MINO PAWL BIAHALNAK

Online ah a Laarmi Si cu Zeitluk in dah a Biapit?

Elaine timi mino nu pakhat nih hitin a chim: “Sianginn ka kaiṭi hawi hna nih online ah follower tampi an ngeihmi ka hmuh tikah ‘Wow—an laar bak si!’ tiah ka ruah. A hmaan tein chim ahcun tlawmpal cu ka nahchuah hna.”

Nangtah cutin na um bal maw? Na um ahcun online ah a laarmi si i zuamnak hrial khawh awkah mah capar nih aan bawmh lai.

Ṭih a nunnak cu zeidah a si?

Phungthlukbia 22:1 ah Baibal nih “minṭhat maw, chawva tampi dah naa thim lai ti na si ahcun minṭhat kha vaa thim deuh” tiah a ti. Cucaah midang nih sunsakmi si duh le minṭhatnak hmuh duh cu a palh lo.

Asinain a caan ah cohlanmi si duhnak cu a laarmi si duh tuknak ah a cang kho. Mah cu ṭih a nung maw? Kum 16 a simi Onya nih ṭih a nung tiah a ti:

“Sianginn ah a laarmi si duh ruang men ah inn dothnih cung in a zuangmi kha ka hmuh hna.”

Ṭhirual pawl lungthin lak duh ah mi cheukhat cu hrut ngaiin thil a phunphun an tuah i mah kha online ah an taar. Tahchunhnak ah, kumhra fai tampi cu midang nih an tuah bal lomi, siivai aa telmi thil suknak chatpiat tlang hna kha an ei i video an i thla, cun mah kha online ah an taar!

Baibal nih hitin a ti: “Mah pumpak thangṭhat kawlnak kha nan lakah umter hlah u.”—Filipi 2:3.

Ruah dingmi:

Online ah a laarmi si cu na caah zeitluk in dah a biapit?
Ṭhirual pawl lungthin lak duh le uarmi si duh ruangah na ngandamnak le na nunnak kha na thap lai maw?

Ṭhirual chimmi

“Mi nih a laarmi si awkah zeipaoh tuah a hau timi ruahnak an ngeihmi cu ṭih a nung tuk. An biachim, an thilhruk le an tuahser ning nih a laarmi a kan siter lai tiah an ruah. A laarmi si awkah a palh ti na ruahmi thil pakhatkhat na tuah ahcun a hnuah naa ngaichih lai.”—Leianna.

“A laarmi sinak he aa tlaiin a hmaan lomi hmuhnak”

A laarmi si dingin i zuamnak ah mi nih ṭih a nungmi thil kha an tuah zungzal lo. Kum 22 a simi Erica nih mi cheukhat hmanmi lam dang kong kha hitin a chim:

“Mi nih an nunnak ah an tonmi hmanthlak tampi kha an taar i anmah he caan a hmangṭi pengmi hawikom tampi a ngeimi bantukin an taar. Mah nih a laarmi sinak he aa tlaiin a hmaan lomi hmuhnak kha an chuahter.”

Kum 15 a simi Cara nih a hmaan loin ruahter awkah mi cheukhat nih a ding lomi lam an hman tiah a ti:

“Mi nih inn ah an um ko buin party tuahnak ah a ummi bantukin hman an i thlakmi kha ka hmuh bal.”

Kum 22 a simi Matthew nih cutin a tuahnak kong kha a phuan:

“Asia kha a phanh hmanh ka phan bal lo nain ka hmanthlak pakhat kha Everest Tlang he ka tag i ka taar!”

Baibal nih hitin a ti: “A hmaanmi thil kha tuah kan duhmi a si zungzal.”—Hebru 13:18.

Ruah dingmi:

Social media ah a laar deuhmi na si nakhnga a hmaan loin post pakhatkhat na taar bal maw?
Na taarmi hmanthlak le comment nih zei bantuk minung dah na si i zeidah na sunsak ti kha a langhter maw?

