ZOEL
1 Zeova ti demann Zoel,* garson Petouel pour dir sa parol:
2 “Zot bann ansyen, ekout sa
E tou zabitan sa pei,* ekout byen.
Eski en keksoz koumsa in deza arive dan zot letan
Oubyen dan letan zot bann zanset?+
3 Koz avek zot bann garson lo la,
Zot bann garson pou koz avek zot garson
E zot bann garson pou koz avek sa lot zenerasyon.
4 Bann plant ki bann sotrel* in kite, sotrel ki anvole in manze.+
Sa ki sotrel ki anvole in kite, sotrel ki napa lezel in manze.
Sa ki sotrel ki napa lezel in kite, sotrel ki voras in manze.+
5 Zot bann soular,+ leve e plere!
Zot bann bwarer diven, plennyen!
Akoz i nepli annan diven dou pour zot bwar.+
6 Parski en nasyon pwisan ki pa kapab ganny konte in anvai mon pei.+
Son ledan i parey ledan en lyon+ e son lanmaswar i parey lanmaswar en lyon.
7 Sa nasyon in detrir mon pye rezen ek mon pye fig, i’n kit zis en siko.
I’n depouy zot konpletman e zet zot laba.
Ni menm lekors lo son bann pti brans i pa’n kite.
8 Fer leokri parey en vyerz* ki’n met latwal goni* lo li
Akoz i’n perdi son nouvo marye.*
9 Parski i nepli annan lofrann lagrenn*+ ek lofrann diven+ ki ganny anmennen dan lakaz Zeova.
Bann pret ki pe servi Zeova i dan dey.
10 Bann plantasyon in ganny detrir e later i dan dey.+
Parski rekolt in ganny detrir e i nepli annan nouvo diven ni delwil.+
11 Bann fermye i vreman sagren, bann travayer plantasyon rezen pe plennyen
Akoz dible ek lorz,*
Parski rekolt dan plantasyon in ganny detrir.
12 Pye rezen in sek,
Pye fig in fletri.
Pye grenad, pye dat, pye ponm,
Tou bann pye dibwa dan lakanpanny in sek.+
Olye zwaye, lepep i onte.
13 Zot bann pret, met latwal goni lo zot* e tap zot lestoman.*
Zot ki pe servi kot lotel,+ plennyen.
Zot ki pe servi mon Bondye, vin dan tanp e pas lannwit dan latwal goni.
Parski i nepli annan lofrann lagrenn+ ek lofrann diven+ ki ganny anmennen dan lakaz ou Bondye.
14 Demann dimoun pour zennen.* Fer en lasanble spesyal.+
Reini bann ansyen ek tou zabitan pei
Dan lakaz Zeova zot Bondye+ e sipliy Zeova pour ed zot.
15 Maler akoz sa zour!
Parski zour Zeova i pros+
E i pou parey en destriksyon sorti kot sa Enn Tou Pwisan!
16 Pa manze in disparet devan nou lizye
E i nepli annan lazwa ek lakontantman dan lakaz nou Bondye?
17 Lagrenn* in sek anba zot lapel.
Bann stor i vid.
Bann grennyen* in ganny demoli akoz lagrenn in sek.
18 Menm zannimo pe plennyen!
Bann bef pa konnen kote pour ale akoz napa zerb!
Bann mouton i soufer akoz sa ki’n arive.
19 O Zeova, se ou ki mon pou kriye.+
Parski dife in detrir zerb dan lakanpanny
E laflanm dife in detrir tou pye dibwa dan pei.
20 Menm bann zannimo sovaz i vin rod led kot ou,
Parski delo larivyer in sek
E dife in detrir zerb dan lakanpanny.”
2 “Soufle tronpet* lo Montanny Siyon!+
Kriye dan mon montanny sen ki i pou annan lager.
Ki tou zabitan pei* i tranble
Parski zour Zeova pe vini+ e i pros!
En zour nyaze e vreman sonm,+
I parey sa lalimyer sonm dan granmaten lo bann montanny.
I annan en pep ki for e zot en kantite.+
I pa’n zanmen annan en pep parey li
E i pa pou zanmen annan en lot,
Zenerasyon apre zenerasyon.
