Novanm

Si ou en paran, ed ou zanfan pour prepar en larepons ki apropriye pour zot laz. Parfwa i annan bann lartik ki pe koz lo bann sityasyon serye. Par egzanp, konsernan bann problenm dan maryaz oubyen bann keksoz ki annan pour fer avek moralite. Me kantmenm sa, i annan bann paragraf ki bann zanfan i kapab reponn. Osi, ed ou zanfan pour konpran akoz ki zot pa pou toultan ganny sa loportinite pour reponn. Ler ou fer sa, sa pou ed ou zanfan pour pa dezapwente ler lezot i reponn. (1 Tim. 6:18) Nou tou nou kapab prepar bann larepons ki onor Zeova e ki ankouraz nou bann frer ek ser. (Prov. 25:11) Menm si parfwa nou kapab koz lo nou prop leksperyans, nou pa devret koz tro bokou lo nou lekor. (Prov. 27:2; 2 Kor. 10:18) O kontrer, nou devret fer zefor pour atir latansyon lo Zeova, son Parol ek son pep.—Rev. 4:11. w23.04 24-25 ¶17-18

Pour nou reste eveye e pour kontinyen rezonn byen, nou bezwen annan lanmour. (Mat. 22:37-39) Lanmour pour Zeova i ed nou pour kontinyen partisip dan sa travay predikasyon menm si sa i fer nou ganny problenm. (2 Tim. 1:7, 8) Vi ki nou osi kontan bann dimoun ki pa servi Zeova, nou kontinyen anons sa bon nouvel. Nou menm fer sa atraver let e par telefonn. Nou toultan annan lespwar ki en zour bann dimoun pou sanze e zot pou konmans fer sa ki byen. (Ezek. 18:27, 28) Nou osi kontan nou bann frer ek ser. Nou montre ki nou kontan zot par “ankouraz kanmarad e batir kanmarad zis parey [nou] pe deza fer li.” (1 Tesa. 5:11) Parey bann solda ki pe lager kot a kot, nou ankouraz kanmarad. Nou pa pou zanmen anvi bles santiman nou bann frer ek ser par ekspre oubyen rann mal pour mal. (1 Tesa. 5:13, 15) Nou osi demontre nou lanmour par demontre respe pour bann frer ki pe dirize dan kongregasyon.—1 Tesa. 5:12. w23.06 10 ¶6; 11 ¶10-11

En fason ki nou kapab ranforsi nou lafwa i par medit lo sa ranson. Sa ranson i fer nou asire ki bann promes Bondye pou vin vre. Ler nou pran letan pour reflesir lo akoz Zeova ti donn sa ranson e ki i ti fer pour donn sa ranson, sa i kapab ranforsi nou lafwa ki sa promes ki Bondye in fer pour nou viv pour touzour dan en lemonn meyer, pou sirman vin vre. Akoz nou kapab dir sa? Annou vwar ki Zeova ti fer pour donn sa ranson. Zeova ti anvoy son Garson ki i kontan, ki ti osi son bon zanmi, lo later pour li kapab ne konman en imen parfe. Ler Zezi ti lo later, i ti fer fas avek tou sort kalite problenm. Apre i ti soufer e i ti mor dan en fason kriyel. Pa sa ti en gran sakrifis ki Zeova ti fer! Nou Bondye ki kontan nou pa ti pou zanmen les son Garson soufer e mor, zis pour ki nou kapab viv en pli bon lavi pour en pti pe letan. (Zan 3:16; 1 Pyer 1:18, 19) Vi ki Zeova in donn son Garson ki presye pour li pour ed nou, i pou fer sir ki nou pou viv pour touzour dan nouvo lemonn. w23.04 27 ¶8-9

Eski Zeova i anvi resisit bann dimoun ki’n mor? Nou kapab asire ki i anvi resisit bann dimoun ki’n mor. I’n enspir plizyer ekriven Labib pour ekri konsernan son promes pour resisit bann dimoun ki’n mor dan lavenir. (Iza. 26:19; Rev. 20:11-13) Ler Zeova i fer en promes, i toultan akonpli sa promes. (Zoz. 23:14) Anfet, Zeova i vreman anvi resisit bann dimoun ki’n mor. Annou vwar sa ki Zob ti dir. Zob ti asire ki menm si i mor, Zeova ti pou vreman anvi resisit li. (Zob 14:14, 15) Zeova i santi menm parey pour tou son bann serviter ki’n mor. I anvi resisit zot pour zot kapab an bonn sante e ere. Me ki mannyer Zeova i santi anver tou sa bann dimoun ki’n mor avan ki zot in ganny loportinite pour aprann laverite konsernan li. Nou Bondye i kontan bann imen e i anvi resisit zot osi. (Akt 24:15) I anvi ki zot ganny sa loportinite pour vin son zanmi e pour viv pour touzour lo later.—Zan 3:16. w23.04 9 ¶5-6

