Cume i Testimoni di Ghjehova fàcenu usu di i doni ch’elli ricèvenu ?
Femu usu di i doni chì ricivimu per finanzà l’attività religiose è umanitàrie di a nostra urganizazione. Ss’attività ci permèttenu di còmpie una missione impurtante assai : quella d’aiutà a ghjente à esse discìpuli di Cristu Ghjesù (Matteu 28:19, 20).
Ùn ci ghjuvemu mai di i doni per arrichì à qualchissìa. I nostri anziani è altri ministri di u cultu ùn sò micca pagati, è i Testimoni di Ghjehova ùn sò micca pagati per andà à picchjà à e porte. Quelli chì si danu di rimenu indè e nostre filiale o à u nostru capilocu mundiale, ancu quelli di a Cuncultina centrale, fàcenu parte di un òrdine religiosu è ùn ricèvenu nisuna paga.
E nostre attività principale
Edizione : traducimu, stampemu, mandemu è femu a distribuzione di milioni di Bìbbie è d’altre publicazione cristiane tutti l’anni, è què, di rigalu. Di listessa manera, u situ jw.org è l’applicazione JW Library permèttenu d’avè accessu à e nostre publicazione numèriche senza avè da pagà qualcosa è senza publicità.
Custruzzione è mantenanza : Custruimu è intrattenimu lochi di cultu sèmplici dapertuttu in u mondu per permette à e nostre accultine di credenti d’aduniscesi indè i lochi chì cunvènenu per adurà à Diu. Femu di listessa manera pè e nostre filiale è i nostri scagni di traduzzione. A maiò parte di stu travàgliu hè fatta da vuluntàrii, ciò chì permette di fà calà e spese.
Amministrazione : L’attività fatte à u nostru capilocu mundiale, indè e nostre filiale è indè i nostri scagni di traduzzione, dinù quelle fatte da i nostri ministri itineranti, sò finanzate da doni fatti à a nostra òpera mundiale.
Predicazione : I Testimoni ùn sò micca pagati per predicà o per amparà à l’altri a « parolla di Diu » (2 Curintini 2:17). Orbè, cum’è ghjera u casu di certi cristiani di u sèculu unu, ministri di u cultu scelti è furmati per dedicà a maiò parte di u so tempu à a predicazione, ricèvenu un alloghju è robba da manghjà (Filippesi 4:16, 17 ; 1 Timuteu 5:17, 18).
Insignamentu : E nostre accolte reghjunale è di circuscrizzione sò finanzate da doni. Di più, femu a pruduzzione di prugrammi audio è videò chì s’appòghjanu nant’à a Bìbbia. È demu furmazione chì ampàranu à i nostri anziani è à i nostri ministri di u cultu à tempu pienu à esse più capaci indè e so attività.
Òpere di succorsu : Demu robba da manghjà, acqua è alloghju à quelli chì sò culpiti da una catastròfa naturale o casgiunata da l’omi. Ss’attività umanitàrie prufìttanu à « quelli chì sò i nostri fratelli è surelle in la fede », ma dinù à quelli chì ùn sò micca Testimoni (Galatesi 6:10).