Fevriye

Ler Lerwa Ezekya ti vreman malad, i ti sipliy Zeova pour geri li e Zeova ti fer sanmenm. (2 Rwa. 20:1-6) De lot kote, ler zapot Pol ti sipliy Zeova pour tir ‘en pikan ki ti pe pik li,’ Zeova pa ti geri li. (2 Kor. 12:7-9) Lerwa Erod ti anvi touy zapot Zak ek zapot Pyer. Zak ti ganny touye e en lanz ti sov Pyer. (Akt 12:1-11) Nou kapab demann nou lekor, ‘Akoz Zeova ti sov Pyer e pa Zak?’ Labib pa dir. Me nou kapab asire ki fason fer Zeova “pa zanmen enzis.” (Det. 32:4) Parfwa larepons nou lapriyer i kapab pa sa enn ki nou pe ekspekte. Me vi ki nou annan konfyans ki Zeova i toultan azir avek lanmour e i toultan zis, nou pa pou konplent konsernan lafason ki i swazir pour reponn nou lapriyer.—Zob 33:13. w23.11 21 ¶6

Zak, sa ekriven ki ti’n ganny enspire pour ekri sa verse, ti dir ki en dimoun ki saz i “pare pour obei.” Reflesir lo sa ki sa verse i vedir. Nou devret anvi e pare pour obei bann ki Zeova in donn serten lotorite. Me Zeova pa ekspekte ki nou obei en dimoun ki demann nou pour dezobei Son bann lord. (Akt 4:18-20) Petet nou vwar li pli fasil pour obei Zeova olye en imen. Apre tou, Zeova i toultan donn bann lenstriksyon ki parfe. (Ps. 19:7) Me sa i pa leka avek bann imen parski bann imen ki annan lotorite i enparfe. Kantmenm sa, nou Papa ki dan lesyel in donn bann paran, bann zofisye gouvernman ek bann ansyen dan kongregasyon serten lotorite. (Prov. 6:20; 1 Tesa. 5:12; 1 Pyer 2:13, 14) Alor ler nou obei zot, nou pe obei Zeova. w23.10 6 ¶2-3

En fason ki nou kapab ranforsi nou lafwa i ler nou reflesir lo ki kantite Zeova i pwisan. I annan sa pouvwar pour akonpli tou son bann promes. Apre tou, i Bondye Tou Pwisan. (Zob 42:2; Mark 10:27; Efe. 3:20) I ti promet Abraam ek Sara ki zot ti pou ganny en garson menm si zot ti aze. (Zen. 17:15-17) I ti osi promet Abraam ki son desandans ti pou ganny donnen pei Kanaan. Pandan bann lannen ki bann Izraelit, ki ti desandans Abraam ti lesklav Lezip, i ti paret konmsi sa promes pa ti pou zanmen vin vre. Me i ti vin vre. I ti dir Mari, ki ti en vyerz ki i ti pou donn nesans son Garson. Sa ti pou akonpli en promes ki Zeova ti’n fer plizyer milye lannen pli boner dan zarden Edenn. (Zen. 3:15) Ler nou medit lo tou bann promes ki Zeova in fer e lo lafason ki i’n akonpli sa bann promes, nou konpran ki Zeova i vreman pwisan. Sa pou fer nou annan plis lafwa dan sa promes konsernan en nouvo lemonn.—Zoz. 23:14; Iza. 55:10, 11. w23.04 28 ¶10-12

Zeova ti reponn lapriyer David e i ti sov li. (1 Sam. 19:10, 18-20; 2 Sam. 5:17-25) Nou osi nou kapab annan sa menm konfyans. (Ps. 145:18) I kapab ki Zeova pa reponn nou lapriyer lafason ki nou, nou ekspekte. Zapot Pol ti demann Bondye pou tir en ‘pikan ki ti pe pik li.’ Trwa fwa Pol ti priy spesifikman konsernan sa problenm. Eski Zeova ti reponn sa lapriyer? Wi. Me pa dan sa fason ki Pol ti anvi. Olye tir sa problenm, Zeova ti donn Pol sa lafors ki i ti bezwen pour kontinyen servi li fidelman. (2 Kor. 12:7-10) Parfwa i kapab ki Zeova i reponn nou lapriyer dan en fason ki nou pa ti pe ekspekte. Me nou kapab asire ki Zeova i konn sa pli bon fason pour ed nou. I kapab menm “fer bokou bokou plis ki tou sa ki nou kapab demande oubyen imazinen.” (Efe. 3:20) I pour sa rezon ki son larepons i kapab vin dan en moman ouswa dan en fason ki nou pa ti pe ekspekte. w23.05 8-9 ¶4-6