Ki mannyer nou kapab gard nou lespwar antet? Par egzanp si ou annan lespwar pour viv pour touzour lo later, lir bann verse dan Labib ki koz lo paradi e medit lo la. (Iza. 25:8; 32:16-18) Imazin ki mannyer lavi pou ete dan nouvo lemonn. Imazin ou dan nouvo lemonn. Si nou kontinyen gard antet nou lespwar konsernan sa nouvo lemonn, nou bann problenm pou “tanporer e leze.” (2 Kor. 4:17) Sa lespwar ki Zeova in donn ou i kapab ed ou pour vin for. I’n fini donn nou bann mwayen kot nou kapab ganny lafors. Alor ler ou bezwen led pour desarz en responsabilite, pour andir en problenm oubyen pour gard ou lazwa, koz avek Zeova dan lapriyer e rod son gidans par fer letid personnel. Aksepte sa lankourazman ki bann frer ek ser i donn ou. Gard antet sa lespwar ki ou annan. Apre sa, “lafors glorye ek pwisans Bondye [pou] fortifye [ou] pour ki [ou] kapab andir tou keksoz avek pasyans ek lazwa.”—Kol. 1:11. w23.10 17 ¶19-20

Nou annan en kantite rezon pour remersye Zeova dan lapriyer. Nou kapab remersye li pour tou bann bon keksoz ki nou annan parski apre tou, tou bon kado i sorti kot li. (Zak 1:17) Par egzanp, nou kapab remersye li pour nou zoli plannet later e bann zoli keksoz ki i’n kree. Nou kapab osi remersye Zeova pour sa lavi ki i’n donn nou, pour nou fanmir, nou zanmi ek sa lespwar ki nou annan. Nou anvi remersye Zeova parski in permet nou pour annan en lanmitye avek li. I kapab ki nou bezwen pran letan pour reflesir lo bann rezon akoz nou personnelman, nou rekonesan anver Zeova. En kantite dimoun ozordi pa rekonesan. Souvandfwa dimoun i konsantre zis lo ki mannyer zot kapab ganny sa ki zot anvi olye lo ki mannyer pour demontre lapresyasyon pour sa ki zot annan. Si nou konmans annan sa menm latitid, nou lapriyer i kapab vin zis konman en lalis bann keksoz ki nou anvi. Pour anpes sa arive, nou bezwen kontinyen devlop e demontre lapresyasyon pour tou sa ki Zeova in fer pour nou.—Lik 6:45. w23.05 4 ¶8-9

Zeova i nou Papa ki kontan nou e i pa kontan vwar nou pe soufer. (Iza. 63:9) Kantmenm sa, i pa anpes tou problenm arive avek nou. Parfwa sa bann problenm i kapab parey larivyer ouswa laflanm. (Iza. 43:2) Me Zeova i promet ki i pou ed nou “travers” bann problenm. I pou fer sir ki nou toultan kapab kontinyen servi li. Zeova i osi donn nou son lespri sen ki pwisan pour ed nou pour kapab andire. (Lik 11:13; Fili. 4:13) Alor nou kapab asire ki nou pou toultan annan sa ki nou bezwen pour nou kapab andire e reste fidel avek Zeova. Zeova i ekspekte ki nou annan konfyans dan li. (Ebr. 11:6) Parfwa nou kapab santi ki nou bann problenm i tro difisil pour nou fer fas avek. Nou kapab menm konmans annan dout si Zeova pou ed nou. Me Labib i asir nou ki avek pwisans Bondye, nou kapab “grenp en miray.” (Ps. 18:29) Alor olye kontinyen annan dout, nou devret priye e annan lafwa ek konfyans ki Zeova pou reponn nou lapriyer.—Zak 1:6, 7. w23.11 22 ¶8-9

