Desanm

Eski Zeova i annan sa pouvwar pour resisit bann dimoun ki’n mor? Definitivman! Parski i “sa enn Tou Pwisan.” (Rev. 1:8) Zeova i sitan pwisan ki i kapab ranport laviktwar lo tou son lennmi, menm lanmor. (1 Kor. 15:26) En lot rezon akoz nou konnen ki Bondye i kapab resisit bann dimoun ki’n mor, i akoz i pa oubliy nanryen. I konn tou bann zetwal. (Iza. 40:26) I osi rapel bann dimoun ki’n mor. (Zob 14:13; Lik 20:38) I kapab fasilman rapel sak pti detay konsernan bann dimoun ki pou resisite enkli zot laparans, personnalite, bann keksoz ki zot in pas ladan ek zot souvenir. Nou kapab annan konfyans dan sa promes ki dan lavenir Zeova pou resisit bann dimoun ki’n mor parski nou konnen ki Zeova i anvi resisit zot e i annan sa pouvwar pour fer li. I annan en lot rezon akoz ki nou kapab annan konfyans dan sa promes. Sa i akoz Zeova in deza resisit dimoun dan lepase. Dan letan Labib, i ti donn serten zonm fidel enkli Zezi, sa pouvwar pour resisit bann dimoun ki’n mor. w23.04 9-10 ¶7-9

Si nou swazir byen nou mo e nou koz avek ladouser, sa i kapab fer en dimoun pli pare pour ekoute e kontinyen koz avek nou. Me si en dimoun i zis anvi argimante oubyen boufonn nou, i pa neseser pour nou kontinyen koz avek li. (Prov. 26:4) Me i tre probab ki laplipar dimoun pa koumsa e i kapab ki en kantite dimoun pou ekout nou. I kler ki nou ganny en kantite byenfe ler nou aprann pour demontre ladouser. Priy Zeova pour donn ou sa lafors ki ou bezwen pour kontinyen demontre ladouser ler ou bezwen reponn bann kestyon konsernan bann topik ki dimoun i kontan argimant lo la oubyen bann keksoz ki dimoun i dir lo nou ki pa vre. Gard antet ki ler ou demontre ladouser, sa i kapab anpes en konversasyon vin en dispit ler sakenn i annan diferan lopinyon. Ler ou reponn avek ladouser e dan en fason respektab, sa i kapab motiv serten dimoun ki pe ekout ou pour sanz lafason ki zot konsider Temwen Zeova ek bann laverite ki dan Labib. Ou bezwen “touzour pare pour defann” ou krwayans e “fer li avek ladouser ek bokou respe.” (1 Pyer 3:15) Les ladouser fer ou vin for! w23.09 19 ¶18-19

Annou vwar kat fason ki nou kapab demontre pasyans. Premyerman, en dimoun ki annan pasyans pa ankoler vitman. Ler lezot i fer en keksoz pour fer li ankoler, i reste kalm e i pa tret zot parey zot tret li. I osi pa tret lezot dan en fason brit ler i strese. (Egz. 34:6) Dezyenmman, en dimoun ki annan pasyans i reste kalm ler i bezwen espere. Si en keksoz i pran plis letan ki i pe ekspekte, sa dimoun pou fer zefor pour pa ankoler. (Mat. 18:26, 27) Trwazyenmman, en dimoun ki annan pasyans pa azir vitman san reflesir. Ler en dimoun ki annan pasyans i annan en keksoz enportan pour fer, i pa degaze pour konmans sa keksoz oubyen degaze pour fini. O kontrer i fer sir ki i annan ase letan pour plàn sa ki i pou fer. Apre i pran letan pour fer sa keksoz byen. Katriyenmman, en dimoun ki annan pasyans i fer zefor pour andire ler i annan problenm e i pa konplent. I mazin lo bann bon keksoz ki i annan dan son lavi e i pou fer son mye pour kontinyen servi Zeova avek lazwa. (Kol. 1:11) Konman pep Zeova, nou bezwen demontre pasyans dan tou sa bann fason. w23.08 20-21 ¶3-6

