ah i pumh awk a si kha zei Baibal cang nih dah a langhter?

⁶ Baibal nih Khrihfa hna cu hmunkhat ah an i pumh awk a si tiah a ti. (1 Kor. 14:23; Heb. 10:24, 25) Asinain kan lung aa rual nakhnga market asiloah lentecelh- nak hmun ah mi an i ton bantuk in i ton men lawng in a za lo. Jehovah cawnpiaknak kan ngaih le a thlarau lamhruainak kan zulh ahcun a lung aa rualmi kan hung si lai.

7. ‘Pumkhat sinak thlarau nih an pekmi hna ngei peng u’ timi cawnpiaknak zeitindah kan zulh khawh?

⁷ Jehovah nih Khrih tlanhnak man a zummi hna kha miding in a hmuh hna i, chiti thuhmi an si ahcun a fale in le tuu-​dang an si ahcun a hawile in a hmuh hna. Asinain hi chan ṭhalo i kan nun chung ahcun pakhat le pakhat karlak ah lung i khahlonak a um zungzal ko lai. (Rom 5:9; Jeim 2:23) Mah ruang ah Baibal nih pa-​khat le pakhat cung ah lungsaunak ngei u tiah a kan ti. Cu a si ah unau pawl he lung i rual awkah zeidah kan tuah kun lai? ‘Toidornak le lungnemnak’ ngeih kan i zuam lai. Cun Paul nih “pumkhat sinak, thlarau nih an pekmi hna kha, ngeih peng awkah an funtu hna daihnak hri khan fek tein i ṭem u” ti zong in a kan forh. (Efesa 4:1-3 rel.) Mah cawnpiaknak zulh khawhnak lam khat cu Pathian thlarau lamhruainak zulh le thlarau theitlai langhter awk thlarau nih a kan bawmhmi co-​hlan a si. Thlarau theitlai nih pakhat le pa-​khat karlak ah lung i khahlonak a ummi tawnghtham awk a kan bawmh i lung a rualter. Asinain minung sining nih a tuah tawnmi thil nih cun ṭhencheunak a chuahter zungzal.

8. Minung sining nih a tuah tawnmi thil nih zeitindah mi a ṭhencheuter?

⁸ “Minung sining nih a tuah tawnmi” thil nih zeitindah ṭhencheunak a chuah-​ter? (Galati 5:19-21 rel.) Nu le pa sualnak nih mi kha Jehovah le Khrihfabu he a hlatter. Zuanzamnak nih chungkhar ah lungfahnak le ngaihchiatnak a chuahter i fale le nu le pa kha a ṭhenter hna, sualnak a ngeilomi innchunghawi kha a nupi asiloah a va he a ṭhenter. A thurhnawmmi thil nih mi pakhat kha Pathian le a dawtmi hna he lungrual tein um awk a harter. Thil pahnih kha kaw in sengh na duh ahcun a pahnih in an thian veve lawng ah fek tein aa seng kho lai. Aa dawhcah lomi thil tuah hramnak nih mi cu Pathian nawlbia a ngai lomi le zei i a rel lomi a si a langhter. Minung sining nih a tuah tawnmi a dang thil hna zong nih mi kha midang he zong, Pathian he zong a hlatter. Mah tuahsernak hna cu Jehovah huatmi an si.

9. Remte le lungrual tein um ding kan i zuam le zuam lo hngalh awkah zei bia dah kan i hal khawh?

⁹ Cucaah hitin kan i hal awk a si: ‘Unau pawl he remte le lungrual tein umṭi awkah fakpi in kaa zuam maw? Mi pakhatkhat he kan lung aa khahlo tikah zeidah ka tuah? Ka hawile tampi kha keimah lei ṭang ding in mah kong kha ka chim hna maw? Keimah nih remnak va ser lo in Khrihfa upa nih remnak kan serpiak hna seh ti ka duh maw? Mi pakhatkhat nih a ka rem lo ti ka hngalh ko nain mah kong tawnghtham lo in ka hrial maw?’ Mah lak ah pakhatkhat kan tuah a si ahcun Khrih uknak tang ah mi vialte chungkhar pa-​khat siter ding timi Jehovah tinhmi tlinter awk kan bawmh a si hnga maw?

10, 11. (a) Unau pawl he rem tein um zeicah a biapit? (b) Mi he aa remmi si le Jehovah thlua-​chuah hmuh kan duh ahcun zeidah kan tuah lai?

¹⁰ Jesuh nih hitin a ti: “Pathian sinah nan laksawng cu biakṭheng cung i pekchanh na zalh tikah khan, na unau pa-​khatkhat kha na cungah thinhunnak a ngei ti na hun hngalh ahcun, biakṭheng hmai ah cun na laksawng cu chia ta law khulrang in va kal law na unau he khan remnak va tuah, cu hnuah cun ra ṭhan law Pathian sinah na laksawng cu va pe. . . . Amah he cun remnak tuah i zuam.” (Matt. 5:23-25) Jeim nih hitin a ṭial: “Daihnak sertu pawl nih daihnak in an tuhmi thlaici nih a thei a tlaimi cu ṭhatnak a si.” (Jeim 3:17, 18) Mah nih midang he kan i rem lo ahcun ṭhatnak tuah khawh a si lo ti a langhter.