Sa i en zoli fason pour dekrir vre lanmour! Sa bann parol i kapab ankouraz bann koup ki’n marye. I montre ki zot kapab annan sa vre lanmour pour kanmarad. Pour en koup kapab kontan kanmarad tou dilon zot lavi, zot bezwen fer zefor. Annou vwar en legzanp. Pour en dife kapab kontinyen brile, en dimoun i bezwen kontinyen met dibwa ladan. Si i pa fer sa, avek letan sa dife pour tennyen. Pareyman, sa lanmour ant en msye ek son madanm i kapab kontinyen reste for si zot kontinyen fer zot relasyon vin pli for. Parfwa en koup i kapab santi ki zot lanmour pe refrwadir sirtou ler zot annan problenm larzan, problenm lasante oubyen ler zot pe fer grandi zot zanfan. Alor pour en koup kapab kontinyen gard sa “laflanm sorti kot Ya” brile, zot tou le de zot bezwen fer zefor pour annan en bon lanmitye avek Zeova. w23.05 20-21 ¶1-3

Ki nou bezwen fer pour nou devlop kouraz? Nou paran i kapab ankouraz nou pour devlop kouraz me zot pa kapab fer nou annan kouraz menm si zot, zot annan. Ler ou pe devlop kouraz sa i parey ler ou pe aprann fer en keksoz. En fason ki ou kapab fer sa, i par obzerv sa ki sa enstrikter i fer e apre fer parey. Dan menm fason, nou aprann pour demontre kouraz par obzerv bann ki pe demontre sa kalite e apre fer parey zot. Parey Danyel, nou bezwen konn byen Parol Bondye, nou bezwen devlop en lanmitye pros avek Zeova par koz avek li souvan e dir li egzakteman ki mannyer nou pe santi. Nou bezwen annan konfyans dan Zeova e asire ki i pou toultan ed nou. Koumsa ler nou fer fas avek bann difikilte, nou pou annan kouraz. Souvandfwa dimoun ki demontre kouraz i ganny respe lezot. Zot legzanp i osi kapab ed serten dimoun pour aprann konn Zeova. I kler alor ki nou annan bann bon rezon pour devlop kouraz. w23.08 2 ¶2; 4 ¶8-9

Sa mo Grek ki’n ganny tradwir “verifye” ti ganny servi pour dekri lafason ki dimoun ti teste bann metal parey lor ek larzan pour fer sir ki zot ti vreman lor ek larzan. Dan menm fason, nou bezwen teste sa ki nou tande oubyen lir pour verifye si i laverite. I pli enportan pour nou fer sa anmezir ki gran ladetres i arive. Olye krwar tou sa ki lezot i dir, nou bezwen servi nou abilite pour rezonnen pour konpar sa ki nou lir oubyen tande avek sa ki Labib ek lorganizasyon Zeova i dir. Ler nou fer sa, nou pa pou ganny anbete avek bann parol ki’n ganny enspire par bann demon. (Prov. 14:15; 1 Tim. 4:1) Nou konnen ki pep Zeova pou pas atraver gran ladetres. Me nou pa konnen ki i kapab arive avek nou demen. (Zak 4:14) Kantmenm sa, ki swa nou pas atraver gran ladetres oubyen nou mor avan ki gran ladetres i arive, si nou reste fidel, Zeova pou donn nou lavi eternel. Alor annou konsantre lo nou lespwar e toultan pare pour gran zour Zeova! w23.06 13 ¶15-16

Nou pa konnen ki mannyer serten profesi Labib pou ganny akonplir. (Dan. 12:8, 9) Me zis akoz nou pa konpran ki mannyer en profesi pou ganny akonplir, pa vedir ki i pa pou ganny akonplir. Nou kapab asire ki Zeova pou ed nou konpran sa ki nou bezwen konnen dan sa bon moman, zis parey i ti fer dan lepase. Bann nasyon pou anonse konmkwa i annan “lape ek sekirite.” (1 Tesa. 5:3) Apre bann gouvernman pou atak fo larelizyon e detri li. (Rev. 17:16, 17) Ler zot in fini, zot pou atak pep Bondye. (Ezek. 38:18, 19) Apre sa, lager Armagedon pou konmanse. (Rev. 16:14, 16) Nou kapab asire ki sa bann levennman pou arive byento. Me ziska ki sa i arive, annou kontinyen montre ki nou rekonesan anver nou Papa ki dan lesyel par etidye bann profesi ki dan Labib e par ed lezot pour fer parey. w23.08 13 ¶19-20