I ti pou byen si tanzantan nou reflesir lo sa promes konsernan rezireksyon. Akoz? Parski nou pa zanmen konnen kan ki nou kapab ganny en maladi grav oubyen kan ki en dimoun ki nou kontan i kapab mor en sel kou. (Ekle. 9:11; Zak 4:13, 14) Nou lespwar konsernan rezireksyon i kapab ed nou fer fas avek bann problenm koumsa. (1 Tesa. 4:13) Labib i asir nou ki nou Papa ki dan lesyel i konn nou byen e i kontan nou en kantite. (Lik 12:7) Reflesir lo ki kantite Zeova i bezwen konn nou byen pour li kapab resisit nou avek sa menm personnalite ek souvenir ki nou ti annan. Zeova i kontan nou en kantite e in fer li posib pour nou viv pour touzour. Menm si nou mor, i pou resisit nou. Me akoz nou kapab annan konfyans dan sa promes konsernan rezireksyon? Parski nou asire ki sa enn ki fer sa promes i anvi akonpli sa promes e i annan sa pouvwar oubyen abilite pour fer li. w23.04 8-9 ¶2-4

Zozef ek Mari ti osi travay ansanm pour gard zot lanmitye avek Zeova for. Zot ti konpran ki i enportan pour ador Zeova ansanm konman en fanmir. (Lik 2:22-24; 4:16) Sa i en bon legzanp pour bann koup ki’n marye! Si parey Zozef ek Mari, ou annan zanfan, i kapab ki i difisil pour asiste renyon oubyen pour fer ladorasyon fanmir. I kapab pli difisil pour trouv letan pour etidye oubyen priye konman en koup. Me gard antet ki ler zot ador Zeova ansanm, zot vin pli pros avek Zeova e zot vin pli pros avek kanmarad. Alor fer zot ladorasyon vin en priyorite. Si i annan problenm dan ou maryaz, i kapab ki ou pa anvi fer ladorasyon fanmir ansanm. Alor petet zot kapab etidye en keksoz ki pa tro long e ki agreab. Sa i kapab ed zot pour kontan kanmarad plis e pour anvi ador Zeova ansanm. w23.05 22 ¶7-8

Ki mannyer respe ki Obadya ti annan pour Zeova ti ed li? Premyerman, sa respe ki Obadya ti annan pour Zeova ti fer li vin en dimoun onnet e diny konfyans. Sa ti fer ki lerwa ti met li ansarz pale. (Konpar Neemya 7:2.) Sa respe ki Obadya ti annan pour Zeova ti osi ed li pour annan en kantite kouraz e sa i en kalite ki i ti vreman bezwen. I ti viv dan sa letan kot move Lerwa Aab ti diriz Izrael. (1 Rwa. 16:30) Osi, madanm Aab ki ti apel Zezabel ti ador Baal. Zezabel ti sitan ay Zeova, ki i ti esey anpes tou dimoun dan sa dis tribi Izrael ador Zeova. I ti menm touy en kantite profet Bondye. (1 Rwa. 18:4) Ler Zezabel ti pe rod bann profet Bondye pour touye, Obadya ti kasyet 100 profet “par group 50 dan en kavern e [i] ti kontinyen anmenn dipen ek delo pour zot.” (1 Rwa. 18:13, 14) Si Zezabel ti konnen ki Obadya ti pe fer, i ti pou’n fer touy Obadya. Byensir, i kapab ki Obadya ti per e i pa ti anvi mor. Me Obadya ti kontan Zeova e i ti kontan bann ki ti servi Zeova plis ki i ti kontan son prop lavi. w23.06 16 ¶9-10