3 Dife i devor tou sa ki par devan zot
E laflanm dife i detrir tou sa ki par deryer zot.+
Devan zot, sa pei i parey zarden Edenn,+
Me par deryer zot, sa pei i vin en landrwa dezerte
E napa nanryen ki kapab sap zot.
4 Zot parey bann seval
E zot taye parey bann seval lager.+
5 Ler zot pe sote lo latet montanny, zot fer tapaz parey bann saret lager,+
Parey tapaz en gro dife ki pe bril lapay sek.
Zot parey en larme pwisan ki annord e pare pour al lager.+
6 Dimoun pou vreman per akoz zot.
Figir tou dimoun pou vin pal akoz lafreyer.
7 Zot atake parey bann gerye,
Zot grenp miray parey bann solda,
Sakenn i al drwat devan
E zot pa sanz semen.
8 Zot pa pous kanmarad.
Sak zonm i avans devan.
Si serten i tonbe akoz bann fles,*
Lezot i kontinyen avans devan.
9 Zot antre dan lavil an tayan e zot tay lo miray.
Zot grenp lo bann lakaz e zot antre par lafnet parey en voler.
10 Ler zot vini, later i tranble e lesyel i sekwe.
Soley ek lalin in vin sonm+
E bann zetwal i nepli briye parey avan.
11 Zeova pou kriye devan son larme,+ parski i annan en kantite solda dan son kan.+
Parski sa enn ki pe akonpli Son parol i pwisan.
Parski zour Zeova i gran e i vreman efreyan.*+
Lekel ki pou kapab tenir?”+
12 La sa ki Zeova i dir, “Pourtan, i pa tro tar pour zot retourn kot mwan avek tou zot leker,+
Zennen,+ plere e fer leokri.
13 Desir zot leker,+ pa zot lenz+
E retourn kot Zeova zot Bondye.
Parski i annan konpasyon, i pran pitye, i pa ankoler vitman+ e i annan en kantite lanmour fidel+
E i pou sanz son desizyon* konsernan sa maler.
14 Lekel ki konnen, petet i pou aret ankoler, sanz son desizyon*+
E donn zot en benediksyon,
Pour ki zot kapab ofer en lofrann lagrenn* ek lofrann diven pour Zeova zot Bondye?
15 Soufle tronpet* lo Montanny Siyon!
Demann dimoun pour zennen.* Fer en lasanble spesyal.+
16 Rasanble bann dimoun e fer bann ki’n rasanble vin sen.+
Reini bann zonm aze,* rasanble bann zanfan ek bann pti baba ki ankor pe tete.+
Ki nouvo ek nouvel marye i sorti dan zot lasanm.
17 Ki bann pret ki pe servi Zeova
Ant larantre ek lotel+ i plere e dir:
‘O Zeova, pran pitye pour ou pep.
Pa les ou pep* ganny meprize
Par les bann nasyon domin lo zot.
Akoz sa bann nasyon pou bezwen dir, “Oli zot Bondye?” ’+
18 Alor, Zeova pou protez son pei avek devouman
E i pou pran pitye pour son pep.+
19 Zeova pou reponn son pep:
‘La mon pe donn zot lagrenn, nouvo diven ek delwil
E zot pou vreman rasazye.+
Mon pou nepli les zot vin en laont parmi bann nasyon.+
20 Mon pou sas bann ki sorti dan nor lwen avek zot.
Mon pou dispers zot dan en landrwa sek e dezerte.
Mon pou sas bann solda ki par devan dan lanmer ki dan les*
E bann solda ki par deryer dan lanmer ki dan was.*
Zot move loder pou monte,
Zot loder piyanter pou kontinyen monte.+
Parski Bondye pou fer bann gran keksoz.’
21 O pei, pa bezwen per.
Ou devret selebre e dan lazwa, parski Zeova pou fer bann gran keksoz.
