I Testimoni di Ghjehova sò contru à fassi vaccinà ?
Innò. I Testimoni di Ghjehova ùn sò micca contr’à a vaccinazione. Ghjè ogni Testimone chì decide per ellu stessu s’ellu hà da fassi vaccinà. Parechji anu fattu a scelta di vaccinassi.
Ricirchemu cure mèdiche di qualità è ricunnuscimu u valore di i prugressi fatti da a medicina per fà calà i rìsichi di sviluppà una malatìa sèria. Li simu grati à i prufessiunali di a salute pè a so annegazione è u so travaglione, soprattuttu in tempi di crisa.
Sustenimu l’auturità di a salute. Per esèmpiu, dapoi u princìpiu di a pandemìa di a Covid-19, avemu publicatu nant’à u nostru situ Internet è in centinàie di lingue, artìculi è videò chì anu ramentatu l’impurtanza di rispettà e misure sanitàrie pigliate da l’auturità lucale. St’artìculi è sse videò anu incuraghjitu a ghjente à seguità e direttive nant’à e cuncolte pùbliche, a quarantana, lavassi e mani è mette a maschera, è altre misure imposte o arricumandate da l’autorità (Rumani 13:1, 2).
Dapoi parechji anni, e nostre publicazione ramèntanu ssi princìpii quì :
Per ciò chì tocca à a salute ghjè à ognunu di fà a so pròpria scelta (Galatesi 6:5).
« [Sta rivista] ùn arricumanda micca un ghjenaru di medicina o di trattamentu piuttostu ch’un antru, è [ella] ùn dà micca cunsìglii medicali. [Ella] prisenta solu i fatti è làscia u lettore fassi u so parè è piglià e so decisione » (Réveillez-vous !, 8 di ferraghju di u 1987).
« Chì voi è i vostri figlioli vi fèssite vaccinà o nò, ghjè a vostra pròpria decisione » (Réveillez-vous !, 8 d’agostu di u 1993).
Ci femu curà chì per noi a vita ghjè più chè preziosa (Atti 17:28).
« I testimoni di Ghjehova si gìranu versu a medicina per esse curati. Tènenu à a so vita è ghjè per quessa ch’elli fàcenu tuttu ciò chì hè ragiunèvule è in accordu cù e Scritture per ch’ella durghi » (La Tour de Garde, 1u d’ottobre di u 1975).
« I Testimoni di Ghjehova accèttanu [...] vulinteri i trattamenti medicali. Vòlenu stà in salute è campà cent’anni. In fatti, cum’è Lucca, cristianu di u sèculu unu, certi Testimoni di Ghjehova sò duttori. [...] I Testimoni di Ghjehova cunnòscenu bè l’impegnu è l’annegazione di quelli chì medichèghjanu i malati è li sò dinù grati perchè li danu sullevu » (La Tour de Garde, 1u di ferraghju di u 2011).