En rezon enportan ki nou protez nou leker senbolik, setadir sa dimoun ki nou ete anndan, i akoz Zeova i egzamin nou leker. Sa i vedir ki i pa zis vwar sa ki lezot i vwar me i osi vwar sa kalite dimoun ki nou vreman ete. I pou kontan nou si nou kontinyen mazin son bann konsey ki kapab ed nou viv pour touzour. (Zan 4:14) Si nou kontinyen mazin bann konsey saz Zeova, i pou napa plas dan nou lespri pour bann mansonz ki Satan ek son lemonn pe propaze e nou pa pou swiv kondwit bann move dimoun. (1 Zan 5:18, 19) Anmezir ki nou vin pli pros avek Zeova, nou pou annan plis lanmour ek respe pour li. Vi ki nou pa anvi bles santiman nou Papa, nou pa pou ni menm mazin pour fer en keksoz mal. En ser ki reste Kroasi, ki apel Marta ti ganny tante pour komet imoralite seksyel. Marta i dir: “Mon ti vwar li difisil pour rezonn byen e pour reziste sa dezir pour fer sa ki mal. Me sa gran respe ki mon annan pour Zeova ti protez mwan.” Ki mannyer sa gran respe ki Marta ti annan pour Bondye ti protez li? Marta i dir ki i ti reflesir lo sa ki ti pou arive si i ti fer en move desizyon. Nou osi nou kapab fer parey. w23.06 20-21 ¶3-4

Zezi ti konnen ki i lavolonte Zeova pour sanktifye Son non setadir, pour montre ki tou bann mansonz ki’n ganny dir lo Zeova pa vre. I pour sa rezon ki nou Met ti ansenny son bann disip pour priye e dir: “Nou Papa ki dan lesyel, ki ou non i ganny sanktifye.” (Mat. 6:9) Zezi ti konpran ki sa keksoz pli enportan ki bann lanz ek bann imen i merit fer, i pour sanktifye non Zeova. Napa okenn lanz oubyen imen ki’n deza sanktifye non Zeova dan sa fason ki Zezi in fer li. Ler Zezi ti ganny arete, son bann lennmi ti akiz li konmkwa in mank respe pour son Papa. Byensir Zezi ti santi ki pour sali non son Papa ki sen ti sa pese pli grav. I ti fatig Zezi en kantite ki i ti pe ganny kondannen pour sa krim. I kapab ki i sanmenm sa rezon ki Zezi ti “telman angwase” avan i ti ganny arete.—Lik 22:41-44. w24.02 11 ¶11

Dan sa lakours pour ganny lavi eternel, nou bezwen kontan Zeova ek Zezi plis ki nou fanmir. (Mat. 10:37) Me sa pa vedir ki nou negliz nou responsabilite dan nou fanmir, konmsi sa bann responsabilite pe anpes nou fer plezir Bondye ek Kris. O kontrer, pour nou kapab fer plezir Bondye ek Kris, nou bezwen desarz nou responsabilite dan nou fanmir. (1 Tim. 5:4, 8) Ler nou fer sa, nou pou pli zwaye. Apre tou, Zeova i konnen ki en fanmir pou zwaye ler msye ek madanm i tret kanmarad avek lanmour ek respe, ler paran i kontan e ansenny zot zanfan e ler zanfan i obei zot paran. (Efe. 5:33; 6:1, 4) Ki swa ou en msye, madanm oubyen zanfan, annan konfyans dan bann konsey saz ki dan Labib. Pa zis fer sa ki ou krwar i byen, sa ki laplipar dimoun ki reste dan ou zanmirant i fer oubyen sa ki bann eksper i dir ou devret fer. (Prov. 24:3, 4) Servi nou bann piblikasyon ki baze lo Labib. Dan sa bann piblikasyon, i annan bann sizesyon lo ki mannyer pour aplik bann prensip Labib. w23.08 28 ¶6-7

En ser Kretyen i bezwen devlop bann abilite ki pou ed li dan son lavi toulezour. I annan serten abilite ki en fiy i aprann ler i ankor zanfan ki pou ed li tou dilon son lavi. Par legzanp, aprann pour lir e ekri byen. Dan serten kiltir, dimoun i krwar ki i pa enportan pour en madanm aprann lir e ekri. Me i enportan pour tou Kretyen konn fer sa. (1 Tim. 4:13) Alor pa les okenn keksoz anpes ou aprann pour lir e ekri byen. Ki byenfe ou pou gannyen? Ler ou konn lir e ekri, sa pou ed ou pour trouv en travay. I pou pli fasil pour ou etidye Parol Bondye e pour ansenny lezot osi. Pli enportan ankor, ler ou lir e medit lo Parol Bondye, sa pou ed ou pour vin pli pros avek Zeova.—1 Tim. 4:15. w23.12 20 ¶10-11

Demann Zeova pour ed ou reziste tantasyon. Vi ki nou enparfe, nou toultan bezwen lager avek sa tandans pour fer sa ki mal. Satan pe fer tou sa ki i kapab pour fer li difisil pour nou reziste tantasyon. En fason ki Satan i esey sali nou lespri i atraver bann divertisman imoral. Bann divertisman koumsa i fer nou annan bann move panse, setadir bann panse ki kapab fer nou vin enpir dan lizye Zeova e ki kapab fer nou fer pese grav. (Mark 7:21-23; Zak 1:14, 15) Nou bezwen led Zeova si nou anvi reziste tantasyon. Zezi ti dir sa dan lapriyer model: “Pa les nou tonm dan tantasyon, me sov nou kont sa enn move.” (Mat. 6:13) Zeova i anvi ed nou me nou bezwen demann li led. Apre ki nou’n demann Zeova led, nou osi bezwen fer nou mye pour evit bann keksoz ki pou tant nou. w23.05 6-7 ¶15-17