22 Zot bann zannimo dan lakanpanny, pa bezwen per,
Parski zerb dan bann landrwa dezerte pou vin ver+
E bann pye dibwa pou raport fri,+
Pye fig ek pye rezen pou bezwen donn fri annabondans.+
23 Zot bann garson Siyon, zot devret selebre e dan lazwa akoz sa ki Zeova zot Bondye pou fer.+
Parski i pou donn zot sa kantite lapli ki zot bezwen pandan sezon lotonn*
E i pou fer bann gro lapli tonm lo zot,
Lapli pandan sezon lotonn e lapli pandan sezon prentan,* zis parey avan.+
24 Landrwa kot dible i ganny bate pou ranpli avek dible ki prop
E bann preswar pou deborde avek nouvo diven ek delwil.+
25 Mon pou rann zot tou sa ki zot in perdi pandan sa letan kot
Mon ti anvoy mon gran larme lo zot:
Bann sotrel* ki anvole, bann sotrel ki napa lezel, bann sotrel ki voras ek bann sotrel ki devore ki’n manz zot plantasyon.+
26 Sirman zot pou manze ziska ki zot rasazye+
E zot pou loue non Zeova zot Bondye+
Ki’n fer bann keksoz merveye pour zot.
Mon pep pa pou zanmen onte ankor.+
27 Zot pou bezwen konnen ki mon la parmi pep Izrael+
E ki mwan, mon Zeova zot Bondye+ e napa en lot!
Mon pep pa pou zanmen onte ankor.
28 Apre sa, mon pou vers mon lespri sen+ lo tou sort kalite dimoun.*
Zot garson ek fiy pou profetize,
Zot zonm aze pou ganny bann rev
E zot garson pou vwar bann vizyon.+
29 Sa letan mon pou vers mon lespri sen,
Menm lo mon bann serviter ek servant.
30 Mon pou fer bann keksoz merveye* anler dan lesyel e lo later,
Avek disan, dife ek lafimen ki pe monte.+
31 Soley pou vin sonm e lalin pou vin rouz parey disan+
Avan zour Zeova ki gran e efreyan i arive.+
32 Tou sa ki kriy non Zeova pou ganny sove.+
Parski zis parey Zeova in dir, i pou annan dimoun ki pou ganny sove lo Montanny Siyon ek Zerizalenm,+
Bann sirvivan ki Zeova in apele.”
3 “Parski ekoute! Pandan sa lepok ek sa letan,
Ler mon pou fer bann egzile retourn Zida ek Zerizalenm,+
2 Mon pou osi rasanble tou bann nasyon
E fer zot desann dan Vale Zeosafat.*
Mon pou ziz zot laba,+
Akoz sa ki zot ti fer mon pep e mon leritaz Izrael.
Parski zot ti fer mon pep eparpiye parmi bann nasyon
E zot ti partaz mon pei antre zot.+
3 Zot ti tir osor* pour kapab partaz mon pep.+
Zot ti vann en garson pour pey en prostitye
E zot ti vann en fiy pour aste diven pour bwar.
4 Tir, Sidon ek tou bann rezyon Filisti,
Ki zot annan kont mwan?
Eski zot pe repey mwan pour en keksoz ki mon’n fer?
Si zot pe repey mwan,
Deswit, mon pou degaze pour repey zot* dapre sa ki zot in fer.+
5 Parski zot in pran mon larzan ek lor+
E zot in anmenn mon bann pli zoli trezor dan zot tanp.
6 Zot in vann bann zabitan Zida ek Zerizalenm avek bann Grek,+
Pour anmenn zot lwen avek zot pei.
7 La mon pou fer mon pep kit sa landrwa kot zot ti ganny vann+
E mon pou repey zot* dapre sa ki zot in fer.
8 Mon pou vann zot bann garson ek fiy avek bann zabitan Zida+
E zot pou vann zot avek bann zonm ki sorti Seba, avek en nasyon ki byen lwen,
Parski Zeova li menm ki’n koze.
9 Anons sa parmi bann nasyon:+
‘Met zot pare* pour lager! Mobiliz bann zonm for!
Ki tou bann solda i rasanble e atake!+
10 Fer zot zouti pour labour later vin bann lepe e fer zot gran kouto* vin bann lans.
Ki sa enn ki fay i dir: “Mon for.”
