Premye liv Kronik
11 Pli tar, tou bann Izraelit ti al Ebronn+ kot David e dir: “Gete! Nou ou fanmir pros.*+ 2 Dan lepase ler Sail ti ankor lerwa, ou menm ou sa enn ki ti diriz Izrael ler zot ti al bann kanpanny militer.*+ Zeova ou Bondye ti dir ou: ‘Ou pou pran swen avek mon pep Izrael e ou pou vin sef mon pep Izrael.’”+ 3 Alor, tou bann ansyen dan Izrael ti vin Ebronn kot lerwa e David ti fer en lalyans avek zot devan Zeova. Apre, zot ti vid delwil lo latet David pour fer li vin lerwa Izrael+ parey Zeova ti’n dir atraver Samyel.+
4 Pli tar, David ek pep Izrael antye ti al Zerizalenm, setadir Zebouz,+ kot bann Zebouzit+ ti pe reste. 5 Bann zabitan Zebouz ti sifok David e dir: “Ou pa pou zanmen antre isi!”+ Me David ti pran sa landrwa Siyon+ ki ti ganny proteze avek bann gro miray e ki ozordi i apel Lavil David.+ 6 Alor David ti dir: “Sa ki premye pour atak bann Zebouzit pou vin sef* ek prens.” Zoab+ garson Zerouya ti al atak premye e i ti vin sef. 7 Apre, David ti al reste dan sa landrwa proteksyon. Sanmenm sa zot ti apel sa landrwa, Lavil David. 8 I ti konmans konstri bann miray ek lezot batiman toultour lavil, depi konblaz* ziska dan bann landrwa dan zalantour. Zoab ti rekonstri leres lavil. 9 Alor David ti vin deplizanpli pli for+ e Zeova Sef larme ti avek li.
10 Sa i bann sef gerye David ki for ki ti siport li konman lerwa ansanm avek pep Izrael antye. Zot ti fer li vin lerwa parey Zeova ti’n dir konsernan Izrael.+ 11 La lalis bann gerye David ki for: Zasobeam+ garson en Akmonit ti sef sa trwa gerye ki for.+ En fwa, i ti touy 300 zonm avek son lans.+ 12 Apre li, i ti vin Eleazar+ garson Dodo en Aoit.+ I ti parmi sa trwa gerye ki for. 13 I ti avek David Pas-Damim+ kot bann Filisten ti’n rasanble pour lager. Dan sa landrwa i ti annan en bout later ki ti ranpli avek lorz.* Bann dimoun ti’n sove akoz bann Filisten. 14 Me li i ti reste lanmenm dan milye sa plantasyon e defann sa landrwa. I ti kontinyen touy bann Filisten e Zeova ti ganny en gran laviktwar.+
15 Trwa parmi sa 30 sef ti desann kot David, kot kavern Adoulam,+ pandan ki en larme Filisten ti pe kanpe dan Vale Refaim.+ 16 David ti dan landrwa proteksyon e en group solda Filisten ti’n stasyonnen Betleenm. 17 Apre, David ti dir zot sa ki i ti vreman anvi. I ti dir: “Si zis mon ti kapab bwar en pe delo dan sa basen* ki o bor baro lavil Betleenm!”+ 18 Alor, sa trwa gerye ti antre pardfors dan kan bann Filisten e pran delo dan sa basen ki o bor baro lavil Betleenm. Zot ti anmenn kot David me David pa ti oule bwar sa delo e i ti vid li ater pour Zeova. 19 I ti dir: “Dapre pwennvi mon Bondye, i enposib pour mwan fer sa! Eski mon devret bwar disan sa bann zonm ki’n riske zot lavi?+ Parski zot in riske zot lavi pour anmenn sa delo.” Alor, i pa ti oule bwar sa delo. Sa i sa bann keksoz ki son trwa gerye ki for ti fer.
20 Abisay+ frer Zoab+ ti vin sef en lot group trwa gerye ki for. I ti touy 300 zonm avek son lans e i ti annan menm repitasyon parey sa premye trwa gerye ki for.+ 21 Parmi sa trwa gerye ki for, i ti pli renonmen ki sa de lezot e i ti zot sef. Me i pa ti lo menm nivo avek sa premye trwa gerye ki for.
22 Benaya+ garson Zeoada ti en zonm kouraze* ki ti fer en kantite fraka dan lavil Kabzeel.+ I ti touy sa de garson Ariyel ki ti sorti Moab. En zour ler lanez ti pe tonbe, i ti desann dan en pwi e touy en lyon.+ 23 I ti osi touy en zonm Ezipsyen ki ti vreman gran ki ti mezir senk koude.*+ Menm si sa Ezipsyen ti annan en lans dan son lanmen ki ti gro parey sa bout dibwa ki dimoun i servi pour fer latwal avek,+ Benaya ti atak li avek en baton e aras sa lans dan son lanmen e touy sa Ezipsyen avek son prop lans.+ 24 Benaya garson Zeoada ti fer sa bann keksoz e i ti annan menm repitasyon parey sa trwa premye gerye ki for. 25 Menm si i ti pli renonmen ki sa trant, i pa ti lo menm nivo avek sa premye trwa gerye ki for.+ Me David ti swazir li pour ansarz son bann gard personnel.
26 Bann gerye ki for dan lafors militer ti Asael+ frer Zoab, Elanann garson Dodo ki sorti Betleenm,+ 27 Samot en Arorit, Elez en Pelonit, 28 Ira+ garson Ikes en Tekoit, Abi-Ezer+ en Anatotit, 29 Sibekay+ en Ousatit, Ilay en Aoit, 30 Maaray+ en Netofatit, Eled+ garson Baana en Netofatit, 31 Itay garson Ribay ki sorti Gibea ki dan teritwar Benzamen,+ Benaya en Piratonnit, 32 Ouray ki sorti dan Vale* Gaas,+ Abyel en Arbatit, 33 Azmavet en Baaroumit, Eliaba en Saalbonit, 34 bann garson Asenm en Gizonit, Zonatan garson Sagi en Ararit, 35 Aiyam garson Sakar en Ararit, Elifal garson Our, 36 Efer en Mekeratit, Aiya en Pelonit, 37 Ezro en Karmelit, Naaray garson Ezbay, 38 Zoel frer Natan, Mibar garson Agri, 39 Zelek en Amonnit, Naaray en Berotit, sa enn ki anmenn bann zarm Zoab garson Zerouya, 40 Ira en Itrit, Gareb en Itrit, 41 Ouriya+ en Itit, Zabad garson Alay, 42 Adina garson Siza en Ribennit, en sef bann Ribennit ek 30 zonm ki ti avek li, 43 Anann garson Maaka, Zosafat en Mitnit, 44 Ouzia en Asteratit, Sama ek Zeiel, bann garson Otam en Aroerit, 45 Zedyael garson Simri ek Zoa son frer en Tizit, 46 Eliel en Maavit, Zeribay ek Zosavya bann garson Elnaam, Itma en Moabit, 47 Eliel, Obed ek Zaasyel en Mezobait.