Ki mannyer sa i kapab ed zot dan zot maryaz? Ler en koup i apresye zot lanmitye avek zot Papa ki dan lesyel, zot pou kontan pour aplik son bann konsey. Sa pou ed zot pour evit e sirmont bann problenm ki kapab fer zot lanmour pour kanmarad refrwadir. Ler en koup i annan en bon lanmitye avek Zeova, zot pou fer zot mye pour swiv son legzanp e zot pou devlop bann kalite ki Zeova i annan parey labonte, pasyans e zot pou pare pour pardonnen. (Efe. 4:32–5:1) Ler en koup i demontre sa bann kalite, sa pou fer li pli fasil pour zot kontan kanmarad plis. En ser ki apel Lena, ki’n marye pour plis ki 25 an, i dir: “I fasil pour kontan e annan respe pour en dimoun ki annan en bon lanmitye avek Zeova.” Annou vwar en legzanp dan Labib. Ler Zeova ti swazir en koup pour vin paran Mesi, I ti swazir Zozef ek Mari parmi tou bann desandans David. Akoz? Zot tou le de zot ti annan zot prop lanmitye avek Zeova e Zeova ti konnen ki zot ti pou met li premye dan zot maryaz. w23.05 21 ¶3-4

Zezi i nou Sef e i parfe. Me bann frer ki i’n apwente pour dirize dan kongregasyon i enparfe. Parfwa i kapab difisil pour obei zot, sirtou si zot demann nou pour fer en keksoz ki nou pa anvi fer. En fwa, ler zapot Pyer ti ganny en lenstriksyon, i ti ezite pour obei. Ler en lanz ti dir li manz bann zannimo ki enpir dapre Lalwa Moiz, trwa fwa Pyer ti refize pour manze. (Akt 10:9-16) Akoz i ti refize? Sa nouvo lenstriksyon pa ti fer sans pour li. De lot kote, zapot Pol ti obei ler bann ansyen Zerizalenm ti dir li anmenn kat zonm avek li kot tanp kot i ti pou pirifye son lekor pour montre ki i pe obei Lalwa Moiz. Pol ti konnen ki bann Kretyen ti nepli anba Lalwa Moiz e ki i pa ti’n fer nanryen mal. Kantmenm sa, Pol ti fer sa ki sa bann zonm ti’n dir li. “Son lannmen, Pol ti al avek sa bann zonm e zot ti pirifye zot lekor.” (Akt 21:23, 24, 26) Lefet ki Pol ti obei, sa ti ede pour gard linite dan kongregasyon.—Rom. 14:19, 21. w23.10 10 ¶15-16

Petet ou pa pou mazinen ki respe i sitan enportan pour annan en bon lanmitye. Me bann ki anvi annan en bon lanmitye avek Zeova i bezwen annan “en gran respe” pour li. Nenport ki kantite letan nou pe servi Zeova, nou tou nou bezwen kontinyen annan en gran respe pour li. Me ki i vedir annan en gran respe pour Bondye? En dimoun ki annan en gran respe pour Bondye i kontan Bondye e i pa anvi fer okenn keksoz ki pou gat son lanmitye avek Li. Zezi ti annan en “gran respe pour Bondye.” (Ebr. 5:7) I pa ti zanmen per Zeova. (Iza. 11:2, 3) O kontrer, i ti vreman kontan Zeova e i ti anvi obei li. (Zan 14:21, 31) Parey Zezi, nou osi nou annan en gran respe pour Zeova parski i kontan nou, i saz, i annan lazistis e i pwisan. Nou osi konnen ki lafason ki nou reazir ler Zeova i ansenny nou, i annan en lefe lo li. Sa ki nou fer i kapab fer Zeova kontan ouswa i kapab fer li sagren.—Ps. 78:41; Prov. 27:11. w23.06 14 ¶1-2; 15 ¶5