Zeova pe kontinyen diriz son pep ozordi parey i ti fer dan lepase. I fer sa atraver son Parol ek son Garson, ki sef kongregasyon. Eski nou annan levidans ki Bondye pe osi kontinyen servi bann imen pour gid son pep dan nou letan? Wi. Annou vwar par egzanp sa ki ti arive apre lannen 1870. Charles Taze Russell ek son bann koleg ti konmans konpran ki lannen 1914 ti pou en lannen enportan pour Rwayonm Bondye. (Dan. 4:25, 26) Zot ti konpran sa parski zot ti’n fer resers dan Labib e zot ti annan konfyans ki bann profesi Labib pou vin vre. Eski Zeova ti pe gid zot dan zot bann resers? I kler ki Zeova ki ti pe gid zot parski sa ki ti arive an 1914 ti montre ki Rwayonm Bondye ti’n konmans dirize. Premye Lager Mondyal ti konmanse e i ti annan bann lepidemi, tranblemandter ek mankman manze. (Lik 21:10, 11) I kler ki Zeova ki ti pe servi sa bann zonm senser pour gid son pep. w24.02 22 ¶11

Konman pep Zeova, nou konnen ki Zeova i kontan nou e ki i anvi nou annan sa pli bon lavi. (Rom. 8:35-39) Nou osi asire ki ler nou aplik bann prensip Labib, sa pou toultan anmenn byenfe pour nou. (Iza. 48:17, 18) Me ki mannyer nou reazir si nou fer fas avek bann problenm ki nou pa ti pe ekspekte? Par egzanp, i kapab arive ki en manm nou fanmir i dezapwent nou. Petet nou annan en maladi grav ki anpes nou fer sa ki nou ti ava kontan dan servis Zeova. I kapab osi ki nou pe fer fas avek move lefe ki dezas natirel i anmennen. Oubyen nou pe ganny persekite akoz nou krwayans. Ler nou fer fas avek bann problenm koumsa, petet nou demann nou lekor: ‘Akoz sa pe arive avek mwan? Eski mon’n fer en keksoz mal? Eski sa i vedir ki Zeova pa pe beni mwan?’ Eski ou’n deza santi ou koumsa? Si wi, pa bezwen dekouraze. En kantite serviter fidel Zeova in santi koumsa.—Ps. 22:1, 2; Aba. 1:2, 3. w23.04 14 ¶1-2

Ler nou ganny tante, deswit nou rezet okenn panse oubyen aksyon ki kapab gat nou lanmitye avek Bondye. Zeova i ekspekte ki nou ‘obei li avek tou nou leker.’ (Rom. 6:17) Sa ki i demann nou pour fer i toultan bon pour nou e nou pa kapab sanz son bann lalwa. (Iza. 48:17, 18; 1 Kor. 6:9, 10) Dyab i servi vyolans ek presyon pour fer li difisil pour nou obei bann lalwa ek standar Zeova. Satan i anvi devor nou, setadir gat nou lanmitye avek Zeova. (1 Pyer 5:8) Bann Kretyen dan premye syek ti ganny menase, bate e touye parski zot ti determinen pour reste fidel avek Zeova. (Akt 5:27, 28, 40; 7:54-60) Ozordi Satan i ankor pe servi persekisyon pour esey fer nou dezobei bann lalwa ek standar Zeova. Nou kapab vwar sa dan sa fason kriyel ki nou bann frer ek ser Larisi e dan lezot pei, pe ganny opoze. Partou dan lemonn, bann frer ek ser pe ganny persekite dan en fason oubyen en lot. Apard ki persekisyon, Satan i osi servi “bann riz.”—Efe. 6:11. w23.07 15-16 ¶6-9

Pli ou etidye Parol Bondye, pli ou kontan Zeova plis. Sa lanmour i motiv ou pour aplik sa ki ou aprann. Sa i fer ou fer bann pli bon desizyon ki baze lo bann prensip Labib. Ou aprann pour mazin e fer bann bon keksoz parski ou anvi fer plezir Bondye. Zis parey en zanfan i swiv legzanp son paran, ou pe swiv legzanp ou Papa ki dan lesyel. (Efe. 5:1, 2) Nou kapab demann nou lekor: ‘Eski la konmela mon kontan Zeova plis ki ler mon ti fek vin en Kretyen? Eski apre mon batenm, mon fason panse ek mon aksyon in vin pli parey pour Zeova sirtou ler mon demontre lanmour anver mon bann frer ek ser?’ Si “sa lanmour ki ou ti annan o konmansman” i nepli for parey avan, pa dekouraze. En keksoz en pe parey ti arive avek bann Kretyen dan premye syek. Kantmenm sa, Zezi pa ti rezet zot e i pa pou rezet nou. (Rev. 2:4, 7) I konnen ki nou kapab retrouv sa lanmour ki nou ti annan ler nou ti fek aprann laverite. w23.07 8 ¶2-3

