Zanvye

Zezi ti “vwar” sa manman e apre “son leker ti fermal.” (Lik 7:13) Me Zezi pa ti zis pran pitye pour sa manman, i ti osi demontre konpasyon anver li. San dout, Zezi ti koz avek li dan en fason rekonfortan e i ti dir: “Aret plere.” Apre Zezi ti fer en keksoz pour ed sa madanm. I ti resisit sa garson e i ti “donn li avek son manman.” (Lik 7:14, 15) Ki nou kapab aprann avek sa resi konsernan ler Zezi ti resisit garson en vev? Nou aprann ki nou bezwen demontre konpasyon anver bann ki dan dey. Parey Zezi, nou pou annan konpasyon pour bann ki dan dey si nou obzerv byen. Nou kapab demontre konpasyon par dir e fer sa ki nou kapab pour ed e rekonfort zot. (Prov. 17:17; 2 Kor. 1:3, 4; 1 Pyer 3:8) Nou pa bezwen dir e fer bann gran keksoz me nou kapab dir e fer bann keksoz ki kapab ankouraz e rekonfort zot. w23.04 5-6 ¶13-15

Menm si Zezi i konnen ki son zanmi fek mor, Zezi i reste dan sa landrwa kot i ti ete pour ankor de zour e apre i al Betani. Alor, ler Zezi i ariv laba, kat zour in pase depi ki Lazar in mor. Zezi pe al fer en keksoz ki pou anmenn byenfe pour son bann zanmi e ki pou glorifye Bondye. (Zan 11:6, 11, 17) Dan sa resi, nou aprann en leson konsernan lanmitye. Reflesir lo sa: Ler Mari ek Mart ti anvoy mesaz pour Zezi, zot pa ti demann li pour vin Betani. Zot ti zis dir li ki son zanmi ti malad. (Zan 11:3) Ler Lazar ti mor, Zezi ti’n kapab resisit li menm si i ti lwen. Me Zezi ti deside pour al Betani pour vwar Mari ek Mart. Eski ou annan en zanmi ki pou vin ed ou san ki ou bezwen demann li? Si wi, ou konnen ki ou kapab depan lo li “dan letan maler.” (Prov. 17:17) Annou swiv legzanp Zezi e vin sa kalite zanmi pour lezot. w23.04 10 ¶10-11

Ler nou pe fer fas avek en problenm, petet nou santi ki nouvo lemonn pe tarde vini. Eski sa i vedir ki nou lafwa i feb? Pa neseserman. Annou vwar en legzanp. Pandan sezon lapli, i kapab ki nou santi ki i pa pou zanmen vin ansoleye ankor me apre en pe letan, nou reganny soley. Pareyman ler nou dekouraze, nou kapab santi ki nouvo lemonn pe tarde vini. Me si nou lafwa i for, nou konnen ki bann promes Bondye pou vin vre. (Ps. 94:3, 14, 15; Ebr. 6:17-19) Sa i fer ki nou pou kapab kontinyen met ladorasyon Zeova premye dan nou lavi. Nou osi bezwen annan en lafwa for pour kapab fer sa travay predikasyon. En kantite dimoun pa krwar ki Bondye pou anmenn en nouvo lemonn. (Mat. 24:14; Ezek. 33:32) Nou pa devret zanmen dout sa ki Zeova pe ansenny nou. Pour anpes sa arive, nou bezwen kontinyen ranforsi nou lafwa. w23.04 27 ¶6-7; 28 ¶14

Eski ou’n deza mazinen si Zeova pe reponn ou lapriyer? Si wi, ou pa tousel. En kantite frer ek ser in demann sa kestyon sirtou ler zot annan problenm. Si nou pe soufer, i kapab ki nou osi nou vwar li difisil pour vwar ki mannyer Zeova pe reponn nou lapriyer. Akoz nou kapab asire ki Zeova i reponn lapriyer son bann serviter? Labib i asir nou ki Zeova i kontan nou en kantite e ki nou presye pour li. (Aga. 2:7; 1 Zan 4:10) I pour sa rezon ki i envit nou pour demann li led dan lapriyer. (1 Pyer 5:6, 7) I anvi ed nou reste pros avek li e pour fer fas avek nou bann problenm. Dan Labib, nou lir ki Zeova ti reponn lapriyer son bann serviter. Eski ou kapab mazin en legzanp? w23.05 8 ¶1-4