Ler zapot Pol ti pe koz lo lafwa, lespwar ek lanmour, i ti dir ki parmi sa bann kalite “lanmour i pli gran.” (1 Kor. 13:13) Akoz Pol ti dir sa? Dan lavenir, nou pou nepli bezwen annan lafwa dan promes Bondye konsernan nouvo lemonn oubyen annan lespwar ki sa bann promes pou ganny akonplir parski zot pou’n fini ganny akonplir. Me nou pou toultan bezwen kontan Zeova ek lezot dimoun. Anfet nou lanmour pour zot pou kontinyen vin pli for pour touzour. Osi, nou kontan kanmarad akoz sa i montre ki nou bann vre Kretyen. Zezi ti dir son bann zapot: “Par sa, tou dimoun pou konnen ki zot mon disip, si zot annan lanmour antre zot.” (Zan 13:35) Osi, ler nou kontan kanmarad, sa i ed nou pour reste ini. Pol ti osi dir ki lanmour i “soud keksoz ansanm dan en fason parfe.” (Kol. 3:14) Zapot Zan ti dir son bann frer ek ser: “Sa ki kontan Bondye i devret osi kontan son frer.” (1 Zan 4:21) Alor, ler nou demontre lanmour pour kanmarad, nou montre ki nou kontan Bondye. w23.11 8 ¶1, 3

Labib i konpar nou lavi konman en Kretyen avek en lakours. Bann atlet ki fini sa lakours pou ganny lavi eternel. (2 Tim. 4:7, 8) Nou bezwen fer tou sa ki nou kapab pour kontinyen taye parski laliny finisyon i vreman pros. Zapot Pol ti koz lo kwa ki pou ed nou fini sa lakours. I ti dir ki nou bezwen “debaras nou avek tou fardo . . . [e] avek landirans, annou tay dan sa lakours ki Bondye in met devan nou.” Eski Pol ti pe dir ki dan sa lakours Kretyen en Kretyen pa devret anmenn nanryen? Non. O kontrer, i ti pe dir ki nou bezwen debaras nou avek bann keksoz ki nou pa bezwen. Sa bann keksoz i lour e zot kapab fer nou ralanti e fatige. Pour nou kapab andire nou bezwen vitman idantifye e zet okenn keksoz ki kapab en fardo pour nou. Me an menm tan nou pa anvi debaras nou avek bann keksoz ki nou devret anmennen. Si nou zet sa bann keksoz, nou pou nepli kalifye pour reste dan sa lakours.—2 Tim. 2:5. w23.08 26 ¶1-2

Ler nou en dimoun ki rezonnab, sa i ed nou pour respekte lopinyon lezot. Par egzanp, i annan serten ser ki kontan makiye tandis ki lezot pa kontan. Serten Kretyen i kontan pour bwar en pti gin lalkol tandis ki lezot pa bwar ditou. Tou Kretyen i anvi annan en bon lasante me nou swazir diferan metod pour pran swen avek nou lasante. Si nou krwar ki sa ki nou fer i toultan byen e nou esey konvenk nou bann frer ek ser pour fer sa ki nou nou fer, nou kapab fer lezot fer fot e kree divizyon dan kongregasyon. (1 Kor. 8:9; 10:23, 24) Par egzanp, Zeova pa’n donn nou bann lalwa strik konsernan nou fason sanze me in donn nou bann prensip pour nou swiv. Nou sanz dan en fason ki apropriye, ki onor Bondye, ki montre ki nou rezonnab, respektab e ki nou annan “bon zizman.” (1 Tim. 2:9, 10) Sa i fer ki nou pa pou sanz dan en fason ki atir latansyon lo nou menm. Bann prensip Labib pou osi ed bann ansyen pour evite fer zot prop lalwa konsernan fason sanze ek pennyen. w23.07 23-24 ¶13-14

Zeova in montre nou ki mannyer nou kapab annan en bon lavenir. Bann ki aksepte sa lenvitasyon sorti kot sa “madanm bet” i konsantre lo bann plezir ki imoralite seksyel i anmennen. Sa ki zot pe fer pou anmenn zot “dan fon Latonm.” (Prov. 9:13, 17, 18) Sa i diferan avek sa ki arive avek bann ki aksepte lenvitasyon sorti kot sa madanm ki reprezant “vre lasazes.” (Prov. 9:1) Nou pe aprann pour nou kontan sa ki Zeova i kontan e ay sa ki Zeova pa kontan. (Ps. 97:10) Nou kontan parski nou envit lezot pour aprann avek “vre lasazes.” I konmsi nou pe “kriye lo bann oter ki toultour lavil: ‘Sa enn ki napa leksperyans, vin isi.’” Bann byenfe ki nou tou ki’n aksepte sa lenvitasyon i gannyen i pa zis pour la konmela. Me nou pou kontinyen ganny sa bann byenfe e i pou permet nou pour “viv” pour touzour, anmezir ki nou “mars lo semen lentelizans.”—Prov. 9:3, 4, 6. w23.06 24 ¶17-18