Zapot Pyer ti fer bann fot. Premyerman, Pyer ti fer vantar e i ti dir ki i pou reste fidel avek Zezi menm si lezot zapot i abandonn Zezi. (Mark 14:27-29) Apre, plizyer fwa Pyer pa ti kapab reste eveye. (Mark 14:32, 37-41) Apre Pyer ti abandonn Zezi ler en lafoul avek lepe ek baton ti vin aret Zezi. (Mark 14:50) Finalman, trwa fwa Pyer ti dir ki i pa konn Zezi e i ti menm fer en serman ki i pa konn Zezi. (Mark 14:66-71) Ki mannyer Pyer ti reazir ler i ti realize ki i ti’n fer en pese grav? I pa ti kapab tenir e i ti plere. (Mark 14:72) Olye reprimann Pyer, Zezi ti dir son zanmi ki i pou ganny bann pli gran responsabilite. (Zan 21:15-17) Pyer ti konnen ki i ti’n fer en pese grav me i ti kontinyen esey fer sa ki byen. Akoz? Parski i ti konnen ki Zezi i ankor kontan li. Ki nou aprann? Zeova i anvi ki nou asire ki i kontan nou e ki i pare pour pardonn nou.—Rom. 8:38, 39. w24.03 18-19 ¶13-15

Imoralite seksyel i kapab anmenn laont, i kapab fer en dimoun santi ki i pa vo nanryen. I kapab anmenn en lansentman ki personn pa ti anvi e i kapab kas fanmir. I kler alor, ki i saz pour rezet lenvitasyon sa madanm bet. Apard ki gat zot lanmitye avek Zeova, en kantite dimoun ki komet imoralite seksyel i ganny bann maladi ki kapab touy zot. (Prov. 7:26) Proverb 9:18 i dir: “Son bann envite i dan fon Latonm.” Me akoz en kantite dimoun i aksepte lenvitasyon sa madanm bet menm si sa i anmenn en kantite problenm? (Prov. 9:13-18) Enn bann keksoz ki fer bokou dimoun aksepte lenvitasyon sa madanm bet, i pornografi. Serten i krwar ki i pa mal pour get pornografi. O kontrer en dimoun ki get pornografi i fer ditor son prop lekor. I perdi respe pour son lekor e pour lezot e i vreman difisil pour li aret get pornografi. Enn fwa ki en dimoun in vwar bann portre imoral, i difisil pour li oubliye. Osi, pornografi pa ed en dimoun pour rezet bann move dezir. O kontrer i fer sa bann dezir vin pli for. (Kol. 3:5; Zak 1:14, 15) Sa i fer ki en kantite dimoun ki get pornografi, i komet imoralite seksyel. w23.06 23 ¶10-11

Menm si parfwa lezot nasyon i opoz Pouvwar Mondyal Angle ek Ameriken, zot pa pou ranplas li. Nou konn sa parski “sa ros” ki reprezant Rwayonm Bondye pou kraz sa lipye. Sa lipye i sa bout dan sa stati ki reprezant Pouvwar Mondyal Angle ek Ameriken. (Dan. 2:34, 35, 44, 45) Eski ou asire ki sa profesi ki Danyel ti koz lo la konsernan sa lipye ki an feray ek larzil pe ganny akonplir? Si wi, sa pou annan en lefe lo lafason ki ou viv ou lavi. Ou pa pou konsantre lo esey fer plis larzan oubyen tay deryer bann keksoz materyel parski ou konnen ki byento sa move lemonn pou ganny detrir. (Lik 12:16-21; 1 Zan 2:15-17) Ler nou konpran sa profesi, sa pou osi ed nou vwar ki i enportan pour anons sa bon nouvel e ansenny dimoun. (Mat. 6:33; 28:18-20) Apre ki ou’n etidye sa profesi, petet ou kapab demann ou lekor sa kestyon: ‘Eski bann desizyon ki mon fer i montre ki mon asire ki byento Rwayonm Bondye pou detri tou gouvernman imen?’ w23.08 11 ¶13-14