Ler Lerwa Ouzya ti vin for, i ti oubliye ki Zeova ki ti’n donn li son lafors e ki ti’n ed li prospere. Ki nou kapab aprann? Nou devret rapel ki tou bann benediksyon ek privilez ki nou annan i sorti kot Zeova. Olye fer vantar konsernan bann keksoz ki nou’n fer, nou devret donn loner Zeova pour bann keksoz ki nou kapab fer. (1 Kor. 4:7) Nou bezwen annan limilite e rekonnet ki nou enparfe e ki nou bezwen disiplin. En frer ki annan apepre 60 an, i dir: “Mon’n aprann pour pa ofanse oubyen dekouraze ler lezot i remark bann fot ki mon fer. Parfwa mon fer bann fot bet e ler mon ganny disiplinen pour sa, mon esey amelyore e kontinyen donn Zeova mon meyer.” Ler nou obei Zeova e nou kontinyen annan limilite, nou pou ere.—Prov. 22:4. w23.09 10 ¶10-11

Bann Kretyen dan premye syek ti bezwen landirans. Zot ti fer fas avek menm problenm ki laplipar dimoun ki ti pe viv sa letan ti pe fer fas avek. Me zot ti osi fer fas avek lezot problenm parski zot ti bann Kretyen. En kantite parmi zot ti ganny persekite avek bann sef larelizyon Zwif, bann lotorite Romen e osi avek zot prop fanmir. (Mat. 10:21) Zot ti osi bezwen fer sir ki zot pa ganny enfliyanse avek fo lansennyman bann aposta ki ti pe esey diviz kongregasyon. (Akt 20:29, 30) Kantmenm sa, sa bann Kretyen ti andir sa bann difikilte fidelman. (Rev. 2:3) Ki mannyer zot ti fer sa? Zot ti medit lo legzanp bann serviter Zeova dan Labib ki ti annan landirans, parey legzanp Zob. (Zak 5:10, 11) Zot ti priye pour ganny lafors. (Akt 4:29-31) Zot ti kontinyen rapel ki Zeova pou rekonpans zot si zot demontre landirans. (Akt 5:41) Nou osi nou kapab andire si regilyerman nou etidye e medit lo legzanp landirans bann serviter Zeova ki dan Labib e dan nou bann piblikasyon. w23.07 3 ¶5-6

Zeova ek Zezi pa pou abandonn nou. Apre ki zapot Pyer ti dir ki i pa konn Zezi, Pyer ti bezwen fer en desizyon enportan. Eski i ti pou arete oubyen kontinyen konman en disip Zezi? Zezi ti’n sipliy Zeova pour ed Pyer pour ki son lafwa pa afebli konpletman. Zezi ti dir Pyer konsernan sa lapriyer e i ti annan konfyans ki pli tar Pyer ti pou kapab ankouraz son bann frer. (Lik 22:31, 32) Sirman sak fwa ki Pyer ti mazin sa ki Zezi ti dir, sa ti ankouraz li. Ler nou bezwen fer en desizyon enportan, Zeova i kapab servi bann berze ki kontan nou pour ankouraz nou pour nou kapab kontinyen reste fidel avek li. (Efe. 4:8, 11) Zis parey Zeova ti donn Pyer ek lezot zapot bann keksoz materyel ki zot ti bezwen, Zeova pou osi donn nou sa ki nou bezwen ler nou met sa travay predikasyon premye dan nou lavi. w23.09 24-25 ¶14, 15

Zeova i vwar tou bann bon keksoz ki nou fer pour lezot menm si sa ki nou fer i pa en gran keksoz. I vwar sa bann keksoz ki nou fer konman en sakrifis ki vreman presye e konman en det ki i pou peye.Si dan lepase ou ti deza en serviter kongregasyon oubyen en ansyen, Zeova i rapel bann travay ki ou ti fer pour li dan lepase e sa lanmour ki ti motiv ou pour fer sa travay. (1 Kor. 15:58) Zeova i osi vwar sa lanmour ki ou pe kontinyen demontre. Zeova i anvi ki nou tou nou devlop plis lanmour pour li e pour lezot. Nou kapab devlop plis lanmour pour Zeova par lir e medit lo son Parol e par koz avek li dan lapriyer regilyerman. Nou kapab devlop plis lanmour pour nou bann frer ek ser par rod bann fason pour ed zot. Anmezir ki nou devlop plis lanmour, nou pou vin pli pros avek Zeova e avek nou bann frer ek ser e nou pou kapab reste zanmi avek zot pour touzour! w23.07 10 ¶11; 11 ¶13; 13 ¶18