Mari ti annan son prop lanmitye avek Zeova. Son lafwa pa ti depan lo sa ki Zozef ti fer. I ti konn byen Lekritir. I ti osi pran letan pour medite. (Lik 2:19, 51) Nou kapab asire ki sa lanmitye ki Mari ti annan avek Zeova ti fer li en bon madanm. Ozordi, en kantite madanm i fer zefor pour swiv legzanp Mari. Par egzanp, en ser ki apel Emiko i dir: “Ler mon ti selibater, mon ti annan mon progranm pour fer mon bann aktivite spirityel. Apre ki mon ti’n marye, mon msye ki ti priy pour nou e diriz ladorasyon fanmir. Mon ti realize ki mon ti pe konmans depan lo li pour fer sa bann keksoz pour mwan. Mon ti osi realize ki mwan ki ti pou bezwen gard mon lanmitye avek Zeova for. Alor, aprezan mon met letan dekote pour mwan pas letan avek mon Bondye mwan tousel. Mon priye, lir Labib e medit lo fason panse Bondye.” (Gal. 6:5) Bann madanm marye, ler ou kontinyen annan en bon lanmitye avek Zeova, ou msye pou annan plis rezon pour felisit ou e kontan ou.—Prov. 31:30. w23.05 22 ¶6

Nou bezwen devlop en gran respe pour Zeova parski nou pa’n ne avek sa kalite. En fason ki nou kapab devlop en gran respe pour Zeova, i par etidye kreasyon. Ler nou realize ki mannyer “bann keksoz ki Bondye in fer” i montre son lasazes, son pwisans ek son lanmour pour nou, sa pou fer nou annan plis respe pour li e nou pou kontan li plis. (Rom. 1:20) En lot fason ki nou kapab devlop en gran respe pour Bondye, i ler nou priy Bondye regilyerman. Nou vin pli pros avek Zeova sak fwa ki nou koz avek li dan lapriyer. Sak fwa ki nou demann Zeova sa lafors pour nou andir en problenm, sa i fer nou rapel ki Zeova i vreman pwisan. Ler nou remersye li pour donn nou son Garson konman ranson, sa i fer nou rapel ki Zeova i kontan nou. Ler nou sipliy Zeova pour ed nou fer fas avek en problenm, sa i fer nou rapel ki Zeova i vreman saz. Bann lapriyer koumsa i ed nou pour annan plis respe pour Zeova e nou pli determinen pour pa fer okenn keksoz ki pou gat nou lanmitye avek li. w23.06 15 ¶6-7

Zeova i toultan fer bann lalwa ki fasil pour son pep konpran. Par egzanp, konsey direkter dan premye syek ti koz lo trwa keksoz ki bann Kretyen i bezwen fer pour reste ferm: (1) pa ador zidol, ador zis Zeova, (2) obei lalwa Zeova ki dir ki disan i sakre e (3) obei sa lord ki dan Labib pour reste lwen avek imoralite seksyel. (Akt 15:28, 29) Ki mannyer bann Kretyen ozordi i reste ferm ler zot fer sa trwa keksoz? Par ador e obei Zeova. Zeova ti donn lord bann Izraelit pour ador zis li. (Det. 5:6-10) Ler Dyab ti tant Zezi, Zezi ti dir ki nou devret ador zis Zeova. (Mat. 4:8-10) Alor, nou pa ador zidol. Nou pa tret okenn zonm konmsi zot bann bondye, ki swa zot bann sef relizye, dirizan politik, bann atlet popiler, akter oubyen mizisyen. Nou ador sa enn ki’n “kree tou keksoz.”—Rev. 4:11. w23.07 14-15 ¶3-4

Lemonn Satan i kontan tou sa ki annan pour fer avek imoralite seksyel ek pornografi. (Efe. 4:19) Alor nou bezwen devlop en gran respe pour Bondye e rezet sa ki mal. Dan Proverb sapit 9, nou lir konsernan de madanm. Enn i reprezant lasazes e lot i reprezant enbesilite. Dapre sa sapit, sa de madanm pe envit bann ki napa leksperyans, setadir bann ki “napa lasazes,” kot zot. I konmsi zot pe dir ‘Antre dan mon lakaz e vin pran en repa.’ (Prov. 9:1, 4-6) Sa ki arive avek bann ki aksepte lenvitasyon sa madanm ki reprezant lasazes i diferan avek sa ki arive avek bann ki aksepte lenvitasyon sa madanm ki reprezant enbesilite. Annou vwar konsernan sa lenvitasyon ki sa “madanm bet” i ofer. (Prov. 9:13-18) Sa madanm i annan lardyes. I envit dimoun ki napa leksperyans pour vin dan son lakaz pour pran en repa avek li. Ki i arive avek bann ki aksepte sa lenvitasyon? Labib i dir ki “se lanmenm kot bann mor ki napa lafors i ete.” Nou ganny averti konsernan en madanm ki dezord e imoral. Nou ganny dir ki “son lakaz pou desann dan lanmor.” (Prov. 2:11-19) Dan Proverb 5:3-10 i annan en lavertisman konsernan en lot “madanm dezord” ki “son lipye i desann ver lanmor.” w23.06 21-22 ¶6-7