¹¹ Tahchunhnak ah, ral an rak i tuknak ram cheukhat ah ram chung vawlei cheuthum cheukhat leng ah vawlei chung phummi bom a um lo tiah mi nih an ruah ahcun cuka ah lo an thlawh. Bom pakhat a puah ahcun cuka hmun cu lothlotu pawl nih an thlo duh ti lo, cu tikah khuate ah rian a har i khuapi zong ah rawl a har. Cu bantukin midang he rem tein a kan umter kho lomi ziaza kan ngeih ahcun Khrihfa ziaza ngeih chin awk kan i harh lai i vawlei chung phummi bom he kan i lo lai. Cuti kan si ahcun kan ziaza kan i remh a hau. Mi kan ngaihthiam colh hna i an ca ṭhatnak kan tuah ahcun mi he kan i rem lai i Jehovah thluachuah kan hmu lai.

12. Khrihfa upa nih lungrual awkah zeitindah a kan bawmh khawh?

¹² Khrihfa upa zong nih lungrual awk a kan bawmh khawh. Annih cu ‘zumhnak i pakhat’ kan si nakhnga bawmtu ah Pathian nih a kan pekmi an si. (Efe. 4:13) Annih cu Jehovah rianṭuannak ah kanmah he an ṭuanṭi tik le kan sin an rat i Baibal in ruahnak an kan cheuh tikah Khrihfa ziaza ngeih chin awk a kan bawmh a si. (Efe. 4:22-24) Khrihfa upa nih ruahnak an in cheuh tikah vawlei thar i na nun khawh nakhnga Jehovah nih nangmah timhlamh awkah a hman hna ti kha i cinken. Khrihfa upa pawl zong, mi ruahnak nan cheuh hna tikah bawmh nan duh taktak hna kha langhter u.—Gal. 6:1.

‘Pakhat le Pakhat Cungah Zaangfahnak Ngei U’

13. Efesa 4:25-32 cawnpiaknak kan zulh lo ahcun zeidah a chuak kho?

¹³ Efesa 4:25-29 ah kan hrial awk a simi ziaza aa ṭial. Mah ah lihchim, thinhun, thathut le bia ṭhalo chim aa tel. Asinain kannih cu a ṭhami le thazaang a pemi bia tu kan chim awk a si. Mah cawnpiaknak a ngai lomi nih ṭhencheunak a chuahter. Cun ‘Pathian thiang thlarau kha a ngaih a chiatter’ khawh, zeicahtiah thiang thlarau cu lungrualnak a chuahtertu a si. (Efe. 4:30) Daihnak le lungrualnak ngeih awkah Paul nih a ṭial chapmi hi bia zong hi kan zulh a hau: “Lungthli in i uamnak le thinhunnak le ingpuannak kha hlaw hna u. I hua ti hlah u, i vawlpam ti hlah u. Huatnak lungthin ngei ti hlah u. Pa-​khat le pakhat cungah zaangfahnak lungthin le nemnak lungthin ngei u law Pathian nih Khrih thawngin an ngaihthiam hna bantukin pakhat le pakhat i ngai-​thiam u.”—Efe. 4:31, 32.

14. (a) Paul nih ‘pakhat le pakhat cungah zaangfahnak ngei u’ tiah zeicah a kan ti? (b) Zaangfahnak ngeih awkah zeinihdah a kan bawmh lai?

¹⁴ A caancaan ah zaangfahnak kan ngei tawn lo i ngeih awkah kan i zuam a herh caah Paul nih ‘pakhat le pakhat cungah zaangfahnak ngei u’ tiah a kan cawnpiak. Kanmah ruahnak nakin midang ruahnak kha biapi deuh ah chiah kan i zuam a hau. (Fil. 2:4) A caan ah capo saih asiloah fim a kan coter dingmi bia chim kan duh ko lai. Asinain cutin chim cu zaangfahnak ngeih lo a si ahcun chim lo ding a si. Bia kan chim hlan ah ruah hmasanak nih ‘pakhat le pakhat cungah zaangfahnak ngeih’ awk a kan bawmh lai.

Chungkhar ah Dawtnak le Upatnak Ngeih awk Cawng

15. Efasa 5:28 nih vale kha Khrih i zohchunh ding a si hngalh awkah zeitindah a bawmh hna?

¹⁵ Baibal nih Khrih le Khrihfabu an i pehtlaih ning kha nu le va an i pehtlaih ning he a tahchunh. Khrih tuahmi nih vale kha an nupile dawt awk, lamhruai awk le zohkhenh awk a si hngalh awk a bawmh hna. Cun nupile kha an vale tangah i dor awk a si zong hngalh awk a bawmh hna. (Efe. 5:22-33) Paul nih “pa nih an nupi le cu anmah pum an i dawt bantuk in an dawt hna awk a si” a ti tikah vale kha aho nawl i cawn awk dah a forh hna? (Efe. 5:28) Khrih le Khrihfabu kong a chimmi nih a phi hngalh awk a kan bawmh lai. Khrih nih Khrihfabu cu a dawt i a nunnak a pek i ‘Pathian bia, ti in thiang tein a ṭawl’ tiah Paul nih a ti. Cucaah pa cu a chungkharmi pakhat cio Jehovah he pehtlaihnak ṭha an ngeih nakhnga bawmh ding rian a ngei. Cutin a tuah cu Khrih uknak tangah mi vialte chungkhar pakhat siter ding timi Jehovah tinhmi tlinter awk a bawmh a si.