Sak Kretyen i bezwen deside ki mannyer i pou pran swen avek son lasante. Dan Labib, i annan zis detrwa lalwa ki kapab annan en lefe lo bann desizyon ki en Kretyen i fer konsernan son lasante. Sa bann lalwa i konsern bann lord pour pa servi disan e pa partisip dan bann keksoz demonyak. (Akt 15:20; Gal. 5:19, 20) Apard sa, sak Kretyen i kapab deside ki swen medikal zot pou aksepte. Menm si nou konvenki ki en tretman spesifik i bon ouswa pa bon, nou bezwen respekte drwa nou bann frer ek ser pour fer zot prop desizyon konsernan zot lasante. I pour sa rezon ki nou devret gard antet sa kat pwen: (1) Zis Rwayonm Bondye ki pou geri nou konpletman e fer ki nou pa pou zanmen malad ankor. (Iza. 33:24) (2) Ler en Kretyen pe fer desizyon konsernan son lasante, i “devret konvenki” konsernan sa ki pli bon pour li. (Rom. 14:5) (3) Nou pa ziz lezot ouswa fer en keksoz ki pou fer zot fer fot. (Rom. 14:13) (4) Bann Kretyen i demontre lanmour anver kanmarad e zot konpran ki linite dan kongregasyon i pli enportan ki zot prop lopinyon.—Rom. 14:15, 19, 20. w23.07 24 ¶15

Eski ou apresye ou lanmitye avek Zeova? Byensir. Tou dilon listwar en kantite dimoun in santi parey avek ou. (Ps. 104:33, 34) En kantite dimoun in fer bann sakrifis pour ador Zeova. I sanmenm ki bann Nazireen oubyen bann ki ti’n ganny dedye dan letan ansyen Izrael ti fer. Bann Nazireen ti bann Izraelit ki ti fer serten sakrifis pour servi Zeova dan en fason spesyal. Dapre Lalwa Moiz, en zonm oubyen en madanm ti kapab fer en ve spesyal avek Zeova pour viv konman en Nazireen pour en peryod letan. (Nom. 6:1, 2) Ler en Izraelit ti fer sa ve pour viv konman en Nazireen, i ti swiv bann lenstriksyon ki larestan bann Izraelit pa ti bezwen swiv. Alor akoz en Izraelit ti pou swazir pour vin en Nazireen? I tre probab ki en Izraelit ti fer sa ve parski i kontan Zeova en kantite e i ti rekonesan pour bann bon keksoz ki Zeova i fer.—Det. 6:5; 16:17. w24.02 14 ¶1-2

Dan Labib, sa mo Ebre ki’n ganny tradwir konman “fidel” oubyen “lanmour fidel” i donn nide en lanmitye pros ki ranpli avek lanmour e sa mo i souvan ganny servi pour dekri sa lanmour ki Bondye i annan pour son bann serviter. Sa mo i osi ganny servi pour dekri lafason ki bann serviter Bondye i fidel avek kanmarad. (2 Sam. 9:6, 7) Avek letan, nou kapab vin en dimoun ki pli fidel. Annou vwar ki mannyer sa ti arive avek profet Danyel. Tou dilon son lavi, Danyel ti pas dan bann sityasyon kot i ti bezwen montre si i ti pou reste fidel avek Zeova oubyen non. Enn bann moman ki ti vreman difisil ti arive ler i ti dan son 90 an. Sa letan, bann Med ek Pers ti’n ranport laviktwar lo Babilonn e Lerwa Daryis ki ti pe dirize. Bann o zofisye dan lakour Lerwa Daryis pa ti kontan Danyel e zot ti napa respe pour sa Bondye ki Danyel ti adore. Alor zot ti fer en plan pour fer touy Danyel. Zot ti fer lerwa siny en lalwa ki ti pou montre si Danyel ti fidel avek son Bondye oubyen avek lerwa. Si Danyel ti aret priy Zeova pour 30 zour, sa ti pou montre ki Danyel i fidel avek lerwa. Me Danyel ti swazir pour reste fidel avek Zeova.—Dan. 6:12-15, 20-22. w23.08 5 ¶10-12

Zeova i anvi ki nou kontinyen demontre lanmour anver nou bann frer ek ser. Alor, ler nou bann frer ek ser pa tret nou dan en fason ki en Kretyen i devret, nou kapab annan konfyans ki zot anvi swiv bann prensip Labib e ki zot pa’n fer par ekspre pour bles nou santiman. (Prov. 12:18) Bondye i kontan son bann serviter fidel menm si zot fer fot. I kontinyen reste nou zanmi e i pa ankoler avek nou menm ler nou fer fot. (Ps. 103:9) Nou vreman rekonesan ki Zeova i pardonn nou e nou bezwen swiv son legzanp par pardonn lezot. (Efe. 4:32–5:1) Nou bezwen osi gard antet ki anmezir lafen i aprose nou bezwen reste pros avek nou bann frer ek ser. Nou ekspekte ki nou pou ganny persekite plis ankor. I kapab ki nou ganny met dan prizon akoz nou lafwa. Si sa i arive, nou pou bezwen nou bann frer ek ser plis ki zanmen oparavan.—Prov. 17:17. w24.03 15-16 ¶6-7