Bann ansyen i devret rezonnab. Sa pou fer zot vin en bon legzanp pour kongregasyon. (1 Tim. 3:2, 3) Par egzanp, en ansyen pa devret ekspekte ki lezot i aksepte son lopinyon toultan, zis akoz i pli vye ki tou lezot ansyen. I realize ki lespri sen Zeova i kapab azir lo nenport ansyen pour dir en keksoz ki pou ed konsey ansyen fer en desizyon ki saz. Si laplipar ansyen in dakor lo en desizyon ki pa kont bann prensip Labib, en ansyen ki rezonnab pour siport sa desizyon menm si li i ti pou’n dakor avek en lot keksoz. Bann Kretyen ki rezonnab i ganny bokou byenfe. Nou annan bann pli bon lanmitye avek bann frer ek ser e i annan lape dan kongregasyon. Nou kontan ki parmi pep Zeova i annan dimoun ki annan diferan personnalite e ki sorti dan diferan kiltir. Nou kontan pour konnen ki menm si nou tou nou diferan, nou ador Zeova konman en sel fanmir. Me pli enportan ankor, nou kontan pour konnen ki nou pe swiv legzanp Zeova, nou Bondye ki rezonnab. w23.07 25 ¶16-17

Danyel ti etidye bann profesi avek sa bon motivasyon, setadir pour konn laverite. Danyel ti osi annan limilite. I ti konnen ki Zeova ti pou ed bann ki konn li e ki viv dapre son bann standar pour konpran bann profesi. (Dan. 2:27, 28) Danyel ti montre ki i annan limilite par depan lo Zeova pour ganny led. (Dan. 2:18) Danyel ti osi etidye o profon. I ti fer resers dan bann Lekritir ki ti disponib sa letan. (Zer. 25:11, 12; Dan. 9:2) Ki mannyer ou kapab swiv legzanp Danyel? Egzamin ou motivasyon. Eski ou etidye bann profesi parski ou vreman anvi konn laverite? Si wi, Zeova pou ed ou. (Zan 4:23, 24; 14:16, 17) I kapab ki serten i etidye pour esey trouv levidans ki Labib pa’n ganny enspire par Bondye. Zot krwar ki si Labib pa sorti kot Bondye, zot kapab deside pour zot menm kwa ki byen e kwa ki mal. Alor i enportan ki nou annan sa bon motivasyon ler nou etidye bann profesi. w23.08 9 ¶7-8

Ler nou konpar nou avek lezot, sa i kapab vin parey en fardo pour nou. (Gal. 6:4) Si nou fer sa, nou kapab vin groker e konmans fer konpetisyon avek lezot. (Gal. 5:26) Si nou esey fer sa ki lezot pe fer menm si nou pa kapab, nou kapab fer ditor nou prop lekor. Reflesir lo sa: Labib i dir ki “ler en keksoz ki ou pe espere pa arive,” sa i fer ou dekouraze. (Prov. 13:12) Alor i pou pli dekourazan pour espere pour en keksoz ki nou pa pou zanmen gannyen. Si nou fer sa, nou kapab vin sitan fatige ki nou ralanti dan sa lakours pour ganny lavi eternel. Pa ekspekte plis avek ou lekor ki sa ki Zeova i ekspekte avek ou. Zeova pa zanmen ekspekte ki nou donn dapre sa ki nou napa. (2 Kor. 8:12) Ou kapab asire ki Zeova pa konpar sa ki ou pe fer avek sa ki lezot pe fer. (Mat. 25:20-23) I apresye ou servis ki ou pe fer avek tou ou leker, ou fidelite ek ou landirans. w23.08 29 ¶10-11

Zeova ti ekout lapriyer Sanmson e i ti ed li. I ti donn Sanmson delo atraver en mirak. Ler Sanmson ti bwar sa delo, “i ti reganny lafors ek kouraz.” (Ziz 15:19) I paret ki sa nouvo sours delo ti ankor egziste plizyer lannen pli tar ler profet Samyel ti ganny enspire pour ekrir liv Ziz. I kapab ki bann Izraelit ki ti vwar sa sours delo ti rapel ki si zot depan lo Zeova, Zeova pou ed son bann serviter fidel ler zot bezwen led. Nou osi nou bezwen depan lo Zeova pour ed nou malgre nenport abilite ki nou annan oubyen malgre nenport keksoz ki nou’n fer dan son servis. Nou devret annan limilite e admet ki nou kapab fer sa ki Zeova i demann nou zis ler nou depan lo li. Sanmson ti ganny sa lenerzi ki i ti bezwen ler i ti bwar sa delo ki Zeova ti donn li. Parey Sanmson, nou bezwen aksepte led ki Zeova i donn nou pour nou kapab reste fidel avek li.—Mat. 11:28. w23.09 4 ¶8-10

