Cumu si passa un matrimòniu indè i Testimoni di Ghjehova ?

Indè i Testimoni di Ghjehova, un matrimòniu si passa spessu cù una cerimònia simplice è degna è cù dinù un discorsu bìblicu. Dopu a cerimònia, i sposi urganizèghjanu à le volte pè i so invitati una stonda di cunvivialità, induve podassi ci serà robba da manghjàa. Si pò rimarcà chì à l’inìziu di u so ministeru, Ghjesù hè andatu à un pastu di matrimòniu in a cità di Cana (Ghjuvanni 2:1-11).

Cumu si passa a cerimònia di matrimòniu ?

U mumentu di primura di a cerimònia ghjè u discorsu di matrimòniu di circa 30 minuti datu da un ministru di u cultu di i Testimoni di Ghjehova. Ssu discorsu pienu d’affettu hè pè i dui sposi ; mette in risaltu i cunsìgli di a Bìbbia pè i còppii affinch’elli cunnòscanu un matrimòniu felice è chì tenerà (Efesini 5:33).

In parechji paesi, l’autorità permèttenu à ministri di u cultu di i Testimoni di Ghjehova di celebrà i matrimònii. Tandu, prima ch’ellu si compii u discorsu, i sposi si fàcenu prumesse sulenne. Pò accade dinù ch’elli si mèttinu l’anelli. U ministru di u cultu i dichjara oramai moglia è maritu.

In d’altri paesi, a lege impone chì e cerimònie di matrimòniu sìanu fatte voltu à un ufficiale di u Statu Civile. Sta cerimònia civile, si tene pocu tempu nanzu à u discorsu di matrimòniu. Sè i sposi ùn si sò fatti e prumesse sulenne mentre a cerimònia civile, ponu falla prima ch’ellu si compii u discorsu. Sè l’anu digià fattu, ponu falla torna parlendu à u passatu. U discorsu finisce cù una prighera chì dumanda à Diu di benedisce i sposi.

Induve si pàssanu i matrimònii di i Testimoni di Ghjehova ?

A maiò parte di i Testimoni scèglienu di celebrà u so matrimòniu indè una Sala di u Reame, sè ci n’hè una dispunìbuleb. Sè i sposi anu privistu una festa, l’urganizèghjanu in un altru locu.

Un còppiu si marita ind’una Sala di u Reame. Un ministru di u cultu di i Testimoni di Ghjehova dà un discorsu di matrimòniu chì s’appoghja nant’à a Bìbbia.

Qual’hè chì pò vene à a cerimònia ?

Sè a cerimònia si passa à a Sala di u Reame, pè u più tutt’ognunu pò vene, ch’ellu sìa Testimone o micca. Sè dopu i sposi urganizèghjanu una festa, sò elli chì scèglienu i so invitati.

Ci vole à vestesi d’una certa manera ?

Quandu un matrimòniu si passa indè una Sala di u Reame, ùn ci hè micca una manera speziale di vestesi. Però, i Testimoni di Ghjehova cèrcanu di seguità i cunsiglii di a Bìbbia per ciò chì tocca a manera di vestesi : anu una tenuta mudesta è rispettosa di l’avvenimentu. À i sposi l’aggarba assai chì tutti i so invitati seguitèssinu sti principìi (1 Timuteu 2:9). È ghjè listessa cosa pè a festa chì vene dopu, sè i sposi ne fàcenu una.

Si ne face rigali à i sposi ?

A Bìbbia arricumanda d’esse manilargu (Salmu 37:21). Li garba à i Testimoni di Ghjehova di fà rigali è di ricevene (Lucca 6:38). Ma i sposi Testimoni ùn dumàndanu micca rigali è ùn fàcenu micca sapè davanti à tutti u nome di quelli chì li ne anu fattu (Matteu 6:3, 4 ; 2 Curintini 9:7 ; 1 Petru 3:8). Prima, a Bìbbia ùn arricumanda micca st’usi, eppò in più ponu imbarazzà l’invitati.

L’invitati tòccanu u bichjeru per bèie à a salute di i sposi ?

Innò. I Testimoni di Ghjehova nè tòccanu u bichjeru nè fàcenu brindisi in l’onore di chiunque, perchè st’usu vene da u paganismuc. I Testimoni li prèganu furtuna di casa di un’antra manera.

L’invitati ne làmpanu risu o cunfetti à i sposi ?

Innò. In certi paesi, l’invitati anu l’abitùdine di lampà risu, cunfetti o cose cusì à i sposi. Pènsanu chì cusì seranu furtunati è ch’elli camperanu felici. Ma i Testimoni di Ghjehova righjèttanu tuttu ciò chì hà un liame cù a superstizione. Dunque, ùn anu micca l’abitùdine di pregà bona furtuna, perchè st’usu s’oppone à i princìpii di a Bìbbia (Esàia 65:11).

Ci n’hè robba da manghjà è da beie ?

Mentre a cerimònia di matrimòniu à a Sala di u Reame ùn ci hè nè robba da manghjà nè da bèie. Dopu a cerimònia religiosa, certi sposi fàcenu a scelta d’urganizà una festa induve ci hè da manghjà è da beie (Ecclesiasta 9:7). S’elli anu decisu di serve biende alculizate à i so invitati, seranu attenti ch’ella sìa cù misura è solu à quelli chì anu l’età legale di bèiene (Lucca 21:34 ; Rumani 13:1, 13).

Ci n’hè mùsica è balli ?

Sè i sposi urganizèghjanu una festa, ponu sceglie di mette mùsiche è ballà (Ecclesiasta 3:4). Sceglieranu a mùsica cù primura, d’appressu à ciò chì li piace è a so cultura. Mentre a cerimònia religiosa à a Sala di u Reame, spessu ci sò mùsiche chì anu tema bìblichi.

À a so festa di matrimòniu, i sposi bàllanu cù qualchi di i so invitati.

I Testimoni di Ghjehova i festighjèghjanu l’anniversàrii di matrimòniu ?

I princìpii di a Bìbbia ùn arricumàndanu micca di festighjà l’anniversàrii di matrimòniu, ma ùn l’impedìscenu micca. Dunque, ghjè à ogni còppiu di decide s’ellu hà da festighjà u so anniversàriu di matrimòniu. Quandu dui Testimoni festighjèghjanu u so anniversàriu di matrimòniu, a fàcenu sìa tramindui, sìa cù a so famìglia è i so amichi.

a L’usi è e lege per ciò chì tocca e cerimònie di matrimòniu ponu scambià secondu i paesi è i lochi.

b U ministru di u cultu chì face u discorsu ùn hè micca pagatu. A Sala di u Reame hè messa à a dispusizione di i sposi di gràtisi.

c Per sapenne di più nant’à l’urìgine di st’usu, vede l’artìculu « Questions des lecteurs » indè A Torra Sentinella di u 15 di ferraghju di u 2007.