Fodre vwar pour krwar

“En agnostic i en dimoun ki panse ki i enposib pour konn laverite lo Bondye ek lo lavenir ki bann Kretyen e lezot larelizyon i konsernen avek. Oubyen si i posib, pour le moman i enposib.”—Filozof Bertrand Russel, 1953.

SA ZONM ki ti envant sa term “agnostic” ti en syantis ki ti fer letid lo zannimo ki ti apel Thomas Huxley. Huxley ti ne an 1825, i ti viv dan menn letan avek Charles Darwin e i ti osi dakor avek sa lansennyman lo evolisyon. An 1863, Huxley ti ekrir ki i pa vwar okenn levidans ki montre ki i annan en Bondye ki “kontan e enterese avek nou parey bann Kretyen i dir.”

Bokou ozordi i kapab dakor avek lopinyon sa bann zonm an dizan ki zot pou krwar zis dan sa ki zot vwar. Zot kapab dir ki i bet pour krwar dan en dimoun ouswa en keksoz ki napa laprev ki i egziste.

Eski Labib i dir ki nou devret krwar dan Bondye san ki i annan okenn levidans ki i egziste? I tou le kontrer. Labib i dir ki i bet pour krwar dan en keksoz ki napa levidans ki i egziste. Labib i dir: “Sa ki napa leksperyans i met lafwa dan tou parol, me sa enn ki malen i egzamin son lepa.”—Proverb 14:15.

Alors, ki nou pou dir lo krwayans dan Bondye? Eski i annan okenn levidans ki montre ki Bondye i egziste? Eski i kontan e enterese avek nou?

Bann kalite Bondye i ganny revele

Pandan ki i ti pe koz avek en group dimoun byen edike Atenn, Pol en ekriven Labib ti dir ki Bondye i’n “fer lemonn e tou sa ki ladan.” Pol ti dir son lodyans ki ti annan bann dout ki Bondye i enterese avek bann imen e ki anfet, “i pa lwen avek sakenn parmi nou.”—Akt 17:24-27.

Akoz Pol ti konvenki ki Bondye i egziste e i enterese avek imen ki enn Son kreasyon? Pol ti revel en rezon pour sa kan i ti ekrir son bann frer ek ser Kretyen dan lavil Ronm. I ti dir sa lo Bondye: “Depi ki Bondye in kre lemonn son bann kalite envizib, . . . in ganny revele par bann keksoz ki in fer.”—Romen 1:20.

Bann lartik ki swiv pou egzamin trwa kalite Bondye ki klerman ganny idantifye dan bann keksoz ki i’n kree. Pandan ki ou egzamin sa bann legzanp, demann ou lekor, ‘Kan mon aprann bann kalite Bondye, ki lefe sa i annan lo mwan?’

[Not adisyonnel]

Labib pa siport sa lide ki nou devret krwar dan Bondye san annan okenn laprev