Ki nou kapab fer ler lezot i esey fer nou ankoler, par egzanp ler en dimoun i dir bann move keksoz lo Zeova oubyen lo Labib? Nou devret demann Zeova son lespri sen ek son lasazes pour nou kapab reponn avek ladouser. Me ki nou pou fer si pli tar nou realize ki nou pa’n reponn parey nou ti’n devret reponn? Nou kapab koz avek Zeova ankor lo sa sityasyon e reflesir lo ki mannyer nou kapab fer pli byen laprosenn fwa. An retour, Zeova pou donn nou son lespri sen pour ki nou kapab kontrol nou lakoler e demontre ladouser. Dan Labib, i annan bann verse ki kapab ed nou ler nou vwar li difisil pour koz dan en fason zantiy. Lespri sen Bondye i kapab ed nou rapel sa bann verse. (Zan 14:26) Par egzanp, i annan plizyer prensip dan liv Proverb ki kapab ed nou demontre ladouser. (Prov. 15:18) Sa liv Labib i osi montre nou akoz i bon pour nou reste kalm dan bann sityasyon difisil.—Prov. 10:19; 17:27; 21:23; 25:15. w23.09 15 ¶6-7

Zapot Pyer ti konnen ki i ti pros pour mor. I ti reste fidel pour plizyer dizenn lannen. Pandan sa letan, i ti mars avek Zezi, i ti konmans anons sa bon nouvel dan bann nouvo teritwar e i ti servi lo konsey direkter. Me travay Pyer pa ti fini la. Ver lannen 62 a 64, i ti ganny enspire pour ekri de let, sa i premye e dezyenm let ki Pyer ti ekri ki dan Labib. (2 Pyer 1:13-15) Pyer ti ekri sa de let ler bann Kretyen sa letan ti “sagrinen akoz bann diferan leprev.” (1 Pyer 1:6) Bann move dimoun ti pe konmans ansenny bann fo lansennyman e anmenn bann move kondwit dan kongregasyon. (2 Pyer 2:1, 2, 14) Bann Kretyen ki ti reste Zerizalenm ti pou fer fas avek “lafen tou keksoz,” andotmo bann larme Romen ti pou detri Zerizalenm e osi sistenm Zwif sa letan. (1 Pyer 4:7) Bann let ki Pyer ti ekri ti pou vreman ed bann Kretyen pour andir bann leprev e met zot pare pour fer fas avek bann leprev ki ti pou arive a lavenir. w23.09 26 ¶1-2

Parey Zezi, souvandfwa nou aprann pour obei ler nou fer fas avek bann sityasyon difisil. Par egzanp, ler pandemi COVID-19 ti fek konmanse, eski ou ti vwar li difisil pour obei ler nou ti ganny demande pour aret asiste renyon kot Lasal Rwayonm e pour aret fer predikasyon kazankaz? Lefet ki ou’n obei, sa in protez ou, in ede ki i annan linite dan kongregasyon e sa in fer Zeova kontan. Sa i fer ki aprezan, nou pli byen pare pour obei okenn lenstriksyon ki nou pou gannyen pandan gran ladetres. Nou lavi i kapab depan lo nou lobeisans. (Zob 36:11) Sa rezon pli enportan akoz nou swazir pour obei Zeova i parski nou kontan li e nou anvi fer li plezir. (1 Zan 5:3) Nou pa pou zanmen kapab repey Zeova pour tou sa ki i’n fer pour nou. (Ps. 116:12) Me nou kapab obei li ek bann ki annan lotorite. Ler nou obei, nou montre ki nou saz. Bann dimoun ki saz i fer plezir Zeova.—Prov. 27:11. w23.10 11 ¶18-19