Dan Labib, i annan bann resi konsernan bann zenn ki ti vin pros avek Zeova, ki ti annan son laprouvasyon e ki ti annan en lavi ki ere. David ti enn parmi sa bann zenn. Ler i ti ankor zenn, i ti swazir pour vin zanmi Bondye e pli tar, i ti vin en lerwa ki ti fidel avek Bondye. (1 Rwa. 3:6; 9:4, 5; 14:8) Ler ou etidye konsernan legzanp David, sa i kapab ankouraz ou pour servi Zeova fidelman. Oubyen ou kapab osi etidye legzanp Mark ek Timote. Ou pou vwar ki zot ti servi Zeova depi ler zot ti ankor byen zenn e zot ti kontinyen servi Zeova fidelman. Lafason ki ou viv ou lavi la konmela pou annan en lefe lo ki mannyer ou lavi pou ete dan lavenir. Si ou annan konfyans dan Zeova e pa lo ou prop rezonnman, Zeova pou ed ou pour fer bann desizyon ki saz. Ou kapab ere. Rapel ki Zeova i apresye sa ki ou fer pour li. Sa pli bon fason ki ou kapab viv ou lavi i pour servi Zeova, nou Papa ki kontan nou. w23.09 13 ¶18-19

Zapot Pol ti konnen ki son bann frer ek ser dan kongregasyon ti enparfe. Par egzanp, ler i ti fek vin dan kongregasyon Zerizalenm, serten pa ti krwar ki i en disip Zezi. (Akt 9:26) Pli tar, serten ti dir bann move keksoz lo li pour fer lezot perdi konfyans dan li. (2 Kor. 10:10) En zour, Pol ti vwar en ansyen fer en move desizyon ki ti’n kapab fer lezot tonbe. (Gal. 2:11, 12) Osi, Mark ki ti enn bann bon zanmi Pol, ti dezapwent li. (Akt 15:37, 38) Pol ti’n kapab les sa bann sityasyon fer li evite pas letan avek bann ki’n ofans li. Kantmenm sa i ti kontinyen annan en bon pwennvi lo son bann frer ek ser e i ti kontinyen servi Zeova fidelman. Kwa ki ti ed Pol pour fer sa? Pol ti kontan son bann frer ek ser. Sa lanmour ki Pol ti annan pour lezot, ti fer li konsantre lo zot bann zoli kalite olye lo zot bann defo. Sa lanmour ki Pol ti annan pour lezot, ti osi ed li pour fer sa ki dan nou teks pour ozordi. w24.03 15 ¶4-5

Dan Labib, i annan en kantite resi ki montre ki ladouser i en kalite ki vreman presye. Annou vwar legzanp Izaak. Ler i ti reste Gerar, ki en landrwa dan teritwar bann Filisten, son bann vwazen ti konmans zalou li e zot ti bous bann pwi ki serviter son papa ti’n fouye. Olye lager pour sa bann pwi, Izaak ti al reste pli lwen e i ti fouy lezot pwi. (Zen. 26:12-18) Me bann Filisten ti dir ki sa bann pwi ki Izaak ti’n fek fouye ti osi pour zot. Kantmenm sa, Izaak ti gard lape. (Zen. 26:19-25) Kwa ki ti ed li pour demontre ladouser menm ler i paret ki lezot ti anvi fer li ankoler? Nou kapab asire ki i ti’n vwar legzanp son paran e i ti’n aprann en kantite avek lafason ki Abraam ti gard lape e osi avek sa “leta lespri trankil e dous” ki Sara ti annan.—1 Pyer 3:4-6; Zen. 21:22-34. w23.09 15 ¶4

Zeova ti anvoy son Garson premye ne lo later pour ansenny dimoun konsernan sa Rwayonm e pour donn son lavi konman en ranson pour sov nou dan pese ek lanmor. Apre Zeova ti resisit Zezi e fer li retourn dan lesyel pour li dirize konman Lerwa dan Rwayonm Bondye. Sa mesaz prensipal dan Labib i konsernan non Zeova ki pou ganny sanktifye ler i akonpli son plan pour later. I pou fer sa atraver son Rwayonm ki pou ganny dirize par Kris. I napa nanryen ki kapab sanz plan Zeova. I’n garanti ki i pou fer sa ki i anvi zis parey i’n dir. (Izai 46:10, not; Ebre 6:17, 18) Later pou vin en paradi kot bann desandans Adan ek Ev ki parfe e ki drwat pou “viv ere pour touzour.” (Ps. 22:26) Me pa zis sa ki Zeova pou akonpli. Zeova i anvi ki tou son bann serviter ki dan lesyel e lo later i ini ansanm. Sa pou fer ki tou sa ki vivan pou soumet avek Zeova konman zot Dirizan. (Efe. 1:8-11) Eski pa lafason ki Zeova i akonpli son plan i enpresyonan? w23.10 20 ¶7-8