11 Zot tou bann nasyon dan zalantour, vin ede, rasanble ansanm!’ ”+
O Zeova, fer desann ou bann gerye* dan sa landrwa.
12 “Ki bann nasyon i leve e al kot Vale Zeosafat,
Parski laba ki mon pou asize pour ziz tou bann nasyon dan zalantour.+
13 Pran en fosiy,* parski rekolt in mir.
Desann e vin kraz rezen, parski preswar i plen.+
Bann basen pe deborde, parski bann nasyon pe fer en kantite keksoz mal.
14 Lafoul, lafoul dimoun dan vale zizman,*
Parski gran zour Zeova i pros pour arive dan vale zizman.+
15 Soley ek lalin pou vin sonm
E bann zetwal pou nepli briye parey avan.
16 Parey en lyon, Zeova pou kriye lo Montanny Siyon,
I pou kriye Zerizalenm.
Lesyel ek later pou tranble,
Me Zeova pou vin en landrwa kasyet pour son pep+
E en landrwa proteksyon pour pep Izrael.
17 Zot pou bezwen konnen ki mwan, mon Zeova zot Bondye, ki reste Siyon, lo mon montanny sen.+
Zerizalenm pou vin en landrwa sen+
E bann etranze pou nepli pas par la.+
18 Sa letan, diven dou pou koule lo bann montanny,+
Dile pou koule lo bann pti montanny
E delo pou koule dan tou bann pti larivyer Zida.
En pti sours delo pou koule sorti dan lakaz Zeova+
E i pou aroz Vale* Pye Akasya.*
19 Me Lezip pou vin en landrwa abandonnen+
E Edonm en landrwa dezerte+
Akoz vyolans ki zot in fer pep Zida,+
Kot zot in vers disan bann dimoun inosan.+
20 Me i pou toultan annan dimoun ki reste Zida
Ek Zerizalenm, zenerasyon apre zenerasyon.+
21 Mon pou pardonn zot* pour disan inosan ki zot in fer koule+
E mwan Zeova mon pou reste Siyon.”+
Sa non i vedir “Zeova i Bondye.”
Oubyen “later.”
Oubyen “sotrel ki manz tou.” Dan sa verse an Ebre, i servi diferan mo pour dekrir kat kalite sotrel.
Oubyen “zenn madanm.”
Oubyen “lenz dey.” Vwar Leksplikasyon bann mo.
Literalman, “msye son zenntan.”
Vwar Leksplikasyon bann mo.
Lorz i en plant parey dible ki ganny servi pour fer lafarin.
Oubyen “anmar zot lenz dan zot leren.”
Oubyen “zot pou dan dey.”
Vwar Leksplikasyon bann mo.
Oubyen posibleman, “fig sek.”
Oubyen “stor.”
Literalman, “korn.” Vwar Leksplikasyon bann mo.
Oubyen “later.”
Oubyen “zarm.”
Oubyen “enpresyonan.”
Oubyen “regrete.”
Oubyen “regrete.”
Vwar Leksplikasyon bann mo.
Literalman, “korn.” Vwar Leksplikasyon bann mo.
Vwar Leksplikasyon bann mo.
Oubyen “ansyen.”
Oubyen “leritaz.”
Setadir, Lanmer Mor.
Setadir, Lanmer Mediterannen.
Sa lapli ti konmans tonbe apepre dan milye mwan Oktob. Vwar Lezot lenformasyon B15.
Sa lapli ti konmans tonbe apepre dan milye mwan Avril. Vwar Lezot lenformasyon B15.
Dan sa verse an Ebre, i servi diferan mo pour dekrir kat kalite sotrel.
Literalman, “laser.”
Oubyen “bann siny.”
Sa non i vedir “Zeova i Ziz.”
Vwar Leksplikasyon bann mo.
Literalman, “lo zot latet.”
Literalman, “lo zot latet.”
Literalman, “sanktifye.”
Oubyen “sizay.”
Oubyen “bann ki for.”
Oubyen “gran kouto.”
Oubyen “desizyon.”
Oubyen “larivyer sek.”
Sa i en kalite pye dibwa ki annan pikan ki pous byen dan dezer.
Literalman, “konsider zot disan inosan.”