Ṭhirual chimmi

“Mi cheukhat nih like tampi hmuh awkah zeipaoh an tuah. Aa tlak lomi bia a chimmi le thil aa hrukmi asiloah ngeihmi thilri a langhtermi in hngalhmi si kha na duh maw? Asiloah sining ṭha a ngeimi in le midang cungah siaherhnak taktak a ngeimi in dah hngalh na duh deuh? Like hmuhnak nih aan nuamhter ko lai nain mah cu i porhlawt khawhnak a ruang a si maw ti kha ruat.”—Hannah.

Follower le like cu zeitluk in dah a biapit?

Mi tampi nih online i a laarmi sinak caah a biapi bikmi cu follower le like tampi hmuh kha a si tiah an ruah. A hmasa ah langhtermi Matthew nih cutin a ruah venak kong kha a phuan:

“Mi pawl kha ‘Follower zeizat dah na ngeih?’ asiloah ‘Zeizat dah like tam bik na hmuh bal?’ tiah ka hal hna. Follower tampi hmuh duh ah ka hngalh bal lomi kha follow ka tuah hna, mah cu follow an ka tuah ṭhan lai timi ruahchannak he a si. A laarmi si kha ka hun duh i social media nih mah duhnak kha a alhter chin.”

Hmanthlak Langhtermi: 1. Kumhra fai nu pakhat nih social media ah like a hmuhmi kha a zoh i a ni. 2. Mah nu nih kheng khat in a ummi muṭhai kha a ei. 3. Mah nu nih a paw kha aa domh i aa lungsi lo. — Online ah a laarmi sinak cu ei supsap he aa lo—chikkhat caah cun a ṭha ko nain lungsinak a pe taktak lo

Kum 25 a simi Maria nih mi cheukhat cu follower le like an hmuhmi cungah i hngat in anmahle anmah kha biachahnak an i tuahmi kha ka hmuh tiah a ti:

“Nu pakhat nih selfie aa thlakmi kha a taar i like tampi a hmuh lo tikah ka mui a chia tiah biachahnak a tuah. Mah cu a hmaan lomi ruahnak a si nain mi tampi zong cu bantuk ruahnak an ngei ve. Mah cu anmahle anmah an i serhsatmi a si.”

Baibal nih hitin a ti: “Kan ruam a kai awk a si lo, pakhat le pakhat kan thin kan i hunter awk a si lo, pakhat le pakhat kan i nahchuah awk a si lo.”—Galati 5:26.

Ruah dingmi:

Social media na hman tikah mah nih midang he aan tahchunhter maw?
Hawikom ṭha taktak ngeih nakin follower ngeih kha biapi deuh ah na chia maw?

Ṭhirual chimmi

“Online ah a laarmi si awkah midang uarmi si a hau, mah cu anmah a cohlangmi kha mi nih an cohlang ve hna tinak a si. Mah nih midang hmuhnak le anmah uarmi si khawh ning hna kha biapi tuk in aan chiahter khawh. Like hmuh duh cu a palh lo nain a laarmi si duhnak nih mah duhnak kha a ṭhawnter khawh.”—Joshua.

“Toidormi bantukin i umter” kha i ralring

Mi cheukhat nih an hlawhtlinnak cungah an i uangthlar ko nain an i phunzaitermi kha na hmu bal maw?

“Mawṭaw thar ka ngeih caah mi nih i citter ve dingin an ka hal peng!”
“Ka pound a ṭum deuh caah mikip nih an ka thangṭhatmi kha ka duh lo!”

Phungchimtu nih aa toidormi si khawh ning kong kha a chim ko nain amah cu aa porhlawmi a si.

Ralrin peknak: Cu bantuk porhlawtnak le ruamkainak nih midang thin a hunter, zeicatiah mi nih na sining kha an hngalh caah a si. Toidormi bantukin i umter cu lungthin ṭha a ngeimi an si lo caah mi nih hlangfang tein aa porhlawmi hna nakhmanh in an fih deuh hna.

Social media ah comment le hmanthlak na taar tikah aa toidormi bantukin i umter kha hrial. Mah Baibal ruahnak cheuhnak hi zul: “Nangmah kaa nih si loin midang tu nih in thangṭhat deuh hna seh.”—Phungthlukbia 27:2.