Lasazes Bondye i evidan dan lanatir
“I sa Enn ki ansenny nou plis ki bann bebet lo later, e i fer nou menm pli saz ki bann kreatir ki anvole dan lesyel.”—Zob 35:11.
ZWAZO i annan bann abilite merveye. Bann dimoun ki desin plan avyon i kontan admir lafason ki en zwazo i anvole san ki i bezwen fer okenn gran zefor. Serten lespes zwazo i kapab anvol pour plizyer milye kilomet atraver losean e ariv egzakteman dan sa landrwa kot zot ti pe ale.
En lot abilite remarkab ki zwazo i annan e ki revel lasazes zot Kreater, i sa abilite pour kominike par bann son ek sanson. Egzamin serten legzanp.
Zwazo i kominike
Serten lespes zwazo i konmans kominike menm avan ki zot eklo. En femel kay par egzanp i ponn ziska wit dizef, e sa i en dizef par zour. Si tou dizef ti devlop an menm tan, zot ti pou eklo pandan wit zour. E la sa manman ti pou kapab ganny difikilte pour pran swen avek bann ki’n fini eklo e an menm tan sof sa ki pa ankor eklo. Me o kontrer, tou le wit pti kay pour eklo pandan en lespas sis erdtan. Ki mannyer sa i posib? Dapre bann serser, en rezon prensipal pour sa i ki anbriyon kay i kominik avek kanmarad depi ki zot ankor dan dizef e dan en kek fason zot aranze pour ki zot eklo preski an menm tan.
Normalman bann mal zwazo ki sante e zot fer sa kan zot in ariv zot staz matirite. Zot plizoumwen sante kan zot an sezon pour atrakte femel ouswa pour mark zot teritwar. Dan sa plis ki milye lespes zwazo, sak lespes i annan zot langaz e sa i ede pour ki bann femel i kapab idantifye en partner ki menm lespes avek li.
Zwazo i kontan sant dan granmaten ouswa ler soley pe kouse e sa i pour en bon rezon. Pandan sa moman i annan mwens divan ek lezot tapaz. Bann serser in dekouver ki ou kapab tann sanson bann zwazo 20 fwa pli byen dan bomaten ek aswar ki pandan lazournen.
Menm si mal ki plizoumwen bann santer, tou le de, mal konman femel i fer bann pti tapaz ouswa son ki annan diferan sinifikasyon. En kalite zwazo ki apel Chaffinches par egzanp i annan apepre nef diferan kalite son. Si i annan danze en predater ki pe anvole dan lezer, zot fer en kalite son pour avertir lezot. Me zot fer en lot kalite son si i annan danze ki pe aprose ater.
En abilite siperyer
Sa lasazes ki Zeova in donn bann zwazo i vreman enpresyonan. Me abilite ki imen i annan pour kominike i vreman pli enpresyonan. Zob 35:11 i dir ki Bondye in fer zonm “pli saz ki bann kreatir ki anvole dan lesyel.” Zis imen ki annan sa abilite pour transmet bann nide oubyen panse konplike par son ki zot lakord vokal i fer ouswa par zes.
Kontrerman avek lezot kreatir, bann pti baba i ne avek sa abilite pour aprann bann langaz konplike. Zournal American Scientist lo Internet i dir: “Bann pti zanfan i kapab aprann en langaz menm si zot paran pa koz avek zot direkteman. Bann zanfan sourd i kapab menm envant zot prop langaz siny si zot pa’n ganny montre pour fer siny kot zot.”
Sa abilite ki nou annan pour kominik sa ki nou panse e sa ki nou santi atraver parol ouswa siny, i en kado merveye sorti kot Bondye. Parkont, sa pli meyer kado ki nou’n gannyen avek Bondye i sa abilite pour koz avek li par lapriyer. Anfet, Zeova i envit nou pour koz avek li. Parol Bondye, Labib i dir: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan.”—Filipyen 4:6.
Zeova i anvi ki nou diriz nou latansyon ver sa lasazes ki annan dan Labib kan nou annan bann desizyon difisil pour fer. I pou osi ed nou aprann konman pour aplik sa bann konsey ki ladan. En ekriven Labib ki apel Zak ti dir: “Si i annan parmi zot ki mank lasazes, ki i demann Bondye e Bondye a donn li parski i donn tou dimoun zenerezman san fer okenn repros.”—Zak 1:5
Ki lefe i annan lo ou?
Apre ki ou’n ekout sa zoli melodi ki en zwazo i sante ouswa en zanfan ki pe esey dir son premye mo, ki lefe sa i annan lo ou? Eski ou rekonnet lasazes Bondye dan bann keksoz ki i’n fer?
Apre ki i ti’n medit lo lafason ki i ti’n ganny kree, psalmis David ti ganny pouse pour dir: “Mon pou loue ou parski mon’n ganny fer dan en fason merveye, e sa i fer mwan annan lakrent pour ou. Sa ki ou’n fer i merveye, e mon konn sa byen.” (Psonm 139:14) Pandan ki ou egzamin lasazes Bondye ki evidan dan kreasyon avek bokou lapresyasyon, ou lafwa dan son abilite pour donn ou bann bon gidans pou sirman agrandi.
[Not adisyonnel]
Sa abilite pour kominike i en kado sorti kot Bondye