Ler bann Zwif ti kit Babilonn e zot ti ariv Zerizalenm, pa bokou letan apre ki zot ti’n ariv Zerizalenm, zot ti konmans fer fas avek problenm ekonomik, i ti annan problenm politik e zot ti pe ganny opoze. Sa ti fer ki serten ti vwar li difisil pour konsantre lo sa travay pour rekonstri tanp Zeova. Alor, Zeova ti anvoy Agay ek Zekarya ki ti de profet, pour ankouraz son pep pour kontinyen sa travay. Sa ki sa bann profet ti dir ti vreman ankouraz sa pep. (Aga. 1:1; Zek. 1:1) Me apepre 50 an pli tar, bann Zwif ti bezwen lankourazman ankor. Alor Ezra, ki ti en dimoun ki ti kopye parol Bondye, ti kit Babilonn e al Zerizalenm pour ankouraz pep Zeova pour fer ladorasyon Zeova vin premye dan zot lavi. (Ezra 7:1, 6) Bann profesi Agay ek Zekarya ti ed pep Bondye dan lepase pour kontinyen annan konfyans dan Zeova ler zot ti ganny opoze. Sa bann profesi i kapab ed nou ozordi pour kontinyen annan konfyans ki Zeova pou ed nou malgre nenport problenm ki nou fer fas avek.—Prov. 22:19. w23.11 14-15 ¶2-3

Ki mannyer nou montre nou bann frer ek ser ki nou kontan zot? En fason ki nou fer sa i par rekonfort zot. Nou pou kapab “kontinyen rekonfort kanmarad” si nou annan konpasyon pour lezot. (1 Tesa. 4:18) Ki mannyer nou kapab gard sa lanmour ki nou annan pour kanmarad for? Nou fer sa ler nou pardonn nou bann frer ek ser pour bann fot ki zot fer menm ler i difisil pour pardonn zot. Akoz nou bezwen demontre lanmour pour kanmarad sirtou ozordi? Remark sa ki Pyer ti dir: “Lafen tou keksoz in vin pli pros. Alor, . . . zot devret kontan kanmarad en kantite.” (1 Pyer 4:7, 8) Anmezir lafen sa move lemonn i vin pli pros, ki nou kapab ekspekte? Zezi ti dir sa konsernan son bann disip: “Tou nasyon pou ay zot akoz zot port mon non.” (Mat. 24:9) Pour nou kapab reste fidel avek Zeova menm si dimoun i ay nou, nou bezwen reste ini. Si nou kontan nou bann frer ek ser, Satan pa pou zanmen kapab kree divizyon parmi nou parski nou annan lanmour.—Fili. 2:1, 2. w23.11 13 ¶18-19

Bann laverite ki dan Parol Bondye i vreman pwisan. Ler nou ansenny dimoun konsernan Zeova ek bann zoli kalite ki i annan, nou ganny sa loportinite pour vwar en keksoz merveye. Dimoun i aret ganny anbete par bann mansonz Satan e zot konmans vwar bann zoli kalite ki nou Papa i annan. Zot enpresyonnen avek son gran pwisans. (Iza. 40:26) Zot aprann pour annan konfyans dan Bondye parski i en ziz parfe. (Det. 32:4) Zot aprann en kantite avek son gran lasazes. (Iza. 55:9; Rom. 11:33) Zot ganny rekonforte ler zot aprann ki Zeova i lanmour. (1 Zan 4:8) Anmezir ki zot vin pli pros avek Zeova, zot lespwar pour viv pour touzour konman son bann zanfan i vin pli for. I en loner pour nou ed dimoun vin pros avek zot Papa. Ler nou fer sa, Zeova i konsider nou konman bann ki “travay ansanm avek [li].”—1 Kor. 3:5. w24.02 12 ¶15

Si ou en etidyan Labib oubyen si ou’n grandi dan laverite avek bann paran ki Temwen Zeova, eski ou pe mazin pour batize? Sa i en bon lobzektif pour annan! Me avan ou batize, ou pou bezwen dedye ou lavi avek Zeova. Ki mannyer ou dedye ou lavi avek Zeova? Dan en lapriyer, ou promet Zeova ki ou pou ador zis li e ki ou pou fer son lavolonte vin sa keksoz pli enportan dan ou lavi. Anfet ou pe promet Zeova ki ou pou kontinyen kontan li “avek tou ou leker, avek tou ou nanm, avek tou ou lespri e avek tou ou lafors.” (Mark 12:30) Ler ou dedye ou lavi avek Zeova, ou fer li an prive e i ant ou avek Zeova. De lot kote, batenm i ganny fer an piblik e i montre lezot ki ou’n dedye ou lavi avek Zeova. Ler ou dedye ou lavi avek Zeova, sa i en promes ki serye. Ou devret gard sa promes e Zeova i ekspekte ki ou fer sa.—Ekle. 5:4, 5. w24.03 2 ¶2; 3 ¶5