Annan limilite e aksepte ki ou pa pou kapab fer tou sa ki ou anvi la konmela, petet akoz ou laz, ou lasante oubyen ou sirkonstans pa permet ou. Parey Barzilay, ou bezwen pare pour dir non si ou lasante ouswa ou laz pou fer li difisil pour ou fer en servis. (2 Sam. 19:35, 36) Parey Moiz, aksepte led e ler i apropriye, donn lezot serten responsabilite. (Egz. 18:21, 22) Si ou annan limilite, ou pa pou ekspekte ki ou fer plis ki sa ki ou kapab fer. Parski si ou fer sa, ou pou fatige. Osi, nou pa devret santi nou responsab pour bann move desizyon ki lezot i fer. Nou pa kapab fer desizyon pour lezot e nou pa toultan kapab anpes zot ganny konsekans zot move desizyon. Par egzanp, i kapab ki avek letan ou garson oubyen ou fiy i deside pour aret servi Zeova. Sa desizyon i kapab fer ou konman paran vreman sagren. Me bann paran ki blanm zot lekor pour bann move desizyon ki zot zanfan i fer, pe met en fardo lo zot lekor. Sa i pa en fardo ki Zeova i ekspekte zot anmennen. w23.08 29 ¶11-12

Sanmson ti enparfe parey nou. Alor parfwa i ti fer bann move desizyon. Enn bann desizyon ki i ti fer, ti anmenn bann move konsekans. Apre ki Sanmson ti’n servi konman en ziz pour en pe letan, i “ti tonm anmoure avek en madanm ki ti apel Dalila ki ti reste dan Vale Sorek.” Oparavan, Sanmson ti’n fiyanse avek en madanm Filisten me “Zeova ki ti’n pous li pour pran sa desizyon, parski Bondye ti pe rod en loportinite pour atak bann Filisten.” Pli tar ler Sanmson ti al Gaza, ki ti en lavil Filisten, i ti reste dan lakaz en prostitye. Ler i ti laba, Bondye ti donn li sa lafors pour tir baro lavil e sa ti fer sa lavil vin fay. (Ziz 14:1-4; 16:1-3) Me son relasyon avek Dalila ti diferan. I tre probab ki Dalila ti en Izraelit. Dalila ti aksepte en gro sonm larzan ki bann Filisten ti donn li pour li trai Sanmson. w23.09 5 ¶12-13

Ler nou annan bon zizman, sa i kapab ed nou pour annan ladouser. En dimoun ki annan bon zizman i annan kontrol lo son lekor ler lezot i kestyonn li konsernan son krwayans. Annou vwar en legzanp. Ler nou vwar en iceberg nou vwar zis sa pti bout ki par lao delo, me pli gro bout sa iceberg i anba delo. Dan menm fason ler en dimoun i demann nou en kestyon souvandfwa nou pa konnen akoz i pe demann nou sa kestyon. Alor avan nou reponn i ti pou byen ki nou realize ki nou pa vreman konnen kwa ki motiv sa dimoun pour demann sa kestyon. (Prov. 16:23) Annou vwar ki mannyer Gideonn ti reponn bann zonm Efraim. Bann zonm Efraim ti ankoler e zot ti demann Gideonn akoz ki i pa ti’n apel zot pli boner pour zot vin lager avek bann lennmi Izrael. Akoz zot ti sitan ankoler? Petet zot ti ofanse. Me Gideonn ti annan bon zizman, i ti esey konpran akoz ki zot ti sitan ankoler e i ti reponn zot avek ladouser. Ki ti arive apre? Larepons ki i ti donn zot ti fer zot “aret ankoler.”—Ziz 8:1-3. w23.09 16 ¶8-9