Si en lanz ti koz avek ou, eski ou ti pou ekout li? Ozordi, i annan en lanz ki pe koz “avek tou nasyon, tribi, langaz ek pep.” Ki sa lanz pe dir? “Annan en gran respe pour Bondye e rann li glwar . . . Ador sa Enn ki’n fer lesyel [ek] later.” (Rev. 14:6, 7) Zeova i sa sel vre Bondye e tou dimoun i devret ador li. Nou vreman rekonesan ki i’n donn nou sa loportinite pour ador li dan son gran tanp spirityel. Kisisa sa tanp spirityel Zeova e kote nou kapab trouv bann detay konsernan sa tanp? Sa tanp spirityel i pa en batiman fizik. Tanp spirityel i sa laranzman ki Zeova in met an plas gras a sakrifis Zezi, pour nou kapab ador li dan en fason akseptab. Zapot Pol ti donn en leksplikasyon konsernan sa laranzman dan en let ki i ti ekri dan premye syek, pour bann Kretyen Ebre ki ti pe reste Zide. w23.10 24 ¶1-2

An 522 avan Kris, bann lennmi bann Zwif ti reisi persyad gouvernman Pers pour aret sa travay pour rekonstri tanp Zeova. Me Zekarya ti asir bann Zwif ki Zeova ti pou servi son lespri sen ki pwisan pour retir okenn lobstak ki ti pe anpes zot konstri tanp. An 520 avan Kris, Lerwa Daryis ti donn bann Zwif permisyon pour kontinyen konstri tanp e i ti menm donn zot larzan pour fer sa. I ti osi donn lord bann gouverner pour ed zot. (Ezra 6:1, 6-10) Zeova ti promet son pep ki i ti pou ed zot si zot ti fer sa travay pour rekonstri tanp vin en priyorite dan zot lavi. (Aga. 1:8, 13, 14; Zek. 1:3, 16) Sa ki sa bann profet ti dir ti ankouraz bann Zwif e zot ti rekonmans konstri tanp an 520 avan Kris e zot ti fini rekonstri tanp dan mwens ki senk an. Vi ki bann Zwif ti fer travay Zeova vin en priyorite dan zot lavi menm si zot ti annan en kantite problenm, Zeova ti kontinyen siport zot. Sa ti fer ki zot ti ador Zeova dan lazwa.—Ezra 6:14-16, 22. w23.11 15 ¶6-7

Menm si en kantite dimoun in tann koz lo Abraam, laplipar zot pa konn bokou keksoz lo li. Me ou, ou konn en kantite lo Abraam. Par egzanp, ou konnen ki Labib i dir ki Abraam i “papa tou sa bann ki annan lafwa.” (Rom. 4:11) Me petet ou kapab demann ou lekor, ‘Eski mon kapab swiv legzanp Abraam e annan menm kalite lafwa ki li i ti annan?’ Wi, ou kapab. En fason ki nou kapab annan sa menm lafwa ki Abraam ti annan i par etidye son legzanp. Abraam ti toultan fer sa ki Bondye ti demann li pour fer. I ti al reste dan en lot pei lwen avek son lakour e pour plizyer lannen, i ti reste anba latant. I ti pare pour sakrifye son garson Izaak, ki i ti kontan en kantite. Abraam ti fer tou sa bann keksoz parski i ti annan en lafwa for dan Zeova. Sa lafwa ki Abraam ti annan e bann aksyon ki i ti fer, ti fer li ganny laprouvasyon Zeova e vin son zanmi. (Zak 2:22, 23) Zeova i anvi ki nou tou, enkli ou, nou ganny son laprouvasyon e vin son zanmi. I pour sa rezon ki i ti enspir Pol ek Zak, sa de ekriven Labib pour koz lo legzanp Abraam. w23.12 2 ¶1-2

Ser, aprann pour kominik byen. I enportan pour en Kretyen fer sa. I pour sa rezon ki disip Zak i donn nou sa bon konsey ki dan nou teks pour ozordi. Ler ou ekout lezot byen, ou montre ki ou konpran zot santiman. (1 Pyer 3:8) Si ou pa tro asire si ou konpran sa ki sa dimoun pe dir oubyen santi, demann bann kestyon ki apropriye. Apre, pran letan pour reflesir avan ou koze. (Prov. 15:28) Demann ou lekor: ‘Eski sa ki mon pe al dir i vre e pou ankouraz sa dimoun? Eski sa ki mon pe al dir i montre ki mon annan respe pour sa dimoun e ki mon pe demontre labonte?’ Aprann avek legzanp bann ser matir ki kominik byen. (Prov. 31:26) Ekout byen sa ki zot dir e lafason ki zot koze. Pli ou aprann pour kominik byen, pli ou pou annan bann bon lanmitye avek zot. w23.12 21 ¶12

