Perchè i Testimoni di Ghjehova tènenu a so neutralità pulìtica ?
I Testimoni di Ghjehova tènenu a so neutralità pulìtica per esse in accordu cù e so credenze religiose chì s’appòghjanu nant’à ciò ch’insegna a Bìbbia. Ùn femu micca parte di gruppi di pressione, ùn vutemu micca per partiti o candidati pulìtichi, ùn circhemu micca à avè càriche in u guvernu, è ùn participemu micca à mosse per scambià di guvernu. Pensemu chì a Bìbbia dà ragiò sode per seguità stu modu di fà.
Seguitemu l’esèmpiu di Ghjesù, chì hà ricusatu càriche pulìtiche (Ghjuvanni 6:15). Hà dumandatu à i so discìpuli d’ùn fà parte di u mondu è li hà spiegatu di manera chjara ch’ùn duvìanu micca uccupassi di l’affari pulìtichi (Ghjuvanni 17:14, 16 ; 18:36 ; Marcu 12:13-17).
Simu fidi à u reame di Diu, chì Ghjesù hà parlatu quand’ellu hà dettu : « Ista bona nova di u regnu sarà predicata in lu mondu interu » (Matteu 24:14). Simu riprisentanti di u reame di Diu è simu incaricati d’annunzià a so ghjunta. Ghjè per què chì no tinimu a nostra neutralità inquant’à l’affari pulìtichi d’ogni paese, ancu quellu induve campemu (2 Curintini 5:20 ; Efesini 6:20).
À tene a nostra neutralità, simu liberi di parlà di a bona nova à tutti qualsìasi u so partitu pulìticu. A nostra primura hè di fà vede cù e nostre parolle è i nostri fatti a nostra cunvinzione chì u regnu di Diu hà da scioglie i prublemi di l’umanità (Salmu 56:12).
Cume ùn simu micca tocchi da divisione pulìtiche, simu uniti da una vera fratellanza, qualsìasi u nostru paese (Culussesi 3:14 ; 1 Petru 2:17). Invece, e religione chì s’uccùpanu di pulìtica caghjunèghjanu divisione trà i so credenti (1 Curintini 1:10).
Rispittemu i guverni. Ancu sè ùn femu micca pulìtica, rispittemu l’autorità di u statu chì guverna u paese induve campemu, ciò chì hè in accordu cù stu cumandamentu di a Bìbbia : « Chì ugnunu sìa sottumessu à l’autorità superiori » (Rumani 13:1). Ubbidimu à e lege, paghemu i nostri impòsiti è sustinimu l’impegni di u guvernu per ciò chì tocca u benestà di i citadini. Invece di cercà à fà cascà u guvernu in piazza, femu nostru u cunsigliu di a Bìbbia di prigà pè i « rè è [...] quelli chì sò alti in dignità », anzituttu quand’elli sò incaricati à piglià decisioni in leia cù a libertà di cultu (1 Timuteu 2:1, 2).
Rispittemu dinù u dirittu d’ugnunu à fà e so scelte pulìtiche. Per esèmpiu, ùn disturbemu micca l’elezzioni, nè circhemu à impedì quelli chì vòlenu andà à vutà di falla.
A nostra neutralità hè un’idea oghjinca ? Innò. Ghjè u modu d’esse ch’avìanu fattu sòiu l’apòstuli è d’altri primi cristiani riguardu à l’autorità di i guverni. U libru Au-delà des bonnes intentions (ingl.) face rimarcà : « Ancu s’elli si ne facìanu un duvere di rispettà l’autorità, i primi cristiani ùn vidìanu micca a necessità di participà à a vita pulìtica. » U libru Sur le chemin de la civilisation (ingl.) dice dinù chì i primi cristiani « ùn pigliàvanu nisuna càrica pulìtica ».
A nostra neutralità pulìtica : una minaccia pè a securità naziunale ? Innò. I guverni ùn anu micca à avè paura, simu citadini pacìfichi. In lu 2001, un raportu publicatu da l’Accadèmia naziunale di e scienze d’Ucràina facìa ssu cummentu nant’à a nostra neutralità pulìtica : « Oghje, à certi ùn li piace ssu modu d’esse di i Testimoni di Ghjehova ; ghjè anzituttu pè a listessa ragiò chì i regimi tutalitàrii nazisti è cumunisti d’anni passatoni si ne sò pigliati à elli. » Intantu, ancu sottu a ripressione suviètica, i Testimoni sò « firmati citadini rispittosi di e lege. Onesti è senza circà u so tornacontu, anu travagliatu indè tinute cullettive è impianti industriali ; ùn riprisentavanu nisuna minaccia pè u regime cumunistu ». U raportu finisce dicendu chì di listessa manera oghje e credenze è e pràtiche religiose di i Testimoni di Ghjehova « ùn mèttenu micca in perìculu a securità è l’integrità d’alcunu Statu ».