Zeova ek Zezi i annan sa pli bon relasyon ki egziste ant en papa ek en garson. San dout, i ti vreman fermal pour Zeova vwar son Garson ganny trete dan en move fason, ganny rezete e soufer. En paran ki son zanfan in mor, i konn byen douler ki en paran i santi ler son zanfan i mor. Menm si nou annan konfyans dan sa promes konsernan rezireksyon, ler en dimoun ki nou kontan i mor, nou leker i fermal. Sa legzanp i ed nou pour konpran ki mannyer Zeova ti santi sa zour prentan lannen 33, ler i ti pe get son Garson pe soufer e mor. (Mat. 3:17) Depi ozordi ziska zour Memoryal, esey etidye plis konsernan ranson dan ou letid personnel oubyen dan ladorasyon fanmir. Zour Memoryal, pa oubliye pour get sa video ladorasyon bomaten pour Memoryal. Ler nou prepar nou leker pour Memoryal, nou pou kapab ed lezot pour ganny bann byenfe zot osi.—Ezra 7:10. w24.01 11 ¶10-12

En fason ki nou kapab ganny lafors avek Zeova i ler nou koz avek li dan lapriyer. Zeova pou reponn nou lapriyer par donn nou sa lafors ki “pli pwisan ki nou prop lafors.” (2 Kor. 4:7) Nou osi kapab ganny lafors ler nou lir son Parol e medit lo la. (Ps. 86:11) Sa ki Zeova i dir nou dan Labib i “pwisan.” (Ebr. 4:12) Ler ou priy Zeova e lir son Parol, ou pou ganny sa lafors ki ou bezwen pour andire, pour gard ou lazwa oubyen pour desarz en responsabilite ki difisil. Annou vwar ki mannyer Zeova ti ed profet Zonas pour annan lafors. Ler Zeova ti donn li en responsabilite ki difisil, Zonas ti sov lwen avek Zeova. Sa ti fer ki i ti met son lavi ek lavi lezot an danze pandan en tanpet e i ti pros pour mor. Apre ki i ti’n ganny zete dan delo, en pwason ti anval li e i ti trouv li dan en landrwa ki fernwanr e fer per. Ler Zonas ti li tousel dan vant sa pwason, ki i ti fer pour li ganny kouraz? I ti priy Zeova.—Zon. 2:1, 2, 7. w23.10 13 ¶4-6

Menm si zapot Pyer ti ekri sa bann let pour bann Kretyen dan premye syek, Zeova ti fer sir ki sa de let i form parti Labib. Alor nou osi nou kapab benefisye avek sa de let. (Rom. 15:4) Bann dimoun otour nou pa krwar dan bann profesi Labib. I kapab ki nou bann opozan i monk nou parski nou pe esper lafen sa lemonn depi bokou lannen. Serten ki kritik nou i dir ki lafen pa pou zanmen arive. (2 Pyer 3:3, 4) Ler nou tann dimoun dan predikasyon, kot travay oubyen nou bann manm fanmir dir sa, sa i kapab afebli nou lafwa. Me sa ki Pyer ti dir i kapab ed nou. I kapab paret ki Zeova i dousman pour met en lafen avek sa move lemonn. Me parol Pyer i kapab ed nou pour annan en bon pwennvi akoz i rapel nou ki lafason ki Zeova i konsider letan i vreman diferan avek lafason ki bann imen i konsider letan. (2 Pyer 3:8, 9) Pour Zeova, mil an i parey en zour. Zeova i pasyan e i pa oule ki personn i ganny detrir. Par kont, ler son zour zizman pou arive, sa move lemonn pou bezwen fini. w23.09 26-27 ¶2-5

Akoz zapot Pol ti ekri sa let pour bann Kretyen Ebre ki ti pe reste Zide? I kapab ki i ti fer sa pour de rezon. Premyerman, i ti fer sa pour ankouraz zot. Laplipar parmi zot ti’n grandi dan larelizyon Zwif e i kapab ki bann sef larelizyon Zwif ti sikann zot akoz zot ti’n vin Kretyen. Akoz sa bann sef larelizyon Zwif ti fer sa? Parski bann Kretyen ti napa en tanp pour ador Bondye ladan, zot ti napa en lotel pour ofer sakrifis pour Bondye e zot ti napa pret pour servi zot. Sa ti’n kapab dekouraz bann disip Kris e afebli zot lafwa. (Ebr. 3:12, 14) Petet serten ti’n menm kapab mazin pour retourn dan larelizyon Zwif. Dezyenmman, Pol ti dir ki sa bann Kretyen Ebre pa ti pe fer zefor pour manz bann “manze solid,” setadir pour konpran bann nouvo lansennyman oubyen bann lansennyman profon ki dan Parol Bondye. (Ebr. 5:11-14) I ti kler ki i ti annan serten ki ti ankor pe swiv Lalwa Moiz. w23.10 24-25 ¶3-4