Ozordi, Zeova i kapab servi nou fanmir, zanmi oubyen bann ansyen pour siport nou. Me ler nou vreman sagren, petet nou anvi reste lwen avek lezot e nou zis anvi reste tousel. I normal pour nou reazir koumsa. Me ki nou kapab fer pour ki Zeova i siport nou? Fer zefor pour pa reste lwen avek lezot. Ler nou reste lwen avek lezot nou kapab konmans konsantre zis lo nou menm ek bann problenm ki nou pe fer fas avek. Sa kalite fason panse i kapab anpes nou fer bann bon desizyon. (Prov. 18:1) Byensir nou tou nou bezwen letan pour nou menm sirtou ler nou pas dan en sityasyon vreman difisil. Me si nou reste lwen avek lezot pour en kantite letan, i kapab ki nou pe rezet led bann dimoun ki Zeova pe servi pour siport nou. Alor, annou aksepte led avek nou fanmir, zanmi e avek bann ansyen. Vwar zot konman sa bann ki Zeova pe servi pour siport nou.—Prov. 17:17; Iza. 32:1, 2. w24.01 24 ¶12-13

Bann Nazireen ti fer en ve pour pa koup zot seve. Sa ti en fason pour montre zot lobeisans anver Zeova. Malerezman, parfwa lezot pa ti apresye bann Nazireen oubyen donn zot sipor. Parfwa en Nazireen ti bezwen annan bokou kouraz pour gard son ve e pour diferan avek lezot. (Amos 2:12) Vi ki nou swazir pour obei Zeova, lezot i remarke ki nou osi nou diferan avek zot. Nou bezwen annan kouraz pour dir avek lezot ki swa kot lekol oubyen dan travay ki nou en Temwen Zeova. Anmezir ki latitid ek konportman bann dimoun dan sa lemonn i vin pli move, i tre probab ki nou pou vwar li pli difisil pour viv dapre bann prensip Labib e pour anons sa bon nouvel avek lezot. (2 Tim. 1:8; 3:13) Me toultan gard antet ki ler nou demontre kouraz e nou diferan avek bann ki pa servi Zeova, nou “fer [Zeova] plezir.”—Prov. 27:11; Mal. 3:18. w24.02 16 ¶7; 17 ¶9

Mazin tou sa kalite dimoun ki ti dan kongregasyon Ronm. Serten ti Zwif, ki ti’n ganny ansennyen pour obei Lalwa Moiz. Me i ti annan lezot dimoun ki ti sorti dan lezot nasyon e zot ti annan lezot koutim. I tre probab ki serten Kretyen ti bann lesklav tandis ki lezot ti bann dimoun lib e petet serten parmi zot ti menm annan bann lesklav. Ki mannyer sa bann Kretyen ti kapab kontinyen demontre lanmour pour kanmarad menm si zot ti diferan? Zapot Pol ti ankouraz zot pour “byen resevwar kanmarad.” Ki Pol ti pe dir? Sa mo ki’n ganny tradwir “byen resevwar” i vedir byen akeyir en dimoun, par egzanp dan ou lakour oubyen konman ou zanmi. Par egzanp, Pol ti dir Filemon ki mannyer pour resevwar Onezim ki ti en lesklav ki ti’n sove. Pol ti dir Filemon: “Byen resevwar li.” (Filem. 17) Prisil ek Akila ti resevwar Apolos ki ti konn mwens keksoz konsernan larelizyon bann Kretyen ki Prisil ek Akila. Zot ti fer sa par “anmenn li avek zot.” (Akt 18:26) Sa bann Kretyen pa ti les bann diferans ki ti annan antre zot kree divizyon antre zot. O kontrer, zot ti byen resevwar kanmarad. w23.07 6 ¶13

Sa rezon prensipal ki ou dedye ou lavi avek Zeova, i akoz ou kontan li. Ou lanmour pa baze zis lo ou santiman. Ou’n aprann pour kontan Zeova ler ou’n ganny “konnesans egzakt” konsernan li ek son plan. (Kol. 1:9) Ler ou’n etidye Labib, sa in konvenk ou (1) ki Zeova i egziste, (2) ki Labib in ganny enspire par Zeova e (3) ki Zeova i servi son lorganizasyon pour akonpli son lavolonte. Bann dimoun ki dedye zot lavi avek Zeova i devret konn bann lansennyman de baz ki dan Parol Bondye e zot devret pe viv dapre bann standar Bondye. Zot fer zot mye pour koz avek lezot lo sa ki zot in aprann. (Mat. 28:19, 20) Zot in devlop plis lanmour pour Zeova e zot vreman anvi ador zis Zeova. Eski pa sanmenm sa ki’n arive avek ou? w24.03 4-5 ¶6-8