Ki mannyer ou santi ler en koleg travay oubyen en kanmarad lekol i demann ou konsernan ou krwayans? Eski ou per? Laplipar nou i santi koumsa. Me en kestyon koumsa i kapab ed nou konpran ki sa dimoun pe mazinen oubyen ki i krwar ladan e sa pou donn nou en loportinite pour partaz sa bon nouvel avek li. Parfwa en dimoun i kapab demann en kestyon parski i pa dakor avek nou oubyen i anvi argimante. Sa pa devret sirprann nou parski serten dimoun in ganny bann fo lenformasyon konsernan nou krwayans. (Akt 28:22) Osi, nou pe viv dan “bann dernyen zour” ki en letan kot en kantite dimoun pa “tonm dakor avek kanmarad” e zot menm “kriyel.”(2 Tim. 3:1, 3) Petet ou kapab mazinen: ‘Ki mannyer mon kapab kalm e an menm tan zantiy ler en dimoun i anvi argimant avek mwan konsernan mon krwayans?’ Kwa ki pou ed ou? Ou pou bezwen annan ladouser. En dimoun ki annan ladouser pa ankoler vitman e i annan kontrol lo son lekor ler lezot i esey fer li ankoler oubyen ler i pa asire ki i pou dir. w23.09 14 ¶1-2

Parfwa nou ganny konsey sorti kot lorganizasyon Zeova ki averti nou konsernan kontan larzan e konsernan fer bann keksoz ki kapab fer nou dezobei lalwa Bondye. Si nou swiv gidans Zeova dan sa bann domenn, nou pou ganny bann byenfe. (Izai 48:17, 18; 1 Tim. 6:9, 10) Nou kapab asire ki Zeova pou kontinyen servi bann imen pour donn gidans son pep pandan gran ladetres e pandan Renny Mil an Kris. Eski nou pou kontinyen swiv gidans Zeova? I pou pli fasil pour nou fer sa si nou swiv gidans Zeova la konmela. Alor annou toultan swiv gidans Zeova ki enkli gidans ki nou gannyen avek bann zonm ki Zeova in apwente pour vey lo nou. (Iza. 32:1, 2; Ebr. 13:17) Anmezir nou fer sa, nou annan bon rezon pour annan konfyans dan nou Gid, Zeova parski Zeova pe diriz nou lwen avek okenn keksoz ki kapab gat nou lanmitye avek li e i pe gid nou ver lavi eternel dan nouvo lemonn. w24.02 25 ¶17-18

Zapot Pol ti kontan son servis pour Zeova me i pa ti toultan fasil pour li. Souvandfwa Pol ti vwayaz bann gran zistans e sa letan, i pa ti fasil pour vwayaze. Parfwa dan son bann vwayaz, i ti fer fas avek “danze kot bann larivyer” e “danze akoz voler.” I ti osi ganny bate avek bann ki ti opoz li. (2 Kor. 11:23-27) Osi, bann frer ek ser dan kongregasyon pa ti toultan demontre lapresyasyon pour bann keksoz ki i ti fer pour ed zot. (2 Kor. 10:10; Fili. 4:15) Kwa ki ti ed Pol pour kontinyen servi Zeova? Atraver Lekritir e atraver son prop leksperyans, Pol ti aprann en kantite konsernan personnalite Zeova e sa ti fer li asire ki Zeova i kontan li. (Rom. 8:38, 39; Efe. 2:4, 5) I ti aprann pour kontan Zeova en kantite. Pol ti montre ki i kontan Zeova “par servi e kontinyen servi bann sen.”—Ebr. 6:10. w23.07 9 ¶5-6