16. Jehovah pekmi rian kha nu le pa nih an ṭuan ahcun zei ṭhatnak dah a chuak lai?

¹⁶ Nu le pa hna, Jehovah nih fale zohkhenhnak rian aan pek hna kha i cinken u. Tuchan mi tampi ‘zaangfahnak an ngeih lomi’ hi ngaihchiat awk ngai a si. (2 Tim. 3:1, 3) Pale tampi nih an fale an zohkhenh hna lo caah an fale cu harnak an tong i an lung a fak. Paul nih Khrihfa pale kha “nan fale kha an thin hung seh ti in ti hna hlah u. Khrihfa ziaza le cawnpiaknak he tu ṭhanter hna u” tiah a ti hna. (Efe. 6:4) Fale nih dawtnak ngeih awk le mi upat thiam awk an cawn hmasa biknak cu innchungkhar ah a si. Cu bantuk kong fale a cawnpiakmi nu le pa cu mi vialte hmunkhat ah pumhkhawmh ding timi Jehovah tinhmi tlinter awk a bawmmi an si. Fale nih an inn cu dawtnak a lengmi hmun in an ruah nakhnga nu le pa nih an tuah awk a si. Cucaah nu le pa cu an thin an i sum a herh i fale kha raak chih le bia fakfak in an ti hna awk a si lo. Cuticun dawtnak le upatnak zeitindah langhter awk a si timi an cawnpiak khawh hna. Cutin an tuah cu an fale kha vawlei thar i nun awkah an timhlamh hna a si.

17. Satan doh awkah zeidah kan tuah a herh?

¹⁷ Satan nih mi kha Pathian rian ṭuan ti hna hlah seh ti a duh zungzal i cutin kan um nakhnga a tuah khawhmi zei thil paoh a tuah lai ti kha kan hngalh a hau. Mi tampi cu an i ṭhen, ṭhitum lo in an umṭi, nu le nu, pa le pa an i umnak thawngin Satan duhmi an tuah. Asinain kannih cu tuchan mi tampi nih an cohlanmi ziaza le tuahsernak kha kan i cawn lo. Khrih nawl tu kan i cawn. (Efe. 4:17-21) Cucaah Satan le khuachia pawl kan doh hna tikah ‘Pathian nih a kan pekmi ralthuam vialte kha i hruk’ a hau.—Efesa 6:10-13 rel.

Dawtnak I Ukter

18. Lung i rual awkah zeidah a herh?

¹⁸ Lung i rual awkah a herh bikmi cu dawtnak a si. Kan lungthin cu “Bawipa pakhat” lawng a simi Jesuh Khrih le ‘Pathian pakhat’ lawng a simi Jehovah le kan minung hawi kan dawt hnanak in a khat. Cucaah daite le lungrualte in um zungzal awk bia kan khiak. (Efe. 4:3-6) Cu bantuk dawtnak he aa tlai in Jesuh nih hitin thla a cam: “Anmah ca lawngah hin thla ka cam lo, an chimmi bia thawngin a ka zum laimi hna ca zongah ka cam. Annih cu an dihlak in pakhat an si nakhnga thla hi ka cam. Ka Pa, keimah cu nangmah chungah ka um i nangmah cu keimah chungah na um bantuk hin annih zong kan chungah um ve hna seh. Na ka dawtnak cu an chungah a um i kei zong an chungah ka um nakhnga, nangmah kong cu annih kha ka hngalhter hna i ka hngalhter ṭhan lengmang ko hna lai.”—Johan 17:20, 21, 26.

19. Zei tuah awk dah bia na khiah?

¹⁹ Thlen kan i harhmi ziaza pa-​khatkhat kan ngei men lai. Asinain dawtnak nih “ka lungthin a dih umnak in na rian ka ṭuan nakhnga ka cawnpiak ko” tiah thla a cammi salm caṭialtu pa bantuk in cam ve awk a kan forh lai. (Salm 86:11) Dawtnak a ngeimi Pathian le unau pawl he kan i ṭhen nakhnga fakpi in aa zuammi Satan kha doh awkah bia khiak u sih. Cun ‘Pathian dawtmi fa kan si caah’ innchungkhar, phungchimnak le Khrihfabu ah Pathian i zohchunh in ‘kan nunnak cu dawtnak nih a uk’ nakhnga fakpi in kan i zuam awk a si.—Efe. 5:1, 2.

[Cahmai 29nak i hmanthlak]

A laksawng kha biakṭheng pawngah a chiahtak i a unau he remnak a va ser

[Cahmai 31nak i hmanthlak]

Nu le pa hna, nan fale kha mi upat an thiam nakhnga cawnpiak hna u