Abigel ti marye avek Nabal e Labib i dir ki Nabal ti en zonm brit ki ti konport li dan en move fason. (1 Sam. 25:3) I ti’n bezwen difisil pour Abigel viv avek en msye koumsa. Eski Abigel ti annan loportinite pour sorti dan sa maryaz? Wi. I ti ganny sa loportinite ler David, ki ti pou vin lerwa Izrael, ti vin touy son msye parski son msye ti’n ensilte David ek son bann zonm. (1 Sam. 25:9-13) Abigel ti’n kapab sove e les David touy Nabal me i pa ti fer sa. O kontrer, i ti konvenk David pour pa touy Nabal. (1 Sam. 25:23-27) Akoz i ti fer sa? Abigel ti kontan Zeova e i ti respekte standar Zeova konsernan maryaz. I ti konnen ki maryaz ti en keksoz sakre pour Zeova. I ti anvi fer Bondye plezir e sa ti motiv li pour fer tou sa ki i ti kapab pour sov bann dimoun dan son lakour enkli son msye. I ti azir vitman pour anpes David touy Nabal. w24.03 16-17 ¶9-10

Eski i annan serten frer ek ser dan ou kongregasyon ki pe esey senplifye zot lavi pour zot fer plis pour Zeova? Eski ou konn bann zenn ki pe demontre kouraz e pe montre ki zot diferan avek lezot kot lekol menm si i difisil pour zot fer sa? Eski i annan lezot ki petet pe vwar li difisil pour reste fidel parski zot fanmir pe opoz zot? Annou servi tou loportinite pour ankouraz zot e dir zot ki nou apresye zot kouraz e sa ki zot pe fer pour Zeova. (Filem. 4, 5, 7) Zeova i asire ki nou anvi fer li plezir e ki nou pare pour fer bann sakrifis pour viv an armoni avek sa ve ki nou’n fer pour servi li. I onor nou par donn nou sa loportinite pour montre li ki nou kontan li. (Prov. 23:15, 16) Alor annou determinen pour kontinyen servi Zeova par volonterman donn li nou meyer. w24.02 18 ¶14; 19 ¶16

Imazin sa ki ti arive ver lafen lannen 29, ler Zezi ti konmans son minister lo later. Zezi ek son manman Mari ti’n ganny envite en maryaz Kana. I paret ki Mari ti pe ede pour pran swen avek bann envite. Me pandan sa maryaz, en keksoz ti arive. Diven ti’n fini. Deswit Mari ti al kot son garson e i ti dir: “Diven in fini.” (Zan 2:1-3) Ki Zezi i fer? I fer delo vin en “bon diven.” (Zan 2:9, 10) Zezi ti fer lezot mirak pandan son minister. I ti servi son pouvwar pour ed plizyer milye dimoun. Par egzanp, parmi bann mirak ki Zezi ti fer, i ti donn manze 5,000 zonm e pli tar 4,000 zonm. Si nou enkli bann madanm ek zanfan, i kapab ki an tou Zezi ti donn manze plis ki 27,000 dimoun. (Mat. 14:15-21; 15:32-38) Tou le de fwa, Zezi ti geri bann dimoun ki ti malad.—Mat. 14:14; 15:30, 31. w23.04 2 ¶1-2

Apre ki nou’n pas dan en sityasyon vreman difisil, i annan zour ki petet nou santi nou fay fizikman e emosyonnelman. Parey Eliya, nou kapab santi ki i tro difisil pour nou leve e nou zis anvi dormi. (1 Rwa. 19:5-7) I kapab ki nou bezwen led pour kontinyen reste aktif dan servis Zeova. Dan bann moman koumsa, Zeova i asir nou ki i pou ed nou, parey nou ganny dir dan nou teks pour ozordi. Lerwa David ti ganny sa menm led. Ler David ti fer fas avek bann sityasyon difisil, i ti dir avek Zeova: “Ou lanmen drwat i soutenir mwan.” (Ps. 18:35) Souvan Zeova i siport nou par motiv lezot pour ed nou. Par egzanp, en fwa ler David ti santi li fay, son zanmi Zonatan ti al vizit li pour ankouraz li. (1 Sam. 23:16, 17) Pareyman Zeova ti swazir Elisa pour donn Eliya bann led pratik.—1 Rwa. 19:16, 21; 2 Rwa. 2:2. w24.01 23-24 ¶10-12