Dan tou maryaz i annan problenm. Labib i dir ki bann dimoun ki’n marye “pou ganny problenm dan zot lavi.” (1 Kor. 7:28) Akoz? Parski en msye ek madanm i de dimoun enparfe e zot annan diferan kalite ek keksoz ki zot kontan e pa kontan. I kapab ki zot sorti dan diferan kiltir e lafason ki zot in grandi i diferan. I kapab ki avek letan zot vwar bann tre dan personnalite zot konzwen ki zot pa ti vwar avan zot marye. Sa bann keksoz i kapab kree problenm dan en maryaz. Olye rekonnet ki zot tou le de zot fer fot e ki zot devret travay ansanm pour rezourd sa bann problenm, zot kapab blanm kanmarad pour bann problenm dan maryaz. Zot menm kapab konmans krwar ki zot devret separe oubyen divorse. Me eski si zot separe oubyen divorse sa pou rezourd zot bann problenm? Non. Zeova i anvi ki bann koup marye i respekte sa laranzman maryaz menm si zot konzwen i en dimoun difisil pour viv avek. w24.03 16 ¶8; 17 ¶11

Apre ki ou’n dedye ou lavi avek Zeova e ou’n batize, ou’n kontinyen aprann konn Zeova pli byen e devlop plis lanmour pour li. Sa in fer ou lespwar pour viv pour touzour dan paradi lo later vin pli reel. (Ebr. 5:13–6:1) I tre probab ki ou’n eksperyans sa ki ganny dir dan Romen 5:2-4. Ou’n pas dan diferan problenm me ou’n andire e Zeova in montre ki i pran plezir dan ou. Vi ki ou asire ki ou annan laprouvasyon Zeova, ou annan plis rezon pour ekspekte ki ou pou ganny bann keksoz ki i’n promet. Ou lespwar in vin pli reel ki avan. I pli personnel e i annan bokou plis lefe lo ou. I annan en lefe lo tou laspe ou lavi e i sanz lafason ki ou tret ou fanmir, lafason ki ou fer bann desizyon e menm lafason ki ou servi ou letan. Zapot Pol i osi azout en pwen vreman enportan konsernan sa lespwar ki ou gannyen ler ou’n ganny aprouve konman drwat. I asir ou ki sa ki ou pe espere pou vin vre.—Rom. 15:13. w23.12 12-13 ¶16-19

Ler nou pas dan difikilte, petet nou pa pou santi, reflesir oubyen azir parey labitid. Parey en bato ki pe balote dan bann gro laroul, nou kapab santi ki nou pe ganny tape avek diferan lemosyon. Ki mannyer Zeova i ed nou ler nou bann lemosyon i konmans fer nou konfize e nou pa konnen ki pour fer? Zeova i asir nou ki i pou ed nou pour reste stab. Ler en bato i pas dan en tanpet, sa bato i kapab balote gos drwat. Pour ki en bato i reste stab, i annan bann stabilizers ki ganny mete lo sak kote sa bato anba delo. Sa bann stabilizers i kapab ede pour ki bato pa tro balote. Sa i fer ki bann dimoun ki abor sa bato i pli an sekirite e zot vwayaz i vin pli konfortab. Me en kantite sa bann stabilizers i fonksyonn pli byen ler bato pe bouz devan. Pareyman, Zeova pou ed nou vin stab anmezir nou kontinyen servi li dan bann moman difisil. w24.01 22 ¶7-8

Ler ou per, demann ou lekor, ‘Ki Zeova in fer dan lepase?’ Reflesir lo bann keksoz ki Zeova in kree. Par egzanp, ler nou “get byen” lafason ki Zeova i pran swen avek bann zwazo ek bann fler, menm si i pa’n kree zot avek sa abilite pour demontre son bann kalite e pour ador li, sa pou fer nou annan plis konfyans ki Zeova pou pran swen avek nou osi. (Mat. 6:25-32) Reflesir osi lo ki Zeova in fer pour son bann serviter. Ou kapab etidye lo en dimoun dan Labib ki’n demontre lafwa oubyen ou kapab lir leksperyans en serviter Zeova dan nou letan. Osi medit lo lafason ki Zeova in pran swen avek ou. Ki mannyer Zeova in atir ou ver laverite? (Zan 6:44) Ki mannyer in reponn ou bann lapriyer? (1 Zan 5:14) Ki byenfe ou gannyen sak zour atraver sakrifis son Garson?—Efe. 1:7; Ebr. 4:14-16. w24.01 3 ¶6; 7 ¶17