En kantite dimoun i dakor ki nou bezwen bann gouvernman e ki nou devret obei serten lalwa ki sa “bann lotorite” i met an plas. Me sa bann menm dimoun i kapab ezite pour obei en lalwa ki paret enzis oubyen ki zot pa dakor avek. Labib i dir ki bann gouvernman imen i fer dimoun soufer, ki zot ganny kontrole par Satan e ki byento zot pou ganny detrir. (Ps. 110:5, 6; Ekle. 8:9; Lik 4:5, 6) Labib i osi dir ki “sa ki opoz lotorite i al kont laranzman Bondye.” Pour le moman, Zeova in permet bann gouvernman pour dirize. Pour ki i annan lord dan lemonn, i ekspekte ki nou obei sa bann gouvernman. Alor, nou bezwen “donn zot sa ki zot demande,” sa i enkli taks, respe ek lobeisans. (Rom. 13:1-7) Petet nou kapab krwar ki en lalwa i fer nou lavi difisil, i enzis oubyen i kout nou pour obei. Me nou obei Zeova e Zeova i demann nou pour obei sa bann lotorite tan ki zot pa demann nou pour dezobei son bann lord.—Akt 5:29. w23.10 8 ¶9-10

Ler Sanmson ti ne, bann Filisten ki ti pe diriz Izrael e bann Filisten ti domin lo zot. (Ziz 13:1) Bann Izraelit ti soufer en kantite parski bann Filisten ti vreman kriyel. Zeova ti swazir Sanmson pour “sov Izrael dan lanmen bann Filisten.” (Ziz 13:5) Pour Sanmson kapab sov bann Izraelit, i ti pou bezwen depan lo Zeova. En fwa, en larme Filisten ti vin Lei pour atrap Sanmson. I tre probab ki Lei ti dan lavil Zida. Bann zonm Zida ti per. Alor zot ti deside pour tyonbo Sanmson e donn li avek bann Filisten. Sa bann zonm ki ti sorti dan menm nasyon avek Sanmson, ti anmar Sanmson avek de lakord nef e anmenn li kot bann Filisten. (Ziz 15:9-13) Me Sanmson “ti ganny lafors atraver lespri sen Zeova” e i ti kapab sorti dan sa bann lakord. Apre i “ti trouv lanmaswar en mal bourik ki ti’n fek ganny touye” e i ti servi sa lanmaswar pour touy 1,000 zonm Filisten!—Ziz 15:14-16. w23.09 2 ¶3-4

Dan Labib Zeova in ptitapti revel son “lavolonte eternel”. En fason ou en lot, Zeova i toultan reisi parski i’n fer fason pour ki “tou keksoz i ede realiz son plan.” (Prov. 16:4) Alor sa ki Zeova i fer pour dire pour touzour. Me ki plan Zeova e ki azisteman Zeova in fer pour akonpli son plan? Bondye ti koz avek bann premye imen konsernan son plan, setadir sa ki i ti anvi pour zot. I ti anvi ki zot “fer zanfan e vin bokou, ranpli later e pran swen avek li. Zot [ti] pou domin lo . . . tou zannimo lo later.” (Zen. 1:28) Ler Adan ek Ev ti rebel, sa ti fer ki pese ti antre dan lemonn me sa pa ti pou anpes Zeova akonpli son plan. O kontrer, i ti aziste lafason ki i ti pou akonpli son plan. Deswit, Zeova ti deside pour etabli en Rwayonm dan lesyel ki pou akonpli son plan, setadir sa ki i ti anvi pour bann imen e pour later depi o konmansman.—Mat. 25:34. w23.10 19-20 ¶6-7

Zeova i kapab ed nou pour persevere setadir pour kontinyen servi li. I kapab ki i pa toultan fasil pour kontinyen servi Zeova sirtou si nou pe lager avek menm febles pandan bokou letan. Parfwa, nou bann febles i kapab paret pli difisil ki bann febles ki zapot Pyer ti fer fas avek. Me Zeova i kapab donn nou sa lafors ki nou bezwen pour nou pa abandonnen. (Ps. 94:18, 19) Par egzanp, en frer ti fer bann aksyon omoseksyel pour plizyer lannen avan i aprann laverite. I ti deside pour sanz son fason viv e apre viv parey Labib i dir nou devret viv. Me kantmenm sa, parfwa i ti lager avek bann move dezir. Kwa ki ti ed li pour persevere? I dir: “Zeova i donn nou lafors.” I osi dir: “Atraver lespri sen Zeova . . . , mon’n aprann ki i posib pour [kontinyen] viv dan sa fason ki Zeova i anvi nou viv . . . Zeova in kapab servi mwan e malgre mon febles, Zeova i kontinyen donn mwan lafors.” w23.09 23 ¶12