Serten madanm i swazir pour pa marye. (Mat. 19:10-12) Nou kapab asire ki Zeova ek Zezi pa krwar ki sa bann ser pa vo nanryen zis akoz zot selibater. Bann ser selibater partou dan lemonn i annan en bon lenfliyans dan kongregasyon. Sa lanmour ek lentere senser ki zot demontre, i fer zot vin bann ser ek manman spirityel pour lezot dan kongregasyon. (Mark 10:29, 30) Serten in vin bann serviter a plen tan. Bann ser dan kongregasyon i fer en kantite dan sa travay predikasyon ki pe ganny fer partou dan lemonn. (Ps. 68:11) Eski ou kapab fer plan la konmela pour ou pran servis a plen tan dan lavenir? Petet ou kapab vin en pionye, en volonter dan travay konstriksyon pour lorganizasyon Temwen Zeova oubyen en Betelit. Koz avek Zeova konsernan ou lobzektif. Koz avek lezot ki’n atenn en lobzektif parey e demann zot ki ou bezwen fer pour ou kalifye pour pran sa servis. Apre fer en plan ki pou ed ou atenn sa lobzektif. Si ou vin en serviter a plen tan, sa pou fer li posib pour ou fer lezot keksoz eksitan dan servis Zeova. w23.12 22 ¶16-17

Vi ki gran ladetres i vreman pros, nou realize ki i vreman enportan pour obei sa lord pour partisip dan sa travay predikasyon. Me nou kapab vwar li difisil pour fer sa travay predikasyon vin sa keksoz pli enportan dan nou lavi, si nou annan problenm larzan oubyen si dimoun pe opoz sa travay predikasyon. Kwa ki kapab ed nou fer lavolonte Bondye vin sa keksoz pli enportan dan nou lavi? Nou bezwen annan konfyans ki “Zeova Sef larme” i avek nou. I pou ed nou si nou kontinyen met lentere Rwayonm avan sa ki pour nou. Alor i napa nanryen pour nou per. (Aga. 2:4) Zeova i anvi ki nou konsantre lo sa travay ki sov lavi par kontinyen fer disip. Agay ti ankouraz pep Zeova pour oubliy sa ki ti’n arive e rekonmans zot servis sakre konmsi zot pe met fondasyon tanp ankor. Zeova ti promet ki si zot ti fer sa, i ti pou “beni zot.” (Aga. 2:18, 19) Nou osi nou kapab asire ki Zeova pou beni bann zefor ki nou fer, si nou fer sa travay ki i’n donn nou vin en priyorite. w23.11 16 ¶8; 17 ¶11

Dan sa let ki zapot Pol ti ekri pour bann Kretyen dan lavil Ronm, Pol ti dir ki tou dimoun i fer pese. Alor, ki en dimoun i kapab fer pour li ganny konsidere konman drwat e san defo e ganny laprouvasyon Bondye? Pol ti servi legzanp Abraam pour ed bann Kretyen konn larepons sa kestyon. Ler Zeova ti dir ki Abraam ti en dimoun drwat, Abraam ti pe reste dan pei Kanaan. Akoz sa letan Zeova ti kapab dir ki Abraam ti en dimoun drwat? Eski i akoz Abraam ti pe obei Lalwa Moiz? Non. Ki mannyer nou konn sa? (Rom. 4:13) Lalwa Moiz ti ganny donnen avek nasyon Izrael plis ki 400 an apre ki Bondye ti dir ki Abraam ti en dimoun drwat. Alor, kwa ki ti fer li posib pour Bondye dir ki Abraam ti en dimoun drwat? Zeova ti demontre labonte ekstraordiner anver Abraam e i ti konsider li konman en dimoun drwat akoz son lafwa.—Rom. 4:2-4. w23.12 3 ¶4-5