Atraver legzanp sa madanm ki reprezant “vre lasazes” ki dan Proverb sapit 9, nou aprann ki Zeova i zenere e i donn nou en kantite bon keksoz. Sa resi i dir ki sa madanm in byen prepar lavyann, i’n melanz son diven e i’n aranz son latab pour akeyir son bann envite. (Prov. 9:2) Osi, dapre verse 4 ek 5, sa madanm ki pe reprezant vre lasazes, “i dir bann ki bet: ‘Vin manz mon dipen.’” Akoz nou devret aksepte lenvitasyon sorti kot sa madanm? Zeova i anvi ki son bann zanfan i vin saz e reste sen e sof. I pa anvi ki nou fer bann fot ki pou fer nou soufer. I pour sa rezon ki “Bondye i anmas lasazes pour bann dimoun drwat.” (Prov. 2:7) Ler nou annan en gran respe pour Zeova, nou pou anvi fer li plezir. Nou ekout son konsey saz e nou kontan pour aplik sa konsey.—Zak 1:25. w23.06 23 ¶14-15

Menm si nou pa kapab fer tou sa ki nou ti ava kontan dan servis Bondye, nou kapab asire ki Zeova i apresye zefor ki nou fer pour fer li plezir. Ki mannyer nou konn sa? Dan letan Zekarya, Zeova ti demann son profet pour fer en kouronn avek sa lor ek larzan ki bann Zwif ki ti reste Babilonn ti’n anvoy pour bann Zwif ki reste Zerizalenm. (Zek. 6:11) Sa “zoli kouronn” ti pou ganny servi pour fer bann Zwif “rapel” sa kontribisyon zenere ki bann Zwif ki reste Babilonn ti’n fer. (Zek. 6:14, not.) Nou kapab asire ki Zeova pa pou zanmen oubliy bann zefor ki nou kontinyen fer pour servi li dan bann moman difisil. Dan sa bann dernyen zour, nou pou kontinyen fer fas avek problenm e keksoz i kapab vin pli pir dan lavenir. (2 Tim. 3:1, 13) Me sa pa devret fer nou tro enkyet. Rapel sa ki Zeova ti dir son pep dan letan Agay. I ti dir: “Mon avek zot . . . Pa bezwen per.” (Aga. 2:4, 5) Nou osi, nou kapab asire ki Zeova pou avek nou tan ki nou fer nou mye pour fer son lavolonte. w23.11 19 ¶20-21

Zeova ti’n kapab fer sir ki bann fot ki Pyer ti fer pa ganny ekrir dan Labib. Me i ti fer ekri pour ki nou kapab aprann avek legzanp Pyer. (2 Tim. 3:16, 17) Ler nou aprann konsernan Pyer, ki ti en zonm ki ti annan febles ek santiman parey nou, sa i kapab ed nou konpran ki Zeova pa ekspekte ki nou fer keksoz dan en fason ki parfe. Zeova i anvi ki nou persevere setadir ki nou kontinyen servi li menm si nou annan bann febles. Akoz i enportan ki nou kontinyen servi Zeova? Apre ki nou santi ki nou’n reisi sirmont en febles ki nou ti annan, i kapab ki nou fer sa fot ankor. Me nou bezwen kontinyen fer zefor pour amelyore. Nou tou nou dir oubyen fer bann keksoz ki pli tar nou regrete. Me kantmenm sa, Zeova pou ed nou pour kontinyen amelyore si nou pa abandonnen. (1 Pyer 5:10) Lafason ki Zezi ti demontre konpasyon anver Pyer i kapab motiv nou pour kontinyen servi Zeova. w23.09 20-21 ¶2-3

Parey nou vwar dan teks pour ozordi, Zezi ti’n kapab geri Lazar. Me Zezi ti anvi fer en keksoz pli remarkab. I ti dir: “Ou frer pou resisite.” I ti osi dir: “Mwan menm rezireksyon ek lavi.” (Zan 11:23, 25) Bondye in donn Zezi sa pouvwar pour resisit bann dimoun ki’n mor. Pli boner Zezi ti resisit en pti fiy pa bokou letan apre ki sa pti fiy ti’n mor. I ti osi resisit en garson sa menm zour ki sa garson ti mor. (Lik 7:11-15; 8:49-55) Me eski i ti pou kapab resisit en dimoun ki’n mor pour kat zour e ki son lekor in konmans pouri? Mari, ki ti sa lot ser Lazar, ti al zwenn Zezi e i ti dir Zezi sa menm keksoz ki son ser ti’n dir. I ti dir: “Senyer si ou ti la, mon frer pa ti pou’n mor.” (Zan 11:32) Ler Zezi ti vwar e tann Mari ek lezot avek li pe plere, i ti vreman sagren li osi. Vi ki son leker ti fermal, son larm ti koule. Zezi i konnen ki kantite i fermal ler en dimoun ki nou kontan i mor. Nou kapab asire ki i vreman anvi retir tou sa ki fer nou plere. w23.04 10-11 ¶12-13