Zenn frer, ou pou bezwen fer zefor pour vin en frer matir parski sa pa pou vin otomatikman. Ou bezwen swazir bann bon legzanp ki ou kapab swiv, devlop abilite pour reflesi, vin en dimoun ki diny konfyans, devlop bann abilite ki itil e prepar ou pour bann responsabilite ki ou kapab annan dan lavenir. Ler ou mazin bann sanzman ki ou bezwen fer, i kapab ki ou santi ki i tro difisil pour fer. Me ou kapab fer sa bann sanzman. Rapel ki Zeova i vreman anvi ed ou. (Iza. 41:10, 13) Ou kapab asire ki ou bann frer ek ser dan kongregasyon pou osi ed ou. Ler ou vin en Kretyen matir, ou pou ere. Zenn frer, nou kontan ou! Ki Zeova i beni ou anmezir ki ou fer zefor la konmela pour vin en frer matir. w23.12 29 ¶19-20

Meton ou dan en rankont avek lezot frer ek ser. Ou pe pas en bon letan e ou tir en portre tou dimoun ansanm. Anfet, ou tir de lezot portre an ka sa premye portre pa zoli. Aprezan ou annan trwa portre me dan enn sa portre, ou remarke ki en frer i annan en lanmin lo son figir. Alor ou delete sa portre parski ou annan de lezot portre kot tou dimoun enkli sa frer pe sourir. Normalman, nou annan bann bon souvenir konsernan bann moman ki nou’n pase avek nou bann frer ek ser. Me petet dan enn sa bann moman, en frer oubyen en ser i dir ouswa fer en keksoz ki bles ou santiman. Ki ou devret fer avek sa souvenir? Ou devret esey oubliy sa souvenir zis parey ou ti pou delete enn sa bann portre. (Efe. 4:32) Nou kapab fer sa parski nou annan en kantite souvenir bann bon moman ki nou’n pase avek sa frer oubyen sa ser. Sa i sa bann kalite souvenir ki presye e ki nou anvi garde. w23.11 12-13 ¶16-17

Bann mo Grek ki Pol ti servi i montre ki en madanm i devret toultan sanz dan en fason apropriye e ki son fason sanze i devret montre ki i’n pran kont santiman ek lopinyon lezot. Nou vreman apresye nou bann ser matir ki sanz dan en fason modes. En lot kalite ki en ser i bezwen annan pour li kapab vin matir i disernman. Kisisa disernman? En dimoun ki annan disernman i annan sa abilite pour konnen kwa ki byen e kwa ki mal e apre i swazir pour fer sa ki byen. Mazin legzanp Abigel. Son msye ti fer en move desizyon ki ti pou anmenn maler pour tou dimoun dan son lakaz. Me Abigel ti azir vitman. I ti annan disernman e akoz sa, i ti sov lavi bann dimoun dan son lakaz. (1 Sam. 25:14-23, 32-35) Ler nou annan disernman, sa pou ed nou pour konnen kan pour koze e kan pour reste trankil. Sa kalite pou osi ed nou pour demontre lentere dan lezot san ki nou fer zot enkonfortab.—1 Tesa. 4:11. w23.12 20 ¶8-9

Zapot Pol ti ekri sa bann parol pour kongregasyon Ronm. Bann frer ek ser dan sa kongregasyon ti’n aprann konsernan Zeova ek Zezi, zot ti’n demontre lafwa e zot ti’n vin bann Kretyen. Sa ti fer ki Bondye ti konsider zot “konman drwat akoz [zot] lafwa” e i ti swazir zot avek son lespri sen. (Rom. 5:1) Alor, zot ti kapab annan en lespwar merveye e zot ti asire ki zot ti pou ganny sa ki zot ti pe espere. Pli tar, Pol ti ekri bann Kretyen swazir dan lavil Efez konsernan sa lespwar ki zot in gannyen. Zot ti pou ganny en “leritaz glorye ki [Bondye in] anmase pour bann sen.” (Efe. 1:18) Pol ti osi dir bann Kolosyen kote zot ti pou ganny zot rekonpans. I ti dir: “Sa lespwar ki’n ganny rezerve pour zot dan lesyel.” (Kol. 1:4, 5) Alor, sa lespwar ki bann Kretyen swazir i annan, i pour zot ganny resisite pour al viv dan lesyel pour touzour kot zot pou dirize ansanm avek Kris.—1 Tesa. 4:13-17; Rev. 20:6. w23.12 9 ¶4-5