Sa zour swar apre ki profet Natann ti’n dir David bann parol ki dan nou teks pour ozordi, Zeova ti dir Natann ki David pa ti pou sa enn ki ti pou konstri sa tanp. (1 Kron. 17:3, 4, 11, 12) Ki mannyer David ti reazir ler i ti ganny sa mesaz? I ti anmas larzan e rod bann materyo ki son garson Salomon ti pou bezwen pour fer sa proze. (1 Kron. 29:1-5) Deswit apre ki David ti’n ganny dir ki pa li ki pou konstri tanp, Zeova ti fer en lalyans avek li. Zeova ti promet David ki enn son desandans ti pou dirize pour touzour. (2 Sam. 7:16) Dan nouvo lemonn, David pou vreman kontan ler i pou aprann ki sa Lerwa ki pou pe dirize pour mil an i Zezi e ki Zezi i enn son desandans. Sa resi i ed nou pour vwar ki menm si nou pa kapab fer tou sa ki nou anvi pour Zeova, nou Bondye i kapab donn nou lezot bon keksoz ki nou pa ti pe ekspekte. w23.04 16 ¶8-10

Serten parti oubyen liv spesifik dan Labib i kapab rekonfort ou ler ou per. Par egzanp, ou kapab trouv bann lankourazman dan liv Zob, Psonm ek Proverb e osi avek sa ki Zezi i dir dan Matye sapit 6. Ler ou priy Zeova e ou lir son Parol ou pou santi ki Zeova pe rekonfort ou. Nou kapab asire ki Zeova pou ed nou ler nou pas dan bann moman difisil. Nou pa pou zanmen tousel. (Ps. 23:4) Zeova i promet ki i pou protez nou, fer nou vin stab, siport nou e rekonfort nou. Izai 26:3 i dir sa parol konsernan Zeova: “Ou pou protez bann ki depan lo ou konpletman, ou pou toultan donn zot lape, parski zot annan konfyans dan ou.” Alor annan konfyans dan Zeova e fer tou sa ki ou kapab pour ganny led ki i donnen. Si ou fer sa, ou pou reganny ou lafors menm ler ou fer fas avek bann sityasyon difisil. w24.01 25 ¶16-17

Reflesir lo sa profesi ki dan sa verse: “Okenn zarm ki’n ganny fer kont ou pa pou reisi”! Sa profesi pe ganny akonplir ozordi. Sa bann parol swivan i osi aplik pour nou letan: “Tou ou bann garson pou ganny ansennyen par Zeova, e lape ou bann garson pou en kantite. Ou pou solidman ganny etabli dan ladrwatir. . . . Ou pa pou per nanryen e ou pou napa rezon pour terifye, parski i pa pou vin pros avek ou.” (Iza. 54:13, 14) Menm Satan, ki “Bondye sa lemonn” pa kapab aret sa travay ki pep Zeova pe fer pour ansenny lezot lo Zeova. (2 Kor. 4:4) Ladorasyon pir in ganny retabli e i pa pou zanmen ganny sali ankor. I pou reste pour touzour. Okenn zarm ki ganny fer kont nou pa pou reisi! w24.02 4 ¶10

Konman bann Kretyen, nou pran o serye nou ve ki nou’n fer avek Zeova. Sa i annan en lefe lo nou bann desizyon ek bann keksoz ki nou fer ki konsern lafanmir. Nou fer nou mye pour pran swen avek nou fanmir me nou pa zanmen met sa ki nou fanmir i anvi avan sa ki Zeova i demann nou pour fer. (Mat. 10:35, 36; 1 Tim. 5:8) Parfwa, i kapab ki nou bezwen fer bann desizyon ki nou fanmir pa kontan pour nou fer Zeova plezir. Zeova i Loter lafanmir e i anvi ki nou annan en lavi fanmir ki ere. (Efe. 3:14, 15) Pour nou vreman ere, nou bezwen fer sa ki Zeova i demann nou pour fer. Ou kapab asire ki Zeova i apresye bann sakrifis ki ou fer pour servi li anmezir ki ou pran swen avek ou fanmir e ou tret zot avek lanmour ek respe.—Rom. 12:10. w24.02 18 ¶11, 13