Sa mo orizinal ki’n ganny tradwir konman “protez,” ti en lekspresyon ki dekri en solda ki vey en lavil kont okenn latak. Bann dimoun dan lavil kot i annan bann solda pe veye, i santi zot an sekirite parski zot konnen ki i annan solda kot baro. Pareyman, ler lape Bondye i protez nou leker ek lespri, nou santi nou kalm parski nou konnen ki nou an sekirite. (Ps. 4:8) Parey Ana, menm si nou sityasyon pa sanze deswit, nou kapab santi nou kalm. (1 Sam. 1:16-18) Ler nou santi nou kalm, souvan nou pli kapab reflesir byen e fer bann desizyon ki saz. Ki nou kapab fer? Ler nou fer fas avek difikilte, nou kapab demann Zeova pour protez nou. Ki mannyer? Priye ziska ki ou ganny lape Bondye. (Lik 11:9; 1 Tesa. 5:17) Si ou dan en sityasyon difisil, kontinyen sipliy Zeova dan lapriyer e ou pou santi lape Bondye pe protez ou leker ek lespri.—Rom. 12:12. w24.01 21 ¶5-6

Pour Zezi kapab sanktifye non son Papa, i ti andir tou sort kalite soufrans, lensilt ek fo lakizasyon. I ti konnen ki i’n obei son Papa dan tou keksoz e ki i ti napa nanryen pour li onte. (Ebr. 12:2) I ti osi konnen ki pandan sa bann moman difisil, Satan ti pe atak li direkteman. (Lik 22:2-4; 23:33, 34) Satan ti krwar ki i ti pou kapab fer Zezi aret fidel avek Zeova me i pa ti reisi. Zezi ti montre klerman ki Satan i en manter e ki Zeova i annan bann serviter ki reste fidel anver li menm ler zot pas dan bann sityasyon vreman difisil. Eski ou anvi fer ou Lerwa ki pe dirize dan lesyel plezir? Kontinyen loue non Zeova par ed lezot pour aprann konsernan bann kalite merveye ki Bondye i annan. Ler ou fer sa, ou pe swiv legzanp Zezi. (1 Pyer 2:21) Parey Zezi, ou pe fer Zeova kontan e ou pe montre ki Son lennmi Satan i en manter. w24.02 11-12 ¶11-13

Pandan sa dernyen senk an, plis ki en milyon dimoun in batize e vin en Temwen Zeova. Ler ou dedye ou lavi avek Zeova, ou swazir pour vin en disip Zezi Kri e ou fer lavolonte Bondye vin sa keksoz pli enportan dan ou lavi. Ler ou dedye ou lavi avek Zeova, ki sa i enplike? Zezi ti dir: “Si en dimoun i oule swiv mwan, fodre i aret viv zis pour li menm.” (Mat. 16:24) Sa term Grek ki’n ganny tradwir “fodre i aret viv zis pour li menm” i osi kapab ganny tradwir “dir non avek son lekor.” Konman en dimoun ki’n dedye ou lavi avek Zeova, ou pou bezwen rezet okenn keksoz ki pa fer plezir Zeova. (2 Kor. 5:14, 15) Sa i enkli rezet “bann move kondwit lekor enparfe,” parey imoralite seksyel. (Gal. 5:19-21; 1 Kor. 6:18) Eski ler ou obei sa bann lord sa i fer ou lavi difisil? Si ou kontan Zeova e ou asire ki son bann lalwa i pour ou prop dibyen, ou pa pou vwar ou lavi difisil.—Ps. 119:97; Iza. 48:17, 18. w24.03 2 ¶1; 3 ¶4

Zeova i donn son lespri sen avek bann ki annan son laprouvasyon. (Mat. 12:18) Reflesir lo sa kestyon, ‘Eski mon demontre serten kalite ki form parti fri lespri sen?’ Eski konmela ou annan plis pasyans avek lezot ki avan ou ti konn Zeova? Pli ou devlop bann zoli kalite ki form parti fri lespri sen Bondye, pli ou pou asire ki ou annan laprouvasyon Zeova. Zeova i aplik valer sa ranson avek bann ki annan son laprouvasyon. (1 Tim. 2:5, 6) Me ki nou kapab fer si nou ankor santi ki nou napa laprouvasyon Zeova menm si nou annan lafwa dan sa ranson e nou’n batize? Rapel ki nou pa kapab annan konfyans dan nou prop santiman me nou kapab annan konfyans dan Zeova. Zeova i konsider bann ki annan lafwa dan sa ranson konman bann dimoun drwat e i promet ki i pou beni zot.—Ps. 5:12; Rom. 3:26. w24.03 30 ¶15; 31 ¶17